Matewuji 3 - Mazu Otchena a Mulungu

Laleya wa Juwawu Mbatizi

¹ Muwari mwa malambo anne Juwawu Mbatizi ohokumelela isalesale ya Judeya roma alaleyaga atu eraga:

² <<Twaruwani, tchoira Umwene wa zulu uhuwandamela.>>

³ Juwawule ali wenno namafiyiheda Izaiya amuwongile liye eraga: <<Ukala nizu nnakuwa muisalesaleni niiraga: <Sakanyedani rampa wa Nabwiya. Ongolani ndila inafuna liye vira.> >>

⁴ Mulombwana Juwawu awara jowara josakanyiwa na mawoya a akamelo eto omangelela mmwinini mwaye sintu nasakanyiwe na tembe. Jodja jaye adjetcha miserebo na nuwi da mukokolani.

⁵ Mulombwana Juwawu agadowile muhindje eriwa Jordawu, kohoza atu adjindji kakumelaga Jeruzalemu na porovinsiya ya Judeya na vilambo dowandamela muhindje Jordawu ule ira kavuruwane laleya waye.

⁶ Mwa enne aliwa korumelela jotega jiwa, liye abatizaga muhindje Jordawu.

⁷ Mwa ora yenno, kohokalawo andimuwa oasogolrelra aJudewu zela ja Mulugu. Amohiwa kali nikuru na aFarizewu, amohiwa kali nikuru na aSadusewu. Mwa enne Juwawu vaaonnege liye adjindji kazaga, kafunaga jobatiziwa na liye, ohovayela asumulula eraga: <<Nyo mulogo wa jivili nyo! Kodi uuwandenleni bani ira mutawe uwali wa Mulugu unafuna za utolotchani?

⁸ Akala muhutwaruwa, muvahege misapo dapama dotonyiheda twaruwa wenyu.

⁹ Nyo mwagarati, kamuroromelege ira: <Mulugu unonirumela mwasiwa hiyo nili ziza na Abarahamu.> Tchoira miyo nnouwandelani ira Mulugu podi sandutcha mabwe ala ira kakale ana Abarahamu.

¹⁰ Eto mbazo imala sayihiwa ira igwadege mitengo na mitchitchi diwa dene. Mutengo watene ahanavaha misapo dapama, unogwadiwa, avokediwe munloni.

¹¹ <<Na mwasa otwaruwa wenyu, miyo nnoubatizani na mahindje. Mbwenye mundulri mwaga mu, ukala mundimuwa unafuna zamo, odikwaranya miyo vano. Masiki miyo vano kadili ofwanela tukula sapato daye. Liye gunafuna ubatizani na Munemba Otchena na munlo.

¹² Liye ukana yovetana yaye mmandani mwaye ira avetena tirigu wenno uli nimburo nobubudavo jalo. Amala veta, unafuna atukule tirigu, ahele musandjani, makata atatilele munloni ohotima.>>

Batiziwa wa Yesu

¹³ Juwawu agalive muhindje Jordawu, Yesu ohovenya porovinsiya ya Galileya, liye dowa iko ule ira Juwawu ambatize.

¹⁴ Juwawu mbwenye ofuna jomukonda eraga: <<Miyo gunafuna ira dibatiziwe na nyo. Eto nyo munaza wa miyo ira dubatizeni?>>

¹⁵ Evale Yesu ohowakula eraga: <<Hiya eno. Nnerela ira jofuna ja Mulugu jikwakwanele.>> Evale Juwawu ohomurumela.

¹⁶ Yesu agabatiziwe, atavuwaga, mobaranya zulu wohuleya. Yesu againg'anne zulu, ohomuona Munemba wa Mulugu atitaga nnga ha kangayiwa, liye za mbotalri.

¹⁷ Ora imohive yenne, zulu wohokumelaga mazu kawongaga keraga: <<Ula gu Mwanaga unamuziveliwa miyo, wenno unadihagalaliha.>>