Matewuji 28 - Mazu Otchena a Mulungu

Venya wa Yesu mokwani

¹ Sabado agavirile, siku noroma na sumana, unde ufunaga tcha, Mariya nkuda Madala na Mariya mmohiwa ule kohomaruwaga ira kadowe kapande nifukweni ule.

² Mobaranya nifukweni ule wohokalaga indarandara mwasiwa mungelro mmohi wa Nabwiya gwatitile kuma zulu, liye za kumihagawo nibwe nafungilena atu nifukwe nne. Agakumihilewo nibwe nne, ohogaratigi vazulu va nibwe vale.

³ Makalelo a mungelrole, alingana no jerima wa muzongwe eto jowara jaye jali jotchena nnga ntondje.

⁴ Evale agwarda kahiyiwege nifukweni ule ira kaing'anelege, kagaonne jejile, kohongurumelaga, kagwelaga vati nnga kere kwa na mwasa oova.

⁵ Mbwenye mungelrole ohowongaga na ahiyanale eraga: <<Kamuove, tchoira miyo dihiiziwa ira nyo munanvenda Yesu wenno akomeliwe.

⁶ Mbwenye liye eni kanafwanyeya vano, mwasiwa uhuvenya mokwani nnga mwawongele liye. Zani uno muone nimburo vamuhenle atu va.

⁷ Muvenye mobaranya mudowe mwaawandele anamamuharaye ira Yesu uhuvenya mokwani. Eni liye unasogolra, unadowa Galileya. Nyo munomuona wewo. Mazu danna miyo ira duwandeleni banno.>>

⁸ Mwa enne ahiyanale kohokumaga nifukweni ule mobaranya, aliwa dowaga, kaganna ova eto tempu imohive kaligi ohagalalene. Kohotamangaga, aliwa dowa awandelamo jatene jejile anamamuharaye.

⁹ Ahiyanale kadowaga, Yesu ohatwanyuwelaga morurumutcha, liye alondjela. Eto aliwa kohomuwandamelaga, aliwa muhinda manyalo aye eto kohomutamalelaga.

¹⁰ Mwa enne Yesu ohawandelaga eraga: <<Kamuove. Mudowe mwaawandele abalaga ira kadowe Galileya. Anodiona wewo.>>

Yonama ya agwarda anno kaing'anela masiye wewo wakoyiwe Yesu

¹¹ Mwa enne ahiyanale kagamaruwile kadowaga, muwari mwa agwarda ale, kohovenyaga agwarda amohiwa, dowa musidadi, aliwa awandela andimuwa a anamakuta jatene jene jaireyile.

¹² Noira enne, andimuwa a anamakuta ale kohogumanela na andimuwa a aJudewu, aliwa fukanavo zelru yafuna atu ira. Evale kohavahaga agwarda ale kobiri yapamene,

¹³ aliwa kwi: <<Mwadowa mwawongege ira: <Anamamuharaye bazile na mahiyu hiyo nigonaga, aliwa bamo maningo a Yesu!>

¹⁴ Eto masiki governadore Pilatu avwa jejo, hiyo nnosakanyeda jatene ira liye aziveliwe eto ira nyo mwahakayena makani!>>

¹⁵ Evale aliwa kohowatchelaga kobiri ile, aliwa dowa roma wongaga nnga mwemo mwawandeliwele atu. Eto yonama yenne yoira Yesu ohobiwamo na anamamuharaye yohogaweya muwari mwa aJudewu, fiyeda siku na peno.

Yesu ohakumelela anamamuharaye kumi na mmohi

¹⁶ Noira eno, anamamuharaye kumi na mmohi ale kohodowaga porovinsiya ya Galileya, aliwa dowa mwango wenno aawandenle Yesu ira kadowe kagumane wewo.

¹⁷ Evale aliwa kagamuonne, kohomutamalelaga, mbwenye amohiwa kohomukayikelaga.

¹⁸ Noira enne, Yesu ohodowa vali anamamuharaye, aawandelaga eraga: <<Dihimala vahiwa utongi watene wa ilambo ya zulu na ilambwela ya vati.

¹⁹ Nona nnourumani ira mudowe mwilamboni ya vati yatene, mwaalaleye atu a malogo matene ira kakale anamadiharaga. Ale anaroromele, mwaabatize na nzina na Baba na Mwana na Munemba Otchena.

²⁰ Eto mwaafundjihege ira kaharege jengo jatene juwandenleni miyo. Muing'ane, miyo nnokalave na nyo malambo matene, fiyeda magomo a ilambo.>> Kukala mazu Matewuji alrembile liye muwari mwa Munemba Otchena zela jaira Yesu agali mwilamboni ya vati.