Matewuji 16 - Mazu Otchena a Mulungu

AFarizewu na aSadusewu kohonvepa Yesu ionihedo

¹ Evale aFarizewu na aSadusewu kohozaga wa Yesu ira kamuxixe, aliwa muwongana keraga: <<Hiyo nnafuna muniirele ionihedo imohi ira niwande kana ibaribari ira nyo mukumele zulu wa Mulugu!>>

² Yesu mbwenye ohawakulaga eraga: <<Nyo ora ya tchiguwo mwaona zulu wagali wofila, munawonga ira: <Zulu para kala wofila eni ku wonga metchelo unde unokala pama.>

³ Mbwenye siku nimohi niwa mwaona zulu wagali wofila na mabebehi, muni: <Zulu uhukala mirambo dofila na dodiba. Ku wonga peno unde kunakala pama.> Mwairaga eno ku wonga nyo munowanda iziwa makalelo a zulu. Nnga akala munowanda tapulela jionihedo ja zulu, mwasiwa gwa nni nyo hawandaga tapulela jionihedo jotonyiheda tempu inna hiyo ila?

⁴ Atu a tempu ili hiyo ila ba atu abure, atu oraruwa. Anavepa ira kaone ionihedo. Mbwenye aliwa kinavahiwa ionihedo ili yatene yahali ionihedo ya mulombwana Jonasi.>> Nowonga enne, ohahiyaga evale, liye venyavo.

Leverina wa aFarizewu na aSadusewu

⁵ Anamamuharaye kalambuwaga, kadowaga kombela ya ule, kohodiwalaga tukula pawu.

⁶ Noira enne, Yesu ohowongaga eraga: <<Polre polre. Inafwanela muwande rambela leverina wa aFarizewu na aSadusewu!>>

⁷ Anamamuharaye ale kagavwile enne, kohoromaga wonga oka oka keraga: <<Yesu unawongela eni na mwasa oira kanitukunle pawu!>>

⁸ Mwa enne Yesu ohowongaga eraga: <<Nyo atu oyeva nroromelo nyo! Kodi munawongela nni nyoka nyoka na mwasa ohokana pawu?

⁹ Kodi na vanove kamunaonelremo? Kodi nne kamunaumbuwela pawu tanu daadjihilena miyo atu 5.000? Atu atene kagarumbanle, mwagudenlege migogoda mingasi da jejo jahanle?

¹⁰ Eto dagaadjihile atu 4.000 na pawu tanu na mbinli mwagudenle migogoda mingasi da jodja jahanle?

¹¹ Mwasiwa gwa nni nyo hawandaga onelramo ira miyo kannawonga zela leverina wa pawu? Mbwenye nnawonga ira muwande rambela leverina wa aFarizewu na aSadusewu!>>

¹² Mwa enne pawandile onelramo anamamuharaye ale ira Yesu kawonga zela leverina onyakuwiha pawu. Mbwenye liye awonga zela jofundjiha ja aFarizewu na aSadusewu.

Umboni wa Peduru zela Yesu

¹³ Evale Yesu agafiyile pandi ya Sezariya wa Filipi, ohafukaga anamamuharaye eraga: <<Kodi atu kadiona miyo Mwana wa Mutu, anadira dili ani?>>

¹⁴ Evale aliwa kohowakulaga, aliwa ira: <<Atu amohiwa anauirani: <Juwawu Mbatizi>, amohiwa anauirani: <Eliya>, amohiwa anauirani: <Jeremiya>, amohiwa anauirani: <Namafiyiheda mmohiwa wa wanle!> >>

¹⁵ Evale Yesu ohawelihedaga, liye ira: <<Nnga nyo? Kodi nyo mwadiona, munadiira ani?>>

¹⁶ Agafukile enne, Simawu Peduru ohowonga ira: <<Nyo muli Namatikeliwa, Mwana Mulugu Okalawo!>>

¹⁷ Noira enne, Yesu ohowongaga eraga: <<Orelihiwa gu weyo mulombwana Simawu mwana Jonasi, mwasiwa jejo jiwongile we, uuwandenle kahi mutu wa sangiri nne wa maningo. Mbwenye uuwandenle jejo gu Baba wenno uli zulu!

¹⁸ Tchoira na miyene eto nnouwandela ira weyo Peduru nzina nawo tapulela nibwe. Eto mwa nibwe ni nnomanga nikuru naga. Eto nne Nimburo na Anokwa kaniza nigondjiha nikuru naga!

¹⁹ Miyo nnouvaha maxavi a Umwene wa zulu. Jatene jinamangege we mwilamboni ya vati, na zulu wene jinerege mangiwa. Eto jatene jinamasule we vati vano, na zulu wene jinerege masuliwa.>>

²⁰ Noira enne, ohawandelaga anamamuharaye ale moakokomeza, liye ira: <<Kakalevo unafuna nyo muwandela ira Yesu gu Namatikeliwa!>>

Yesu ohowonga zela kwa waye no venya waye mokwani

²¹ Kuma evale Yesu ohoromaga aonihedamo anamamuharaye ale ira: <<Ili yofwanela didowe Jeruzalemu ira daonihiwe goyi na andimuwa a aJudewu, na andimuwa a anamakuta na anamafundjiha malamulo. Eto era eno, nnopiwa. Mbwenye siku naneraru nnovenya mokwani!>>

²² Noira enne, mulombwana Peduru ohomudowana Yesu vokala ha vale, liye roma musumulula eraga: <<Nabwiya jejo kajiireye. Mulugu karumelihe ira jejo juufwanyeni nne vang'ono!>>

²³ Yesu mbwenye ohomuwakulaga Peduru eraga: <<Kakumawo sogolro waga wu, Satana we! Weyo uli mutu odigwagwadutcha! Mwasiwa weyo kunaumbuwela makalelo a Mulugu, mbwenye unaumbuwela nnga makalelo anaumbuwela atu a mwilamboni.>>

Yesu ohowonga zela makalelo omuhara

²⁴ Noira enne, Yesu ohowongaga na anamamuharaye ale eraga: <<Akala uhukalawo unafuna dihara miyo, inafwanela alramwise ingumi yaye, atukule muradi waye, arome dihara!

²⁵ Tchoira mutu wenno unavende jovulumutcha ingumi yaye, liye unagomela iyelela ingumi ya ibaribari. Mbwenye mutu wenno unayelele ingumi yaye ya ilambo ya vati na mwasa wa miyo, unagomela kana ingumi ya ibaribari.

²⁶ Mutu adjavo jatene jili mwilamboni ya vati, amala apuzeya ingumi ya ibaribari, jaye jipile liye jinafuna jimpindulre nni? Tchoira mutu agapuzeyile ingumi yaye, kilivo yengo inawanda liye pagalri ira awande iwombola!

²⁷ Mwasiwa Mwana wa Mutu unaza aze na undimuwa wa Babaye, vamohi na angelro. Agazile, unerege mutambilriha kada mutu na mabasa ahinda liye.

²⁸ Na ibaribari nnouwandelani ira amohiwa anafwanyeya veva anoza kamuone Mwana wa Mutu azaga na umwene waye, aliwa kahanalawihe ukwa.>>