Matewuji 2 - Mazu Otchena a Mulungu

Andimuwa a toto kohoza mutamalela Yesu

¹ Yesu abaliwaga, abaliwe Beleme, porovinsiya ya Judeya. Tempu yenne atonga ilambo yenne ali mwene Erodi. Evale kohokalawo andimuwa a toto kavennye pandi ya makumelo wa nzuwa, aliwa fiya sidadi ya Jeruzalemu,

² roma fukedaga keraga: <<Hiyo nnanfukeda mwana ubaliwe tchineneva, wenno unafuna kala mwene wa aJudewu. Tchoira nihiona makumelo wa nzuwa nyenyedi yotonyiheda baliwa waye. Mwa eno, hiyo nizele ira nimutamalele.>>

³ Mbwenye mwene Erodi agavwile ejile, ohokukumuwa. Eto atu atene kafwanyeya Jeruzalemu na aliwene kohokukumuwa.

⁴ Evale mwenole ohagumaniha andimuwa a anamakuta vamohi na aliba fundjiha malamulo, aafukaga eraga: <<Nyo munavwetcha ira Namatikeliwa unafuna abaliwe ilambo ya uvi?>>

⁵ Evale andimuwale kohomuwakula ira: <<Hiyo nnavwetcha ira Namatikeliwa unaza abaliwe Beleme, muwari mwa ilambwela ya Judeya. Ira niwonge eno, wanle ohokala namafiyiheda mmohi, alrembile mazu a Mulugu eraga:

⁶ <We Beleme masiki uyevileve muwari mwa ilambo ya Judeya, uhukana mabasa malukulu. Masiki tatamo datene nnafwanyeya ilambo ya Juda dindjive, mwa weyo Beleme punaza mubaliwe mwene wenno unafuna akumbuzaga atwaga akuda Izarayeli.> >>

⁷ Evale Erodi ohovenya mozembiheya, aitana andimuwa a toto ale, liye afuka eraga: <<Kodi nyo, nyenyediwa mwaromile ona ora nni?>> Aliwa kohomuwandela siku naromile atu ona nyenyedile.

⁸ Kagamanle muwandela, oharuma Beleme eraga: <<Nyo dowani mwanfukede pama mwanoyo. Mwanfwanya, muvire uno ira mudiwandele uli liye ira na miyene didowe, damutamalele.>> Mbwenye liye awongela eno mwasiwa afuna ampe.

⁹ Kagavwile mazu a Erodi, aliwa kohovenyihana, kadowaga. Evale kadowaga, nyenyedile yaona atu ikumelaga pandi ya makumelo wa nzuwa yohowelela asogolrelra fiyeda dowa imela vazulu va malro vali mwanole.

¹⁰ Evale aliwa kagaonne nyenyedile, kohagalala valukulu.

¹¹ Aliwa kohofiyaga nyumba mwali mwanole. Kagavolowile, kohonfwanya mwanole na mmaye, aliwa nkokorela mwanole, kamutamalelaga. Evale kohotapulaga mivaho dofuneya valukulu dadowana atu da oru, na yonukela yotumeyiwa, na makura onukela kaitaniwa mira, aliwa nvaha mwanole.

¹² Mbwenye kahanavenyihane ira kawelele mundulri, kohowandeliwa morohani ira kahawelele wa Erodi. Novwa mazwale, kohogundeya, kaharaga ndila imohiwa, aliwa dowaga waniwa.

Mariya na Joze kohomutawiheda mwaniwa ilambo ya Ijipitu

¹³ Andimuwa a toto ale kagadowile, mwa ora ya vang'onove, ohoza mungelro wa Nabwiya muwandela mulombwana Joze morohani eraga: <<Uvenye, umutukule mwanawo na mmayiwa, mutawele ilambo ya Ijipitu. Mwasiwa Erodi tchineneva unafuna anvende mwanawo ira ampe. Mudowe mwakale wewo fiyeda ora inafuna miyo duwandeleni ira muze uno.>>

¹⁴ Mulombwana Joze agavwile mazwale, ohovenya, mulanda mwanaye na mmayiwa, aliwa venyihana na mahiyu kadowaga Ijipitu.

¹⁵ Kagafiyile, kohokala wewo fiyeda vakwile Erodi. Jejo johoireya ira jikwakwanelihede mazu awongile Nabwiya mwa namafiyiheda mmohi ira: <<Dihimuitana mwanaga ira akumemo muIjipitu.>>

Piwa wa ahima

¹⁶ Mbwenye Erodi, vahanle liye, agaonne ira: <<Andimuwa a toto ale kohodinyenga, kizile diwandela uli mwana!>>, ohotakaleliwa valukulu. Voira liye ohafukaga andimuwa a toto ale siku naromile atu ona nyenyedi yahara atu, oharuma atu ira kadowe Beleme na vilambo dowandamela wewule, kaapemo ahima atene a anapongwe, roma mwana wa mmandani fiyeda mwana wa yaka mbinli.

¹⁷ Mwa enne kohokwakwanelaga mazu awongile namafiyiheda Jeremiya oira:

¹⁸ <<Tatamo ya Rama uhuvweya nizu nokumbanya no kuwa wo nla ulukulu. Anla ali Rakeli, aanlelaga ahimaye. Eto liye kafuna sembeselreya ira amiyale mwasiwa ahimaye kiliwo!>>

Joze na Mariya kohowelawo Ijipitu

¹⁹ Vakwile mwene Erodi, mungelro wa Nabwiya ohozaga muIjipitu mwali atu mule, muwandela Joze morohani,

²⁰ liye ira: <<Uvenye, umutukule mwanawo na muhiyanawo, muwelele ilambo ya Izarayeli mwasiwa ale kafuna kampe mwanoyo, kohomala kwa.>>

²¹ Evale mulombwana Joze agavwile ejile, ohomulanda mwanaye na mmayiwa, aliwa venyihana kadowaga ilambo ya Izarayeli.

²² Mbwenye kagali mundila, kahanafiye ilambo ya Izarayeli, Joze ohovwa ira: <<Uhanle atongaga porovinsiya ya Judeya vamalroni va Erodi, gu mwanaye Arkelawu.>> Evale liye ohoroma ova dowawo. Mbwenye ohowandeliwa morohani akoka ira: <<Uvenye, udowe porovinsiya ya Galileya.>>

²³ Evale kohodowaga sidadi ya Nazareti, aliwa kalaga wewule ira kakwakwanele mazu kawongiwe na anamafiyiheda zela Namatikeliwa ira: <<Liye unerege itaniwa muNazareti.>>