Markuji 3 - Mazu Otchena a Mulungu

Yesu ohonvulumutcha maliba rangala ndanda mmohi siku na sabado

¹ Siku nimohi niwa na sabado Yesu ohovenya, dowa volowa nyumba yofundjamo Mazu. Mmba mule mohokalaga mutu anna ndanda noumma, norangala.

² Eto mohokala aFarizewu kamuing'ana Yesu moira: Nnafuna nimuone akala unonvulumutcha mutula peno siku na sabado. Mwasiwa aliwa kavenda mwasa mugwihana mulandu.

³ Evale Yesu ohomuwongana maliba umma ndanda ule ira: <<Kaza uno.>>

⁴ Murendole agafiyile vali Yesu vale, Yesu ahananvulumutche mutule ohobabihaga afuka atwale ira: <<Kodi muwari mwa malamulo inorumelihiwa muirela mutu yabure owu hehi muirela yapama peno siku na sabado? Inorumelihiwa mpa, owu inorumelihiwa nvulumutcha peno siku na sabado?>> Agafukile eno, vevale atenene kohomiyalaga noo.

⁵ Nomala eno, Yesu ohaing'ana atwale otakaleliwene mokumbanya mwasiwa atwale kohokana mirima dovanda. Vevale ohowonga na murendole, liye ira: <<Katapula ndanda nawo no.>> Evale liye no tapula ndanda naye nne, ohovulumuwa.

⁶ Evale aFarizewu kohovenyihanaga, aliwa kuma, dowa gumanela na aJudewu ofuna ja Erodi, aliwa roma mpanganela Yesu ira kampe.

Yesu oholaleya no avulumutcha atu adjindji

⁷ Evale Yesu na anamamuharaye kohovenya, aliwa dowa ntiya na Galileya. Mwindji wa atu kakuma vilambo da Galileya, Judeya,

⁸ Jeruzalemu, Idumeya, kombela ya Jordawu, fiyeda wandamelana sidadi da Tiru na Sidoni, kohoza wa liye mwasiwa kohovwa jengo jairile liye.

^9-10 Kagagumanne vali Yesu, liye ohoroma avulumutcha arenda adjindji. Muwari moavulumutcha mule, arenda amohiwa adjindji kohomurindja ira kamusakwinye ira kavulumuwe. Evale Yesu ohowonga na anamamuharaye ira kavende mwadeya liye agwelemo tawiha ira unafinyiwege na anamwindji ale.

¹¹ Eto ora yenno, kohokalawo atu kagwa minemba dotakala. Vamuona atu Yesu, kofiya kagwaga vali liye, minemba dile kuwaga ira: <<Nyo muli Mwana Mulugu.>>

¹² Yesu mbwenye ohosumulula minemba dabure dile mwa kopolo ira dahamuvweyihege.

Yesu ohasakulra anamarumiwaye kumi na ambinli

¹³ Siku nimohi Yesu ohogwelaga vamwangoni. Agagwenle, ohoromaga aitana alombwana kumi na ambinli aafuna liye, aliwa fiya vali liye vale.

¹⁴ Evale Yesu oahambiha ira kawendege na liye, kakale anamarumiwaye ira kadowe kalaleye mazu

¹⁵ no kumihamo minemba dabure.

¹⁶ Aahambihile kumi na ambinli ala. Mmohi ali Simawu, wenno Yesu anvahile liye nzina na Peduru.

¹⁷ Amohiwa ali Tiyagu na mbalaye Juwawu, ana Zebedewu. Ambinlene Yesu ohavaha nzina na Bowanereji, ku wonga ira ahima a ndari.

¹⁸ Amohiwa ba ala: Andire, Filipi, Bartolomewu, Matewuji, Tome. Mmohiwa ali Tiyagu mwana Alifewu. Mmohiwa ali Tadewu. Mmohiwa ali Simawu wenno aromile kala muwari mwa nikuru na aZeloti.

¹⁹ Ogomihediwa kala Judasi Iskariyoti, wenno afuna za nguliha Yesu.

Anamafundjiha malamulo kohomuwongana Yesu ira ugondjihiwa na Belizebu

²⁰ Yesu ohodowa vande. Mwa enne atu oindjiva ohokala a masika kohogumana akoka vali liye fiyeda mwezo Yesu na anamamuharaye hakana tempu ira kadje.

²¹ Atu a muibalini mwa Yesu kagavwile jaireya, kohodowa ira kamuhinde mwasiwa atu kawonga ira: <<Yesu uhukana mihala.>>

²² Mwa ora yenno anamafundjiha malamulo amohiwa kakumilege Jeruzalemu kohowonga keraga: <<Moyole ugondjiheya na Belizebu.>> Kohowonga eto keraga: <<Unanvaha kopolo dowanda tamangiha minemba dabure dile gu Belizebu mundimuwa wa minemba dabure.>>

²³ Noira enne, Yesu ohaitana atwale kafwanyeyaga evale, liye roma afundjihaga muwari mwa jofwalrafwaniha eraga: <<Kodi vihikala wandeya Satana liye vitamangihaga ekave?

²⁴ Akala atu a umwene umohive anogaweya aliwa roma wana oka oka, umwene wenno unagomela mala.

²⁵ Nari akala atu a vande vamohive anowana oka oka, nivande neno nnagomela mala.

²⁶ Tapulela nnga umwene wa Satana. Umwene wa Satana wavigawa nikuru nikuru, Satana na minemba dabure daye kawanaga oka oka, umwene waye unogoma.

²⁷ Mbwenye kalivo mutu unawanda dowa vande va mulombwana mmohi olimba, aroma mbela jorayela jaye ahanababihe mmanga. Yengo yoroma unaroma mmanga. Aira eno pinaroma liye tukula jatene.>>

²⁸ Yesu ohowonga eraga: <<Nnafuna duwandeleni ibaribari ira jotega jejo jinairana atu, masiki makalelo matene omululuviha Mulugu anaira atu, jinowanda za kurumuweliwa.

²⁹ Mbwenye ule unamululuviha Munemba Otchena kaza akurumuweliwa mwasiwa yotega yenno unokanave ante kala no kala.>>

³⁰ Yesu aza awongaga eno, mwasiwa aliwa kere wonga ira: <<Mutula uhumala gondjihiwa na munemba otakala.>>

Yesu ohowonga zela mmaye na adibiliye a ibaribari

³¹ Agairile enne, Yesu mmaye na Yesu abalaye, kohozaga wewule waligi Yesu ule. Kagazile, kadowilege kala unde, aliwa awandela atu ira kadowe kamuitane Yesu ira agumane na aliwa.

³² Mwa tempu yenne Yesu afwanyeya agagaratile vamohi na atu oindjiva. Mwa enne kohomuwandela ira: <<Mminyu na adibilinyu kali unde wu, anoufunani.>>

³³ Evale Yesu ohawakula eraga: <<Kodi mmaga miyo bani? Nnga kodi adibilaga miyo bani?>>

³⁴ Nowonga enne, ohaing'anaga atu kagaratile evale, liye awandela eraga: <<Kaing'anani! Mmaga na adibilaga banna kali evano na miyo.

³⁵ Tchoira mutu wenno unerana funa wa Mulugu, mbalaga, murongolaga, na mmaga, gwenno.>>