Matewuji 13 - Mazu Otchena a Mulungu

Yofwalrafwaniha ya maliba woka mbewu

¹ Siku nimohive nenne, Yesu agakumile mmba mule, ohomaruwaga, liye dowa garati tcherela ya ntiya.

² Mwa enne ohogumana mwindji ohokala wa masika, aliwa za wa liye. Yesu agaaonne atwale, ohogwelaga mmwadeyani, liye garati. Eto mwindji watene kafwanyeyaga kagaimenle tcherela ya ntiya nne.

³ Mwa enne Yesu ohoromaga awandela jengo jidjindji mwa jofwalrafwaniha eraga: <<Ohokalawo mulombwana mmohi avenyilege ira adowe awoke mbewu.

⁴ Awokaga, mbewu dimohi diwa dohomorelaga mmambalo mwa ndila. Evale mbalrame dohozaga, aliwa dja.

⁵ Eto mbewu dimohi diwa damorenlege nimburo nafwanyeyana mabwe, vevo vahali teya idjindjene. Evale kadarutchile, dohomelaga mobaranya, mwasiwa mbewu dile kadatimbeleyile bure.

⁶ Mbwenye nzuwa nagazilewo, mbewu damenle dile dohomala ja, aliwa umma, mwasiwa mitchitchi diwa kadadowile vati na mwasa wa mabwe ale.

⁷ Mbewu dimohi diwa damorenlege vamingani. Evale minga dile diulukulaga, dohopitikelrelra jomela jile, aliwa nyala.

⁸ Mbwenye mbewu dimohi diwa dohomorelaga vateyani vapama. Evale dohomelaga, aliwa ulukula, vaha jovaha jidjindji. Dimohi diwa dohovaha jovaha 100, dimohi diwa 60, dimohi diwa 30.

⁹ Ule unna mabaru ovwana, avwe.>>

Mwasa wawongela Yesu mwa jofwalrafwaniha

¹⁰ Evale Yesu agamanle wonga enne, anamamuharaye kohozaga, aliwa nfuka keraga: <<Kodi mwasiwa gwa nni nyo awandelaga atu mwa jofwalrafwaniha?>>

¹¹ Evale Yesu ohawakulaga eraga: <<Nyo muhuvahiwa ira muonelremo jokoyeya ja Umwene wa zulu. Mbwenye aliwa kivahiwe.

¹² Tchoira mutu wenne unna, gunafuna vahiwave, liye wendjediwagave. Mbwenye ule ahanna, eto mwa yengo ya vang'ono yenno inna liye, unoza awakiwe.

¹³ Na mwasa wenno miyo nnaawandela mwa jofwalrafwaniha ira aliwa masiki kaganna meso, kaing'anaga, kahawande ona eto kagannave mabaru, kavuruwanagave, kahawande vwa nne kahawande onelramo inawonga miyo.

¹⁴ Aliwa jatene jinera atu jinafuna jikwakwanelihede mazu Mulugu awongile liye muwari mwa Izaiya ira: Na ibaribari, vwave, munerege vwa, mbwenye kamuza muonelragamo. Eto onave, munerege ona, mbwenye kamuza muiziwaga pama!

¹⁵ Mwasiwa atwala mirima dewa dinnanave vanda. Kagannave mabaru, anavwa vang'ono. Kagannave meso, anaona vang'ono bahi. Kinafuna ona na meswiwa nne kinafuna vwa na mabaruwa, tawiha ira anoza kaonelremo na mmirimani mwewa, katwaruwe ira miyo daavulumutche.

¹⁶ <<Mbwenye orelihiwa ba meso enyu mwasiwa anowanda ona eto orelihiwa ba mabaru enyu mwasiwa anovwa!

¹⁷ Na ibaribari nnouwandelani ira anamafiyiheda adjindjene na atu owongowa adjindji a malambo a mundulri, kohofunafuna ira kaone jengo jejo jinaona nyo, mbwenye aliwa tchaonile. Eto aliwa kohofunafuna ira kavwe jengo jejo jinavwa nyo, mbwenye tchavwile!>>

Yotapulela ya yofwalrafwaniha ya namawoka mbewu

¹⁸ Yesu ohowongagave eraga: <<Kavuruwanani pama yotapulela ya yofwalrafwaniha ya namawoka mbewu damuwonga miyo ule.

¹⁹ Mutu uli watene unavuruwana mazu a muUmweneni ahaonelragamo, unaza gu Mutu Wabure, liye muwaka jejile jizaliwe mmirimani mwaye. Ku wonga yenno tchi mbewu yamorenle mmambalo mwa ndila.

²⁰ Eto mbewu yenne yamorenle vateyani vafwanyeya mabwe gu mutu wenne unavwa mazu eto agavwile evale unowanda awatchela mohagalala.

²¹ Mbwenye voira liye kanna mitchitchi mwa liye eka, jejile kajinadibeliwa. Kagazile makatamiho no harahariwa na mwasa wa mazu, mobaranya unowelela mundulri.

²² Eto mbewu yenne yamorenle vevo vamenle minga gu mutu wenne unavwa mazu, mbwenye agavwile enne, kaza makatamiho a mwilamboni na jonyenga ja jorayela, jatene ejo jinopitikelrelra mazu avwile liye, evale liye kanavaha jovaha.

²³ Mbwenye mbewu yenne yamorenle vateyani vapama gu mutu wenne unavwa mazu, aonelragamo, ante afiyeda vaha jovaha jimohi jiwa 100 owu hehi 60, owu hehi 30.>>

Yofwalrafwaniha ya mwidani mmohi awokile ntandje mmundani mwa tirigu

²⁴ Noira enne, Yesu ohowongaga yofwalrafwaniha imohiwa eraga: <<Umwene wa zulu unafwalrafwana na mulombwana mmohi azanle mbewu yapama ya tirigu mmundani mwaye.

²⁵ Mbwenye na mahiyu anamalabaye kagonaga, ohozaga mwidanaye, liye woka ntandje vari va munda vale, liye dowaga.

²⁶ Noira enne, tirigule agamanle ulukula, agamanle manga mihumbu, ntandje nne nohooneya mmundani mule.

²⁷ Anamalabale kagaonne ntandje nne, kohomaruwaga, dowa nfwanya mwinnya wa mundole, aliwa muwandela keraga: <Mbwiyeni nihifwanyamo ntandje mmundani mule. Kodi kamwanizalihilemo mbewu yapamave? Nnga ntandje nne nnakumela waani?>

²⁸ Evale liye ohowakulaga eraga: <Ukala mwidani uzile asakanya jejo.> Evale anamalaba ale kohonfukaga keraga: <Mbwiyeni nnga nyo munofuna ira hiyo nidowe nadulemo?>

²⁹ Liye ohowakulaga, liye ira: <Nari! Muhiye mwemule, tawiha ira mwadulaga ntandje niwa, munadulege vamohi na tirigu wenne!

³⁰ Muhiye jatene jiulukulege vamohi ante tempu ya mahandelo. Tchoira tempu yohanda yafiya, miyo nnoawandela anamahanda ira: <<Mubabihe gudela ntandje natene vamohive, mumangihege mapitika mapitika ira jitumeyiwe. Mbwenye tiriguwa, mugudele, mudowena musandjani mwaga!>> > >>

Yofwalrafwaniha ya mbewu ya mostarda

³¹ Eto ohawandelaga yofwalrafwaniha imohiwa eraga: <<Umwene wa zulu unalingana na mbewu ya mostarda, yenno mulombwana mmohi atukunle liye, azala mmundani mwaye.

³² Fwanyeya ira mbewu ya mostarda tchi mbewu ing'ining'inive igomihede yeva muwari mwa mbewu datene da mmundani. Mbwenye mulombwanole agamanle zala, yagamenle, mutenguwa ohoulukula kwaranya mbewu datene dozaliwa da mmundani. Evale mbalrame dovava zulu dozaga, aliwa mangaga jitundji mutambini mwa mutengole.>>

Yofwalrafwaniha ya leverina

³³ Nomala eno, Yesu ohawandelagave yofwalrafwaniha imohiwa eraga: <<Umwene wa zulu unalingana na leverina muhiyana mmohi atukunle liye, adowa atanganiha na malanta mararu a utu. Liye agatanganihile, masa matene kohonyakuwa.>>

Yesu alabana jofwalrafwaniha ve

³⁴ Jatene jeji jawongile Yesu na mwindji wa atu, awonga mwa jofwalrafwaniha. Eto kilivo nne yengo imohi yahawongile liye muwari mofwalrafwaniha.

³⁵ Jatene ejile ali ira jikwakwanele na mazu awongile namafiyiheda mmohi wanle ira: Miyo nnofugula mulomo waga, diwongege mwa jofwalrafwaniha. Nnovweyiha jengo jejo jali jokoyeya romela mapanduwelo a ilambo!

Yotapulela ya yofwalrafwaniha ya ntandje

³⁶ Noira enne, Yesu ohahiyaga anamwindjale evale, liye dowa volowa mmba. Agavolowile mmba mule, anamamuharaye kohozaga, aliwa nfwanya, atu kwi: <<Niwandeleni yotapulela ya yofwalrafwaniha ya ntandje nafwanyeya mmundani mule!>>

³⁷ Evale liye ohowakulaga eraga: <<Unazala mbewu yapama gu Mwana wa Mutu.

³⁸ Eto munda damuwonga miyo unafwanyeya agali ilambo ya vati. Mbewu yapama yazanle mundimuwole ba ahima a muUmweneni. Eto ntandje nne ba ahima a Mutu Wabure.

³⁹ Eto mwidani wenno azile wokamo ntandje nne unafwanyeya agali Diyabo. Eto mahandelo uwa unafwanyeya agali magomelo wa ilambo eto anamahanda ba angelro.

⁴⁰ Mwa eno, voira ntandje nnogudeliwa dowa tumeyiwa na munlo eto pinafuna ireya magomelo wa ilambo.

⁴¹ Mwana wa Mutu unoza aarume angelro aye ira kaakumihemo muUmweneni mwaye anne anaategiha afwiwa vamohi na aliba tega.

⁴² Kagamanle akumihamo, anoatatilela muhofuni mwa munlo ohindetchetcha. Wewule mbwenye unoza ukale nla no takuna meno!

⁴³ Mbwenye atu apama anoza kakayena wareya nnga nzuwa muUmweneni mwa Babiwa. Ule unna mabaru ovwana, avwe.>>

Yofwalrafwaniha ya yengo yofuneyetchetcha yatimbeliwe

⁴⁴ Yesu ohowongagave eraga: <<Vamohive vevo Umwene wa zulu unalingana na yengo yofuneyetchetcha yatimbeliwe mmundani mwa mutu. Evale mulombwana mmohiwa ohoifwanya yengwele. Agaifwanyile, muwari moira mundole kaali waye, liye aromile weliheda vali atu. Mwa enne ohokagana hagalala, liye venya dowa guliha jatene janna liye, tukula kobiri diwa, liye gulana mundole ira adje yengwele.>>

Yofwalrafwaniha ya nibwe nofuneyetchetcha

⁴⁵ Yesu ohowongagave eraga: <<Vamohive vevo, Umwene wa zulu unalingana na mulombwana mmohi osakanya malronda, wenno asaka mabwe ofuneyetchetcha.

⁴⁶ Evale liye asayelagave, ohofwanyaga nibwe nimohi nofuneyetchetcha, nokwima bure. Mwa enne ohovenyaga, liye dowa vande vaye, guliha jatene janna liye, dowa gula nibwe nne.>>

Yofwalrafwaniha ya ntavi na somba

⁴⁷ Yesu ohowongagave eraga: <<Vamohive vevo Umwene wa zulu unalingana na ntavi navokediwe mwiko niwandaga dodela somba da makalelo matene.

⁴⁸ Nagazanle, aliba meza ale kohotutumulela tcherela ya bara, aliwa dowa garati roma sakulrelraga somba dapama, aliwa helaga mungogodani, mbwenye jatene jabure kohotatila.

⁴⁹ Yengo imohive tchinafuna za ireya magomelo wa ilambo. Angelro anoza kaasakulrelemo atu apama na abure.

⁵⁰ Eto anoza kaatatilele atu abure muhofuni mwa munlo ohindetchetcha wewo unaza ukale nla no takuna meno.>>

Makalelo a namafundjiha wapama

⁵¹ Noira eno, Yesu ohafukaga anamamuharaye eraga: <<Kodi muhuonelramo jatene jiwongile miyo?>> Evale aliwa kohomuwakulaga keraga: <<He, nihionelramo!>>

⁵² Nomala enne, ohawandelaga eraga: <<Akala muhuonelramo, miyo nnouwandelani ira namafundjiha malamulo wenno ufundjihile ja Umwene wa zulu unalingana na mwinnya wa vande, wenno unawanda dowa nimburo naye nokoyamo jaye, liye kumiha jengo japama jixa vamohi na jengo japama ja wanle.>>

Yesu agali sidadi ya Nazareti

⁵³ Yesu agamanle wonga jofwalrafwaniha jatene ejile, ohovenyagavo nimburo nenne.

⁵⁴ Noira enne, ohowelelaga ilambo ya waniwa, liye fundjihaga munyumbani mwiwa mwemo mwafundja atu mazu. Evale atu atene kavuruwana jawonga liye, kokala otikiniheyene kafukaga keraga: <<Kodi zelru unna liye na kopolo doirana jotikiniha ji, unakumana waani?

⁵⁵ Kodi wenna kahi mwana namasema? Nnga mmaye kahi wenno unaitaniwa Mariya? Liye mbalaye kahi Tiyagu, Joze, Simawu na Judaji?

⁵⁶ Nnga kodi arongoliye kahi anna anakala tatamo yenna? Nnga jatene jinaira liye ji jinakumela waani?>>

⁵⁷ Na mwasa wenne, kohomutakaleliwa. Mbwenye Yesu ohawandelaga eraga: <<Namafiyiheda unorihediwa pandi datene dene, mbwenye ilambo ya waniwa na atu a vande vaye kinamuriheda.>>

⁵⁸ Nona na mwasa ohofuna roromela wewa, wewule Yesu kasakanyilewo matikiniho madjindji a kopolo.