Matewuji 24 - Mazu Otchena a Mulungu

Yesu ohowonga zela bwanyuliwa wa Nyumba ya Yehova

¹ Yesu akumaga vatando va Nyumba ya Yehova, adowaga, anamamuharaye kohomuwandamelaga, aliwa ira: <<Kaing'anani makalelo kamangeyile nyumba di nnafwanyeya vatando va Nyumba ya Yehova va!>>

² Yesu mbwenye ohawandelaga eraga: <<Kodi nyo peno va kamunaona jatene jeji eni? Mbwenye na ibaribari nnouwandelani ira vasogolro veva kavali nibwe nnafuna za kala vazulu va nibwe nfwaye. Jatene eji jinomala bwanyuliwavo, kavinahalave yengo.>>

Yesu ohowongaga zela jengo ja musogolro

³ Evale Yesu agagaratile Mwango wa Mitengo da Azeti, anamamuharaye kohozaga wa liye kamuwongagana kagalivo okave keraga: <<Muniwandele siku nnafuna za ireya jatene ejo. Kodi ionihedo tchivi inafuna za oneya nyo mwazaga vamohi na ilambo yamalaga?>>

⁴ Evale Yesu ohawakulaga, liye roma awandela eraga: <<Polre polre tawiha ira munaze mmuhare mutu ouholotchani.

⁵ Mwasiwa atu adjindji anerege za kavikalihege nnga miyo, kawongege kerege: <Miyo dili Kiristu>, kahali. Eto anofiyeda anyenga atu adjindji.

⁶ Eto munoza muvwege zela ja kondo na ja fe fe fe ja kondo. Mbwenye inafwanela muing'anele pama ira mwahakukumuwe mwasiwa ili yofuneya ira jatene jejo jiireye. Mbwenye mwaona jeji jiireyaga, kahi magomelo wa ilambo nari.

⁷ Mwasiwa nlogo nimohi nnoza nivenye ira niwanege na nlogo nfwaye, umwene unoza uwanege na umwene nfwaye. Eto mamburo madjindji munoza mufwanyeyege ndala eto munoza mukale vindarandara pandi didjindji dene da ilambo.

⁸ Mbwenye jatene ejo jaza jiroma ireya, wewo unakala maromelo wa goyi nnafuna atu ona nnga muhiyana aromaga wene ona upa obala.

⁹ <<Aliwa anerege ugulihani ira muonihiwe goyi eto anerege upani. Atu a malogo matene anerege uidani nyo na mwasa wa nzina naga.

¹⁰ Tempu yenno atu adjindji anoza kaperuwe eto anoza kagulihanege mmohi na nfwaye eto anerege idana mukalele atu.

¹¹ Eto anoza kakumelele anamafiyiheda adjindji onama. Aliwa anerege aholotcha atu adjindji.

¹² Na mwasa oindjiva irana jinakondiha malamulo, tempu yenno mwilamboni zivelana wanna mutu na nfwaye unoza udidile.

¹³ Mbwenye mutu wenno unavilele ante magomelo wa makatamiho anno, unovulumuwa.

¹⁴ Eto Muselu Wapama ula wa muUmweneni unolaleyiwa mwilamboni mwatene eto unohidedeliwa umboni mwa malogo matene. Jaireya eno, pinafuna zaga makutulo.>>

Yengo yotakaliha Nyumba ya Yehova

¹⁵ Yesu ohowongagave eraga: <<Nyo mwaza muona yengo yabure yohokala ya masika, yengo yotakaliha Nyumba ya Yehova, yenno yawongile namafiyiheda Daniyeli, yagaimetchiwe Nimburo Notchena, (ule unaileri mazwala, aumbuwele pama tapulela uwa),

¹⁶ atu anne anakale Judeya, inafwanela katawelege mmwangoni.

¹⁷ Eto mutu wenno unafwanyeye vazulu va nyumba, inafwanela atawe mobaranya, kavolowe mmba ira adowe atukule yengo ili yatene.

¹⁸ Nari mutu wenno unafwanyeye minda, kawelele vande ira adowe atukule kapa yaye.

¹⁹ Udilu zela ahiyana okana vambani na ahiyana okana ahima ang'onong'ono owamwa matempu anno!

²⁰ Inafwanela mulobele ira tempu yenno inafuna nyo tawa yahaze tempu yodidila, nne siku na sabado.

²¹ Mwasiwa unoza ukale goyi yohokala ya masika, yenno ili yahanababihege kalawo romela mapandutchiwelo wa ilambo fiyeda peno. Eto goyi yenno yavira kiza ikalawo goyi imohiwa yokala ha yenno.

²² Eto malambwiwa a goyi dile kere vunguliwa na mwasa wa atu anne kasakulriwe. Mbwenye malambwiwa ahakale kahavunguliwa, kalivo afuna vulumuwa.

²³ <<Eto munvwa mutu auwandelagani ira: <Namatikeliwa ula!>, owu hehi airaga: <Namatikeliwa ule!>, kamuroromele.

²⁴ Mwasiwa anoza kakumelele akiristu onama na anamafiyiheda onama. Aliwa anerege irana jionihedo na jotikiniha johokala ja masika ira kaanyengege atu. Eto jakala jowandeya anerege fiyeda anyenga atu osakulriwa na Mulugu.

²⁵ Nona miyo divayelaga uwandelani jengo jiwa jahanaireye.

²⁶ <<Eto mwavwa kauwandelagani ira: <Kaing'anani, eni liye uli muisalesaleni!>, nyo kamuyewo. Nne masiki mwavwa kawongaga keraga: <Liye unafwanyeya mmba mule!>, nyo kamuroromele.

²⁷ Mwasiwa nnga jinairetcha jerima enne, wajerima makumelo wa nzuwa, moneya uwa ufiyaga mavirelo wa nzuwa, Mwana wa Mutu azaga jinaza jiireye eno.

²⁸ Vevo vinakale mutembo wa mutu okwa pi vevo vinafuna za gumana makuvi.>>

Yesu ohowonga zela za waye wanembinli

²⁹ Yesu ohowongagave eraga: <<Malambo a goyi ale kamalaga, nzuwa nnoza nidibe eto mwedi kanamoneyege. Zulu ule nyenyedi nnoza dimorewo eto kopolo datene da zulu nnoza ditikinyeye.

³⁰ Jaireya eno, pa evale vanafuna za kumelela zulu ionihedo ya Mwana wa Mutu eto malogo matene a mwilamboni anoza kanle eto anoza kamuone Mwana wa Mutu azelaga mmiramboni da zulu na kopolo vamohi na undimuwa wohokala wa masika.

³¹ Eto liye unoza aarume angelro aye no kuwa ulukulu wa palraza indimuwa. Aliwa kagarumiwe, anoza kaagumanihe atu atene osakulriwa pandi dannayi dene da ilambo, magomelo wa ilambo wu ante magomelo wa ilambo wu.

³² <<Inafwanela mufundje zela yofwalrafwaniha ya mutengo wa mufigera. Nyo mwaona matakuru aye karoma puwa, munovayela iziwa ira tempu ya muzongwe ihiwandamela.

³³ Tchi imohive eto inafuna za ireya zela za wa Mwana wa Mutu. Mwaona jatene jeji, inafwanela muvayele iziwa ira liye uhuwandamela, uli vakwikwive na va mulango.

³⁴ Na ibaribari nnouwandelani ira jatene eji jinokwakwanela atu okalawo malambo anne kahanamale kwa.

³⁵ Zulu na ilambo ya vati jinoza jivire, mbwenye mazwaga kiza kamala.

Zela siku nnafuna za Mwana wa Mutu

³⁶ <<Mbwenye kalivo uiziwile oriwa nne siku nnafuna za Mwana wa Mutu. Nne angelro anakala zulu, nne miyo Mwanaye. So uiziwile gu Baba mwinnya bahi.

³⁷ Tchoira nnga jaireyile tempu ya Nowe, ti jejo jinafuna za ireya mazelo a Mwana wa Mutu.

³⁸ Mwasiwa tempu ya Nowe atu kodja, kong'wa, alombwana na ahiyana kotelana, fiyeda siku Nowe avolowile liye mmwadeyani.

³⁹ Aliwa tchaiziwile yengo tchivi yafuna za ireya, fiyeda za mahindje madjindji. Evale mahindje kagazile, kohomala atolotcha atu atene. Eto siku nnafuna za Mwana wa Mutu jinaza jiireye eno.

⁴⁰ Alombwana ambinli anoza kakale minda. Mbwenye mmohi unoza atukuliwe, nfwaye ahiyiwe.

⁴¹ Eto ahiyana ambinli anoza katchilege vatchiloni. Mmohi atukuliwevo, nfwaye ahiyiwe.

⁴² <<Nona inafwanela mukaleve orurumuwene. Mwasiwa nyo kamuiziwile siku nnafuna za Nabwiya wenyu.

⁴³ Eto inafwanela muiziwe ira ahakanlege mbava azaga vande mwinnya aiziwaga tempu inafuna za mbavole, erege ing'anela vande vaye vale ira mbava ahawande gudjulavo.

⁴⁴ Na nyenne inafwanela mukale okozeyene. Mwasiwa Mwana wa Mutu unaza afiye tempu yahanadediha nyo.>>

Namalaba ororomeleya na namalaba ohororomeleya

⁴⁵ Yesu ohowongagave eraga: <<Kodi namalaba ororomeleya eto owendjela guvi? Gwenno unakwakwaneliheda mabasa uvahediwe liye na patarawu waye ira aaing'anelege anamalaba afwaye eto aavahege jodja jiwa ora yakwakwana.

⁴⁶ Orelihiwa gu namalaba wenne patarawu waye ule azaga unanfwanye liye alabaga mabasaye.

⁴⁷ Na ibaribari nnouwandelani ira patarawu ule unonvaheda namalabole ira aing'anelege jengo jaye jatene.

⁴⁸ Mbwenye namalabole akala wabure, patarawu waye adowa, liye aroma wonga mmirimani mwaye ira: <Patarawu unosimbwa dibeliwa>,

⁴⁹ aroma abubuda afwaye, aromaga dja, ang'waga na anamalrezelra,

⁵⁰ siku nahamudediheda liye na ora yahaiziwile liye, pinafuna fiya patarawu waye ule.

⁵¹ Patarawu waye ule agafiyile, anfwanya airagana jejile, unongwada yano yano, amutukule amudowena nimburo neno uli angongomwa. Wewule unoza ukale nla no takuna meno.>>