Matewuji 17 - Mazu Otchena a Mulungu

Tchindjeya wa Yesu agali vamwangoni

¹ Vagamanle malambo matanu na nimohi, Yesu ohomutukulaga Peduru, Tiyagu na mbalaye Juwawu, aliwa dowa gwela mwango olapa.

² Kagagwenle vazulu vale, anamamuharaye ale kohoonaga makalelo a Yesu tchindjeya. Kove yaye yohoromaga jerimela nnga nzuwa eto jowara jaye johosanduwaga, aliwa kala jotchena nnga wareya.

³ Evale morurumutcha kohatwanyuwelaga alombwana ambinli, Mozeji na Eliya, aliwa za wongaga na Yesu.

⁴ Evale mulombwana Peduru ohowongaga na Yesu eraga: <<Nabwiya, yali yapama nikalegeni wewuno. Mwafuna, miyo nnosakanya misasa miraru. Mmohi wenyu, mmohiwa wa Mozeji, mmohiwa wa Eliya.>>

⁵ Mwa enne mulombwana Peduru awongagave enne murambo omoneya ohozaga, akunela atene. Kavuruwanaga, mmiramboni mule mohokumelaga nizu nawongaga niiraga: <<Ula gu Mwanaga unamuziveliwa miyo, wenno unadihagalaliha. Munvwelelege liyene!>>

⁶ Anamamuharaye ale kagavwile nizu nne, kohorendjeyaga, aliwa gwa, kaing'anihaga kove diwa vati.

⁷ Evale Yesu ohozaga, liye asakwinya, aawandelaga eraga: <<Kavenyani, kamuove!>>

⁸ Aliwa kagavenyile, kagaing'anihile meso ewa vevale vafwanyeya Yesu, kamuonnevo Yesu bahi.

⁹ Mwa enne kawelagawo mwangoni ule, Yesu ohawandelaga eraga: <<Kamumwandele mutu zela jejo jionne nyo, fiyeda Mwana wa Mutu avenyihiwe mokwani!>>

¹⁰ Evale anamamuharaye ale kohonfukaga keraga: <<Nnga mwasiwa gwa nni anamafundjiha malamulo wongaga ira Eliya unakala murandji za Namatikeliwa ahanaze?>>

¹¹ Evale liye ohowakulaga eraga: <<Tchi ibaribari ira murandji za unakala Eliya eto aza unosakanyeda jatene.

¹² Mbwenye miyo nnouwandelani ira Eliya uhuza eto aliwa kiwandile muiziwa. Komusasanya na makalelo ohokala pama nnga mufunele atu. Sawasawa eto Mwana wa Mutu, na liyene unoza aonihiwe goyi mmandani mwiwa.>>

¹³ Mwa enne anamamuharaye ale kohowanda onelramo ira liye awongaga zela Eliya, amuwonga mulombwana Juwawu Mbatizi.

Vulumutchiwa wa mwana mmohi

¹⁴ Mwa enne kagafiyile nimburo vafwanyeya mwindji wa atu, mulombwana mmohi ohozaga wa Yesu, liye mukokorela awongaga eraga:

¹⁵ <<Nabwiya, muwendeleni tangaranga mwanaga. Mwasiwa liye unafwanyeyana vindjilendjile eto unozuzumihiwa bure. Fendo didjindji dene liye unogwela veko nari mwiko.

¹⁶ Miyo dohomutukula, muzana wa anamauharaninyu, mbwenye aliwa kiwandile nvulumutcha!>>

¹⁷ Evale Yesu ohowakulaga eraga: <<Nyo atu ohokana nroromelo eto oviringana nyo! Kodi miyo nnafuna dikale na nyo fiyeda alini? Miyo nnafuna divilele na joira jenyu fiyeda alini?>> Evale ohomuwongana mulombwanole, liye kwi: <<Kamuzena mwanawo uyo vali miyo va.>>

¹⁸ Kagamuzilena, Yesu ohomusumululaga munemba wabure ule, liye kumamo mwa muzombole. Roma ora imohive yenne muzombole ohovulumuwaga.

¹⁹ Noira eno, anamamuharaye kohomuwandamelaga Yesu, aliwa nfuka vewa vene keraga: <<Nnga mwasiwa gwa nni hiyo niza nahawandaga mutamangiha?>>

²⁰ Liye ohawakulaga eraga: <<Muza mwahawandaga nvulumutcha mwasiwa muire kana nroromelo noyeva! Tchoira na ibaribari nnouwandelani ira mwakana nroromelo nnga mbewu imohi ya mostarda, nyo munerege wonga na mwangola ira: <We mwango katama, udowe wakale ule.> Eto mwaira eno, jatene jinerege ireya. Kinakalavo inaurutchegeni!>>

²¹ Mbwenye munemba wabure wenne ira atamangihiwe, unazela muwari mwa nyo lobela no jejuwari.

Yesu ohowongave akoka zela kwa waye no venya waye mokwani

²² Siku nimohi Yesu na anamamuharaye kagali vamohi ilambo ya Galileya, Yesu ohawandelaga eraga: <<Mwana wa Mutu unovahediwa mmandani mwa atu,

²³ eto anofiyeda mpa. Mbwenye akwa, siku naneraru unovenya mokwani!>> Mwa enne anamamuharaye ale kagavwile mazu anne kohokagana kumbanya ulukulu.

Yesu na Peduru kohovelela misoko

²⁴ Evale kagafiyile Kafaranamu, anamasokiha misoko anno kasoka misoko da Nyumba ya Yehova kohonfwanya Peduru, aliwa nfuka keraga: <<Kodi namafundjiha wenyule kanavelela misoko da Nyumba ya Yehova?>>

²⁵ Peduru ohowakulaga, liye ira: <<He, liye unovelela!>> Noira enne, Peduru ohofiyaga vande vali Yesu. Agavolowile mmba mwali Yesu mule, ahanamuwandelemove, Yesu ohonfukaga eraga: <<Katchiye Simawu, weyo unaonamo avi? Kodi amwene a ilambwela anaasoketcha ani misoko? Anaasoketcha ahimiwa owu atu amohiwa?>>

²⁶ Evale Peduru ohowakulaga eraga: <<Amwene anaasoketcha atu amohiwa hiya ahimiwa!>> Mwa enne Yesu ohowonga eraga: <<Uhuwakula pama! Ku wonga ana mwene kinasokiwa misoko.

²⁷ Mbwenye masiki eno, voira hiyo kannafuna atakaleliwiha aliwa, miyo nnouwandela ira inafwanela uvenye, udowe iko, watatilele imezo yawo mwiko, umeze somba yoromene inafuna za imezoni ule. Wagaimezile sombele, ugudubulre wanoni waye ule, unofwanya kobiri imohi yokwakwana misoko da atu ambinli. Utukule ira udowe wavelele musoko waga na musoko wawo!>>