Matewuji 7 - Mazu Otchena a Mulungu

Zela muselu oatonga afwawo

¹ <<Kamutongege tawiha ira na nyenne munaze mutongiwe.

² Mwasiwa makalelo anafuna nyo atongana afwinyu, ba makalelo anafuna nyo za tongiwana. Eto mpimo wenno munaapimelana nyo afwinyu, Mulugu unaza aupimelenani mpimo mmohive wenno.

³ Kodi mwasiwa gwa nni we wandaga ona ikata inafwanyeya mwintoni mwa mbalawo eto we hawandaga ona mungulru unafwanyeya mwintoni mwawo?

⁴ Owu hehi weyo unawanda wonga avi na mbalawo ira: <Kadihiye dikumihemo ikata inafwanyeya mwintoni mwawo!>, agali na wenne eto uhukana mungulru unafwanyeya mwintoni mwawo?

⁵ We ngongomwa we! Inafwanela ubabihe kumihamo mungulru unafwanyeya mwintoni mwawo. Waira eno mbwenye unowanda ona pama ikata inafwanyeya mwintoni mwa mbalawo ira ukumihemo.

⁶ <<Kamwaavahege jengo jotchena anambwa. Mwasiwa mwaavaha aliwa anourungunuwelani ira kaulumeni. Eto nne kamuvahege nguluwe jengo jenyu jofuneyetchetcha, mwasiwa mwavaha, nnomala nyingalela.

Mulugu unavaha jengo japama

⁷ <<Muvepe. Mwaira eno munovahiwa. Muvende. Mwaira eno munofwanya. Mugogode musuwo. Mwaira eno munohuleliwa.

⁸ Tchoira mutu uli watene unavepa, unovahiwa. Eto mutu wenne unavenda, unofwanya eto ule unagogoda, unohuleliwa.

⁹ Owu hehi, kodi muwari mwa nyo mulombwana guvi uni mwanaye aganvepile pawu, liye atukula nibwe anvaha?

¹⁰ Owu hehi, mulombwana guvi uni mwanaye aganvepile somba, liye atukula nyowa anvaha?

¹¹ Akala nyo mwagalive atu abure muhuiziwa avaha ahiminyu jengo japama, nnga ikalele Babinyu uli zulu avi? Kodi liye kanawanda avaha jengo japama atu anne ananvepa? Na ibaribari unoavaha na makalelo okwaranya.

¹² <<Nona inafwanela mwaairelege afwinyu jengo jatene jejo jinafuna nyo nnga aliwa kauireleni nyo. Tchoira tchenna inakokomeziwa muwari mwa malamulo matene na mazu matene kawongile anamafiyiheda.

Ndila mbinli

¹³ <<Inafwanela muvolowele mulango opurana. Mwasiwa mulango mulukulu na ndila yohorutcha jinamudowiha mutu wewo unafwanyeya tolotchiwa. Eto anahara ndila yenno kahi ang'ono.

¹⁴ Mbwenye mulango opurana na ndila yorutcha jinaadowiha atu ingumini. Eto atu anafwanya ndila yenno ba a vang'ono.

Zela anamafiyiheda onama

¹⁵ <<Polre polre zela anamafiyiheda onama. Aliwa anoza wa nyo kagawarile matembe a mabila, mbwenye muwari muwa anafwanyeya kagali anambwa a mukokolani otolotcha.

¹⁶ Nyo mbwenye munowanda aiziwa anamafiyiheda onama mwa misapo diwa. Tchoira kalivo unadowa mmutengoni mwa minga, ahatchamo magiyawu. Eto kavili jowandeya hatcha mangu vamuratchini va ulrilri.

¹⁷ So mbwenye mutengo watene unna ingumi yapama unavaha misapo dapama. Eto mutengo obulela unavaha misapo dabure.

¹⁸ Mutengo wapama kaza avaha misapo dabure. Nne mutengo obulela kaza avaha misapo dapama.

¹⁹ Eto mutengo uli watene ahanavaha misapo dapama, unogwadiwa, dowa tatileliwa munloni.

²⁰ Na mwasa wenno nyo munowanda aiziwa anamafiyiheda onama mwa misapo diwa.

Zela atu anne anafuna volowa Umwene wa zulu

²¹ <<Kahi atene anadiitana keraga: <Nabwiya, Nabwiya!>, anafuna za volowa muwari mwa Umwene wa zulu. Mbwenye unafuna volowa gwenno unairana funa wa Baba uli zulu.

²² Siku neno nafiya, atu adjindji anoza kawongege kerege: <Nabwiya, Nabwiya, kahi hiyene nafiyihedetcha mazwinyu mwa nzina nenyu? Eto kahi hiyene natamangiha minemba dabure mwa nzina nenyu? Eto kahi hiyene nairetchana jotikiniha jidjindji mwa nzina nenyu?>

²³ Miyo mbwenye nnoza daawakule ira: <Miyo kannababihege uiziwani! Kakumanivo vamentoni vaga, nyo atu oirana jabure!>

Yofwalrafwaniha ya mutu ovwa na mutu ohovwa mazu a Yesu

²⁴ <<Mutu wenno unavwa mazwaga anawonga miyo ala, amala airagana, liye unalingana na mulombwana mmohi wa zelru wenno amangile nyumba vazulu va nibwe.

²⁵ Agamanle manga nyumbaye ile, ohozaga muzongwe na mahindje otamanga ohokala a masika. Eto nipevo novandaga nyumbele, mbwenye nyumbele tchagwilege. Mwasiwa nyumbele yaimetchiwe vazulu va nibwe.

²⁶ Mbwenye mutu uli watene unavwa mazwaga anawonga miyo ala eto ahairagana, unalingana na mulombwana mmohiwa ovuta wenno aromile manga nyumbaye vamisevani vene.

²⁷ Agamanle manga nyumbaye ile, ohozaga muzongwe na mahindje otamanga ohokala a masika. Eto nipevo novandaga nyumbele. Voira nyumbele yamangiwe vamisevani vene, yohofiyeda gwa yatene na makalelo ohokala a masika.>>

Atu kohotikina utongi wanna Yesu

²⁸ Evale Yesu agamanle wonga jowonga jejile, mwindji wa atu kafwanyeyaga vevale kohoromaga tikiniheya zela jofundjiha jaye.

²⁹ Mwasiwa liye afundjiha nnga mutu okana utongi, hiya fundjiha nnga anamafundjiha malamulo kaawendana atu.