Matewuji 5 - Mazu Otchena a Mulungu

Yesu ohowonga zela atu orelihiwa

¹ Mwa enne Yesu agaaonne atu oindjiva kamuharaga enne, ohodowaga gwela mwangoni, liye garati. Evale anamamuharaye kohoza vali liye.

² Noira eno, liye ohotapula mulomo waye, liye roma afundjihaga eraga:

³ Orelihiwa ba atu osimela mmirimani mwewa, mwasiwa Umwene wa zulu gwewa.

⁴ Orelihiwa ba atu anne ananla, mwasiwa aliwa anoza kadidilihiwe murima.

⁵ Orelihiwa ba atu oviyeviha, mwasiwa aliwa anoza kavahiwe ilambo ya vati.

⁶ Orelihiwa ba atu anne anafwanyeyana ndala vamohi na ntona zela funa wewa ira kakayena upama, mwasiwa anoza karumbale.

⁷ Orelihiwa ba atu anne anaawendela afwiwa tangaranga, mwasiwa na aliwene anoza kawendeliwe tangaranga.

⁸ Orelihiwa ba atu anne anafwanyeyana mirima dotchena, mwasiwa aliwa anoza kamuone Mulugu.

⁹ Orelihiwa ba atu anne anaawandaniha afwiwa ira kawende vamohi mwa murendele, mwasiwa aliwa anoza kaitaniwege ana Mulugu.

¹⁰ Orelihiwa ba atu anne anaharahariwa na mwasa oirana upama, mwasiwa Umwene wa zulu gwewa.

¹¹ Mwaruwaniwa, mwaharahariwa, mwawongeliwa mazu abure ounukedani zela nyo kala anamadiharaga, munokala orelihiwa.

¹² Kauirelani jabure jatene ejo inafwanela muhagalale eto muziveliwe, mwasiwa muhukana yotambilra ilukulu ilambo ya zulu. Tchoira anamafiyiheda a malambo a mundulri na aliwene koharahariwa na makalelo amohive.

Mwinnyu no wareya wa ilambo

¹³ <<Nyo muli mwinnyu wa ilambo ya vati. Mbwenye mwinnyu yozivele yamalamo, kanawelela kana yoziva ya mwinnyu akoka. Kanakana mabasa para yengo ili yatene. So unatatiliwa bahi ira anyingaliwege na atu.

¹⁴ <<Nyo muli wareya wa ilambo. Sidadi imangiwe vazulu va mwango, kinakoyeya, inooneya na atu atene.

¹⁵ Eto nne kalivo mutu unatukula panti, ahindiha, agudumeya na ngogoda. Mbwenye mutu ahindiha panti, unahiya vazulu vapama ira yaamoneyege atu atene anakala mmba mule.

¹⁶ Sawasawa nnga nyo, inafwanela muhindihege wareya wenyu vamentoni va atu ira kaona mabasa apama analaba nyo, kamutamalelege Babinyu uli zulu.

Yesu ohowonga zela malamulo

¹⁷ <<Kamuumbuwele ira miyo dizele kwiha malamulo na jengo jilrembile anamafiyiheda, nari. Miyo kadizele kwiha, mbwenye dizele kwakwaneliheda.

¹⁸ Tchoira na ibaribari nnouwandelani ira zulu na ilambo ya vati jagaliwove, kilivo ponto ikitikiti nne yolremba ing'onong'ono inafuna kumamo mmalamuloni, jatene jahanakwakwanele.

¹⁹ <<Nona, akala ukala mutu mmohi unavungula mmalamuloni mule nlamulo nimohi ning'ining'ini, aawandelaga afwaye ira kamusazihege, mutu wenno unakala ogomiheda muwari mwa Umwene wa zulu. Mbwenye mutu wenno unaharihamo malamulo ale, aawandelaga afwaye ira kaharege, liye gunafuna za kala mundimuwa muwari mwa Umwene wa zulu.

²⁰ Tchoira nnouwandelani ira upama wenyu wahakwaranye upama wa anamafundjiha malamulo na aFarizewu, kamuza muvolowa Umwene wa zulu.

Ibaribari zela nlamulo noira kupe

²¹ <<Nyo muhuvwa mazu kawongiwe wanle na makolo a mundulri ira: <Kumpe mutu. Ule unampa mutu, unotongiwa.>

²² Miyo mbwenye nnauwandelani ira ule unatakaleliwa na mbalaye unotongiwa. Ule unampeta mbalaye unotongiwa na andimuwa. Ule unawonga na nfwaye eraga: <We zimora we>, ukana mulandu owanda mudowana munloni ohokana goma uwa.

Zelru para wenno umutegenle nfwaye

²³ <<Mwa eno, we wadowa uvelelaga ibuwani mukuto wa Mulugu, waumbuwela wewule ira: <Ukala mbalaga unna makani na miyo>,

²⁴ inafwanela uhiye mukuto wawo ule wewule sogolro wa ibuwa, udowe wababihe teyihana na mbalawo ule ira jejile jimale. Amala we podi wela dowa velela mukutole pama wa Mulugu.

²⁵ <<Mutu akana mulandu na weyo, wamuona ira unafuna afiyena wa anamatonga, inafwanela unfwanye mundila mwahanafiye matongelo, uvayele rumela jiirile we. Tawiha ira nfwawole liye podi dowa usumela vamentoni va namatonga. Evale namatonga unouvaheda mmandani mwa gwarda, liye ufungela mukadeya.

²⁶ Nnafuna duwandeleni ibaribari. Weyo kuza ukumamo mukadeya mule wahanapagalri kobiri yatenene.

Ibaribari zela nlamulo noira kuraruwe

²⁷ <<Nyo muhuvwa mazu kawongiwe wanle ira: <Kuraruwe.>

²⁸ Miyo mbwenye nnauwandelani ira mutu uli watene unamuing'ane muhiyana amusilrilraga, masiki ahamugonnena, uhumala murarutcha mmirimani mwaye.

²⁹ <<Akala niso nawo na muwononi odjana nnoutegiha, yali yapama ukumihemo utatile. Mwasiwa ili pama we puzeya yano imohi ya maningwawo, hiyanihana maningo matene aliwa dowa munloni ohokana goma uwa.

³⁰ Eto akala ndanda nawo na muwononi odjana nnoutegiha, yali yofwanela ugwadewo utatile. Tchoira ili yapama puzeya yano imohi ya maningwawo, hiyanihana maningo matene aliwa dowa munloni ohokana goma uwa.

Ibaribari zela nkani omwalana

³¹ <<Eto wanle yohowongiwa ira: <Mutu wenne unamulanye muhiyanaye inafwanela alrembe karta nowonga zela mwalana wewa, anvahede muhiyanaye ule.>

³² Miyo mbwenye nnouwandelani ira mutu uli watene unamulanye muhiyanaye ahali na nkani oraruwa, unamuraruwiha. Eto ule unavenya adowa amutela muhiyana omwalana na mamunaye, na liyene unararuwa.

Ibaribari zela muselu olumbela

³³ <<Nyo muhuvwa mazu kawongiwe wanle na makolo a mundulri ira: <Kulumbele zela yengo yohokala ya ibaribari. Mbwenye inafwanela ukwakwanelihede inalumbela we vamentoni va Nabwiya!>

³⁴ Miyo mbwenye nnauwandelani ira kamukayena makalelo olumbelela yengo ili yatene. Nne kamulumbelele zulu. Mwasiwa zulu ku wewo unafwanyeya mpando wa Umwene wa Mulugu.

³⁵ Nne kulumbelele ilambo ya vati, mwasiwa ilambo ya vati ili nnga yengo yonyingalihavo manyalo aye. Nne kulumbelele Jeruzalemu, mwasiwa tchi sidadi ya Mwene mundimuwa!

³⁶ Nne kulumbelele muru wawo, mwasiwa weyo kuza usandutcha nne nsisi nimohi na mmuruni mwawo ira nikale notchena, owu hehi nikale nodiba.

³⁷ Mbwenye akala he, muwongege he. Akala hehi, hehi. Wonga wenyu wakwaranya evo, wonga wewo ukumenle ubureni.

Ibaribari zela muselu owelihedana kunyakunya

³⁸ <<Nyo muhuvwa mazu kawongiwe wanle ira: <Mutu amudula nfwaye niso, na liyene aduliwe niso naye. Mutu amudula nfwaye nino, na liyene aduliwe nino naye.>

³⁹ Miyo mbwenye nnauwandelani ira kammulimbegena mutu wabure. Mbwenye mutu wenne unauvahe nikofi ntama na muwononi odjana inafwanela urungunutche ntama nimohi niwa na muwononi oromana ira auvahe nikofi nimohi niwa.

⁴⁰ Eto mutu ausumela mofuna uwaka kamizawo, umuhiyede na kapene ira atukule.

⁴¹ Eto wamuona mutu aza autukuliha mitolro ira uwendena kilometuru imohi, inafwanela uwendena kilometuru mbinli.

⁴² Unvahege mutu wenne unauvepa eto mutu aza afunaga uboliha yengo, kumukondihe.

Ibaribari zela muselu oazivela amwidani

⁴³ <<Nyo muhuvwa mazu kawongiwe wanle ira: <Umuziveliwege mutu uli watene eto umuidege mwidanawo!>

⁴⁴ Miyo mbwenye nnauwandelani ira mwaaziveliwege amwidani enyu eto mwaalobelelege atu anne anauharaharani

⁴⁵ ira muwande kala ahima a Babinyu wenno unafwanyeya zulu. Mwasiwa liye gunawanda zihawo nzuwa naamoneyelaga atu abure na apama. Eto arumbwihaga muzongwe kanasakulra. Unaarumbwihela atu abure na atu apama.

⁴⁶ Kodi mwaaziveliwa atu anne anauziveliwani bahi, era eno, munafuna mukayena yotambilra nni? Tchoira masiki anamasokiha misoko, na aliwene anoiretchana makalelo anno.

⁴⁷ Kodi mwaalondjelaga abalinyu bahi muhusakanyavo yengo ilukulu yoakwaranya atu amohiwa? Nne vang'ono kamuirilevo yengo. Mwasiwa atu a unde na aliwene anolondjelana mukalele atu.

⁴⁸ Sawasawa nnga Babinyu wa zulu gokwakwanela, na nyenne inafwanela mukale atu okwakwanela nnga liye!>>