Matewuji 11 - Mazu Otchena a Mulungu

Yofuka ya Juwawu Mbatizi

¹ Yesu agamanle afundjiha anamamuharaye kumi na ambinli ale jatene ejile, ohovenyaga evale dowa sidadi da ilambo yenne, roma afundjihaga eto aalaleyaga atu kafwanyeya emule.

² Mwa tempu yenne Juwawu Mbatizi afwanyeya mukadeya. Evale liye agavwile mukadeya emule zela mabasa ahinda Kiristu, oharumaga anamamuharaye eraga:

³ <<Mudowe mwanfuke muire: <Kodi Namatikeliwa wenno afuna za gu nyenne? Owu hehi nimuing'anelegeve mutu mmohiwa?> >>

⁴ Evale aliwa kagadowile nfuka, Yesu ohawakulaga eraga: <<Mudowe mwamuwandele Juwawu jatene jivwile nyo na jatene jionne nyo.

⁵ Mwamuwandele ira: <Atu ohoona, anoonihiwa, aliba rangala anowenda, aliba maranya anovulumutchiwa, atu ohovwa anovwa, aliba kwa anovenyihiwa mokwani eto aliba simela anolaleyiwa Muselu Wapama.>

⁶ Eto orelihiwa gu mutu wenne ahanadiwanganyeda!>>

⁷ Evale anamamuhara a Juwawu ale kavenyagavo, Yesu ohoromaga awandela mwindji wa atu kafwanyeyaga evale zela mulombwana Juwawu eraga: <<Kodi nyo mudowaga muisalesaleni ira mwamuone Juwawu, mwadowela ona nni? Kodi mwadowela mwaone murere mmohi asakwinyeyaga na nipevo?

⁸ Kodi na ibaribari mwadowela ona nni? Kodi mwadowele muona mutu owara jowara japama? Nari. Kaing'anani, atu owara jowara japama anafwanyeya mmavande mwa amwene!

⁹ Kadiwandeleni, kodi nyo mwadowela ona nni? Kodi mwadowela muona namafiyiheda? He, na ibaribari eto miyo nnouwandelani ira liye uhumukwaranya namafiyiheda uli watene.

¹⁰ Mwasiwa Juwawu gwenno awongiwa mMazuni ira: <Kaing'ana, miyo nnoza dimurume maliba milanyo vasogolro vawo ira asakanyede ndila inafuna we vira.>

¹¹ <<Na ibaribari nnouwandelani ira mwa atu atene obaliwa mwa ahiyana, kalivo mundimuwa omukwaranya mulombwana Juwawu Mbatizi. Mbwenye wenne ugomihedile kala mung'ining'ini muwari mwa Umwene wa zulu, guli mundimuwa omukwaranya Juwawu.

¹² <<Eto roma malambo a Juwawu Mbatizi fiyeda peno, Umwene wa zulu unnana waneliwa kondo. Muwari mowana mule, olimba gunavolowa.

¹³ Tchoira atu kohovwa mazu ofiyihediwa muwari mwa malamulo na anamafiyiheda atene ante tempu ya Juwawu.

¹⁴ Eto nyo mwafuna rumela ibaribari, munororomela ira Juwawu unafwanyeya agali namafiyiheda Eliya wenno afuna za.

¹⁵ Ule unna mabaru ovwana, avwe.>>

¹⁶ <<Kodi atu a tempu ili hiyo ila, nnafuna daafwalrafwanihe na yengo nni? Nnafuna daafwalrafwanihe na makuru menli a ahima anagarati varampani kasakanyaga marandje ewa, kawongelagana keraga:

¹⁷ <Hiyo nihiimba nyumbo da vamateloni eto nyo kamufunile ina. Nomala nihiimba nyumbo da vamakwelo eto nyo kamufunile nla.>

¹⁸ Tchoira Juwawu Mbatizi uhuza. Juwawu Mbatizi agazile, liye kaali mutu odja pwando nne mutu ong'wa. Evale atu kagamuonne enne, atu kwi: <Liye uhukana munemba wabure.>

¹⁹ Eto Mwana wa Mutu agazile unodja, unong'wa. Atu eto ani: <Kamuoneni, wenne gu mutu oziveliwa dja, eto gu namalrezelra. Liye afwaye ba anamasokiha misoko na anamatega!> Mbwenye akala mutu unowenda na zelru, zelru daye nnaoneya muwari mwa joira jaye.>>

Yesu ohowonga mazu owopiha zela sidadi dedile dahafunile muroromela

²⁰ Yesu agawongile eno, ohoroma wonga mazu oagwihana mulandu sidadi dedile mwavirile liye asakanyamo matikiniho madjindjene. Awonga mazu oagwihana mulandu sidadi dile mwasiwa liye agasakanyile matikiniho madjindji muwari mwa sidadi dedile, aliwa tchafunile twaruwa. Mwa eno, Yesu ohowonga eraga:

²¹ <<Udilu wa weyo sidadi ya Korazimi! Udilu wa weyo sidadi ya Betisayida! Mwasiwa matikiniho diirile miyo wa nyo sidadi mbinli, ahakanlege matikiniho anna didowa dairana sidadi ya Tiru na sidadi ya Sidoni, adjindji mwa aliwa kogotwaruwa mwa jotega jiwa. Eto muwari motwaruwa wewa, kogowara masakwi eto kavihelege ndora mmuruni mwiwa.

²² Mwa eno, miyo nnouwandelani ira siku notonga naza nifiya, goyi denyu nnokala goyi dilukulu dokwaranya goyi nnafuna vahiwa akuda Tiru na Sidoni!

²³ <<Kodi weyo sidadi ya Kafaranamu unaumbuwela ira weyo unoza ugwele zulu? Mwa ibaribari weyo unoza utatileliwe Nimburo na Anokwa. Mwasiwa matikiniho diirile miyo sidadi ya Kafaranamu, ahakanlege matikiniho anno kairiwana sidadi ya Sodoma, sidadi ya Sodoma tchatumeyiwa, mbwenye yogotwaruwa ikalegewove fiyeda peno!

²⁴ Mbwenye miyo nnouwandelani ira siku notonga naza nifiya, goyi denyu nnokala goyi dilukulu dokwaranya goyi nnafuna za vahiwa akuda Sodoma.>>

Yesu ohomutamalela Mulugu

²⁵ Mwa tempu yenne Yesu ohowonga eraga: <<Miyo nnoutamalelani nyo Babani, Mwinnya wa ilambo ya zulu na ilambo ya vati, mwasiwa nyo muhuwanda koya jengo jeji ira aliba zelru na aliba onelramo kahawande iziwa. Mbwenye muhuwanda aiziwiha ahima ang'onong'ono.

²⁶ Babani na ibaribari wewo ku funa wenyu ira muirena.>>

²⁷ Yesu eto ohowongaga eraga: <<Babaga udivaha jatene mmandani mwaga. Eto kalivo mutu mmohiwa udiiziwile miyo mwanaye ahali Baba. Eto kalivo umuiziwile Baba ahali miyo Mwanaye na anno anafuna miyo aiziwiha!

Yesu ohaitana aliba waheya

²⁸ <<Zani wa miyo nyo atene owaheya, nyo mutukunle jonyemela. Mwaza wa miyo, nnouvahani vuma.

²⁹ Inafwanela mutukule mabasa anafuna miyo uvahani. Mufundjege wa miyo, miyo dili opwaseya eto oviyeviha. Mwaza wa miyo, munofwanya vuma mmirimani mwenyu.

³⁰ Mwasiwa mabasaga boluluva eto mutolro waga kananyemela.>>