Markuji 15 - Mazu Otchena a Mulungu

Yesu asumeliwaga vamentoni va governadore Pilatu

¹ Vevale unde wagatchile, andimuwa a anamakuta na andimuwa a aJudewu, anamafundjiha malamulo na anamatonga atene kohogaratela ira kavahena zelru. Evale aliwa kohommangaga Yesu, aliwa mudowana, nvaheda governadore Pilatu.

² Kaganfiyilena wewule, Pilatu ohonfukaga Yesu eraga: <<Kodi weyo uli Mwene wa aJudewu?>> Evale Yesu ohowakula, liye ira: <<Nyo gunawonga eni.>>

³ Vevale andimuwa a anamakuta kohoromaga munukeda jengo johokala ja masika jonama. Mbwenye Yesu kawakunleve yengo.

⁴ Mwa enne Pilatu ohonfuka ira: <<Kavwa jinaunukeda atu ji, kodi weyo kunakanave yowakula?>>

⁵ Yesu mbwenye, kawakunleve yengo. Evale Pilatu ohoroma tikiniheya zela miyala waye.

Pilatu ohorumela ira Yesu apiwe

⁶ Tempu yenno, va kada Pwando ya Mavirelo, Pilatu omukutcha munyakadeya mmohi wenno asakulriwa na aJudewu ira akutchiwe.

⁷ Ora yenno mukadeya mule, mohokala mulombwana mmohi aitaniwa Baraba. Baraba afwanyeya mukadeya mule vamohi na afwaye kafwanyeyana muselu oapa atu tempu yawanawana atu muwari mokonda tongiwa na aRoma.

⁸ Evale mwindji wa atwale kohoromaga kuwa aliwa nvepaga Pilatu keraga: <<Nnafuna mmukutche mutu mmohi nnga vineretcha nyo.>>

⁹ Evale Pilatu ohafuka eraga: <<Munafuna dukutcheleni Mwene wa aJudewu?>>

¹⁰ Pilatu aza awongaga enne tchoira ohoonelramo ira andimuwa a anamakuta kamusumela Yesu na mwasa wa nrima bahi.

¹¹ Mbwenye andimuwa a anamakuta kagavwile Pilatu awongaga zela mutapula Yesu, kohakanyiheda mwindji wa atu kazile ale ira kawonge ira: <<Hiyo nnafuna mmutapule Baraba, muhiya Yesu.>>

¹² Evale Pilatu ohafuka akoka eraga: <<Nnga damukutcha mulombwana Baraba, mulombwanola munamuira nyo mwene wa aJudewu ula, dimuirena avi?>>

¹³ Aliwa kohokalelagave kuwa keraga: <<Mmukomele vamuradini!>>

¹⁴ Vevale Pilatu ohafuka eraga: <<Mulombwanola kodi unafwanyeyana mulandu nni?>> Mbwenye aliwa kokuwagave na mazu olimbiha keragave: <<Kamukomeleni vamuradini!>>

¹⁵ Evale Pilatu muwari moira aaziveliwihe anamwindji ale, oharuma atwaye ira: <<Mmutapule Baraba. Yesu mmudowena mwamuwaxule.>> Noira enne, kagamanle muwaxula, oharuma eraga: <<Tiyeni, mwankomele vamuradini!>>

Anyakondo kohompeta Yesu

¹⁶ Vevale anyakondo karumiwe na Pilatu, kohomudowana Yesu vatando va palasiyo ya governadore. Kagafiyile evale, kohagumanihaga anyakondo afwiwa atene.

¹⁷ Noira eno, kohomuwungula jowara jaye, aliwa tukula kapa ya usalru wa kore ya musuzu wa bwanda, jagali jowara ja peresu yokwima, aliwa muwariha. Eto aliwa luwa kara ya minga aliwa muhela vamuru vaye.

¹⁸ Vevale aliwa kohoroma mulondjela muwari mompeta keraga: <<Mwene wa aJudewu oye! Oye!>>

¹⁹ Aliwa tukula murere, roma nkomagana vamuru vaye, kamutapelaga mare, kamukokorelaga muwari mompeta.

²⁰ Nomala mpeta enne, kohomuwungula kapa ya usalru wa kore ya musuzu wa bwanda, yenno yafwanyeya yagali ya peresu yokwima ile, aliwa muwariha jowara jaye, aliwa nkumiheda unde ira kadowe kankomele vamuradini.

Yesu ohokomeliwa vamuradini

²¹ Kagamaruwile, kadowaga, kohongumanana maliba vira mmohi aitaniwa Simawu, wa sidadi ya Sirene. Simawu ule ali Alexandiri na Rufu babiwa. Liye akumaga unde avolowaga musidadi ya Jeruzalemu. Anyakondwale kohomutukuliha muradi wa Yesu ule.

²² Vevale kohomudowagana Yesu sogolro fiyeda nimburo nnaitaniwa Gologota. Gologota ku wonga Nimburo na Nigaragazu na mutu.

²³ Evale anyakondwale kohotukula vinyu otatanyiwa na makura onukela kaitaniwa mira, aliwa nvaha Yesu. Yesu mbwenye kang'wile.

^24-25 Evale kohomukomela vamuradini na mabebehi, pandi ya 9 ora. Kagamukomenle, anyakondo ale kohoganaga jowara ja Yesu muwari mosakanya jogu ya ngari ira kada mutu atukule nnga mwemo mwaganyalrele liye.

²⁶ Kohotukula isi tabwa eni, aliwa lrembavo muselu kamutongilena atu. Aliwa lrembavo ira: <<MWENE WA AJUDEWU>>, aliwa komela vazulu va muradi vale, muruni waye.

²⁷ Ora imohive, kohakomela eto ambava ambinli, mmohi ikukuru ya muwononi odjana, mmohiwa ikukuru ya muwononi oromana, Yesu afwanyeya vari.

²⁸ Ejo johokwakwaneliheda ilrembiwe mMazuni wanle ira: <<Liye abalriwe nnga mutu wabure.>>

²⁹ Mwa enne atu kaviraga mundila kohoromaga mpeta Yesu, kawuzuzaga miru diwa, kamuruwanaga keraga: <<Kahi wenne wawongetcha ira unowanda bwanyula Nyumba ya Yehova eto umange muwari mwa malambo mararu bahi?

³⁰ Kavivune eto! Katita eto vamuradini vili we vo!>>

³¹ Eto kohokalawo andimuwa a anamakuta na anamafundjiha malamulo kazile, aliwa roma mpetaga Yesu na makalelo mamohive, kawongaga oka oka keraga: <<Uluwole, gwenne aavulumutchetcha atu oindjiva. Peno avivune ekave nimuone.

³² Akala liye gu Namatikeliwa, Mwene wa aIzarayeli, atite vamuradini vili liye vale tchineneva ira nimuone eto ira niroromele.>> Eto ale kakomeliwe na liye, na aliwene kohoromaga wonga mazu abure zela Yesu.

Makwelo a Yesu

³³ Yagafiyile pandi ya 12 ora, yohozavo isi ilukulu ilambo yatene fiyeda pandi ya 15 ora.

³⁴ Pandi ya 15 ora, Yesu ohokuwaga na mazu olimbiha eraga: <<Eloyi, Eloyi, lama sabatani?>> Tapulela ira: <<Mulugu waga, Mulugu waga, mudihiyele nni?>>

³⁵ Agairile enne, atu kaligi evale, kaganvwile eraga: <<Eloyi, Eloyi>>, mohoiziwa yengo tchivi, kohowongaga ira: <<Kanvweni, liye unamuitana Eliya.>>

³⁶ Mwa enne mutu mmohi ohotamangaga, liye dowa nyetiha ntondje na vinyu ohokala pama nnga vinagere, liye hela murereni, dowa nvaha Yesu ira ang'we. Eto ohowonga, liye ira: <<Kamuhiyeni, nimuone akala Eliya unamuitana liye unowanda za nvuna vamuradini va.>>

³⁷ Agairile eno, Yesu ohokuwa molimbiha. Mwa enne ohomariheya.

³⁸ Ora yenno yakwa Yesu kurtina ilukulu yafwanyeya mmba mwa Nyumba ya Yehova yohokauwaga vari na vari roma zulu fiyeda vati.

³⁹ Yesu akwaga, mundimuwa oasogolrelra anyakondo 100 afwanyeyaga vasogolro va Yesu, amuing'anaga. Mwa enne agaonne makalelo Yesu akwile liye, ohowonga ira: <<Mutula, mwa ibaribari ali Mwana Mulugu.>>

⁴⁰ Vakwa Yesu vale, vohokalaga ahiyana kafwanyeyaga olapela wene kaing'anaga. Muwari mwa ahiyanale, ohokalavo Mariya nkuda Madala, Salome na Mariya wenno ali Joze na Tiyagu wa muzombwe mmiwa,

⁴¹ anno kawendetcha na Yesu agali ilambo ya Galileya, kamukamihedaga. Kohokalagavo eto ahiyana amohiwa oindjiva kamuharile Yesu vadowa liye Jeruzalemu.

Koyiwa wa Yesu

^42-43 Siku nakwa Yesu, naligi siku nosakanyeda jatene ja sabado. Ora ya tchiguwo, Yesu agakwile, ohokalawo mundimuwa mmohi eriwa Joze, waniwa ali Arimateya eto ali namatonga oteteliwa muwari mwa andimuwa a aJudewu. Liye eto ali mutu aing'anela mazelo a Umwene wa Mulugu. Yesu agakwile, Joze ule oholimbiha murima, dowa fiya wa Pilatu, nvepa maningo a Yesu. Tchoira Joze afuna Yesu akumihiwevo vamuradini vale, akoyiwe, sabado ahanafiye.

⁴⁴ Pilatu agavwile ira: <<Yesu uhukwa.>> ohotikinaga mwasiwa esaga ali ahanakwe. Agamuitanihile mundimuwa aing'anela mapiwelo a Yesu, ohonfukedaga akala na ibaribari Yesu ohokwa.

⁴⁵ Mwa enne aganna ibaribari pama muwari mwa musogolrelri wa anyakondo ule ira Yesu uhukwa, evale ohomurumelihaga Joze maningo a Yesu ira adowe ankoye.

⁴⁶ Joze ohovenyaga dowa gula nguwo yosakanyiwa na usalru wapama, liye mutitiha Yesu vamuradini vale, mbulruwalri na nguwo ile, dowa muhela mmasiye, nifukwe neno natimba atu nibweni. Nomala liye pingiritcha nibwe nlukulu, fungana ovolowela wa nifukwe nne.

⁴⁷ Yesu akoyiwaga, Mariya nkuda Madala na Mariya mmaye Joze kohoonaga nimburo neno vakoyiwe liye.