Markuji 14 - Mazu Otchena a Mulungu

Andimuwa a anamakuta na anamafundjiha malamulo kosakasaka ndila yoira kampena Yesu

¹ Vahanle malambo menli ira atu kadje Pwando ya Mavirelo na Pwando ya Pawu Dohosakanyiwana Leverina. Evale andimuwa a anamakuta na anamafundjiha malamulo kosakasaka ndila tchivi yafuna atu kamuhindena Yesu mozembiheya ira kampe.

² Mbwenye kohowonga keraga: <<So kanimpeni muwari mwa Pwando, tawiha ira nnaze nitatamule madugudugu muwari mwa anamwindji.>>

Muhiyana mmohi ohomuhela Yesu perefume

³ Yesu agali tatamo ya Betaniya, ohodowa vande va mulombwana Simawu wenno aitaniwa maliba maranya. Agali vameza, ohozaga muhiyana mmohi anna mwana garafwa nasakanyiwe na nibwe, mwemo mwafwanyeya perefume onukela pama wa nardu. Ali eto wa peresu yokwima. Muhiyanole ohotwa garafwa nne, liye kutulela perefume ule mmuruni mwa Yesu.

⁴ Evale atu amohiwa kagaonne enne, kohoroma wonga motakaleliwa mmohi na nfwaye keraga: <<Mwasiwa gwa nni muhiyanola nongaga perefume wapama ula?

⁵ Perefume wenna ogoguliha peresu yokwima nnga kobiri 300 da parata, amala kobiriwa ogotukula aavahe aliba simela.>> Mwa enne kohokalelagave muwonga muhiyanole.

⁶ Mbwenye Yesu ohawakula eraga: <<Nyo munamukukumulela nni muhiyanola? Kamuhiyeni eno! Liye uhudiirela miyo yengo yapama.

⁷ Tchoira atu osimela kinamala, anakalave na nyo. Malringana vanafunege nyo airela upama munerege airela. Mbwenye vasogolro miyo kannakalegeve na nyo kala no kala.

⁸ Liye uirilena yenno yafuna liye irana, tchoira siku naga nokwa nahanafiye liye uhudizoliha perefume maningwaga ira alabe zela siku naga nokoyiwa.

⁹ Na ibaribari nnouwandelani ira mwilamboni mwatene mwene mwemo munalaleyiwa Muselu Wapama, yenno iirile mwana muhiyana ula inerege vweya. Evale liye unoza aumbuweliwege.>>

Judasi Iskariyoti ohopangana na anamakuta ira amugulihe Yesu

¹⁰ Muwari mwa anamamuhara kumi na ambinli a Yesu mmohi aitaniwa Judasi Iskariyoti, ohovenya, liye dowa afwanya andimuwa a anamakuta ira angulihe Yesu.

¹¹ Andimuwale kagavwile yowonga ya Judasi Iskariyoti, kohoziveliwa, aliwa pangana ira kanvahe kobiri. Kagairile eno, Judasi ohoroma venda tempuwa yafuna liye nvelela Yesu mmandani mwiwa.

Yesu oharuma anamamuharaye ira kasakanyede Pwando ya Mavirelo

¹² Siku noroma na Pwando ya Pawu Dohosakanyiwana Leverina, neno nnafwanyeya nagali siku nopa mabila a Pwando ya Mavirelo, anamamuharaye kohonfukaga Yesu, aliwa ira: <<Nyo munafuna nasakanyede jodja uvi ira hiyo na nyo nidje Pwando ya Mavirelo?>>

¹³ Muwari mwa anamamuharaye ale, Yesu ohasakulramo ambinli, aarumaga eraga: <<Muvenye, mudowe sidadi. Mwavolowa musidadi mule, munonfwanya mulombwana mmohi agatukunle muno wa mahindje. Mmuhare unadowa liye.

¹⁴ Mwafiya vande vanaya liye, muwonge na mwinnya wa vande vale muire: <Namafundjiha gunirumile ira nufukeni ira: <<Sala yaga inafuna miyo na anamadiharaga nidje Pwando ya Mavirelo tchivi?>>>

¹⁵ Liye unoutonyihedani sala ilukulu ya muzulu yomala sakanyediwa pama. Mwafiya nimburo neno musakanye jinafuna hiyo dja.>>

¹⁶ Anamamuharaye ambinlale kohovenyavo, dowa sidadi. Kagadowile, kohofwanya jatene nnga mwemo mwawongele liye. Nomala eno, kohosakanyeda jatene ira kadje Pwando ya Mavirelo.

Yesu ohowonga zela wenno afuna muguliha

¹⁷ Evale yagafiyile igudugudu, Yesu na anamamuharaye kumi na ambinli kohovira, aliwa fiya nimburo nenne.

¹⁸ Kagali vameza, kadjaga pwando, Yesu ohawandela anamamuharaye ale eraga: <<Na ibaribari nnouwandelani ira veva vili hiyo va, ukalavo mutu mmohi mwa nyo unadja na miyo, unafuna diguliha.>>

¹⁹ Evale anamamuharaye ale kohoroma kukumuwa, aliwa roma nfuka Yesu mmohi mmohi keraga: <<Aze akale miyo?>>

²⁰ Yesu mbwenye ohowakulaga, liye ira: <<Mutuwa uli muwari mwa nyo anamadiharaga kumi na ambinli. Unafuna diguliha gwenno unavoda na miyo pawu mparatoni mmohive.

²¹ Tchoira na ibaribari Mwana wa Mutu unagulihiwa nnga mulrembele atu mMazuni. So mbwenye, udilu wa wenno unafuna muguliha! Ali yapama mutu wenno ahabaliwa!>>

Yesu ohodja seya na anamamuharaye

²² Agairile enne, kadjagave, Yesu ohotukulaga pawu liye reliha. Agarelihile, ohomeyaga, liye avaheda anamamuharaye eraga: <<Tukulani pawu ila, mudje, tchoira ala ba maningwaga.>>

²³ Nomala enne, ohotukulaga kopo imohi, liye mutamalela Nabwiya. Eto ohavahaga anamamuharaye, aliwa ng'wamo.

²⁴ Vevale ohawandela anamamuharaye eraga: <<Ni ti sangiri naga, sangiri na Yopangana Ixa, neno nnatatiya para atu adjindji kakale pama.

²⁵ Na ibaribari nnouwandelani ira kadiza ding'wa akoka vinyu wa uva ula, fiyeda tempu inafuna miyo ng'wa vinyu muxa, muUmweneni mwa Mulugu.>>

²⁶ Vevale kohoimbaga nyumbo. Noira eno, kohodowaga Mwango wa Mitengo da Azeti.

Yesu ohomuwandelaga Peduru ira: <>

²⁷ Yesu ohawandela anamamuharaye eraga: <<Nyo mwatene eva munoditawa. Mwasiwa nkani wenno umala lrembiwa mMazuni ira: <Miyo nnombubuda namakumbuza. Evale mabila anobalaleya.> >>

²⁸ Yesu ohowongagave eraga: <<Miyo mbwenye davenyihiwa mokwani, nnosogolra didowe Galileya. Nyo munodowa mwadifwanye wewo.>>

²⁹ Mulombwana Peduru ohomuwongana Yesu eraga: <<Masiki afwaga atene kautawegeni, miyo kannautawani.>>

³⁰ Evale Yesu ohomuwongana ira: <<Na ibaribari miyo nnouwandela ira mahiyu anna, mutumbi ahananle fendo mbinli, weyo unodiruna fendo taru.>>

³¹ Peduru mbwenye okalela ntindi eraga: <<Masiki dipiwege vamohi na nyo, miyo kadiza durunani.>> Eto afwaye atene na aliwene kohowongaga mazu mamohive anne.

Yesu alobelaga Jesemani

³² Noira enne, aliwa kohodowaga nimburo nimohi neriwa Jesemani. Kagali wewule Yesu ohowonga na anamamuharaye eraga: <<Nyo garatini veva. Miyo nnadowa dalobele.>>

³³ Liye mutukulavo Peduru na Tiyagu na Juwawu adowagana waya liye. Adowaga, Yesu ohoroma umbuwela jengo jidjindji, liye kukumuwaga mmirimani mwaye.

³⁴ Evale ohowonga, liye ira: <<Mmirimani mwaga muhukala kumbanya undimuwa. Kumbanya unna miyo ku kumbanya undimuwa wowanda dipa. Nyo mbwenye halani veva, muing'anelege.>>

^35-36 Noira enne, Yesu ohosusagavo, ahiya evale anamamuharaye araru ale, dowa sogolro vang'onove, liye oramiha muru waye ante fiyiha vati, roma lobela eraga: <<Aba! Babani, yakala yowandeya, mudirambihede jengo jinafuna dizela. Nyo munowanda jatene. Dera mudikumihelemo kopo da goyi dinna miyo. Mbwenye kiireye nnga inafuna miyo, iireye nnga munafuna nyo.>>

³⁷ Noira enne, awelelaga wali anamamuharaye, aafwannye kagonaga. Evale ohowonga na Peduru eraga: <<Simawu, weyo unagona? Kodi kuwandile ing'anela nne ora imohi bahi?

³⁸ Muing'anelege eto mulobelege ira mwahaxixiwe na yotega. Nyo mmirimani mwenyu munofuna. Mbwenye maningo komala foka.>>

³⁹ Evale ohowelela wali liye dowa lobela. Yesu alobelaga, alobela mazu amohive.

⁴⁰ Awelagawo aafwannye aliwa kagonaga mwasiwa kohozaleliwa kove. Mwa enne tchannaga yomuwakula.

⁴¹ Evale ohozaga fendo yaneraru, liye afwanya kagonagave. Evale ohawandelaga eraga: <<Kodi munagonave eto munaave vuma? Ihikwakwana, tchoira oriwa ihifiya. Mwana wa Mutu unafuna avahediwe mmandani mwa atu otega.

⁴² Kavenyani ndoweni. Kaing'anani, ule unadiguliha unaza.>>

Hindiwa wa Yesu

⁴³ Yesu awongagave enne, tchi tempu yafiya Judasi wenno ali muwari mwa anamamuharaye kumi na ambinli vamohi na anamwindji kaganna masupada na golromondo diwa. Atwale karumiwe na andimuwa a anamakuta, anamafundjiha malamulo na andimuwa a aJudewu.

⁴⁴ Maliba nguliha Yesu ule ahanafiye wa Yesu, ohokana ionihedo yaavahile liye afwaye ale ira: <<Nafiya, munamuone nyo dinvahaga beju, mutuwa gwenno. Mmuhinde, mmutukule momuing'anela pama.>>

⁴⁵ Judasi agafiyile evale, mobaranya ohomuwandamelaga Yesu, liye ira: <<Namafundjiha!>> Nomala enne, liye mbejari.

⁴⁶ Agambejarile, tempu imohive yenne kohomuhinda, aliwa mmanga.

⁴⁷ Muwari mwa anamamuhara Yesu, ohokalamo mmohi apulunlege supada naye, liye funaga ira ankakatena namalaba mmohi wa mundimuwa wa anamakuta. Mbwenye supada nne nagwadilege nibaru na ikukuru ya muwononi odjana.

⁴⁸ Mwa enne Yesu ohowonga na ale kamuhinda ale, liye ira: <<Nyo mwazaga na masupada na golromondo dinyu ira mudihinde miyo, kodi munadiona nnga dili mbava?

⁴⁹ Miyo dakala na nyo malambo oindjiva Nyumba ya Yehova, dufundjihagani. Mbwenye nyo kamwadihindile. Mbwenye jatene eji jinaireya ira yenno ilrembiwe mMazuni ikwakwanele.>>

⁵⁰ Agairile eno, anamamuharaye kohomuhiya, aliwa tawa.

⁵¹ Kagamuhindile Yesu, wohokala muzombwe mmohi amuharaga. Muzombole wara uwa avipitikelrelrege lensori bahi. Mwa enne, anyakondo ale kohomuhinda muzombole.

⁵² Nomuhinda, liye ohoruxuwaga, hiya yowara yaye ile, liye tawa agali mandave.

Tongiwa wa Yesu

⁵³ Jagaireyile eno, kohomudowana Yesu vande va mundimuwa wa anamakuta. Vevale andimuwa a anamakuta na andimuwa a aJudewu na anamafundjiha malamulo kohogumana nimburo nenne.

⁵⁴ Kamudowaganave Yesu, mulombwana Peduru omuzembelaga Yesu vang'ono vang'ono mundulri, muharagave olapela wene. Ohasusela fiyeda vatando valigi atu, vande va mundimuwa wa anamakuta. Vevale liye ohogarati na agwarda ale kafwanyeya kaotaga munlo.

^55-56 Vevale andimuwa a anamakuta na andimuwa a anamatonga atene kohoroma sakasaka umboni ira kamugwihena mulandu Yesu ira kampe. Mwa enne kohooneya amohi kamunamelaga Yesu mazu. Mbwenye kavakumile yengo ya ibaribari mwasiwa mwa aliba namale, jowonga jiwa kajaharana.

⁵⁷ Kohooneya eto atu amohi kamunamelaga mazu keraga:

⁵⁸ <<Nihivwa liye awongaga ira: <Nyumba ya Yehova imangile atu na manda, miyo nnobwanyula, dimange muwari mwa malambo mararu nyumba imohiwa yohomangiwa na manda a atu.> >>

⁵⁹ Mbwenye masiki atene kamunamela ale, jonama jiwa kajaharana.

⁶⁰ Evale mundimuwa wa anamakuta ohovenyaga vamwindjini, liye nfuka Yesu vari va atu atene eraga: <<Kavwa jinaunukeda atu ji, kodi weyo kunakanave yowakula? Katiye, jatene jinawonga atu zela weyo tapulela ira nni?>>

⁶¹ Mbwenye Yesu kawakunlegeve yengo. Eregeve miyala bahi. Evale mundimuwa wa anamakuta ule ohowelelave nfuka akoka eraga: <<Kodi weyo uli Namatikeliwa, Mwana wa Mulugu Oteteliwa?>>

⁶² Yesu ohowongaga ira: <<MIYO DILI. Eto munoza mmuone Mwana wa Mutu agagaratile ikukuru ya muwononi odjana wa Mulugu wa Kopolo Datene eto munoza mmuone azaga mmiramboni zulu.>>

⁶³ Mundimuwa wa anamakuta ule agavwile mazu anne, ohokawulaga kamizaye eraga: <<Kodi hiyo nneregeve funa umboni wa mutu mmohiwa eva? Umboni umala oneya.

⁶⁴ Tchoira nyo mwatene muhumala vwa na mabaru enyu yenno iwongile liye amululuvihaga Mulugu.>> Mwa enne ohafukaga anamwindji eraga: <<Nnafuna nimuirenani avi?>> Anamwindji atene kaligi vevale kohowongaga keraga: <<Inafwanela apiwe!>>

⁶⁵ Evale kohokalawo karomile mutapelaga mare, aliwa mmangaga wintoni, nkomaga na maxoko keraga: <<Kamurohe ukomile!>> Eto agwarda kali evale na aliwene kohomuhinda, aliwa roma nvaha makofi.

Peduru ohomuruna Yesu

⁶⁶ Vande va mundimuwa wa anamakuta vale nikonde niwa nohokala hogwela vang'onove. Peduru agali mpedi muwa, ohozaga namwali mmohi amulaba mundimuwa wa anamakuta.

⁶⁷ Namwali ule agamuonne Peduru aotaga munlo, ohomuing'anaga, liye ira: <<Weyo wawendetcha vamohi na Yesu wa Nazareti.>>

⁶⁸ Evale Peduru ohomuruna eraga: <<Miyo wenne kadimuiziwile, nne kadiiziwile inawonga we.>> Evale Peduru noira eno ohodowa va mulango va muru awerewera nyumbele. Agali va mulango vale, ora imohive yenne mutumbi ohonlaga.

⁶⁹ Namalabole agamuonne Peduru evale, ohoroma awandela atu aawandamenle liye evale ira: <<Mulombwana wenna na liyene gu namamuhara wa mutule.>>

⁷⁰ Evale mulombwana Peduru ohorunagave akoka. Mwa tempu ya vang'onove atu kaligi evale kohomuwongana Peduru akoka keraga: <<Na ibaribari weyo uli namamuhara wa mutule, tchoira na wenne uli wa Galileya.>>

⁷¹ Evale Peduru ohoroma lumbela aawandelaga eraga: <<Miyo mulombwana wenno munamuwonga nyo uyo kadimuiziwile! Akala miyo nnawonga yonama, Mulugu aditonge.>>

⁷² Agalumbenle enne, mwa ora imohive yenne mutumbi ohonlaga. Evale Peduru ohoumbuwelaga mazu amuwandenle Yesu oira: <<Mutumbi ahananle fendo yanembinli, weyo unodiruna fendo taru wiraga: <Kadimuiziwile.> >> Evale Peduru ohokumaga evale, liye roma nla.