Markuji 13 - Mazu Otchena a Mulungu

Yesu ohowonga zela bwanyuliwa wa Nyumba ya Yehova

¹ Yesu avenyaga vatando va Nyumba ya Yehova, ohokala namamuharaye mmohi amuwongilena eraga: <<Namafundjiha, kaing'anani riya uriyile nyumba di eto vamohi no riya uriyile mabwe kamangilena atu ala.>>

² Evale Yesu ohomuwandelaga ira: <<Akala weyo unaona nyumba dapama di peno va, vasogolro veva kavali nibwe nnafuna za kala vazulu va nibwe nfwaye. Jatene eji jinomala bwanyuliwavo.>>

Yesu ohowonga zela harahariwa na goyi malambo omariha

³ Yesu ohogaratigi Mwango wa Mitengo da Azeti, mwango wenno unafwanyeya kombela ha ule, sogolro wa Nyumba ya Yehova. Agagaratile evale, Peduru, Tiyagu, Juwawu, na Andire kohozaga aliwa nfuka vewa vene keraga:

⁴ <<Kaniwandeleni siku nnafuna za ireya jatene ejo. Kodi ionihedo tchivi inafuna za ireya jatene ejo jafunaga kwakwanela.>>?

⁵ Evale Yesu ohawakulaga, liye roma afundjiha eraga: <<Polre polre tawiha ira munaze mmuhare mutu ouholotchani.

⁶ Mwasiwa atu adjindji anerege za kavikalihege nnga miyo, kawongege kerege: <Miyo dili Kiristu>, kahali. Eto anofiyeda anyenga atu adjindji.

⁷ Eto mwavwa ja kondo, na ja fe fe fe ja kondo, kamukukumuwe, mwasiwa ili yofuneya ira ejo jiireye. Mbwenye mwaona ejo jiireyaga kahi ira ku magomelo nari.

⁸ Mwasiwa nlogo nimohi nnoza nivenye ira niwanege na nlogo nimohi niwa, umwene unoza uwanege na umwene umohiwa. Pandi didjindji dene da ilambo munoza mukale vindarandara eto munoza mufwanyeyege ndala. Mbwenye jatene ejo jaza jiroma ireya, wewo unakala maromelo wa goyi nnafuna atu ona nnga muhiyana aromaga wene ona upa obala.

⁹ <<Ifwanele ira muviing'anele pama, mwasiwa munoza muvahediwe mmandani mwa anamatonga. Aliwa anoububudani muwari mwa nyumba dofundjamo Mazu eto anoza kaudowenani mmandani mwa agovernadore nari mmandani mwa amwene. Jatene ejo jinauireyelegeni na mwasa wa nzina naga ira nyo mudihidedele umboni.

¹⁰ Tchoira ilambwela ya vati yahanafiye magomelo, inofuneya ira Muselu Wapama alaleyiwe mwa malogo matene.

¹¹ Mbwenye aliwa kauhindani, kausumelani, kamukale okukumuwene zela mazu anafuna nyo wonga. Mbwenye yafiya tempuwa ira nyo muwonge, inafwanela muwonge yenno Mulugu inauwandeleni liye. Mwasiwa mazu munafunege nyo wonga kinakala enyu, anakala mazu okumela wa Munemba Otchena.

¹² <<Mutu unerege muguliha mbalaye obaliwana ingulu imohive ira apiwe eto babi unerege muguliha mwanaye. Eto ahima anerege apiha ababiwa.

¹³ Atu atene anerege uidani na mwasa wa nzina naga. Mbwenye mutu wenno unavilele ante magomelo, unovulumuwa.>>

Yesu ohawendjeliha anamamuharaye zela jengo jinafuna ireya

¹⁴ Yesu ohowelela wonga akoka eraga: <<Nyo mwaza muona yabure yohokala ya masika, yengo yotakaliha Nyumba ya Yehova yagaimetchiwe nimburo nohofwanela imetchiwavo (ule unaileri mazwala, aumbuwele pama tapulela uwa), atu anne anakale Judeya, inafwanela katawelege mmwangoni.

¹⁵ Mutu wenno unafwanyeye vazulu va nyumba yaye, aza avwa ira: <Yengo yotakala ile ihimetchiwa>, inafwanela atawe mobaranya, atita nne kavolowe mmba mwaye ira atukule yengo.

¹⁶ Nari mutu wenno unafwanyeye agali minda, na liyene kawelele vande ira adowe atukule kapa yaye.

¹⁷ <<Udilu zela ahiyana okana vambani na ahiyana okana ahima ang'onong'ono owamwa matempu anno!

¹⁸ Inafwanela mulobele ira ejo jahaireye tempu yodidila.

¹⁹ Mwasiwa malambo anne inoza ikalewo goyi ilukulu, yenno ili yahanababihege kalawo roma mapandutchiwelo wa jatene, jejo jipandutchile Mulugu fiyeda peno. Eto goyi yenno yavira, kiza ikalawo goyi imohiwa yokala ha yenno.

²⁰ Eto Nabwiya uhuvungula malambo a goyi dile na mwasa wa atu osakulriwa anno waasakunlre liye. Mbwenye Nabwiya ahavungula malambo a goyi dile, kalivo afuna vulumuwa.

²¹ <<Eto munvwa mutu auwandelagani ira: <Namatikeliwa ula!>, owu hehi airaga: <Namatikeliwa ule!>, kamuroromele.

²² Mwasiwa anoza kakumelele akiristu onama na anamafiyiheda onama. Aliwa anerege irana jionihedo na jotikiniha johokala ja masika ira kaanyengege atu. Eto jakala jowandeya anerege anyenga atu osakulriwa na Mulugu.

²³ Mbwenye nyo mukale tchendjewa! Miyo nnouwandelani jatene ejo, jengo jiwa jahanaireye.>>

Yesu ohowonga makalelo a mazelo aye

²⁴ Yesu ohowongagave eraga: <<Muwari mwa malambo anne, goyi dile damalaga, nzuwa nnoza nidibe eto mwedi kanamoneyege.

²⁵ Zulu ule nyenyedi nnoza dimorewo eto kopolo datene da zulu nnoza ditikinyeye.

²⁶ Jaireya eno, munoza mmuone Mwana wa Mutu azelaga mmiramboni na kopolo no wareya wohokala wa masika.

²⁷ Evale liye unoza aarume angelro aye ira kaze mwilamboni mwatene kaagumanihe atu atene osakulriwa pandi dannayi dene da ilambo, roma magomelo wa ilambo ya vati fiyeda magomelo wa ilambo ya zulu.

Yesu ohofwalrafwaniha mutengo wa mufigera na mazelo aye

²⁸ <<Inafwanela mufundje zela yofwalrafwaniha ya mutengo wa mufigera. Nyo mwaona matakuru aye karoma puwa, munovayela iziwa ira tempu ya muzongwe ihiwandamela.

²⁹ Tchi imohive eto inafuna za ireya zela za wa Mwana wa Mutu. Mwaona jeji jiireyaga inafwanela muiziwe ira liye uhuwandamela, uli vakwikwive na va mulango.

³⁰ Nnafuna duwandeleni ibaribari ira jatene eji jinokwakwanela atu okalawo malambo anne kahanamale kwa.

³¹ Zulu na ilambo ya vati jinoza jivire, mbwenye mazwaga kiza kamala.>>

Yesu ohawendjeliha anamamuharaye ira kakale oing'anela

³² Yesu ohowongagave eraga: <<Mbwenye zela siku niwa vamohi na oriwa inafuna za Mwana wa Mutu, kalivo uiziwile. Nne angelro anakala zulu, nne miyo Mwanaye. So uiziwile gu Baba mwinnya bahi.

³³ Mukale tchendjewa, muing'anelege eto mulobelege. Tchoira nyo kamuiziwile tempuwa inafuna za fiya jatene ejo.

³⁴ Mwasiwa inaza ikale nnga patarawu unakuma vande vaye, adowaga olapela wene. Liye ahanavenye vande vale unonvaha kada namalaba mabasa anafunege liye laba. Anamalaba atene agamanle agawela mabasa, unomukokomeza eto gwarda uli va mulango ira aing'anelege.

³⁵ Na nyenne ifwanele muing'anele, mwasiwa siku nnafuna za maliba vande kamuiziwile. Akala unatwanyuwa na tchiguwo, akala unaza vari va mahiyu, akala unaza mitumbi dinlaga, akala unaza na mabebehi kamuiziwile.

³⁶ Ifwanele muing'anele ira liye afiya morurumutcha, ahaufwanyeni mugonaga!

³⁷ Ilukuluwa inoukokomezani miyo mwatene tchoira mukale oing'anela.>>