Markuji 7 - Mazu Otchena a Mulungu

Yesu ohasumulula aFarizewu na anamafundjiha malamulo zela mangano ewa

¹ AFarizewu na anamafundjiha malamulo angasi angasi kohokuma Jeruzalemu, aliwa dowa waligi Yesu.

² Kagafiyile wewule, kohafwanya anamamuharaye amohiwa kadjaga manda movirihamo mangano a tempu yenno.

³ Tchoira aFarizewu vamohi na aJudewu atene kinafiyeda mwezo odja kahanakwakwanelihede mangano a makolo a wanle.

⁴ Eto kakumaga merkado, anababiha virihamo mangano matene, kamala, aliwa roma dja. Eto manganuwa anahara atu kahi mang'ono zela mahuwelo a kopo, na mapanela, na jatene jopiyana ja mukuwa, vamohi na nimburo neno nnagarati atu kadjaga.

⁵ Mwa enne aFarizewu na anamafundjiha malamulo ale kohonfukaga Yesu keraga: <<Kodi mwasiwa gwa nni anamauharaninyu djaga eno na manda otakalene, hafunaga kwakwaneliheda mangano a makolo a wanle?>>

⁶ Yesu mbwenye ohawakulaga atwale ira: <<Izaiya oholremba ibaribari zela nyo angongomwa. Liye ohofiyiheda mazu a Mulugu alrembaga ira: <Atwayo anaditamalela miyo na milomo bahi. Mbwenye murima wewa, uli olapela wene na miyo.

⁷ Eto aliwa kaditamalelaga anaditamalela vasayi. Eto aliwa anafundjiha jofundjiha ja atu aliwa wesaga nnga ti jofundjiha jaga.>

⁸ <<Tcheniyo imohive inera nyo mutukulaga malamulo a Mulugu, muhelaga vammambalo, mutukulaga mangano a atu, muhelaga vasogolro venyu.>>

⁹ Yesu eto ohowonga na atwale eraga: <<Nyo muli aliba hiya malamulo a Mulugu, nyo kungaga sanganiko denyu.

¹⁰ Tchoira Mozeji ohowonga ira: <Umurihedege babawo na mmawo.> Eto ohowonga ira: <Mutu wenno unawonge ubure zela wa mmaye nari wa babaye, inafwanela apiwe!>

¹¹ Mbwenye nyo munafundjiha ira mutu akana yengo yofwanela ira aakamihedena ababaye, liye unowanda wonga na ababaye ira: <Yengwela, miyo kannauvahani nyo. So nnavelela wa Mulugu.>

¹² Mwa eno, nyo munamukameliha mutu sakanya yengo ili yatene yoakamiheda ababaye.

¹³ Na makalelo anno, munatukula sanganiko denyu, nyo kwihana mazu a Mulugu. Eto nyo munoirana jengo jimohi jiwa jidjindji nnga jeji.>>

Yesu ohowonga zela jinamutakaliha mutu

¹⁴ Noira enne, Yesu ohaitanaga akoka anamwindji kafwanyeya evale, liye awandela ira: <<Nyo mwatene muvuruwane pama inafuna miyo uwandelani ira muwande onelramo.

¹⁵ Yengo ili yatene inakumela unde ivolowaga mwa mutu kinamutakaliha. So mbwenye inamutakaliha mutu tcheniyo inakumela mwa liye idowaga unde.

¹⁶ Ule unna mabaru ovwana, avwe.>>

¹⁷ Yesu agawongile eno, ohovenya na anamamuharaye, aliwa dowa volowa mmba. Kagafiyile mmba mule, kohonfuka zela yotapulela ya yofwalrafwaniha yawongile liye.

¹⁸ Evale Yesu ohafukaga ira: <<Kodi nne na nyenne kamuwandile onelramo? Kamuiziwile ira yengo inavolowa wanoni wa mutu kinamutakaliha mutu?

¹⁹ Tchoira mutu adja yengo, kinadowa mmirimani mwaye. Inadowa munifuni. Yakuma munifuni, kumela unde.>> Mowonga enne ku tapulela ira Yesu otcheniha jodja jatene ira jidjiwege.

²⁰ Yesu ohowongagave eraga: <<Miyo nnafuna duwandeleni, yengo inamutakaliha mutu tchenne inakumela mmirimani mwa mutu.

²¹ Mwasiwa mmirimani mwa mutu pu mwemo munakuma joumbuwela jabure ji: uputa, umbava, mpa mutu, raruwa,

²² milili, uburutu, nyenga, unyambi, pela nrima ja annya, mazu omululuviha mutu, vitukulela, uzimora.

²³ Jabure jatene jeji jinakuma mmirimani mwa mutu, ti jejo jinamutakaliha mutu.>>

Nroromelo na muhiyana mmohi okumela ilambo ya Sirufenisiya

²⁴ Yesu ohokumaga vevale adowaga ilambo yali wandamelana sidadi ya Tiru na sidadi ya Sidoni. Agafiyile wewule, ohodowaga volowa mmba ira atu kahaiziwe ira liye ali wewule. Mbwenye eto muwari mohofuna oniwa na atu, kawandile vikoya.

²⁵ Sidadi ya Tiru ule wohokala mwana muhiyana mmohi anna mwanaye wa muhiyana anna munemba otakala. Muhiyanole agavwile zela nkani wa Yesu, ohozaga, liye kokora vamanyaloni va Yesu.

²⁶ Muhiyanole kaali muJudewu mbwenye ali nkuda Sirufenisiya, awonga iGerego. Mwa enne liye ohonvepa Yesu na ntindi ira: <<Nnouvepani ira mmutamangihe munemba wabure unna mwanaga.>>

²⁷ Mbwenye Yesu ohomuwandela ira: <<Ubabihe ahiya ahima kadje. Kahi pama awaka ahima pawu, dowa atatilela ana anambwa.>>

²⁸ Evale muhiyanole ohowakula eraga: <<He, Nabwiya pu mwemo munawongela nyo! Mbwenye masiki eno, ana anambwa anakala mutchindo mwa meza, aliwa djaga jinyenyeri ja pawu jinamoriha ahima kadjaga vameza vale.>>

²⁹ Yesu ohomuwakula eraga: <<Na mwasa wa yowakula yenno, nnouwandela ira udowege vande, munemba wabure ule uhukumamo mwa mwanawo.>>

³⁰ Muhiyanole agadowile vande, anfwannye mwanole agali ogonantene vakamani vaye, munemba wabure ule agakumilemo.

Yesu ohonvulumutcha mutu mmohi ohowonga eto ohovwa

³¹ Yesu ohokuma pandi yawandamela sidadi ya Tiru, liye vira muwari mwa Sidoni, liye fiya ntiya na Galileya na ilambo ya Dekapoliji.

³² Agali wewule atu amohiwa kohomuzana mutu ohovwa eto liye kawanda wonga pama. Aliwa nvepa Yesu na ntindi ira: <<Nnouvepani mmuhinde mutula ira liye awande vulumuwa.>>

³³ Noira enne, Yesu ohomukumihavo vari va anamwindjale, liye mudowana vaye vene. Agamukumihilevo, ohotukula jibuno jaye hela baruni wa mutule. Nomala liye tapa mare, tukula mare a vang'onove, liye hela vanlumini va mulombwanole.

³⁴ Noira eno, ohoing'ana zulu, liye vuma valukulu mokumbanya, nomala liye wonga na mulombwanole ira: <<Efata!>> Efata inatapulela ira: <<Kahuleya!>>

³⁵ Mwa tempu imohive yenne, baruni wa mutule wohuleya eto nlumi naye nne nohokala pama, liye roma wonga pama.

³⁶ Evale Yesu ohawandelaga atenene ira: <<Jatene jiireyile evano kamumwandele mutu.>> Mbwenye masiki Yesu aawandelave atu enne, aliwa koalaleya afwiwa jatene.

³⁷ Atu kawandeliwa zela jaira Yesu, kokala otikiniheyene kawongaga ira: <<Jatene jinairana liye unosakanya pama. Liye ante unosakanya ira aliba havwa kavwege eto ira aliba hawonga kawongege!>>