Matewuji 15 - Mazu Otchena a Mulungu

Yesu ohasumulula aFarizewu

¹ Mwa enne kohozaga wa Yesu anamafundjiha malamulo na aFarizewu, kakumelaga Jeruzalemu, aliwa nfuka keraga:

² <<Kodi mwasiwa gwa nni anamauharawo aliwa viringanihaga sanganiko da makolo a wanle? Tchoira aliwa anodja kahanahambemo movirihamo makalelo anera hiyo!>>

³ Yesu mbwenye ohawakulaga eraga: <<Nnga nyo, kodi mwasiwa gwa nni nyo viringanihaga malamulo a Mulugu na mwasa wa sanganiko nnahara nyo?

⁴ Tchoira Mulugu ohowonga ira: <Umurihedege babawo na mmawo.> Eto Mulugu ohowonga ira: <Mutu wenno unawonge ubure zela babaye, nari zela mmaye, apiwe!>

⁵ Mbwenye nyo muhuwanda futukula jejo jiwongile Mulugu, nyo sakanya nlamulo nenyu noira: <Akala mutu ohokana yengo yafuna liye mukamihedana babaye nari mmaye moariheda, mbwenye liye awonga ira: <<Miyo yenna dihivelela wa Mulugu!>>, vo mbwenye mutule liye podi haakamiheda eto haariheda ababaye ale.>

⁶ Na makalelo anno, nyo munatukula sanganiko denyu, nyo kwihana mazu a Mulugu.

⁷ Nyo angongomwa nyo! Nona namafiyiheda Izaiya awonga ibaribari zela nyo afiyihedaga mazu a Mulugu oira:

⁸ <Atwayo anaditamalela miyo na milomo bahi. Mbwenye murima wewa uli olapela wene na miyo.

⁹ Eto aliwa kaditamalelaga, anaditamalela vasayi. Eto aliwa anafundjiha jofundjiha ja atu, aliwa wesaga nnga ti jofundjiha jaga.> >>

Jengo jinamutakaliha mutu

¹⁰ Noira enne, Yesu ohaitanaga anamwindji kafwanyeyaga evale, liye awandela eraga: <<Muvuruwane pama inafuna miyo uwandelani ira muwande onelramo.

¹¹ Yengo inavolowa wanoni wa mutu kinamutakaliha mutu. Mbwenye inamutakaliha mutu tcheniyo inakuma wanoni wa mutu.>>

¹² Noira enne, anamamuharaye ale kohozaga wa Yesu kawongaga keraga: <<Kodi nyo muhuiziwa ira aFarizewu kagavwile jatene jiwongile nyo jile, kohotakaleliwa?>>

¹³ Yesu ohawakulaga, liye ira: <<Mutengo uli watene ahazaliwe na Baba wa zulu, unoduliwa!

¹⁴ Kaahiyeni eno. Aliwa ba asogolrelri ohoona. Mutu ohoona afuna jomusogolrelra maliba haona nfwaye, ambinlene anagomela morela nkwegweni!>>

¹⁵ Evale mulombwana Peduru ohowongaga eraga: <<Niwandeleni yotapulela ya mazu mwawongile nyo ale!>>

¹⁶ Yesu ohowakulaga eraga: <<Evale na vano na nyenne kamunawandeve onelramo?

¹⁷ Kodi nyo kamunawanda iziwa ira yengo yavolowa wanoni inadowa munifuni, yakuma munifuni, kumela unde?

¹⁸ Mbwenye yenno inakumela wanoni wa mutu inakumela mmirimani. Yeniyo mbwenye tchinamutakaliha mutu!

¹⁹ Mwasiwa mmirimani munokuma joumbuwela jabure, jompa mutu, raruwa, unyambi, uba, umboni onama no luluvihana.

²⁰ Jengo jeji ti jejo jinamutakaliha mutu! Mbwenye dja eno ohohambamwene kunamutakaliha mutu uli watene.>>

Yesu ohonvulumutcha mwana wa nkuda Kana

²¹ Yesu ohokumaga vali liye, liye susa, dowa ilambo yenno wafwanyeya sidadi da Tiru na Sidoni.

²² Evale muhiyana mmohi nkuda Kana, akaletcha mwilamboni mwemule, ohozaga wa Yesu amukuwelaga eraga: <<So Nabwiya, Mwana Davi, diwendeleni tangaranga miyo vano. Mwasiwa mwanaga wa muhiyana unozuzumihiwa na munemba wabure na makalelo ohokala a masika!>>

²³ Yesu mbwenye kamuwakunlege. Evale anamamuharaye kohozaga vafwanyeya Yesu vale, aliwa za nvepa keraga: <<Kamuwongenani muhiyanole awele, adowege. Mwasiwa unosimbwa nihara akuwaga mundulri mwihu!>>

²⁴ Yesu mbwenye ohawakulaga eraga: <<Miyo dirumiwaga, dazela mabila odimela a nlogo na aIzarayeli!>>

²⁵ Eto muhiyanole ohofiyaga wa Yesu, liye mukokorela, amuwongagana eraga: <<Nabwiya, dikamihedeni!>>

²⁶ Yesu ohomuwakulaga, liye ira: <<Kahi pama awaka ahima pawu, dowa atatilela ana anambwa.>>

²⁷ Evale muhiyanole ohomuwakulaga eraga: <<He, Nabwiya pu mwemo munawongela nyo! Mbwenye masiki eno, ana anambwa anodowa mutchindo mwa meza ya mbwiyiwa, aliwa dodelaga jinyenyeri jinamorela vati!>>

²⁸ Evale Yesu ohomuwakulaga eraga: <<Muhiyana we, nroromelo nawo ti nlukulu. Uireliwe yenno ifunne we!>> Mwa enne tempu imohive yawonga Yesu mazwale, muhiyanole mwanaye ohovulumuwaga.

Yesu ohavulumutcha atu adjindji

²⁹ Yesu ohovenyaga, liye dowa tcherela ya ntiya na Galileya, noira enne ohodowaga, liye gwela mwangoni garati wewule.

³⁰ Evale anamwindji oindjivetchetcha kohazagana aliba rangala, aliba haona, atu ohowonga, aliba howenda, na amohiwa oindjivene, aliwa ahiyaga valigi Yesu. Evale liye ohavulumutchaga.

³¹ Agaavulumutchile, mwindji wa atwale kafwanyeya evale kagaaonne aliba hawonga kawongaga, aliba rangala kavulumuwaga, aliba hawenda kawendaga na aliba haona kaonaga, aliwa kohotikinaga. Eto mwa enne aliwa komutitimihaga Mulugu wa Izarayeli.

Yesu ohadjiha atu fendo yanembinli

³² Noira enne, Yesu ohaitana anamamuharaye, liye awandela eraga: <<Miyo nnoakumbanya anamwindjala, mwasiwa aliwa kohomala malambo mararu kagali na miyo eto kinna yengo ira kadje. Eto miyo kannafuna ira daalanye aliwa kadowege eno na ndala diwa dene, tawiha ira anahileye mundila kadowaga.>>

³³ Evale anamamuharaye kohomuwandelaga keraga: <<Nnga hiyo naone waani pawu didjindji nimburo mwahali yengo muli hiyo muno dokwakwana ira atu atene anna kadje?>>

³⁴ Noira enne, Yesu ohafukaga, liye ira: <<Nnga nyo munna pawu dingasi?>> Aliwa kohowakulaga, aliwa ira: <<Ninna pawu tanu na mbinli vamohi na somba ding'onong'ono dingasi dingasi.>>

³⁵ Evale Yesu ohawongana anamwindjale ira: <<Kagaratini vati.>>

³⁶ Noira enne, ohotukulaga pawu tanu na mbinli dile na somba dile, liye mutamalelana Mulugu. Nomala eno, ohoroma meya, liye avaheda anamamuharaye, aliwa roma agawelaga anamwindji atene kafwanyeya evale.

³⁷ Atene kohodja, aliwa rumbala, fiyeda tchelela jodja jile. Evale kohogudelaga jodja jatene jahanle, fiyeda zala migogoda mitanu na minli.

³⁸ Fwanyeya ira atu kadjilege jodja jile, alombwana ve kali 4.000, hiya ahiyana na ahima.

³⁹ Noira enne, Yesu ohalanyaga anamwindjale, liye gwela mmwadeyani, dowaga pandi ya Magada.