Matewuji 18 - Mazu Otchena a Mulungu

Kodi mundimuwa muwari mwa Umwene wa zulu bani?

¹ Mwa tempu yenne anamamuhara a Yesu kohodowaga valigi liye, aliwa nfuka keraga: <<Namafundjiha, kodi mundimuwa muwari mwa Umwene wa zulu bani?>>

² Evale Yesu ohomuitanaga mwana mmohi, liye dowa muimeliha vari vewa.

³ Noira enne, ohowongaga eraga: <<Na ibaribari nnouwandelani ira nyo mwahasanduwe, mukala nnga ahima, kamuza muvolowa muwari mwa Umwene wa zulu.

⁴ Tchoira mutu wenne unaviyevihe akala nnga mwana uimenle va ula, wenno guli mundimuwa muwari mwa Umwene wa zulu.

⁵ Eto mutu wenne unamuwatchele mwana okala nnga wenna mwa nzina naga, unadiwatchela miyo.

⁶ Mbwenye mutu wenne unamutegihe mwana mmohi okala ha wenna wenno unadiroromela miyo, yali yapama amangeleliwe nibwe nlukulu munikohini mwaye, adowe atatileliwe mbara, akwele emo, hiyaniha no kana mulandu wenno.>>

Yowopiha ya yotega

⁷ Yesu ohowongagave eraga: <<Udilu wa atu a ilambo ya vati anno anaziha joxixa ira afwiwa katege. Tchoira inofuneya ira joxixa jize. Mbwenye udilu wa mutu wenno unafuna ziha joxixa jile!

⁸ Tchoira akala ndanda nawo nari nnyalo nawo nnoutegiha, inafwanela ugwadewo utatilele olapela wene na weyo. Tchoira ili yapama we volowa muingumini wagali mutu orangala nari ohowenda pama hiyanihana we kana manda amenlene na mendo daminli dene, we dowa munloni ohokana goma uwa.

⁹ Eto akala niso nawo nnoutegiha, inafwanela ukumihemo, utatilele olapela wene na weyo. Mwasiwa ili yapama we kana ingumi na niso nawo nimohi, hiyaniha no kana meso amenlene eto weyo dowa tatileliwa munloni ohokana goma uwa.

Nibila nodimela

¹⁰ <<Kaing'anani! Vari va ahima ang'onong'ono okala ha anna, kammulramwisevo nne mwana mmohi. Mwasiwa miyo nnouwandelani ira angelro ewa zulu ora datene anakala vamentoni va Baba wenno unafwanyeya zulu.

¹¹ Mwasiwa Mwana wa Mutu uzele avulusa atu anne kadimenle!

¹² <<Kodi nyo munaonamo avi? Mutu aganna mabilaye 100, nimohi nadimela, kodi neno nidimenle unonihiya wene eno? Nari. Liye unohiya mabila amohiwa 99 mwangoni wewule ira adowe asake nibila nimohi neno nidimenle.

¹³ Liye agasayenle nibila nne, afwanya, na ibaribari nnouwandelani ira unokana ziveliwa ulukulu zela nibila nimohi nne, hiyaniha na mabila 99 anno kahadimenle.

¹⁴ Sawasawa Baba na ahimaye. Kahi funa wa Baba uli zulu ira muwari mwa ahima ang'ining'ini ala adimele mwana mmohi!>>

Makalelo ofwanela zela mbalawo autegela

¹⁵ Yesu ohowongagave eraga: <<Akala mbalawo uhutegela, uvenye udowe wamuwandele yoviringaniha yaye. Eto wamuwandelaga, mukale ambinli, weyo na liye bahi! Liye auvwa, uhuwanda muganyalri mbalawo!

¹⁶ Mbwenye wadowa wamuwandela, ahafune uvwa, uvenye udowe wamutukule nfwawo mmohiwa nari atu ambinli ira muwelelewo akoka. Tchoira ira mutu atongiwe inafwanela ikale ibaribari mohokayikela muwari mwa amboni ambinli owu araru.

¹⁷ Eto mwawelelawo, liye ahafuneve uvwani, muvenye mudowe mwaawandele atu atene a nikuru neno nnga munakalela nyo. Eto atu a nikuru natene kawonga, liye ahafuneve vwa, mmuhele nnga mutu wa unde nari namasokiha misoko.

Yesu ohavaha anamamuharaye utongi

¹⁸ <<Na ibaribari nnouwandelani ira jatene jinamangege nyo mwilamboni ya vati, na zulu wene jinerege mangiwa. Eto jatene jinamasule nyo vati vano, na zulu wene jinerege masuliwa.

¹⁹ Vamohive vevo eto nnouwandelani ira mwa nyo kakalawo atu ambinli anavwanana muwari moilobelela yengo imohive, yengo ili yatene inavepe atu, na ibaribari anovahiwa na Baba uli zulu!

²⁰ Tchoira vevo vagumanne atu ambinli nari araru mwa nzina naga, miyo dili vari vewa!>>

Yofwalrafwaniha zela mulevelela nfwawo

²¹ Mwa enne Peduru ohovenya dowa valigi Yesu anfukaga eraga: <<Nabwiya, kodi mbalaga adidawela, dimulevelele fendo dingasi? Dimulevelele ante fendo tanu na mbinli?>>

²² Yesu ohomuwakula eraga: <<Miyo kannawonga ira: <Umulevelele fendo tanu na mbinli.> Mbwenye nnawonga ira: <Umulevelele fendo 77.> >>

²³ <<Tchoira Umwene wa zulu unakala nnga mwene mmohi afuna akosa anamalabaye kafiyarile kobiri daye.

²⁴ Mwa enne ohomuromaga namalaba mmohi afiyarile kobiri ilukulu yohokala ya masika yagali talentu 10.000.

²⁵ Voira namalabole kawandile velela kobiri daye, patarawaye ule ohokumiha utongi ira: <Nnafuna mmugulihe liye na muhiyanayene na ahimayene vamohi na fwaramento datene da vande vaye ira awande divaha kobiri dafiyarile liye.>

²⁶ Evale namalabole ohomukokorela mbwiyaye ule amuguzelaga mendo ira: <Pepani, nnouvepani ira mudidedihe. Miyo kobiri datene nnouvahani.>

²⁷ Mwa enne patarawayele na tangaranga danna liye ohomukutcha ira: <Mangawa matene dihimala ulevelela.>

²⁸ <<Mbwenye maliba leveleliwa ule agavenyilevo evale, ohongumanana namalaba nfwaye afiyarile kobiri daye da parata 100. Agangumannena, ohomuhinda, roma mudjizaga vanikohini eraga: <Nnafuna udivahede kobiri daga difiyarile we.>

²⁹ Evale nfwayele ohonkokorela amuguzelaga mendo ira: <Pepani, nnouvepani mudidedihe. Miyo kobiri datene nnouvahani.>

³⁰ Mbwenye nfwayele karumenle. Ofiyedaga muheliha kadeya ira akale mwemo fiyeda amale pagalri mangawa anna liye.

³¹ Mbwenye anamalaba afwaye kagamuonne liye amuiragana enne nfwayele, kohokumbanyaga valukulu. Mwa enne kohovenyaga, aliwa dowa nfwanya patarawayele, muwandela jatene jairile namalaba nfwiwole.

³² <<Patarawayele agavwile, ohomuitanihaga. Agazile, ohomuwongagana eraga: <Namalaba wabure we! Miyo duhulevelela kobiri datene edile na mwasa oira weyo wohodivepa.

³³ Kodi tchafwanenle na wenne umuwendela tangaranga namalaba nfwawole nnga duirele miyo?>

³⁴ Mwa enne motakaleliwa mwaye, patarawayele ohonvahedaga mmandani mwa aliba kadeya ira kamuzuzumihege fiyeda ira avelele kobiri datene dadjile liye.>>

³⁵ Yesu ohowongaga eraga: <<Tapulela nnga nyo na Mulugu. Mwahawandege akurumuwela na mmirimani mwenyu mwatene abalinyu oudawelani, Baba wa zulu unouirelani eno.>>