Matewuji 25 - Mazu Otchena a Mulungu

Yofwalrafwaniha ya anamwali kumi

¹ Evale Yesu ohowongaga eraga: <<Umwene wa zulu unaza ulingane na anamwali kumi kali kahanaagonena alombwana, anno katukunlege panti diwa kadowaga ira kagumane na muteli wa mulombwana, kamuwatchele vamateloni.

² Muwari mwa anamwali kumi ale, atanu kali ovuta, amohiwa atanu kali okana zelru.

³ Aliwa kamaruwaga, kohotukula panti diwa. Anamwali atanu ovuta ale tchatukunle makura amohiwa okoyela.

⁴ Mbwenye anamwali atanu a zelru ale, kadowaga kohotukulaga panti diwa eto kohotukulaga magarafwa a makura okoyela.

⁵ Evale aliwa kagadowile muing'anela muteli, liye ododomaga, kawandaga zawo. Mwa enne atene kohokagana kove, aliwa roma gona.

⁶ Kagonaga, vari va mahiyu kohovwaga kuwa ira: <Muteli unaza! Venyani mudowe mwagumane na liye!>

⁷ Mwa enne anamwali kumi ale kohovenyaga, aliwa roma sakanyeda panti diwa.

⁸ Evale anamwali ovuta ale kohowongaga na anamwali a zelru ale keraga: <Nnauvepani ira munivahemo makura enyu, mwasiwa panti dihu nnatima.>

⁹ Mbwenye anamwali a zelru ale kohawakulaga afwiwa ale keraga: <Nari. Mwasiwa makura ninna hiyo kinakwakwana ira niwande uvahanimo, amala kahalemo ehu! So mbwenye nyo venyani mudowe wa atu anne anaguliha ira mwagule.>

¹⁰ <<Evale anamwali ovuta ale kohomaruwaga ira kadowe kagule. Fwanyeya ira aliwa kagadowile gula makura, tchi tempu yafiyaga muteli. Mwa enne anamwali kali okozeyene ale kohovolowaga vamohi na muteli mpwandoni ya matelo. Evale mulango ohofungiwa!

¹¹ Noira enne, pafiyaga anamwali amohiwa atanu ale, aliwa wongaga keraga: <Nabwiya, Nabwiya, kanihuleleni mulango ira nivolowe!>

¹² Liye mbwenye ohawakulaga eraga: <Na ibaribari nnouwandelani ira miyo kaduiziwileni!> >>

¹³ Yesu agamanle wonga enne ohomarihaga eraga: <<Na nyenne inafwanela muing'anelege mwasiwa kamuiziwile oriwa, nne siku nnafuna za Mwana wa Mutu.

Yofwalrafwaniha ya anamalaba araru

¹⁴ <<Mwasiwa jinaza jiireye nnga mundimuwa mmohi anna ulrendo odowa ilambo imohiwa. Liye ahanamaruwe ohaitaniha anamalabaye, liye ahiyeda jorayela jaye.

¹⁵ Mutu mmohi anvahile kobiri tanu da talentu. Mmohiwa anvahile talentu mbinli, mmohiwa anvahile talentu imohi. Anvahile kada mutu zela makalelo anna liye owendiha kobiri. Agamanle avaheda kobiri dile, ohovenyavo.

¹⁶ Namalaba wenno avahiwe kobiri tanu ule, ohotukulaga kobiri dile, liye roma sakanyana malronda. Mwa enne ohopamo kobiri dimohi diwa tanu.

¹⁷ Eto nfwaye mmohiwa avahiwile kobiri mbinli ule, ohoroma sakanyana malronda, liye patamo kobiri dimohi diwa mbinli.

¹⁸ Mbwenye ule avahiwile kobiri imohi, ohotimbela vati kobiri yavahiwe liye ile.

¹⁹ <<Mwa enne vagamanle tempu ilukulu, patarawu wa anamalaba ale ohozaga ira amuone kada mutu makalelo alabile liye na kobiri daye.

²⁰ Mwa enne aromilege ali wenne avahiwe kobiri tanu, liye zana kobiri dimohi diwa tanu, hiya dedile damuhiyedile atu. Liye kwi: <Patarawu, miyo dagahanle na kobiri tanu mwadivahile nyo dile, dihiwanda patamo kobiri dimohi diwa tanu. Ti di!>

²¹ Evale patarawu ule ohowakula eraga: <Uhusakanya pama. Weyo uli namalaba wapama eto ororomeleya. Na mwasa okala ororomeleya mwa jengo ja vang'ono dauhiyedile miyo, nnouhela weyo ira uwendihe malronda malukulu. Kaza uvolowe mmba muno, udje pwando vamohi na miyo mbwiyawo!>

²² <<Evale namalaba wenno avahiwe kobiri mbinli ule, na liyene ohozagana kobiri dimohi diwa mbinli, liye wonga eraga: <Patarawu, miyo dagahanle na kobiri mbinli mwadivahile nyo dile, dihiwanda patamo kobiri dimohi diwa mbinli. Ti di!>

²³ Evale patarawu ule ohowakula eraga: <Uhusakanya pama. Weyo uli namalaba wapama eto ororomeleya. Na mwasa okala ororomeleya mwa jengo ja vang'ono dauhiyedile miyo, nnouhela ira uwendihe malronda malukulu. Kaza uvolowe mmba muno, udje pwando vamohi na miyo mbwiyawo!>

²⁴ <<Vogomiheda azilege ali wenne atambilrile kobiri imohi. Liye agazile ohowongaga eraga: <Mbwiyeni, miyo dere vayela uiziwani ira muli mutu orutcha, nyo munohanda vahazanle nyo eto munodula vevo vahaokile nyo mbewu.

²⁵ Mwa eno, na mwasa ouovani, kobiri imohi mwadivahile nyo ile miyo dere tukula, dowa timbela vati. Kobirinyu ila.>

²⁶ Evale patarawaye ule ohomuwakulaga eraga: <We namalaba wabure eto olramwisa we. Akala weyo wohomala iziwa ira miyo nnohanda munda wenno wahazanle miyo eto nnodula vevo vahaokile miyo mbewu,

²⁷ weyo wogotukula kobiraga udowe wahele banko ira miyo dazaga, diwatchele mowendjededeya na juru!>

²⁸ Evale ndimuwole ohawongana anamalabaye amohiwa ira: <Kamuwakeni kobiri imohi inafwanyeyana liye iyo, mudowe mwanvahe mulombwana wenne unafwanyeyana kobiri kumi.

²⁹ Tchoira mutu wenne unna, gunafuna vahiwave, liye wendjedeyagave. Mbwenye ule ahanna, eto mwa yengo ya vang'ono yenno inna liye unoza awakiwe.

³⁰ Mmutukule namalaba ohokana mabasa ula, munvokede unde isini, wewo unakala nla no takuna meno.>

Matongelo ogomiheda

³¹ <<Eto Mwana wa Mutu azaga na undimuwa waye, vamohi na angelro atene, liye unoza agarati mpando waye mundimuwa wa umwene.

³² Eto atu a malogo matene anoza kagumanihiwe vamentoni vaye. Mwa enne liye unoza ammwalanihege mutu mmohi na mutu mmohiwa, nnga jinaira namakumbuza amwalanihaga mabila na mbuzi.

³³ Unoza atukule mabila ahele muwononi waye odjana, mbwenye mbuzi unoza ahele muwononi waye oromana.

³⁴ Mwa enne mwenole unoza awongege na atu anne anaze kafwanyeyege muwononi waye odjana erege: <Zani, nyo atu orelihiwa na Baba. Zani muwatchele umwene wenno usakanyediwe para nyo roma mapanduwelo a ilambo.

³⁵ Mwasiwa miyo dohokana ndala eto nyo mohodivaha yodja, dohokana ntona eto nyo mohodivaha yong'wa. Miyo dali mulendo mbwenye nyo mohodiwatchela mmavande mwenyu.

³⁶ Miyo dali mandave eto nyo mohodiwariha, dali murenda eto nyo mohoza dipanda. Miyo dali mukadeya, mbwenye nyo mohoza diona!>

³⁷ Evale atu apama ale anoza kanfukege keraga: <Nabwiya, kodi siku tivi nauonnegeni hiyo mwaganna ndala niza nuvahani yodja? Nari siku tivi mwannaga nyo ntona, hiyo nuvahani mahindje mung'wa?

³⁸ Nnga siku tivi mwali nyo mulendo, hiyo nuwatchelani mudowa vande vihu, nari siku tivi mwaligi nyo mandave hiyo nuwarihani?

³⁹ Nari siku tivi mwaligi nyo murenda nari mukadeya hiyo niza nupandani?>

⁴⁰ Evale Mwene ule unoza awakulege eraga: <Na ibaribari nnouwandelani ira jengo jatene jaaireletcha nyo abalaga ang'onong'ono, jejile mwadiireletcha miyo!>

⁴¹ <<Era eno unoza awongege na atu anne anaze kakale ikukuru ya muwononi waye oromana, ira: <Kakumanivo vali miyo va, nyo atu otembelrelreya nyo, mudowege munloni ohokana goma uwa, wenno asakanyediwe para Diyabo vamohi na angelro aye.

⁴² Mwasiwa miyo dohokana ndala, nyo kamwadivahile yodja, dohokana ntona, nyo kamwadivahile mahindje ding'wa.

⁴³ Miyo dali mulendo, kamwazile diwatchela. Dali mandave, kamwadiwarihile. Dali murenda nari dali mukadeya nyo kamwazile dipanda.>

⁴⁴ Evale aliwa anoza kanfukege keraga: <Nabwiya, kodi siku tivi nauonnegeni hiyo nyo mwaganna ndala, nari ntona, nari mwagali mulendo, nari mwagali mandave, nari mwagali murenda, nari mwagali mukadeya eto hiyo nahaukamihedani?>

⁴⁵ Evale liye unoza awakule eraga: <Na ibaribari nnouwandelani ira tempu yenne mwaalramwisetcha nyo atu amohiwa muwari mwa abalaga ang'onong'ono ala, mwadilramwisetcha miyo!>

⁴⁶ Jaireya enne, aliwa anoza kadowe matongiwelo, wewo unafwanyeya goyi yohomala. Mbwenye atu apama anoza kadowege ingumini yohomala.>>