Matewuji 21 - Mazu Otchena a Mulungu

Yesu ohovolowaga Jeruzalemu nnga mwene

¹ Evale Yesu na anamamuharaye kakwivelaga Jeruzalemu, kagafiyile tatamo ya Betifaji, tatamo yenno inafwanyeya wandamelana Mwango wa Mitengo da Azeti, oharumaga anamamuharaye ambinli, liye awandela eraga:

² <<Mudowe tatamo nnafwanyeya sogolro. Mwavolowaga wene tatamo yenno, munofwanya buru wa muhiyana agamangeleliwe, aganna mwanaye. Mwafwanya, mutapule dambinli dene, muzegena uno.

³ Eto akalavo mutu unafuna wonga na nyo, mmuwandele ira: <Nabwiya gunafuna ira alabena.> Era eno liye unourumelihani mobaranya.>>

⁴ Jatene jeji jaireyele ira jikwakwanelihede mazu kawongiwe na namafiyiheda oira:

⁵ <<Mudowe mwamuwandele namwali mwana wa Siyawu ira: <Kaing'ana, mwene wawo unaza moviyeviha, agamanle vikunga vazulu va mwana buru wa mulombwana, mwana wa mwanainyama otukula mitolro.> >>

⁶ Mwa enne anamamuharaye ambinli ale kohomaruwaga, aliwa irana jatene nnga mwemo Yesu mwaarumele liye.

⁷ Kohozagana buru wa muhiyana ule vamohi na mwanaye wenne. Kagamuzilena kohelaga kapa diwa vazulu va anavinyama ale, Yesu liye gwelavo.

⁸ Mwa enne atu adjindji kafwanyeya evale, kozaga katandelaga kapa diwa mundila mwemo mwafuna vira Yesu. Eto amohiwa kokotolaga tambi da mitengo, aliwa roma tandelaga mundila.

⁹ Mwa enne anamwindji atene romela ale kaligi sogolro vamohi na ale kaligi mundulri, kokuwaga keraga: <<Hozana mwana Davi! Orelihiwa gu Mwene wenno unaza na nzina na Nabwiya! Hozana Mulugu Okwaranya Jatene!>>

¹⁰ Mwa enne Yesu agavolowile muJeruzalemu, sidadi yatene yalive dugu dugu dugu, atu kafukaga keraga: <<Kodi wenne bani?>>

¹¹ Atu amohiwa kowakulaga keraga: <<Ula gu namafiyiheda Yesu wenno ukumile porovinsiya ya Galileya, tatamo ya Nazareti.>> Kohokalawo malivuru mannayi anawonga zela jowonga na joira ja Yesu. Kada livuru nnalaba nnga umboni. Malivuruwa ba ala: Matewuji, Markuji, Lukaji na Juwawu. Kada mboni ohowonga ibaribari zela jionne liye eto jiwandeliwe liye. Muwari moira jaira Yesu vamohi na jawonga liye johoindjiva, kahi ira aliwa koholremba jatene. Mulombwana Juwawu agamanle lremba jolremba jaye jatene, oira: <<Ahakale nnga jatene jiirile liye jilrembiwa imohi na imohi, miyo nnoona ira malivuru kafuna lrembiwa tchakwakwanamo mwilamboni!>> (Juwawu 22:25) Muwari mwa malivuru mannayi, kahi ira kada mutu oholremba na makalelo amohive. Amohiwa koholremba jengo kaharaga jaireya kada siku. Amohiwa koholremba jengo kaharaga muselu, muselu. Muwari moileri livuru nimohi, inokala yorutcha onelramo jatene jaireyile sumana yogomiheda Yesu ali liye mwilamboni ya vati, ahanapiwe. So ira mutu aonelremo, unoroma fundja malivuru matene ira awande iziwa nnga muvirile atu. Nafwanya Markuji, nnowanda iziwa ira Yesu agavolowile muJeruzalemu agagwenle vaburuni, ohoroma kuma, liye gona, mmetcheloni muwa liye tembelrelra mutengo wa mufigera, nomala liye volowa muJeruzalemu akoka, liye atamangihavo aliba guliha jengo Nyumba ya Yehova. Mwa enne kakumaga muJeruzalemu ora ya tchiguwo, tchi tempu yaonne anamamuharaye ira mufigera ohoumma. Matewuji alrembaga, agumaniha jengo jaireya muJeruzalemu vamohi na ja mufigera. Ku wonga mutu aileri Matewuji, unoiziwa jaireya mbwenye kanaiziwa siku niwa. Mbwenye Markuji alrembaga, liye oharihamo muselu vang'ono vang'ono zela siku naireya jengo jiwa. Ku wonga atene kawonga miselu dimohive mbwenye kohiyana na makalelo otanda miselu diwa.

Zela malivuru mannayi owonga ja Yesu Yesu ohatamangiha aliba malronda Nyumba ya Yehova

¹² Evale Yesu ohovolowaga vatando va Nyumba ya Yehova, liye roma atamangihavo anamagula na anamaguliha atene eto ohogwihaga meza da aliba tchindja kobiri na kadera da aliba guliha kangayiwa.

¹³ Evale Yesu ohawandelaga eraga: <<Ihilrembiwa ira: <Nyumba yaga inaitaniwege Nyumba yolobelamo.> Mbwenye nyo muhuisandutcha kala nimburo noakoyamo ambava!>>

¹⁴ Mwa enne Yesu agalive muwari mwa Nyumba ya Yehova emule, kohozaga aliba haona na aliba rangala, Yesu liye avulumutcha.

¹⁵ Mwa enne kohokalawo ahima kakuwaga Nyumba ya Yehova ile keraga: <<Hozana mwana Davi!>> Evale andimuwa a anamakuta na anamafundjiha malamulo kagaonne jotikiniha zela jejo jaira Yesu eto kagaaonne ahimale kakuwaga enne, aliwa kohotakaleliwa.

¹⁶ Eto kohonfukaga Yesu, aliwa ira: <<Kodi kunavwa jinawonga ahima ji?>> Yesu ohawakulaga eraga: <<He, miyo nnovwa! Kodi nyo kamunaileri mazu anawonga ira: <Vamulomoni va ahima ang'onong'ono na ahima owamwa, muhusakanya ira kawonge mazu outamalelani!>?>>

¹⁷ Noira enne, ohahiyaga evale, liye kuma musidadi mule, dowaga Betaniya. Agadowile, ohogonaga wewo mahiyu anne.

Yesu ohotembelrelra mutengo wa mufigera

¹⁸ Mmetcheloni muwa ora ya mabebehi Yesu awelelaga musidadi mwakoka mwene, ohokagana ndala.

¹⁹ Adowagave ohonfwanyaga mutengo mmohi wa mufigera wandamelana mundila. Agamukwivenle kafwanyilegemo yovaha nne imohi so afwanyilegemo matakuruve bahi. Mwa enne ohomutembelrelraga mutengole eraga: <<Kuwelele vaha jovaha akoka.>> Nowonga eno mufigera ule ohoummaga ora imohive.

²⁰ Evale anamamuharaye ale kagaonne jejo, kohonfukaga motikiniheya keraga: <<Kodi mutengo wa mufigera ule uwandile umma avi mobaranya?>>

²¹ Evale Yesu ohawakulaga eraga: <<Na ibaribari nnouwandelani ira mwakana nroromelo eto mwahawanganyeda, munerege wanda irana yengo yokwaranya yenno iireyile na mufigera ule, ante munerege fiyeda wonga na mwangola ira: <We mwango, katchikuwa, udowe wamorele mwiko!>, mwaira eno, inerege ireya.

²² Eto mwakana nroromelo, munovahiwa jatene jinavepe nyo molobela.>>

Andimuwa a aJudewu kohonfuka Yesu zela utongi waye

²³ Mwa enne Yesu ohovolowa muNyumbani mwa Nabwiya, liye roma fundjihaga. Evale andimuwa a anamakuta na andimuwa a aJudewu, kohozaga nfuka keraga: <<Kodi jatene jinaira we ji unairana na utongi wa ani? Eto uuvahile utongi ira uiregena jeji bani?>>

²⁴ Evale Yesu ohowakulaga eraga: <<Na miyene eto nnafuna dufukeni yengo imohi. Nyo mwadiwandela yenno inafuna miyo ufukani, na miyene nnouwandelani mutu wenno udivahile utongi ira diiregena jinera miyo.

²⁵ Yofuka iwa tchi ila. Kodi batiza wa Juwawu Mbatizi wakumenle waani? Wakumenle wa Mulugu uli zulu owu wakumenle wa atu?>> Mwa enne aliwa kohoroma wonga oka oka keraga: <<Nnga mutula nimuwakule avi? Nera niwonge ira: <Anvahile utongi ali Mulugu uli zulu>, liye unonifuka ira: <Nnga mwasiwa gwa nni nyo muza mwahawandaga roromela jawonga Juwawu?>

²⁶ Eto nawonga ira: <Anvahile utongi ali atu>, kinakala. Tchoira nnaaova anamwindji mwasiwa atene kaimenle ira mulombwana Juwawu ali namafiyiheda.>>

²⁷ Na mwasa wenne, kohomuwakulaga Yesu keraga: <<Kanimuiziwile amurumile Juwawu.>> Evale liye ohowonga eraga: <<Bahi, na miyene kannamuwonga mutu udivahile utongi zela jinairana miyo ji!>>

Yofwalrafwaniha ya ahima ambinli

²⁸ Yesu ohowongaga eraga: <<Kodi munaonamo avi? Ohokalawo mulombwana mmohi eni anna ahima ambinli a alombwana. Evale mulombwanole ohomuwongana mwanaye mmohi, liye ira: <Mwanaga, udowe walabe munda wa uva peno.>

²⁹ Evale mwanaye ule ohomuwakulaga eraga: <Miyo kannafuna!> Mbwenye agawongile enne, babayele agadowile, liye ohotchindjaga zelru, liye dowawo.

³⁰ Noira eno, babole ohodowaga wa mwanaye mmohiwole, liye muwongana mazu amohive ira: <Mwanaga miyo nnafuna peno udowe walabe munda wa uva.> Agamuwandenle, mwanole ohowakulaga eraga: <Tabo mbwiyeni, miyo nnoyawo.> Eto agarumenle enne, kadowilegewo.

³¹ Kodi va ahima ambinli ala, uirilena yenno yafunne babiwa guvi?>> Evale aliwa kohowakulaga keraga: <<Airilena funa wa babiwa ali mwana oroma ule.>> Evale Yesu ohowongaga eraga: <<Na ibaribari nnouwandelani ira anamasokiha misoko na aputa banafuna kala sogolro wenyu kavolowaga muUmweneni mwa Mulugu, hiya nyo.

³² Mwasiwa mulombwana Juwawu uhuza wa nyo awendaga na ndila ya ibaribari, nne kamufunile rumela jawonga liye. Mbwenye arumenle jowonga jaye ba anamasokiha misoko na aputa. Nyo mbwenye mwagaonne twaruwa wewa, kamufunile tchindja zelru denyu ira muwande rumela jawonga liye.>>

Yofwalrafwaniha ya anamalima abure

³³ Evale Yesu ohowongagave akoka eraga: <<Kavuruwanani yofwalrafwaniha imohiwa ila. Ohokalawo mulombwana mmohi eni anna tereno yaye, liye limamo mundaye wa uva. Agazanle munda watene wenne, ohomanga muru liye wereweriha mundole. Noira eno, ohomangaga nimburo ira kanyingalelegemo uva ira akumege vinyu. Eto ohosakanyagamo mmundani mule nyumba yolapa ya gwarda ira aing'anelege munda watene. Noira enne, ohasakaga anamalima, liye aalugariheda. Noira eno, ohodowaga muulrendoni mwaye ilambo imohiwa ya unde.

³⁴ Mwa enne yagafiyile tempu yohanda, maliba mundole oharumaga anamalabaye ira kadowe katukule pandi ya uva yafuna kala yaye.

³⁵ Evale anamalima ale kagaaonne anamalaba karumiwe ale, kohahindaga, mmohi aliwa mbubuda, mmohiwa aliwa mpa eto mmohiwa kanvokile na mabwe.

³⁶ Noira eno, oharumaga anamalaba amohiwa oindjivene kwaranya oromale. Mbwenye anamalima ale kohasakanyaga na makalelo mamohive.

³⁷ Vogomiheda liye ohomuruma mwanaye ambanle liye, aumbuwelaga ira: <Voira dimurumile mwanaga eni, aafwanya, aliwa anomuriheda.>

³⁸ Mbwenye anamalima ale kagamuonne mwanole azaga, kohoromaga wonga oka oka keraga: <Ula gu mwana unafuna halana jengo jatene jeji babaye agakwile. Ndoweni nimpeni ira babaye agakwile, niwande halana jengo jatene jafuna kala jaye!>

³⁹ Mwa enne kohomuhindaga, aliwa mmburulela unde wa munda ule, aliwa mpa.>>

⁴⁰ Yesu ohowongagave eraga: <<Nnga vire atu kampa enne, mwinnya wa mundole azaga, unaairana avi anamalima ale?>>

⁴¹ Atu kafwanyeya evale kohomuwakulaga keraga: <<Mwinnya wa mundole aza, unoatolotcha alombwana abure ale na makalelo owopiha ohokala a masika, adowe aasake anamalima amohiwa ira kaze kaalugari mundole ira tempuwa yafiya, kawande nvaheda pandi ya jovaha jaye na makalelo apama.>>

⁴² Evale Yesu ohawandelaga eraga: <<Kodi nyo kamunaileri mMazuni? MMazuni muhulrembiwa ira: <Nibwe neno nalramwisile aliba manga nyumba, peno ti nibwe na vamwendoni.> Ejo airilena gu Nabwiya eto tchi yengo yapama, yotikiniha vamentoni vehu!>>

⁴³ Yesu ohowongagave eraga: <<Na mwasa wenno miyo nnouwandelani ira munowakiwa Umwene wa Mulugu, kavahiwe atu amohiwa anno anafuna vaha jovaha japama.

⁴⁴ Eto wenno unagwele vazulu va nibwe neno unomala gwadanyeya. Eto nibwe no namugwela mutu, mutuyo unomala tchileya.>>

⁴⁵ Mwa enne andimuwa a anamakuta na aFarizewu kagavwile jofwalrafwaniha jejile, kohowanda onelramo ira: <<Yesu jofwalrafwaniha jatene jeji, unawonga malro onigwihana mulandu hiyo!>>

⁴⁶ Na mwasa wenne, kohoroma funafuna ira kamuhinde. Mbwenye tchairilena mwasiwa kaaova anamwindji kafwanyeya evale mwasiwa aliwa kamuona Yesu nnga namafiyiheda.