Matewuji 10 - Mazu Otchena a Mulungu

Anamarumiwa kumi na ambinli a Yesu

¹ Noira eno, Yesu ohaitanaga anamamuharaye kumi na ambinli, liye avaha utongi otamangiha minemba dotakala no vulumutcha maurenda ali matene na jopa jili jatene.

² Anamamuharaye kumi na ambinli anno eto kaitaniwa anamarumiwa, maziniwa ba ala: Oroma gu mulombwana Simawu, wenno aitaniwa Peduru na mbalaye Andire, Tiyagu na mbalaye Juwawu, anno kali ana Zebedewu,

³ Filipi, Bartolomewu, Tome na Matewuji, wenno ali namasokiha misoko, Tiyagu mwana Alifewu, Tadewu;

⁴ Simawu wenno aromile kala muwari mwa nikuru na aZeloti. Ogomiheda kala mulombwana Judasi Iskariyoti wenno agomenle nguliha Yesu.

Yesu ohawandela anamamuharaye makalelo kafuna atu laba

⁵ Yesu aarumaga anamamuharaye kumi na ambinli ale, ohawandelaga eraga: <<Mwavenya veva, kamudowe wa atu ohokala aJudewu, nne kamuvolowe tatamo munakala aSamariya.

⁶ Mbwenye mudowe mwaasake mabila odimela a nlogo na aIzarayeli.

⁷ Eto mwadowaga, mulaleyege ira: <Umwene wa zulu uhuwandamela!>

⁸ Eto mwadowa, mwavulumutchege maurenda, mwaavenyihege atu mokwani, mwaavulumutchege aliba maranya, mutamangihege minemba dabure. Voira nyo muwatchenle vasayi, na nyenne eto mudowe mwavahege vasayi!

⁹ <<Nyo mwamaruwaga, kamuvende wendjeda jimohi jiwa kwaranya jinna nyo. Kamuwendjede kobiri imohiwa ya oru nne ya parata nne ya mukuwa ira mumange musintuni mwenyu,

¹⁰ nne pasta imohiwa, nne kamiza mbinli, nne sapato dimohi diwa, nne ikumbuzo imohiwa. Ejo munafwanyege sogolro munadowege nyo mwasiwa inafwanela ira namalaba akayena yodja yaye.

¹¹ <<Sidadi ili yatene nari tatamo ili yatene munafiye nyo, mubabihe saka iziwa akala uhukalavo mutu mmohi wapama unafuna urumelihani ira muhaye vande vaye.

^12-13 Eto nyo mwavolowaga vande vale, mubabihege alondjelavo. Mwagaalondjenle, mwaona ira ba atu orumela uwatchelani, inafwanela murendele wenyu aatitele. Inafwanela nyo mukalege vande evo fiyeda muvenyemo musidadi mule. Mbwenye aliwa mwaona ira kinafuna jouwatchelani, murendele wenyu awelele wa nyo.

¹⁴ <<Eto akala kalivo unafuna uwatchelani ira muhaye vande vaye, nne vwa mazu enyu, mwavenyagavo vande vale nari mwakumagamo musidadi mule, inafwanela mwaatatele tumbulru nnafwanyeya na manyalo enyu.

¹⁵ Na ibaribari nnouwandelani ira siku notonga naza nifiya, goyi nnafuna kana atu a sidadi yenno inaukondeni nnokala goyi dilukulu dokwaranya goyi nnafuna za vahiwa akuda Sodoma na Gomora!

Yesu ohowonga zela harahariwa wafuna za

¹⁶ <<Kaing'anani, miyo nnaurumani nnga muli mabila ira mudowe vari va anambwa a mukokolani. Na mwasa wenno inafwanela mukale oxanga nnga nyowa eto mukale atu ohokana yabure nnga kangayiwa.

¹⁷ Polre polre na atu. Mwasiwa aliwa anougulihani, kaudowenani nimburo notonga eto anouwaxulani munyumbani mwiwa mwemo munafundja atu mazu.

¹⁸ Nyo munotukuliwa mudowiwena vamentoni va agovernadore na vamentoni va amwene na mwasa wa miyo vano ira mudowe mwadihidedele umboni vamentoni vewa eto vamentoni va atu ohokala aJudewu.

¹⁹ Mbwenye aliwa kauvelelani, kamukale okukumuwene muiraga: <Kodi wonga uwa niire avi? Niwonge nni?>, mwasiwa tempu yenyu yowonga yafiya, munovahiwa yenno inafuna nyo wonga.

²⁰ Mwasiwa kahi nyo unafuna wongaga, mbwenye Munemba wa Babinyu gunafuna wongaga muwari mwa nyo.

²¹ <<Mutu unerege muguliha mbalaye obaliwana ingulu imohive ira apiwe eto babi unerege muguliha mwanaye. Eto ahima anerege apiha ababiwa.

²² Atu atene anerege uidani nyo na mwasa wa nzina naga. Mbwenye mutu wenno unavilele ante magomelo, unovulumuwa.

²³ <<Mwaona atu kauharaharagani sidadi imohi, inafwanela mutawele sidadi imohiwa. Mwasiwa na ibaribari nnouwandelani ira nyo kamunamariha wenda sidadi datene da Izarayeli Mwana wa Mutu ahanaze.>>

²⁴ <<Namafundja kanakala mundimuwa mukwaranya wenno unanfundjiha, nne namalaba kanakala mundimuwa mukwaranya patarawu waye.

²⁵ So mbwenye akala namafundja unolingana na wenno unanfundjiha, agomele evo. Eto akala namalaba unolingana na patarawu waye, agomele evo. Akala mwinnya wa vande atu anamuitana na nzina na Belizebu, nnga ikalele atwaye anno anakala na liye vande vale? Ubure unafuna atu wongeliwaga unafuna ukwaranye ubure unawongeliwa mwinnya wa vande.

Yesu ohowonga zela mutu ofwanela oviwa

²⁶ <<Nona nyo kamwaovege aliba uharaharani ale. Mwasiwa kilivo yengo yokuneliwa yenno yahanagomela oniwa, eto kilivo yengo yokoyiwa yahanagomela vituleya.

²⁷ Jatene jinauwandelani miyo na mahiyu wagali isi, mudowe mwawongege na ntana eto jejo jinauwandelani miyo monong'ona, mudowe mwalaleyege movweya, mwagagwenle vazulu va nyumba!

²⁸ <<Nyo kamwaovege atu anne anawanda pa maningo eto kahawandaga pa munemba. Mbwenye mmuovege wenne unawanda tolotcha munemba na maningwene motatilela munloni ohokana goma uwa.

²⁹ Mariye menli anogulihiwa na mwana kobiri imohive. Eto masiki kagulihiwege na kobiri imohi, kilivo mbalrame imohi inakwa ahali funa wa Babinyu.

³⁰ Fiyeda ante masisi anafwanyeya mmuruni mwinyu, Mulugu umala iziwa indjiva uwa.

³¹ Nona nyo kamuove, mwasiwa nyo muli ofuneyetchetcha kwaranya mariye madjindji.

³² Na mwasa wenno, mutu wenne unadirumelele vari va atu, na miyene nnoza dimurumelele vamentoni va Baba wenno uli zulu.

³³ Mbwenye wenne unadirune vari va atu, na miyene nnoza dimurune vamentoni va Baba uli zulu.

Yesu kazilena murendele mwilamboni, mbwenye azilena supada

³⁴ <<Nyo kamuumbuwele ira miyo dizilena murendele mwilamboni ya vati. Miyo kadazana murendele, mbwenye dazana supada.

³⁵ Mwasiwa miyo dazela mwidaniha mwana wa mulombwana na babaye, mwana wa muhiyana na mmaye eto nijali na nijaliye!

³⁶ Eto amwidani alukulu a mutu anakalege atu a vande vaye.

³⁷ <<Mutu unasimbwa muziveliwa mmaye na babaye dikwaranya miyo, mutuyo kahi ofwanela kala namadiharaga. Eto wenne unamuziveliwa simbwa mwanaye wa mulombwana nari wa muhiyana dikwaranya miyo, mutuyo kahi ofwanela kala namadiharaga.

³⁸ Eto mutu wenne ahanatukula muradi waye aroma diharaga, mutuyo kahi ofwanela kala namadiharaga.

³⁹ Mutu wenne unafune djavo ingumi yaye mwilamboni ya vati, unoyelela ingumi yaye. Mbwenye wenne unayelela ingumi yaye na mwasa wa miyo, gunafuna kana ingumi ya ibaribari.

Yotambilra ya wenno unamukamiheda namamuhara wa Yesu

⁴⁰ <<Mutu wenno unauwatchelani, udiwatchela miyo. Eto ule unadiwatchela miyo, umuwatchela wenno udirumile.

⁴¹ Mutu wenne unamuwatchele namafiyiheda momuona ira ula gu namafiyiheda, unoza atambilre yotambilra ya namafiyiheda. Eto wenne unamuwatchela mutu wapama momuona ira ula gu mutu wapama, na liyene unoza atambilre yotambilra ya mutu wapama.

⁴² <<Eto mutu wenne unanvahe masiki kopo imohi ya mahindje odidila muwari mwa atu olramwiseya ala, anvahaga muwari moira gu namadiharaga, miyo na ibaribari nnouwandelani ira liye unoza akayena yotambilra yaye!>>