Matewuji 6 - Mazu Otchena a Mulungu

Makalelo ovaha mivaho

¹ <<Inafwanela muing'ane pama zela makalelo anafuna nyo hinda mabasa a Mulugu. Kamuiregena japama vatando mofuna ira atu kauteteleni. Mwairana eno, kamunna yotambilra yokumela wa Babinyu zulu.

² Nona, nyo mwafunaga nvaha yengo mutu osimela, kamulaleyege mundila nnga vini angongomwa. Aliwa kakala munyumbani dofundjamo mazu nari mundila, anolaleya joira jewa japama ira katitimihiwege na atu. Na ibaribari nnouwandelani ira aliwa kohomala watchela yotambilra yewa.

³ <<Zela nyo mbwenye, mwafunaga nvaha yengo mutu osimela, kammuonihe muwono wenyu oromana mabasa munalaba nyo na muwono wenyu odjana.

⁴ Muiregena eno ira jovaha jenyu jikale jokoyeya. Mwaira eno Babinyu wenno unaona jinaireya mokoyeya, liye gunautambilrihani.

Ibaribari zela muselu olobela

⁵ <<Eto mwalobelaga kamukale nnga angongomwa jinera atu. Tchoira aliwa kafunaga lobela, anoziveliwa lobela oimelene munyumbani dofundjamo mazu, nari mmakakanoni mwa marampa ira kaoniwege na atu. Na ibaribari nnouwandelani ira aliwa kohomala watchela yotambilra yewa.

⁶ Nyo mbwenye ifwanele mutu afunaga lobela, avolowe mmba, afunge musuwo, anvepe Babinyu wenno ahanaoneya. Evale Babinyu wenno unaona jokoyeya jatene gunafuna mutambilriha.

⁷ <<Eto mwalobelaga, kamuwelelege wonga yengo imohive fendo didjindji dene nnga vini atu a unde, moumbuwela ira jovepa jiwa jinovweya na mwasa olapiha lobela.

⁸ Kamukale nnga aliwa mwasiwa Babinyu umala iziwa makatamiho munna nyo mwahananvepe.

Yesu ohafundjiha anamamuharaye makalelo olobela

⁹ <<Lobela uwa inafwanela mulobelege na makalelo ala: Baba wehu muli zulu, nzina nenyu nititimihiwe.

¹⁰ Umwene wenyu uze, funa wenyu uireye mwilamboni ya vati nnga funa wenyu unaireya atu ilambo ya zulu.

¹¹ Munivahe peno udja wehu wa siku na siku.

¹² Munilevelele jotega jehu nnga nnaaleveleletcha hiyo ale ananitegela.

¹³ Kamunihiye ira nixixiwe, mbwenye munivunele mwa jotakala. Tchoira umwene watene, kopolo datene, undimuwa watene jatene ejo ti jenyu kala no kala. Ame.

¹⁴ <<Mwasiwa nyo mwaakurumuwela atu joviringaniha jiwa, Babinyu wa zulu na liyene unoukurumuwelani.

¹⁵ Mbwenye nyo mwahakurumuwelege joviringaniha ja afwinyu, Babinyu na liyene kanaukurumuwelani joviringaniha jenyu.

Zela muselu ojejuwari

¹⁶ <<Eto mwajejuwarigi, kamukalege sisee nnga jinera angongomwa. Mwasiwa aliwa kajejuwarigi, anosandutcha kove diwa ira atu kaaone ira peno atwale anajejuwari. Na ibaribari nnouwandelani ira aliwa kohomala watchela yotambilra yewa.

¹⁷ Nyo mbwenye mwajejuwarigi, ifwanele muvihuwe kovinyu pama, muvizolihe murwinyu makura

¹⁸ ira mwahaoneye na atu ira munajejuwari mbwenye muoneye na Babinyu ahanaoneya. Mwaira eno, Babinyu wenno ahanaoneya gunafuna utambilrihani.

Jorayela ja ilambo ya zulu

¹⁹ <<Kamukoye jorayela jenyu ilambo ya vati. Mwasiwa mwilamboni ya vati mukala anantumbwa anatakuna jengo, mukala kwiti nnanonga jengo eto mukala ambava anagudjula, kabaga jengo.

²⁰ Mbwenye mukoye jorayela jenyu ilambo ya zulu wewo wahali anantumbwa, wahali kwiti eto wewo ambava wahanawanda atu gudjula nne ba.

²¹ Tchoira wewo unafuna kala jorayela jawo, murimawo eto unakala wewo.

Wareya wa maningo

²² <<Meso tchi panti ya maningo. Meso awo kakala apamene, maningo matene anakala owareya.

²³ Mbwenye meso awo kahakale pama, maningo awo anakala isive. Akala moneya wewo unafwanyeya muwari mwa weyo tchi isi, isiwa inokala isi yohokala ya masika.

Mulugu na jorayela

²⁴ <<Kalivo mutu unawanda alaba ambwiye ambinli. Mmohi unerege muvwelela, muziveliwaga. Eto mmohiwole unerege muida, mpetaga. Kavali jowandeya eto ira mutu awande muhara Mulugu na ja kobiri tempu imohive.

²⁵ Nona nnouwandelani ira nyo kamukale okukumuwela ingumi yenyu muiraga: <Kodi hiyo nnadje nni?> Nne kamukukumuwele ira: <Nnang'we nni?> Nne kamukukumuwele maningo enyu ira: <Nnaware nni?> Kodi ingumi na udja, ilukulu yofuneya kwaranya kahi ingumi? Eto kodi maningo na yowara, ilukulu yofuneya kwaranya kahi maningo?

²⁶ Muone mbalrame dovava zulu. Kannazala, kannahanda, kannahelela musandjani. Mbwenye Babinyu wa zulu gunavaha poso. Kodi nyo kamuli ofuneya vamentoni va Mulugu kwaranya mbalrame dedo?

²⁷ Eto mutu guvi unawanda indjiviha kalawo waye ora imohi movikukumuwela?

²⁸ <<Kodi munakalela nni okukumuwene zela jowara? Kaing'anani makalelo anaulukula folori. Folori kannalaba yengo, kannavisakanyela jowara jiwa.

²⁹ Mbwenye miyo nnouwandelani ira nne Salomawu no rayela waye watene, kawandile wara afiyeda nnga jinaira riya wa folori.

³⁰ Tchoira akala Mulugu unowanda wariha mpinda wa mukokolani, wenno unakalawo peno bahi eto metchelo adowa atatileliwa vanikusani, kodi liye kanauwarihani nyo? Nyo eto muli atu okana nroromelo noyeva.

³¹ Nona, nyo kamuwendege okukumuwene muiraga: <Kodi nnadje nni? Eto nnang'we nni? Eto nnaware nni?>

³² Mwasiwa atu a unde anozuzumela jengo jeji. Mbwenye nyo Babinyu wa zulu uhuiziwa ira nyo munofuna jengo jeji.

³³ Nyo mbwenye mubabihe zuzumela Umwene wa Mulugu vamohi no irana upama unafuna liye. Mwairana eno, jatene ejo munowendjediwa.

³⁴ <<Nona, kamuzuzumelege ja metchelo. Tchoira ja metchelo jinosambawulreya metchelo evo. So mbwenye ifwanele muzuzumelege makatamiho anaufwanyani siku na peno.>>