Matewuji 8 - Mazu Otchena a Mulungu

Yesu ohonvulumutcha maliba maranya

¹ Evale Yesu agatitile mwangoni ule, mwindji wa atu ohokala a masika komuharaga.

² Mwa enne ohokala maliba maranya mmohi afiyilege vamentoni va Yesu, liye mukokorela eraga: <<Nabwiya, mwafuna dera mudivulumutche.>>

³ Evale Yesu ohotapulaga ndanda naye, musakwinya mulombwana wa maranya ule eraga: <<Miyo dihifuna ira weyo ukale pama!>> Agawongile mazu anne, tempu imohive mutule ohovulumuwaga, liye kala pama zela maranya anna liye.

⁴ Noira enne, Yesu ohomuwandelaga eraga: <<Wadowa kuwonge na atu amohiwa zela yenno iireyile eva. So mbwenye udowe wanvepe namakuta ira auing'ane. Wamala eno, udowe wavelele yovelela yenno Mozeji yawongile liye para mutu wenno unavulumuwe urenda wa maranya. Udowe wairena eno ira ikale umboni ira weyo uhuvulumuwa.>>

Yesu ohonvulumutcha namalaba wa mundimuwa wa anyakondo

⁵ Yesu avolowaga sidadi ya Kafaranamu, ohozaga musogolrelri mmohi wa anyakondo 100, liye nvepa eraga:

⁶ <<Mbwiyeni miyo vande vaga dihinkana namalabaga uli murenda. Liye kanawanda rungunuwa vanipawuni vili liye. Eto jopa jinna liye kahi jing'ono.>>

⁷ Yesu agavwile mazwale, ohoira: <<Tabo, ndoweni vande vawo, danvulumutche murendoyo.>>

⁸ Mbwenye musogolrelri ule ohomuwongana Yesu ira: <<Mbwiyeni, miyo kadili mutu ofwanela ira nyo mufiye vande vaga. Mbwenye dihiiziwa ira nyo mwawonga bahi, mwera: <Mutule avulumuwe>, namalabagole unovulumuwa.

⁹ Mwasiwa na miyene dihikana andimuwa anaditonga. Eto miyo dihikana anyakondo nnaatonga miyo. Miyo damuwongana mmohi ira: <Udowe wa Udje>, liye unodowa. Eto damuwongana mmohiwa ira: <Kaza uno>, liye unoza. Eto damuwongana namalaba waga ira: <Kadowa wahinde mabasa ala>, liye unoirana. Na nyenne, mwawonga bahi, liye unovulumuwa.>>

¹⁰ Yesu agavwile yowakula ya ndimuwole, ohotikiniheyaga valukulu, liye awongana atu kamuharagale eraga: <<Na ibaribari nnouwandelani ira mwa aIzarayeli atene, miyo kannangumanena mutu okana nroromelo nnga mutula.

¹¹ Nnouwandelani ira atu adjindji anoza kakumelege makumelo wa nzuwa fiyeda mavirelo wa nzuwa ira kadowe kadje vameza vamohi na Abarahamu na Izaki na Jako muwari mwa Umwene wa zulu.

¹² Eto ale kafuna kakale ahima a muUmweneni mule, anoza kavokediwe unde wewo uli isi yohokala ya masika. Wewule unoza ukale nla no takuna meno.>>

¹³ Noira enne, Yesu ohomugunya ndimuwole ira: <<Tiyege. Jatene jene jinokwakwanela nnga mwadiroromele we.>> Nowonga eno, namalabole ohovulumuwa, ora imohive yawonga Yesu.

Yesu ohavulumutcha arenda adjindji

¹⁴ Noira enne, Yesu ohodowaga vande va Peduru. Agadowile, anfwanyilege Peduru mbogohaye ogonatene, aganna febiri.

¹⁵ Evale Yesu ohomuhindaga ndanda naye. Agamuhindile, febiri yanna liye yohomala, liye roma asakanyela jodja.

¹⁶ Nzuwa nagavirile, itchiguwo tchiguwo atu kohoromaga azana atu oindjiva kazuzumihiwa na minemba dabure. Evale Yesu ohoromaga tamangiha minemba dabure eto ohovulumutcha maurenda matene mowonga bahi.

¹⁷ Yesu ohoirana jatene jeji ira jiwande kwakwaneliheda nnga mwemo mwawongele namafiyiheda Izaiya ira: <<Liye ohotukula makatamiho ehu eto ohotukula maurenda ehu.>>

Muselu wa atu amohiwa kafuna muhara Yesu

¹⁸ Evale Yesu agaonne mwindji wa atu kazaga vali liye vale, oharumaga anamamuharaye ira: <<Ndoweni nimaruweni ira niyeni kombela ya ule ya ntiya.>>

¹⁹ Kahanamaruwe, ohokalagavo namafundjiha malamulo mmohi azilege wa Yesu, liye kwi: <<Namafundjiha, miyo nnerege uharani watene munayege nyo!>>

²⁰ Evale Yesu ohomuwakulaga, liye ira: <<Anambwa a mukokolani kohokana miliha nnakala atu eto mbalrame dovava zulu dihikana jitundji jiwa. Mbwenye Mwana wa Mutu kanna vosameliha muru waye.>>

²¹ Eto mutu mmohi afwanyeya muwari mwa anamamuharaye ale ohowongaga eraga: <<Nabwiya, miyo dera mudirumelihe dibabihe dowa damukoye babaga, amala duharegeni!>>

²² Yesu mbwenye ohomuwakulaga eraga: <<Kadiharege miyo! Waahiye aliba kwa kakoyanege aliba kwave!>>

Yesu ohomiyaliha nipevo nlukulu

²³ Noira enne, Yesu ohogwelaga mmwadeyani eto anamamuharaye kohodowaga vamohi na liye.

²⁴ Mwa enne kagali mmwadeyani mule kadowaga, nohooneyaga nipevo nohokala na masika. Evale mahindje omanganyeya kohoroma volowa mmwadeyani mule. Mbwenye Yesu eraga gona.

²⁵ Mwa enne anamamuharaye kohonvenyiha keraga: <<Nivulumutcheni Nabwiya, nnokwa na mahindje!>>

²⁶ Evale liye ohawakulaga eraga: <<Nyo atu oyeva nroromelo nyo, kodi munaovela nni?>> Noira enne, Yesu ohovenyaga, roma sumulula nipevo vamohi na mahindje omanganyeya ale. Evale nipevo nohomiyalaga, jatene aliwa kala pama.

²⁷ Evale aliwa kohotikiniheyaga kawongaga keraga: <<Kodi wenna bani unafiyeda ante nipevo na mahindje nvwelelaga?>>

Yesu ohavulumutcha alombwana ambinli ozuzumihiwa na minemba dabure

²⁸ Evale aliwa kagafiyile kombela ya ule, ilambo ya akuda Gadara, kohozaga alombwana ambinli okana minemba dabure, kakumelaga masiye. Aliwa kali atu owopihetchetcha, fiyeda ira ndila yenno yakala atu, kaliwo awanda virawo.

²⁹ Evale aliwa kagamuonne Yesu, kohokuwaga keraga: <<Kodi munafuna munikayena ani, nyo Mwana Mulugu? Kodi mwazela ira munionihe goyi tempuwa yahanafiye?>>

³⁰ Eto wandamelana valigi atu vale vohokalaga nikuru na nguluwe dohokala da masika deraga dja.

³¹ Evale minemba dabure dile dohonvepaga Yesu ira: <<Akala munafuna munitamangihe mwa atwala, nnouvepani ira munirumelihe nidowe navolowe munguluweni mule.>>

³² Evale Yesu ohowakulaga eraga: <<Kadowani.>> Mwa enne minemba dile dagakumile mwa atwale, dohovolowaga munguluweni mule. Noira enne, nguluwe datene edile dohotitelaga vodiha, aliwa dowa morela mbara, kwela emule.

³³ Nguluwe dile dohokagana anamakumbuza kadjihaga. Evale aliwa kagaonne jairilege nguluwe diwa dile, kohotawaga. Kagafiyile musidadi mule, kohoromaga wongamo jatene ejile makamaka jejo jaaireyele alombwana a minemba dabure ale.

³⁴ Mwa enne atu atene a musidadi mule kagavwile enne, kohomaruwaga, aliwa dowaga wewo wafwanyeya Yesu ira kagumane na liye. Evale aliwa kagamuonne, kohonvepaga ira akumemo mwilamboni mwiwa.