Matewuji 12 - Mazu Otchena a Mulungu

Yesu gu mwinnya wa sabado

¹ Mwa tempu yenne, siku nimohi na sabado, Yesu ohoviraga na anamamuharaye nimburo eni wafwanyeya munda wa tirigu. Evale anamamuharaye na mwasa wa ndala, kohoromaga kotola mangala a tirigu, aliwa takunaga.

² Evale aFarizewu kagaonne enne, kohomuwandelaga Yesu keraga: <<Kaing'anani! Anamauharaninyu anairana yenno inakameliha malamulo irana siku na sabado.>>

³ Mbwenye Yesu ohawakulaga, liye ira: <<Kodi nyo kamunaileri mMazuni jejo jairile mulombwana Davi tempu yanna liye ndala vamohi na afwaye annaga liye?

⁴ Navenda mMazuni nnofwanyamo ira Davi aganna ndala, ohovolowa Nyumba ya Mulugu, liye dja pawu dotchenihiwa, pawu dedile datapulela ira Mulugu uli vamohi na atwaye. Eto fwanyeya ira muwari mwa malamulo kavali jowandeya ira Davi atukule pawu dedo arome djaga nne afwaye. Mbwenye anarumelihiwa ira kadje ba anamakuta bahi! Mulugu mbwenye kamutakaleliwe mulombwana Davi.

⁵ Vamohive vevo, kodi nyo kamunaileri mmalamuloni ira anamakuta kalabaga mabasiwa siku na sabado Nyumba ya Yehova, laba wewo anotakaliha siku na sabado mbwenye kinakana mulandu?

⁶ Miyo mbwenye nnouwandelani ira ukala uzile uli mundimuwa kwaranya Nyumba ya Yehova.

⁷ Nyo ahakanlege muiziwa yotapulela ya mazu a Mulugu oira: <Miyo nnafuna tangaranga hiya mikuto.>, kamwaatongege atu ohokana mulandu.

⁸ Mwasiwa Mwana wa Mutu, unafwanyeya eto agali mwinnya wa sabado.>>

Siku na sabado Yesu ohonvulumutcha mulombwana orangala ndanda

⁹ Noira enne, Yesu ohomaruwaga evale, liye dowa volowa munyumbani mwiwa mwemo mwafundja atu mazu.

¹⁰ Emule mohokalaga mulombwana mmohi annaga ndanda norangala. Mwa enne aFarizewu muwari mofuna ira kawande onavo muselu omunukedana Yesu, kohonfukaga keraga: <<Kodi tchi yengo yorumelihiwa mMalamuloni nvulumutcha mutu siku na sabado?>>

¹¹ Yesu ohowakulaga eraga: <<Kodi muwari mwa nyo mulombwana guvi uni aganna nibila naye, nibila nne nimorela mmulihani siku na sabado ahadowa ahinda, akumihamo?

¹² Nnga ikalele mutu ompumbula? Tchoira mutu gofuneya kwaranya nibila. Mwa eno, miyo nnouwandelani ira tchi yengo yofwanela sakanya upama siku na sabado.>>

¹³ Mwa enne Yesu ohowongaga na mutule eraga: <<Katapula ndanda nawo!>> Evale mutule ohotapulaga ndanda naye. Mwa enne agatapunle, ndanda nne nohowongowaga, aliwa kala pama nnga ndanda nimohi niwa nne.

¹⁴ Noira enne, aFarizewu ale kagakumile evale, kohoromaga mpanganela Yesu ira kampe.

Yesu gu Namalaba osakulriwa wa Mulugu

¹⁵ Yesu muwari moiziwa jejile, ohomaruwaga, ahiya evale, liye dowaga jaye. Evale liye adowaga, kohokalawo atu adjindji kamuhara. Mwa enne liye ohavulumutcha atu atene kali arenda.

¹⁶ Eto oaruma ira: <<Mwadowa, kamuwongege na atu mudivweyihaga.>>

¹⁷ Jatene ejo jalaba ira jiwande kwakwaneliheda mazu a Mulugu anno kawongiwe na namafiyiheda Izaiya ira:

¹⁸ <<Kaing'anani, ula gu namalabaga wenno dimusakunlre miyo, wenno unadihagalaliha kalawo waga. Miyo nnonvaha Munemba waga eto unodowa aalaleyege atu ohokala aJudewu matongelo a ibaribari.

¹⁹ Liye kanakana madugudugu, nne kaza akuwa movweya, nne nizu naye kaniza nivweya murampani.

²⁰ Liye kaza anyenya murere okotoliwa na wanle, nne kaza atimiha munlo uhanlena tuwelave bahi, fiyeda azena matongelo a ibaribari mwatene mwene.

²¹ Eto atu ohokala aJudewu anadedihege nzina naye.>>

Utongi wanna Yesu wotamangihana minemba dabure

²² Noira enne, kohomuzagana mulombwana mmohi ozuzumihiwa na munemba wabure. Muwari mokana munemba wabure mule, mutule kaona nne kawonga. Evale aliwa kagamuzilena wa Yesu, liye ohonvulumutchaga. Mwa enne aganvulumutchile, mutule ohoromaga wonga eto liye onaga.

²³ Atu atene kafwanyeya evale kohotikiniheyaga keraga: <<Kodi wenna kaza akala Mwana Davi?>>

²⁴ Mbwenye aFarizewu kagavwile ejile kohowongaga oka oka keraga: <<Wenna kahi mwana Davi. Liye unatamangiha minemba dabure na kopolo da Belizebu wenno uli mundimuwa wa minemba dabure.>>

²⁵ Yesu mbwenye muwari moiziwa jaumbuwela atu mmirimani mwiwa ohowongaga eraga: <<Umwene watene unavigawa uromaga wana oka oka, unagomela bwanyuliwa. Eto sidadi yatene inavigawa nari nivande nnavigawa, karomaga wana oka oka, magomelo wewa ku bwanyuliwa.

²⁶ Eto Satana akala unomutamangiha Satana, ku wonga Satana mmohive guvigawile, roma wanaga ekave. Nnga jaireya eno, umwene waye unawande limba avi?

²⁷ Eto akala miyo nnatamangiha minemba dabure na kopolo da mundimuwa Belizebu, nnga ahiminyu anatamangiha minemba dabure na kopolo da ani? Na mwasa wenno miyo nnouwandelani ira aliwene anoza kakale anamatonga anafuna utongani nyo!

²⁸ Mbwenye akala miyo nnatamangiha minemba dabure muwari mwa Munemba wa Mulugu, ku wonga Umwene wa Mulugu uhufiya wa nyo.

²⁹ <<Nari kodi mutu unawanda avi dowa vande va mulombwana mmohi olimba adowa amuwaka jengo jaye jatene ahanababihe mmanga? Tchoira liye ahanarome tukula yengo, unaroma mmanga. Amala mmanga, aona ira: <Eniva dihimugondjiha>, unoroma tukula jatene.

³⁰ <<Mutu wenne ahali na miyo, gwenno unadiida. Eto wenne ahanadikamiheda gumaniha, gwenno unamwada.

³¹ Na mwasa wenno nnouwandelani ira yotega ili yatene na jomululuviha Mulugu jatene jinowanda kurumuweliwa. Mbwenye ule unamululuviha Munemba Otchena kaza akurumuweliwa!

³² Mutu awonga ubure zela Mwana wa Mutu unowanda kurumuweliwa. Mbwenye mutu amululuviha Munemba Otchena kaza akurumuweliwa, nne tempu ili hiyo ila nne tempu inafuna za sogolro.>>

Mutengo na jovaha jiwa

³³ <<Mwaona mutengo ovaha jovaha japama, muiziwe ira mutengole gwapama. Mwaona mutengo ovaha jovaha jabure, muiziwe ira mutengole gwabure. Mwasiwa kada mutengo unaiziweya mwa jovaha jaye.

³⁴ <<Nyo mulogo wa jivili nyo! Kodi nyo munawande avi wonga mazu apama agali nyo muli atu abure? Mwasiwa mulomo unawonga jengo jinafwanyeya mmirimani mwa mutu!

³⁵ Mutu wapama unakumiheda unde upama waye wenno unafwanyeya mmirimani mwaye mwapama. Eto mutu wabure unakumiha ubure wenno unafwanyeya mmirimani mwaye mwabure.

³⁶ Miyo mbwenye nnouwandelani ira siku notonga naza nifiya, kada mutu unoza amangiwe mulandu zela jowonga jatene johofwanela jinakumela vamulomoni vaye.

³⁷ Mwasiwa mutu unaza arumeliwe wapama mwa jowonga jaye eto unaza amangiwe mulandu mwa jowonga jaye.>>

Yesu ohowonga zela gwana mulandu wa ale kafuna ona ionihedo

³⁸ Evale Yesu agawongile enne, anamafundjiha malamulo amohiwa na aFarizewu kohoromaga wonga keraga: <<Namafundjiha, hiyo nnafuna muirena ionihedo imohi ira nione!>>

³⁹ Yesu mbwenye ohowakulaga eraga: <<Atu a tempu ili hiyo ila ba atu abure, atu oraruwa. Anavepa ira kaone ionihedo. Mbwenye aliwa kinaireliwa ionihedo ili yatene yahali ionihedo ya namafiyiheda Jonasi.

⁴⁰ Tchoira sawasawa nnga mulombwana Jonasi ohomala malambo mararu ntana na mahiyu mbani mwa somba indimuwa, Mwana wa Mutu na liyene unomala malambo mararu ntana na mahiyu vati va teya.

⁴¹ Siku notonga naza nifiya, atu a Ninive anoza kavenye kaumangeni mulandu nyo atu a tempu ila, mwasiwa aliwa kagavwile mazu a Jonasi, kohowanda twaruwa mwa jotega jewa. Kaing'anani eto wenno uli eva umukwaranya mulombwana Jonasi eto nyo mwagavuruwanile jinawonga liye, kamunafuna twaruwa.

⁴² Siku notonga naza nifiya, mwana muhiyana atonga ilambo ya Suli, liye unoza avenye aumangeni mulandu nyo atu a tempu ila. Inaumangeleni liye mulandu tchoira liye ohovenya waniwa ilambo yolapa, liye dowa ira avuruwane zelru da Salomawu. Eto kaing'anani, peno ukalawo uzile omukwaranya Salomawu wenno. Mbwenye nyo mwagavuruwanile jinawonga liye, kamunafuna vwa.>>

Makalelo a munemba wabure amuwelela mutu

⁴³ Yesu ohowongaga eraga: <<Munemba mmohi otakala akuma mmaningoni mwa mutu unawenda mwemo mwahanafwanyeya mahindje, sakaga nimburo napama ira awande vuma.

⁴⁴ Mbwenye liye asaka, ahafwanye vovuma, unowonga ira: <Nnafuna diwelele vande vevo vikumile miyo.> Era enne unowela, liye dowa vande vale. Afiya vande vale unafwanya kavali mutu eto vihimala jeliwa, vili vapama vene.

⁴⁵ Era eno unodowa tukula minemba dabure dimohi diwa mitanu na minli dokana makalelo abure omukwaranya liye, aliwa za kalaga mmaningoni mwa mutule. Era enne makalelo ogomiheda a mutule anakala otakala kwaranya makalelo oroma anna liye. Makalelo anna banafuna aireyela atu abure a tempu ili hiyo ila.>>

Yesu ohowonga zela ibali yaye ya ibaribari

⁴⁶ Mwa enne Yesu aawandelagave anamwindji ale, mmaye vamohi na abalaye kohozaga, aliwa kala unde, kafunaga ira kawonge na liye.

⁴⁷ Evale ohokalaga mutu azilege muwandela Yesu eraga: <<Mminyu vamohi na adibilinyu anafwanyeya unde wu, anafuna kawonge na nyo.>>

⁴⁸ Yesu mbwenye ohomuwakulaga wenne azilege muwandela, liye ira: <<Kodi mmaga bani? Nnga adibilaga bani?>>

⁴⁹ Noira enne, ohotapula mandaye, liye atonya anamamuharaye eraga: <<Kaing'anani! Mmaga na adibilaga banna kali evano na miyo.

⁵⁰ Tchoira mutu wenno unerana funa wa Baba uli zulu, mbalaga, murongolaga, na mmaga, gwenno.>>