Matewuji 22 - Mazu Otchena a Mulungu

Yofwalrafwaniha ya pwando ya matelo

¹ Yesu ohowelela wonga na atwale muwari mwa jofwalrafwaniha jimohi jiwa, eraga:

² <<Umwene wa zulu unafwalrafwana na mwene mmohi asakanyile pwando ya matelo para mwanaye wa mwanapongwe.

³ Siku niwa nifiyaga, oharuma anamalabaye ira: <Venyani, mudowe mwaawandele atu anne naaitanile hiyo, kaze kadje pwando ya matelo a mwanaga.> Mbwenye anamalabaye ale kagadowile, kagaawandenle, atwale tchazilewo.

⁴ Evale ndimuwole oharuma anamalabaye amohiwa eraga: <Kadowani mwaawandele atwale akoka, mwaire: <<Kerile muze. Ng'ombe dilukulu na ng'ombe ding'onong'ono donuna dihimala piwa. Jengo ja pwando jihimala piyiwa. Jatene jihikwakwanela. Muze mudje pwando ya matelo.>>>

⁵ <<Mbwenye ale kaitaniwe tchaabanlre anamalaba a mwenole. Amohiwa kohodowa mmindani mwiwa. Amohiwa kohodowa ira kagulihege malrondiwa.

⁶ Amohiwa kohofiyeda mwezo oahinda aliba alaleya ja matelo jile, roma airelaga jengo johokala pama, fiyeda apa.

⁷ Mwenole agavwile makalelo anne, ohotakaleliwaga, liye aruma anyakondwaye ira: <Mudowe, mwaape apanga anno kaapile anamalabaga.> Kagamanle apa atwale, kohotumeya sidadiwele.

⁸ <<Jagaireyile eno, oharuma anamalabaye amohiwa eraga: <Pwando ya matelo ihimala sakanyediwa eto ale kalaleyiwale tchali atu ofwanelela za.

⁹ Venyani. Mwerege wenda marampa mandimuwa. Atene munaafwanya nyo mundila, mwaawandele ira kaze kadje pwando.>

¹⁰ Anamalabaye ale kagadowile mmandila, kohoroma agumaniha atu atene kaafwanya atu, abure vamohi na apama. Mwa enne nyumba ya matelo mwadja atu mule yohozala aliba itaniwa.

¹¹ <<Mbwenye mwenole agavolowile mmba mule ira arome aing'ana aliba itaniwa ale, ohonfwanyaga mutu mmohi ahawarile yowara ya vamateloni.

¹² Evale mwenole ohonfukaga mutule eraga: <Moya weyo uvolowile avi wahawarile yowara ya matelo?> Mutule kaannaga yowakula, ohokalaga lohulo.

¹³ Mwa enne mwenole oharuma anamalabaye eraga: <Kamutukuleni, mummange manda na manyalwene, mmutatilele unde uli isi, wewo uli nla no takuna meno.> >>

¹⁴ Yesu nomala eno, ohowonga ira: <<Tchoira adjindji boitaniwa eto osakulriwa ba a vang'ono.>>

Yofuka zela misoko da Sezare

¹⁵ AFarizewu kohodowaga garatela zelru ira: <<Ndoweni nivendeni makalelo bavi anafuna hiyo mugwihana mulandu Yesu mwa jowonga jaye.>>

¹⁶ Evale kagagaratenle, koharuma asempurwiwa vamohi na aJudewu ofuna ja Erodi ira kadowe kanfuke, mofuna ira awonga yengo yohokala yenno, kamuhinde. Kaganfwannye Yesu, kohonfuka, aliwa ira: <<Namafundjiha, hiyo nuhuiziwani ira nyo muli wa ibaribari eto munafundjiha ndila ya Mulugu mwa ibaribari. Nyo kamunabalra joumbuwela ja atu, tchoira nyo kamunatonga zela baleya wa mutu.

¹⁷ Hiyo nnafuna nufukeni. Moonelramo mwenyu zela misoko, munaona avi? Kodi mwa malamulo ehu inorumelihiwa ira nimpagalrigi Sezare misoko, owu hehi kanimpagalrigi?>>

¹⁸ Yesu mbwenye muwari moiziwa ubure waumbuwela atu, ohowakula eraga: <<Nyo angongomwa nyo! Kodi munafunela nni jodixixa miyo?

¹⁹ Kazanani uno kobiri yenno inapagalriwa musoko, mudionihe.>> Evale kohozana kobiri imohi ya parata yenno yapagalretcha atu musoko.

²⁰ Kagazilena kobirile, Yesu ohafukaga eraga: <<Vakobirini va valrembiwe nzina na ani? Eto kove ilivo tchaani?>>

²¹ Kohowakulaga keraga: <<Ja Sezare.>> Mwa enne Yesu ohowongaga eraga: <<Bahi eto, ja Sezare, munvahege Sezare. Ja Mulugu, munvahege Mulugu.>>

²² Evale kagavwile mazu awongilege liye, kohotikiniheya. Aliwa muhiya Yesu, dowaga jiwa.

Yofuka ya aSadusewu zela venya mokwani

²³ Siku nimohive kohokala aSadusewu kavennye kadowaga wali Yesu. ASadusewu banno ani: <<Mutu akwa, kanavenya mokwani.>> Kagafiyile vali Yesu, kohonfuka ira:

²⁴ <<Namafundjiha, Mozeji ohowonga nlamulo noira: <Mulombwana akwa ahanambale mwana na muhiyanaye, mbalaye adowe amutele muhiyanole ira ambalena mwana wenno unafuna tukula nzina na mbalaye ukwile ule.>

²⁵ So mbwenye iireyile tchoira muwari mwa hiyo kohokala alombwana atanu na ambinli kabaliwe ingulu imohive. Murandji ohodowa liye mutela muhiyanaye. Agamutenle muhiyanole, ohokwa ahanambalena mwana.

²⁶ Noira enne, mbalaye wanembinli ohoza mutela. Mbwenye na liyene ohokwa ahanambale mwana na muhiyanole. Aliwa ireyagave enne fiyeda alombwana atene atanu na ambinli ale, aliwa mala kwa.

²⁷ Mwa enne alombwana atene anne kagamanle kwa, vogomiheda eto na muhiyana wenne ohokwa.

²⁸ Nnga vire atu jiireya eno, siku nnafuna za venyihiwa atu atene mokwani, muhiyanole mamunaye unakala ani? Tchoira alombwana atanu na ambinli atene anne kohomutela!>>

²⁹ Evale Yesu ohawakulaga eraga: <<Nyo muhumala holowa na mwasa oira kamuiziwile jinawongiwa mMazuni, nne kopolo da Mulugu kamuiziwile!

³⁰ Tchoira atu kavenyihiwa mokwani, kunakala telana. Mbwenye atu atene anaza kakale nnga angelro a zulu.

³¹ Kodi nyo kamunaileri mMazuni jejo jauwandenleni Mulugu zela venya mokwani? [Abarahamu, Izaki na Jako kagakwile wanle, mMazuni muhulrembiwa ira] Mulugu ohowonga ira:

³² <Miyo dili Mulugu wa Abarahamu, Mulugu wa Izaki na Mulugu wa Jako!> Liye kahi Mulugu wa atu okwa, mbwenye gu Mulugu wa atu okalawo!>>

³³ Yesu agawongile enne, anamwindji kafwanyeyaga evale ale, kohotikinaga zela jofundjiha jaye.

Malamulo okwaranya malamulo matene

³⁴ AFarizewu kagaiziwile ira Yesu ohamiyaliha aSadusewu, kohogumanelaga vamohive.

³⁵ Muwari mwa aFarizewu ale, ohokala mmohi ali eto namafundjiha malamulo. Liye muwari mofuna muxixa Yesu, ohonfukaga eraga:

³⁶ <<Namafundjiha, muwari mwa malamulo matene anafwanyeya mmalamuloni, kodi nlamulo nindimuwa kwaranya matene tivi?>>

³⁷ Evale Yesu ohomuwakulaga eraga: <<Nlamulo nindimuwa ti ni: Umuziveliwege Nabwiya Mulugu wawo na murimawo watene, no kalawo wawo watene, no onelramo wawo watene.

³⁸ Ni ti nlamulo nlukulu noroma.

³⁹ Nlamulo nanembinli nindimuwa nolingana na neni, ti ni: Umuziveliwege mutu uli watene nnga munaviziveliwela we wa mwinnya.

⁴⁰ Malamulo matene a Mozeji na jofundjiha jatene ja anamafiyiheda jinafwanyeya muwari mwa malamulo menli anna.>>

Namatikeliwa gu Nabwiya wa Davi

⁴¹ AFarizewu kagalive ogumanene vevale, Yesu ohafukaga eraga:

⁴² <<Kodi nyo munaumbuwela avi zela Namatikeliwa? Namatikeliwa gu mwana ani?>> Evale aliwa kohomuwakulaga keraga: <<Namatikeliwa gu mwana Davi.>>

⁴³ Evale Yesu ohawelihedagave eraga: <<Akala Namatikeliwa gu mwana Davi, nnga Davi unawanda avi muitana Namatikeliwa na nzina na <Nabwiya>? Tchoira Davi mwa Munemba, ohowonga ira:

⁴⁴ Nabwiya uwonga na Nabwiya waga eraga: Ugarati muwononi waga odjana ante difiyede agondjiha amwidanawo ira kakale nnga yengo yonyingalihavo manyalo awo.

⁴⁵ <<Akala Davi amuira Namatikeliwa: <Nabwiya waga>, nnga unawande avi tempu imohive kala mwana Davi?>>

⁴⁶ Mwa enne kalivo awandile wakula eto romela siku nenne dowaga sogolro kalivo awandile nfuka Yesu yengo imohiwa.