Markuji 9 - Mazu Otchena a Mulungu

Yesu na anamamuharaye araru kohodowa mwangoni

¹ Yesu ohawandela anamamuharaye ira: <<Na ibaribari nnouwandelani ira veva vili hiyo va, kohokalavo atu amohiwa anafuna ona Umwene wa Mulugu uzaga na kopolo kahanakwe.>>

² Yesu agamanle wonga enne, vagamanle malambo matanu na nimohi ohomutukulaga Peduru, Tiyagu na Juwawu, aliwa dowa gwela mwango olapa okave. Kagagwenle vazulu vale, anamamuharaye ale kohoonaga makalelo a Yesu tchindjeya,

³ jowara jaye kala jotchena, jerimelaga. Tchena uwa, kalivo mutu mwilamboni ya vati ila unawanda fulra yowara itchena fiyeda makalelo atchenilege jowara ja Yesu.

⁴ Evale kohatwanyuwelaga alombwana ambinli, Eliya vamohi na Mozeji, aliwa za wongaga na Yesu.

⁵ Evale Peduru ohowonga na Yesu eraga: <<Namafundjiha, yali yapama nikalegeni wewuno! Nimangeni misasa miraru, mmohi wenyu, mmohi wa Mozeji, mmohiwa wa Eliya.>>

⁶ Peduru mbwenye kaiziwile yafuna liye wonga, tchoira liye na afwaye ambinlale, kali orendjeyene na makalelo ohokala a masika.

⁷ Noira enne, murambo ohakunela eto mmuramboni mule mohokumelaga nizu nawongaga niiraga: <<Wenno gu Mwanaga unamuziveliwa miyo. Munvwelelege liyene!>>

⁸ Noira enne, anamamuharaye ale kagaing'anne vali atu vale, kamuonnevo Yesu bahi vamohi na aliwa.

⁹ Kakumaga mwangoni ule, Yesu ohawandelaga anamamuharaye ale ira: <<Kamumwandele mutu zela jejo jionne nyo mwangoni ule fiyeda Mwana wa Mutu avenye mokwani.>>

¹⁰ Aliwa kohokoya yowongele, mbwenye kohoromaga wongaga oka oka ira: <<Yesu awongaga zela venya mokwani tapulela ira avi?>>

¹¹ Aliwa kadowagave kohonfukaga keraga: <<Nnga mwasiwa gwa nni anamafundjiha malamulo wongaga ira Eliya unakala murandji za Namatikeliwa ahanaze?>>

¹² Liye ohorumela ira: <<Na ibaribari murandji za unakala Eliya ira asakanyede jatene. Nnga mwasiwa gwa nni Mazu kawongaga ira: <Mwana wa Mutu unoona goyi yohokala ya masika eto unolramwisiwa.>?

¹³ Miyo nnouwandelani ira Eliya uzile wanle eto komusasanya na makalelo ohokala pama nnga mwafunele atu eto nnga jejo jilrembiwe mMazuni zela liye.>>

Vulumutchiwa wa mwana mmohi anna munemba otakala

¹⁴ Mwa enne kagafiyile nimburo vaahiyile atu anamamuhara amohiwa vale, kohafwanyagavo atu oindjiva nimburo nenne eto kohafwanyaga anamafundjiha malamulo karunihanaga na anamamuhara Yesu kahanle vevale.

¹⁵ Atu atene kali vevale kagamuonne Yesu azaga, kohotikiniheyaga valukulu, aliwa tamanga dowa mulondjela.

¹⁶ Yesu mbwenye agafiyile nimburo nenne, ohafuka eraga: <<Nyo munarunihana na afwinyu zela nni?>>

¹⁷ Mwa enne mulombwana mmohi afwanyeya vari va anamwindji ale, ohowakulaga eraga: <<Miyo dimuzilena mwanaga wa nyo Namafundjiha mwasiwa liye uhindiwe munemba otakala eto kanawonga.

¹⁸ Munemba otakala ule ora inamuhinda liye mwanagola, unomutatilela vati, roma kumaga nipweru wanoni, liye takunaga menwaye, maningo aye anakala olimbene duduru. Miyo mbwenye dagamuzilena vano, dahavepa anamauharaninyu ira kamukumihemo munemba otakala ule mwa mwanagola mbwenye aliwa kimuwandile.>>

¹⁹ Yesu ohowonga evale na atwale ira: <<Nyo atu ohokana nroromelo! Kodi miyo nnaza dikale na nyo fiyeda alini? Nnafuna divilele na nyo fiyeda alini? Kamuzena mwanawo uyo vali miyo va.>>

²⁰ Kamudowagana mwanole, munemba otakala anna muzombwe ule, agamuonne Yesu, ohomukwatimiha mwanole na makalelo abure. Evale mwanole ohogwela vati, kumaga nipweru wanoni.

²¹ Agairile enne Yesu ohonfuka mwanole babaye eraga: <<Mwanawola uromile alini jeji?>> Evale babayele ohowonga eraga: <<Mwanagola uromileve agali mwanene.

²² Fendo didjindji dene munemba uyo anvokelaga vamunloni nari mwiko ira ampe. Mbwenye mwawanda irana yengo, nnouvepani muniwendele tangaranga eto munikamihede!>>

²³ Evale Yesu ohowonga eraga: <<Malringana waroromela. Tchoira para miyo, jatene jinowandeya, malringana mutu unadiroromela.>>

²⁴ Evale muzombwe ule babaye ohovayela wakula, muwari monla eraga: <<Miyo nnouroromelani! Dikamihedeni ira uroromelani waga udowegeve sogolro!>>

²⁵ Yesu agaaonne atu adjindji kazaga kamuwereweraga, ohowongaga amusumululaga munemba otakala ule eraga: <<Miyo nnomuruma munemba otakala wenno unairana ira muzombwela ahawande wonga nne ahawande vwa, munemba wenno akumemo eto ahawelelemo akoka.>>

²⁶ Evale munemba otakala ule ohokuwa eto ohomukwatimiha mwanole na makalelo abure, liye kumamo. Mbwenye muwari mokumamo mule amuhiyile mwanole vati kalaga nnga uhukwa. Mwa enne atu adjindji kohofiyedaga wonga ira: <<Uhumala kwa.>>

²⁷ Yesu mbwenye ohodowa muhinda muzombole ndanda naye liye muvenyiha, liye imela.

²⁸ Kagavolowile mmba, anamamuharaye ale kohonfukaga okave keraga: <<Nnga mwasiwa gwa nni hiyo niza nahawandaga mutamangiha munemba ule?>>

²⁹ Evale Yesu ohawandela anamamuharaye ale eraga: <<Munya munemba wenne unawanda tamangihiwa muwari mwa malobelo vamohi no jejuwari bahi.>>

Yesu ohowonga akoka zela makwelo aye na mavenyelo aye

³⁰ Yesu agamanle wonga enne, ohokumaga vevale na anamamuharaye, aliwa wendawendaga mwilamboni mwa Galileya. Mbwenye liye kafuna ira atu kaiziwe wadowile liye na anamamuharaye,

³¹ mwasiwa tempu yenno ali ira aafundjihe anamamuharaye oka bahi. Mwa enne ohafundjiha eraga: <<Mwana wa Mutu unovahediwa mmandani mwa atu eto anofiyeda mpa. Mbwenye akwa, siku naneraru unovenya mokwani.>>

³² Yesu agawongile enne anamamuharaye ale tchaonenlremo zela yatapulela atu. Teto ira kafuke, kera ova.

Yesu ohowonga zela kala mundimuwa

³³ Yesu na anamamuharaye kohofiya sidadi ya Kafaranamu. Kagavolowile mmba, liye ohafukaga anamamuharaye ale eraga: <<Kodi nyo muzaga mundila mwarunihana nni?>>

³⁴ Kagafukiwe eno, aliwa mbwenye kohomiyala noo, mwasiwa kohoiziwa ira kazaga mundila korunihana iraga: <<Kodi muwari mwa hiyo, mundimuwa oakwaranya afwaye atene bani?>>

³⁵ Evale Yesu ohogaratigi, liye aitana anamamuharaye kumi na ambinli ale, liye awandela eraga: <<Ule unafuna kala murandji, akale ogomiheda eto aalabege afwaye atene.>>

³⁶ Evale ohomuzagana mwana mmohi vari vewa, liye muhela mmandani, liye awandela anamamuharaye ale ira:

³⁷ <<Mutu wenno unamuwatchele mwana mmohi nnga ula na nzina naga, na miyene umala diwatchela. Eto mutu wenno unadiwatchele, kanadiwatchela miyo ve bahi nari, unamuwatchela eto na wenne udirumile.>>

Yesu ohowonga ira: <>

³⁸ Evale Juwawu ohowonga na Yesu eraga: <<Namafundjiha, hiyo nihimuona mulombwana mmohi unatamangiha minemba dabure na nzina nenyu. Mbwenye naganfwanyile, nihimuhiyiha mwasiwa liye kanawendetcha na hiyo.>>

³⁹ Mbwenye Yesu ohowonga eraga: <<Kammuhiyihe, tchoira kalivo mutu unairana jotikiniha jejo na nzina naga, amala asanduwa, aroma wongaga ubure zela miyo.

⁴⁰ Mwasiwa wenno ahananiharahara uli na hiyo.

⁴¹ Tchoira miyo na ibaribari nnouwandelani ira mutu wenno unauvahani kopo ya mahindje ira mung'we na mwasa wa nyo kala atu a Kiristu, liye unoza akayena yotambilra yaye.>>

Wopiha wa jengo jomutegiha mutu

⁴² Mutu wenne unamutegihe mwana mmohi okala ha wenna wenno unadiroromela miyo, yali yapama amangeleliwe nibwe nlukulu munikohini mwaye, adowe atatileliwe mbara akwele emo, hiyaniha no kana mulandu wenno.

⁴³ <<Akala ndanda nawo nimohi nnoutegiha, ifwanele ugwadewo, utatile! Tchoira ili yapama we volowa muingumini na ndanda nimohi, hiyaniha no kana manda amenlene eto weyo dowa munloni ohokana goma uwa,

⁴⁴ wewo uli munlo ohotima eto wewo unafwanyeya minyoka doadja atu dedo dahanakwa.

⁴⁵ Akala mwendo wawo mmohi unoutegiha, umugwadewo, utatile! Tchoira ili yapama we volowa muingumini wagali mutu orangala, hiyaniha no kana mendo daminli dene eto weyo dowa munloni ohokana goma uwa,

⁴⁶ wewo uli munlo ohotima eto wewo unafwanyeya minyoka doadja atu dedo dahanakwa.

⁴⁷ Eto akala niso nawo nnoutegiha, inafwanela ukumihemo, utatile. Mwasiwa ili yapama weyo uvolowe muUmweneni mwa Mulugu na niso nawo nimohi, hiyaniha no kana meso amenlene eto weyo dowa tatileliwa munloni ohokana goma uwa,

⁴⁸ wewo uli munlo ohotima eto wewo unafwanyeya minyoka dowadja atu dedo dahanakwa.

⁴⁹ <<Tchoira atu atenene anoza kaxixiwe na munlo, kalaga nnga yodja yalawihiwaga akala ihikana mwinnyu.

⁵⁰ Mwinnyu tchi yengo yapama. Eto yozivele yamalamo, nyo munowanda nvaha yozivele akoka? Inafwanela mukayena mwinnyu mwa nyenne nyoka eto mukalegewo mwa murendele mutu mmohi na nfwaye.>>