Markuji 6 - Mazu Otchena a Mulungu

Yesu oholramwisiwa waniwa Nazareti

¹ Noira enne, Yesu ohokuma evale, liye dowa waniwa Nazareti agali vamohi na anamamuharaye.

² Nagafiyile siku na sabado, ohoroma fundjiha muwari mwa nyumba yofundjamo Mazu. Atu adjindji kavuruwana jawonga liye jile kohoroma tikina, kafukaga keraga: <<Mulombwanola jatene eji unakumana waani? Kodi iziwa waye unazela uvi? Nnga unawanda avi irana matikiniho?

³ Kodi wenna kahi namasema? Kahi mwana Mariya? Wenna abalaye kahi Tiyagu, Joze, Judaji na Simawu? Arongoliye kili evano na hiyo?>> Na mwasa wenne, kohomulramwisa.

⁴ Yesu mbwenye agavwile mazu anne ohowonga ira: <<Namafiyiheda unorihediwa pandi datene dene, mbwenye ilambo ya waniwa na abalaye na ababayene eto na atu a vande vaye kinamuriheda.>>

⁵ Na mwasa wenne, Yesu kairilena matikiniho madjindji sidadi ya Nazareti. So aavulumutcha arenda a vang'ono bahi, muwari moahela manda.

⁶ Evale Yesu ohotikiniheya na mwasa oira aliwa kali atu ohororomela. Nomala eno, ohoroma wendawenda tatamo dawandamenle wewule, afundjihaga.

Yesu oharuma anamamuharaye kumi na ambinli

⁷ Siku nimohi Yesu ohaitana anamamuharaye kumi na ambinli, aarumaga ambinli ambinli, aavahaga utongi ira katamangihege minemba dotakala.

⁸ Aarumaga, ohawandela ira: <<Mwadowaga muulrendoni mwinyu kamutukule yengo imohiwa, so mbwenye mutukule imiri yenyu yowendana muulrendoni. Kamutukule yodja, nne imwana tumba, nne kamutukule kobiri.

⁹ So muware sapato dinyu, mbwenye kamuware kamiza mbinli.>>

¹⁰ Eto ohawandela ira: <<Nyo mwavolowa musidadi, mufiyede vande vevo vinawatcheliwe nyo. Eto inafwanela mukalege vande evo pakana mufiyede kumamo musidadi mule.

¹¹ Eto ahakalevo unafuna uwatchelani nne uvuruwanani nimburo nili natene, mwavenyagavo mutate tumbulru nnafwanyeya mmanyaloni mwinyu ira ikale ionihedo yoira aliwa anoza katongiwe.>>

¹² Mwa enne aliwa kagamaruwile, kohoroma laleya ira atu katwaruwe mwa jotega jiwa.

¹³ Kotamangiha minemba dabure didjindji eto koavulumutcha arenda adjindji muwari moahela makura.

Piwa wa Juwawu Mbatizi

¹⁴ Mwene Erodi ohomala vwa jatene jene zela Yesu, mwasiwa nzina na Yesu nohomala gaweya mwatene mwene. Evale amohiwa kawonga ira: <<Juwawu Mbatizi, wire venya mokwani. Nona awandaga sakanya matikiniho matene anno.>>

¹⁵ Eto amohiwa kawonga ira gu Eliya, amohiwa kawonga ira gu namafiyiheda nnga anamafiyiheda a wanle.

¹⁶ Mbwenye Erodi agavwile ja Yesu, ohoira: <<Liye gu Juwawu Mbatizi, wenno damugwadihile miyo muru. Eno wire venyihiwa mokwani!>>

¹⁷ Ira Erodi aze awonge eno, mwasiwa malambo a mundulri Erodi ohomuhinda Juwawu, mmangiha, liye muheliha mukadeya. Liye airele ejo na mwasa wa muhiyanaye Erodiya wenno amukumihile liye mmba. Tchoira muhiyanole ali mwadi mbalaye Filipi.

¹⁸ Mwa enne Juwawu akaleletcha musumulula Erodi ira: <<Mwa malamulo a Mulugu, kavili jowandeya ira weyo unonkana mwadi mbalawo.>>

¹⁹ Evale mwadi Erodi avwa mazu anne, opihiwa mbani, liye takaleliwaga valukulu, funaga jompa Juwawu. Mbwenye kawandile mpa mwasiwa

²⁰ mamunaye Erodi omuova Juwawu, tchoira ohoiziwa ira mulombwana Juwawu ali mulombwana wapama osogolrelriwa na Mulugu. Na mwasa wenne, Erodi omukoya mukadeya mwali liye. Eto fwanyeya ira Erodi oziveliwetcha nvuruwana Juwawu jowonga jaye. Eto anvwaga awongaga, omaliwa zelru.

²¹ Mbwenye siku na pwando ya Erodi, akwakwanihaga yaka daye, mwadi Erodi yofuna yaye ira ampe Juwawu yohokwakwana. Siku neno Erodi ohosakanya pwando ilukulu zela umwene waye, liye aitana andimuwa a umwene waye, andimuwa a anyakondo na andimuwa a Galileya ira kaze vapwandoni vale.

²² Muwari mwa tempu yenne, mwadi Erodi mwanaye ohovolowa musalawuni, liye ina pama kwaranya, fiyeda Erodi vamohi na atu atenene aliwa ziveliwa joina jile. Evale Erodi ule ohowonga na mwanole, liye ira: <<Kavepa inafuna we, miyo nnouvaha.>>

²³ Eto oholumbela ira: <<Yengo ili yatene inavepe we, miyo nnouvaha. Masiki ufune ira nigane umwene waga, miyo nnouvaha pandi imohi.>>

²⁴ Evale namwali ule agavwile ejo, ohovenya, liye dowa fiya wa mmaye, liye nfuka ira: <<Nnga divepe yengo nni?>> Evale mmayele ohorumela eraga: <<Udowe wavepe muru wa Juwawu Mbatizi.>>

²⁵ Mwa ora imohive yenne namwali ule ohovenya adowaga mobaranya wewule wali mwene ule, liye dowa nvepa mwene ira: <<Miyo difunne ira mudivahe muru wa Juwawu Mbatizi mparatoni tchineneva eni!>>

²⁶ Evale mwene Erodi agavwile enne, ohokumbanya valukulu. Mbwenye voira oholumbela eto na mwasa wa alendo kafwanyeya vameza vale, kawandile runa nipangano nasakannye liye na namwali ule.

²⁷ Mobaranya mwene Erodi ohomuruma munyakondo mmohi anna mabasa oapa atu ira agwade muru wa Juwawu azena. Evale munyakondole ohodowa kadeya ule, liye gwada muru wa Juwawu,

²⁸ hela mparatoni, liye dowa nvaha namwali ule. Namwali ule agavahediwe muru wa Juwawu ule, ohodowa nvaheda mmaye.

²⁹ Anamamuhara a Juwawu kagavwile jaireyile, kohodowaga tukula maningo a Juwawu, aliwa dowa mukoya.

Indjivihiwa wa pawu fendo yoroma

³⁰ Anamarumiwa a Yesu kagamanle laba mabasiwa karumiwe atu, kohowelela wa Yesu, aliwa muwandelamo zela jatene jerile atu na jafundjihile atu.

³¹ Nimburo nenne vofwanyeyaga atu oindjiva, atu amohiwa kafiyaga, amohiwa kavenyagavo. Yesu na anamamuharaye kohofiyedaga mwezo ohoona tempu ira kadje. Evale ohawandela anamamuharaye eraga: <<Kadiharegeni ira nidoweni nimburo wahali atu ira navume vang'onove.>>

³² Evale aliwa kohovenya oka kagwelaga mwadeya, aliwa dowaga nimburo eni wahali atu.

³³ Mwa enne atu adjindji kohaonaga aliwa kamaruwaga. Evale kagaiziwile ira ali Yesu na anamamuharaye, kohoromaga tamanga na mendo mmambalo mwa ntiya nne kamuharaga wadowa liye ule. Evale Yesu na anamamuharaye kahanafiye, anamwindji ale baligi arandji fiya wewule wadowa Yesu.

³⁴ Evale Yesu atitaga mmwadeyani mule, agaaonne anamwindjale, ohokagana akumbanya valukulu mwasiwa kakalaga nnga mabila ohokana namakumbuza. Na mwasa wenne, Yesu ohokana tangaranga na atwale, liye roma afundjiha jengo jidjindji jene.

³⁵ Ora ya tchiguwo vang'onove, anamamuharaye kohofiya valigi liye vale keraga: <<Nimburo nnafwanyeya hiyo uno ti nimburo mwahali yengo. Eto eni nzuwa nnavira.

³⁶ Kaagunyeni atwala ira kadowe mavande na tatamo diwandamenle wewuno, kagule yodja ira kadje.>>

³⁷ Yesu mbwenye ohawakulaga, liye ira: <<Inafwanela nyenne mwaavahe yodja!>> Anamamuhara Yesu ale kohowonga keraga: <<Ira nigule pawu para atu atene anna, inafuneya kobiri ya mbwambwada nnga kobiri da parata 200.>>

³⁸ Yesu ohafuka anamamuharaye ale eraga: <<Nyo munna pawu dingasi? Kadowani mwaone.>> Anamamuharaye ale kohodowa ona, aliwa muwandela ira: <<Ninna pawu tanu na somba mbinli.>>

³⁹ Evale Yesu ohawandelaga anamamuharaye ira kaagaratihe atwale makuru makuru.

⁴⁰ Mwa enne atwale kogarati makuru makuru. Makuru amohi kali a 50, makuru amohiwa okana atu 100.

⁴¹ Evale Yesu ohotukulaga pawu tanu na somba mbinli dile, liye ing'aniha meso zulu, liye reliha. Nomala liye roma meyaga pawu dile, avahedaga anamamuharaye. Anamamuharaye ale aliwa agawelaga anamwindjale.

⁴² Evale atene kohodjaga, aliwa rumbala,

⁴³ fiyeda tchelela jodja. Mwa enne kagagudenle johala jatene, somba vamohi na pawu dile, johozalaga migogoda kumi na minli.

⁴⁴ Fwanyeya ira muwari mwa atene kadjilege pawu dile, alombwana ve kohokwakwana 5.000 hiya ahiyana na ahima.

Yesu ohowenda vazulu va mahindje

⁴⁵ Kagairile enne, mohodibeliwa Yesu oharuma anamamuharaye ira kagwele mwadeya kasogolrege, kalambuwe ira kadowe kombela ya ule, tatamo ya Betisayida. Mbwenye liye ohalaga vang'ono, liye alanyaga anamwindji kafwanyeya vevale ira kadowege mmavande mwiwa.

⁴⁶ Agamanle alanya atwale, Yesu ohogwela mwangoni ira alobele.

⁴⁷ Unde wagadibile, mwadeya wenno agwenle anamamuharaye afwanyeya vari va ntiya. Yesu mbwenye aligi unde eka.

⁴⁸ Evale Yesu agali unde wewule, ohaonaga anamamuharaye ale katchapaga mosegedeya mwene mwasiwa nipevo nazelaga sogolro wombelaga mundulri. Mbwenye unde wahanarome tcha, Yesu ohodowa wewule, awendaga vazulu va mahindje. Liye afuna aakwaranye anamamuharaye ale, akale vasogolro.

⁴⁹ Mbwenye anamamuharaye ale kagamuonne Yesu awendaga vazulu va mahindje, kaumbuwela ira liye gu yotanduwa. Mwa enne kohoromaga kuwa,

⁵⁰ mwasiwa kohorendjeyaga valukulu kamuonaga azaga. Yesu mbwenye ohovayela wonga na aliwa eraga: <<Kamukukumuwe. Gu miyo vano! Kamuove!>>

⁵¹ Nomala eno, ohogwelaga mmwadeyani mule vamohi na aliwa. Evale nipevo nne nohomiyalaga. Anamamuharaye ale, kohokukumuwaga valukulu.

⁵² Tchoira aliwa tchaonelramo ibaribari zela yotikiniha ya Yesu aindjivihaga pawu dile. Mirima diwa dalive dovanda dene.

Yesu ohavulumutcha arenda adjindji ilambo ya Jenezare

⁵³ Evale kagalambuwele kombela ya ule, kohofiyaga ilambo ya Jenezare, aliwa tukula mwadeya ule mangelela mutcherelani mwa ntiya.

⁵⁴ Kagatitile mmwadeyani mule, atu a wewule kohovayela muiziwa Yesu.

⁵⁵ Evale aliwa kohovenya katamangelaga mutatamoni mwatene mwemule, aliwa roma atukula arenda kali mmakamani, aliwa adowagana nimburo neno naiziwa atu ira: Yesu uli ule.

⁵⁶ Mwatene mwene mwadowa liye, ku wonga tatamoni diwa nari sidadi diwa nari mamburo amohiwa a fora, koagumaniha arenda kaadowagana varampani, aliwa muguzelaga Yesu mendo ira: <<Hiyo nnauvepani ira nihinde magomo wa kapa yenyu bahi ira niwande vulumuwa.>> Mwa enne arenda atene kahinda kapa yaye kovulumuwa.