Matewuji 4 - Mazu Otchena a Mulungu

Xixiwa wa Yesu

¹ Evale Yesu ohosogolrelriwa na Munemba Otchena fiyeda muisalesaleni ira axixiwe na Diyabo.

² Agadowile muisalesaleni, ohojejuwari malambo 40 ahadjaga yengo, ntana na mahiyu. Evale Yesu ohokagana ndala.

³ Mwa enne, namaxixa ohomuzelaga, amuwongagana eraga: <<Akala weyo uli Mwana Mulugu, urume mabwala kasanduwe, kakale pawu.>>

⁴ Yesu mbwenye ohomuwakulaga eraga: <<MMazuni muhulrembiwa ira: <Kahi pawu ve bahi inamukalihawo mutu. Mbwenye mazu matene anakuma vamulomoni va Mulugu banamukalihawo mutu.> >>

⁵ Evale Diyabo ohomudowagana Yesu sidadi yotchena ya Jeruzalemu. Liye muhela vazulu va Nyumba ya Yehova, nimburo notama bure.

⁶ Evale ohomuwongagana eraga: <<Akala weyo uli Mwana Mulugu, uvivoke vazulu va nyumba va, umorele vati. Mwasiwa ihilrembiwa mMazuni ira: <Mulugu unoaruma angelro aye ira kauing'anele. Aliwa anouhidedela na mandiwa ira manyalo awo kahaporeye na mabwe.> >>

⁷ Yesu mbwenye ohomuwakulaga eraga: <<MMazuni eto muhulrembiwa ira: <Kumuxixe Nabwiya Mulugu wawo.> >>

⁸ Evale Diyabo ohomutukula akoka, mudowana mwango olapetchetcha, muoniha maumwene matene a ilambo ya vati na jorayela jiwa.

⁹ Evale ohomuwandelaga eraga: <<Warumela dikokorela miyo vano, uditamalela, miyo nnouvaha jatene jinaona we ji, jikale jawo.>>

¹⁰ Yesu mbwenye ohomuwakulaga eraga: <<Kavenyavo, we Satana! Tchoira mMazuni muhulrembiwa ira: <Umutamalelege Nabwiya Mulugu wawo eto umulabege liyene bahi.> >>

¹¹ Evale Diyabo ohovenyagavo. Agavenyilevo, mobaranya angelro kohoza, aliwa kala na Yesu kamukamihedaga.

Yesu ohoroma hinda mabasaye ilambo ya Galileya

¹² Mwa tempu yenne Yesu agavwile ira: <<Juwawu uhufungeliwa mukadeya>>, ohovenyagavo vali liye, liye welela porovinsiya ya Galileya.

¹³ Muwari modowa Galileya ule, ohovira tatamo ya Nazareti, mbwenye kadibeliwilewo. Liye kwaranya, dowa kalaga sidadi ya Kafaranamu, yenno ili wandamelana ntiya na Galileya, mmadilreni mwa ilambo ya Zebuloni na Nafitali.

¹⁴ Ali ira jiwande kwakwanela nnga mwemo mwawongele namafiyiheda Izaiya ira:

¹⁵ <<Ilambo ya Zebuloni na ilambo ya Nafitali, ndila ya ntiya, kombela ya Jordawu, Galileya wewo unakala atu ohokala aJudewu,

¹⁶ atu anno kawendetcha muisini, kohoona moneya ulukulu. Na ibaribari wareya uhamoneya atu anne kafwanyeya munfulrini mwa ukwa!>>

¹⁷ Roma tempu yenno Yesu ohoromaga laleya eraga: <<Twaruwani mwasiwa Umwene wa zulu uhuwandamela!>>

Yesu ohaitana anamagodomula annayi ira kakale anamamuharaye

¹⁸ Siku nimohi Yesu awendaga mmambalo mwa ntiya na Galileya, ohomuonaga Simawu wenno aitaniwa Peduru agali vamohi na mbalaye Andire kavokelaga mataviwa mwiko mwasiwa kali anamagodomula.

¹⁹ Evale Yesu agaaonne, ohawongagana eraga: <<Kadiharegeni miyo. Mwadihara, miyo nnousakanyani ira nyo mukale aliba agodomula atu!>>

²⁰ Aliwa kagavwile enne, mobaranya kohiyaga mataviwa evale, aliwa roma muharaga Yesu.

²¹ Eto kadowagave sogolro Yesu ohafwanyaga atu ambinli, mulombwana Tiyagu na mbalaye Juwawu anno kali ana Zebedewu. Aliwa kaligi mmwadeyani vamohi na babiwa Zebedewu katchapelraga mataviwa. Evale Yesu ohaitanaga.

²² Na aliwene kagavwile itaniwa ule, mobaranya komuhiyaga babiwa na mwadeya wenne, aliwa roma muhara Yesu.

Yesu ohafundjiha atu eto ohavulumutcha arenda

²³ Evale kohodowaga sogolro, kawendawendaga porovinsiya ya Galileya yatene, Yesu aafundjihaga atu munyumbani mwiwa mwemo mwafundja atu mazu, alaleyaga Muselu Wapama wa Umwene wa Mulugu eto avulumutchaga maurenda matene eto amalihaga jopa jatene jafwanyeyana atu.

²⁴ Mwa enne Yesu ohoromaga vweya mwilamboni mwatene mwa Siriya. Eto kohoromaga azana wa liye atu anne kafwanyeyana maurenda madjindji na jopa johiyana hiyana, aliba zuzumihiwa na minemba dabure, aliba gwa vindjilendjile na aliba hawenda. Evale Yesu oavulumutcha.

²⁵ Mwa enne atu adjindji romela akuda Galileya, akuda Dekapoliji, akuda Jeruzalemu, akuda Judeya, na atu a kombela ya muhindje Jordawu, kohomuhara.