Matewuji 23 - Mazu Otchena a Mulungu

Yesu ohagwihana mulandu anamafundjiha malamulo na aFarizewu

¹ Yesu ohowongaga na anamamuharaye na mwindji wa atu kafwanyeyaga evale eraga:

² <<Peno anamafundjiha malamulo na aFarizewu bahanlena mabasa ofundjiha malamulo a Mozeji.

³ Mwa eno, jatene jinauwandelegeni atu, inafwanela muiregena eto muharihegemo pama. Mbwenye nyo kamwaasazihege aliwa joira jiwa. Mwasiwa aliwa anakalela laleyave bahi, mbwenye irana uwa kinafuna.

⁴ <<Aliwa anamangiha mitolro donyemela dorutcha tukuliwa, akapatchiha afwiwa. Mbwenye mitolro dile aliwa kinafuna nne sakwinya na ibuno yewa imohi ira katukule.

⁵ Joira jiwa jatene anairana ira kawande oniwa na atu. Mwasiwa aliwa joira jiwa anairana ira kaoniwege na atu. Na mwasa wenno anosimbwa ulukuliha mapunda a Mazu anamangiha atu vamuwononi viwa nari vakoveni viwa, eto anosimbwa lapiha ja yavi yavi jinafwanyeya mmagomelo mwa bata diwa.

⁶ Kafiya vapwandoni, anaziveliwa dowa garati mamburo oromene eto kadowa munyumbani dofundjamo mazu anagarati mipando dapama doroma.

⁷ Aliwa eto anoziveliwa ira kawendaga murampani kalondjeliwege. Eto anoziveliwa joitaniwaga Namafundjiha.

⁸ <<Nyo mbwenye kamuitaniwege namafundjiha. Mwasiwa Namafundjiha wenyu gu mmohi bahi. Eto nyo atene muli abalive.

⁹ Eto mwilamboni ya vati kamunkayena unamuitana nyo baba. Mwasiwa Baba unna nyo gwenno mmohive unafwanyeya ilambo ya zulu.

¹⁰ Nne nyo mwawendaga kamuitaniwege <namasunziha>. Mwasiwa Namasunziha wenyu gu mmohive wenno unafwanyeya agali miyo Kiristu!

¹¹ Mbwenye unafuna kala mundimuwa muwari mwa nyo gwenno unafuna kala namalaba wenyu.

¹² Mutu wenne unavitukulela, unoyevihiwa. Mbwenye ule unaviyeviha unotukuleliwa.>>

¹³ Yesu ohowongagave eraga: <<Udilu wa nyo anamafundjiha malamulo na aFarizewu! Nyo angongomwa nyo! Mwasiwa nyo munaabarela atu anafuna volowa Umwene wa zulu ira kahawande volowa. Eto nne masiki na nyenne kamunafuna volowa eto munaakameliha ale anafuna volowa.

¹⁴ Udilu wa nyo anamafundjiha malamulo na nyo aFarizewu. Nyo angongomwa nyo! Mwasiwa nyo munaawaka amakwele a ahiyana nyumba diwa, amala nyo dowa lapihaga malobelo enyu ira muoniwege na atu. Mbwenye na makalelo munna nyo, munoza mutongiwe na makalelo abure ohokala a masika.

¹⁵ <<Udilu wa nyo anamafundjiha malamulo na aFarizewu! Nyo angongomwa nyo! Nyo munolambuwa bara, nyo dowaga vilambo dimohi diwa ira muwande mugondjiha mutu mmohi bahi ira avolowe nikuru nenyu, airegena jenyu jatene. Eto mwamuwanda, munomusandutcha liye kala mwana ofuna dowa munloni ohokana goma uwa fendo mbinli ukwaranyani nyo.

¹⁶ <<Udilu wa nyo asogolrelri ohoona! Nyo munowonga ira: <Mutu wenne unalumbelele Nyumba ya Yehova, kahi yengo, podi hakwakwaneliheda yolumbela yaye. So mutu alumbelela oru unafwanyeya Nyumba ya Yehova, inafwanela akwakwanelihede yenno ilumbenle liye.>

¹⁷ Nyo azimora ohowanda ona nyo! Kodi ilukuluwa tchivi? Ilukuluwa gu oru, owu tchi Nyumba ya Yehova iwandile tcheniha oru?

¹⁸ Nyo eto munofundjiha ira: <Mutu wenne unalumbelele ibuwa ya mukuto, liye podi hakwakwaneliheda yenno ilumbenle liye! Mbwenye alumbelela yovelela yenno inafwanyeya vaibuwani vale, wenno mbwenye inafwanela akwakwanelihede ilumbenle liye.>

¹⁹ Nyo atu ohoona nyo! Kodi ilukuluwa tchivi? Ilukuluwa gu mukutole owu nari tchi ibuwa yenno inawanda tcheniha mukutole?

²⁰ Na mwasa wenno miyo nnouwandelani ira mutu wenne unalumbelele ibuwa ya mukuto, unalumbelela ibuwa ya mukuto yenne vamohi na jovelela jatene jinafwanyeya evale!

²¹ Eto mutu wenne unalumbelele Nyumba ya Yehova, unalumbelela Nyumba ile vamohi na Mulugu wenne unakalamo.

²² Eto mutu alumbelela zulu, unalumbelela vampandoni va Umwene wa Mulugu, vamohi na Mulugu mwinnyiwene wenno unafwanyeya vampandoni vale.>>

²³ <<Udilu wa nyo anamafundjiha malamulo na aFarizewu! Nyo angongomwa nyo! Mwasiwa nyo munovelela yanekumi ya jomela jing'onong'ono nnga masirikawu, ndjani, nari pilripilri. Mbwenye munolramwisa matongelo a ibaribari no muwendela nfwawo tangaranga no kana nroromelo, jengo jejo jili jofuneyetchetcha mmalamuloni. Na ibaribari yohofwanela muiragana jeji eto mwahalramwisaga jengo jimohi jiwa joroma ji.

²⁴ Nyo asogolrelri ohoona! Nyo munotchitchita jatene jinang'wa nyo tawiha ira munoza mung'we puzuzu. Mbwenye akala kamelo, munoimida.

²⁵ <<Udilu wa nyo anamafundjiha malamulo na aFarizewu! Nyo angongomwa nyo! Mwasiwa nyo munahuwa unde wa kopo na unde wa parato, agali muwari muwa muli nrima pwi vamohi no irana jotakala jinafuna nyo.

²⁶ Nyo aFarizewu ohoona nyo! Inafwanela mubabihe huwa muwari mwa kopo na parato ira na unde wene uwande kala wotchena wene.>>

²⁷ <<Udilu wa nyo anamafundjiha malamulo na aFarizewu! Nyo angongomwa nyo! Mwasiwa nyo muli nnga masiye karihediwe undeve. Atu kaing'anaga, anaona nnga masiye ale kohoriya pama, agali muwari muwa munafwanyeya makuva a atu kakwile vamohi na jotakala.

²⁸ Na nyenne atu kauing'anagani unde, anauonani nnga muli atu apama. Mbwenye muwari muwa muzaleliwe ungongomwa no irana jinakondiha malamulo.

²⁹ <<Udilu wa nyo anamafundjiha malamulo na aFarizewu! Nyo angongomwa nyo! Mwasiwa nyo munamanga kampa da anamafiyiheda eto munahela jengo joriya mmafukweni mwemo mukoyiwe atu apama,

³⁰ nyo wongaga ira: <Ahakanlege hiyo nikalawo tempu yaliwo makolo ehu, kanairegena jejo jairetcha atu, kavuvihaga sangiri na anamafiyiheda.>

³¹ Mwa eno, munowanda hidedela umboni ovimanga mulandu ira muli ahima a atu anne kaapile anamafiyiheda.

³² Nona nnouwandelani ira mudowe mwamarihe mabasa karomile ababinyu.>>

³³ <<Nyowa nyo! Mulogo wa jivili nyo! Kodi munafuna muwande tawa tongiwa odowa munloni ohokana goma uwa moira avi?

³⁴ Nona miyo nnoaruma anamafiyiheda, alombwana a toto na anamafundjiha adjindjene. Mbwenye aliwa kaza, amohiwa nyo munoapa moakomela vamuradini, amohiwa munoapa na makalelo amohiwa. Amohiwa nyo munoawaxula muwari mwa nyumba denyu dofundjamo mazu. Amohiwa munoroma aharahara sidadi datene nnatawelege atu.

³⁵ Na mwasa wenno Mulugu unoutongani zela sangiri na atu atene apama anno kapiwe vasayi mwilamboni ya vati mwatene, romela ukwa wa Abeli wenno ahanna mulandu fiyeda Zakariya mwana Barakiya, wenno mumpile nyo vari va Nyumba ya Yehova na ibuwa ya mukuto.

³⁶ Na ibaribari nnouwandelani ira jatene jeji unafuna rumelela sangiri na atu anne ba atu a tempu ili hiyo ila.>>

Yesu ohonlelaga sidadi ya Jeruzalemu na mwasa oizivela

³⁷ Yesu ohowongagave eraga: <<Jeruzalemu, Jeruzalemu, weyo uli sidadi inaapa na mabwe anamafiyiheda anno karumiwe ira kafiye wa we! Kodi fendo dingasi difunile miyo agumaniha ahimawo, nnga jinaira nikolo na mwanaku aagumanihaga ahimaye vati va mapepelo aye? Miyo eto dagafunile ira daagumanihe ahimawo, weyo kufunile!

³⁸ Mwa eno, nyumba yenyu inoza ikale vadebe.

³⁹ Tchoira miyo nnouwandelani ira kamuza mudiona akoka fiyeda muze muwonge ira: <Orelihiwa gu Mwene wenno unaza na nzina na Nabwiya.> >>