Markuji 12 - Mazu Otchena a Mulungu

Yesu ohowongaga yofwalrafwaniha ya anamalima abure

¹ Yesu ohoroma awandela muwari mwa jofwalrafwaniha eraga: <<Ohokalawo mulombwana mmohi eni anna tereno yaye, liye limamo mundaye wa uva. Agazanle munda watene wenne, ohomanga muru, liye wereweriha mundole. Noira eno, ohomangaga nimburo ira kanyingalelegemo uva ira akumege vinyu. Eto ohosakanyagamo mmundani mule nyumba yolapa ya gwarda ira aing'anelege munda watene. Noira enne, ohasakaga anamalima, liye aalugariheda, liye dowaga muulrendoni mwaye ilambo imohiwa ya unde.

² Yagafiyile tempu yohanda, mwinnyole ohomuruma mutu ira adowe atukule pandi yenno yafuna kala yaye muwari mwa jovaha jatene ja mmundani mule.

³ Evale maliba rumiwa ule agadowile, anamalimale kohomuhinda, aliwa mbubuda, nomala aliwa muruma, liye dowaga eno ahatukunle yengo.

⁴ Mwa enne mwinnyole ohomuruma namalaba mmohiwa, mbwenye aliwa kohomukoma murwaye, aliwa mporotcha eto kohomusakanya ja manyazo.

⁵ Eto mmohiwa ohorumiwa, liye dowa wewule, mbwenye anamalimale kohompa. Atu adjindjene kohoiriwana makalelo mamohive anne. Amohiwa kohobubudiwa eto amohiwa kohopiwa.

⁶ Mbwenye vogomiheda, mwinnyole ohomuruma mwanaye mmohive amuziveliwa liye, aumbuwelaga ira: <Mwanagola mbwenye, aliwa anomuriheda.>

⁷ Mwanole agadowile, aliwa kagamuonne, kohowonga mmohi na nfwaye keraga: <Ula gu mwana unafuna halana jengo jatene jeji babaye akwa. Ndoweni nimpeni, era eno, jatene jafuna liye halana babaye agakwile jinokala jehu.>

⁸ Evale kohomuhinda mwanole, aliwa mpa, mutatilela unde wa mundole.>>

⁹ <<Nnga jagaireyile eni, mwinnya wa mundole unaira avi? Jagaireyile eno liye unoza aape alombwanale, amala eno atukule mundole, aalugarihede anamalima amohiwa.

¹⁰ Nyo kamwilerile jejo jinafwanyeya mMazuni? MMazuni muhulrembiwa ira: <Nibwe neno nalramwisile aliba manga nyumba, peno ti nibwe na vamwendoni.

¹¹ Ejo airilena gu Nabwiya eto tchi yengo yapama yotikiniha vamentoni vehu!> >>

¹² Andimuwa a aJudewu kaligi evale Yesu awongaga liye enne, kohoiziwa ira Yesu awonga yofwalrafwaniha ile ira aamange mulandu aliwene. Evale aliwa kohokagana yofuna ira kamuhinde Yesu kampe, so mbwenye kaaova anamwindji kaligi evale. Noira enne, kohomuhiyaga Yesu evale, aliwa dowaga jiwa.

Andimuwa a aJudewu kohomuxixa Yesu zela nkani wa misoko

¹³ Kagairile enne, koharuma aFarizewu vamohi na aJudewu ofuna ja Erodi ira kadowe kawonge na Yesu muwari momuxixa ira kaonevo mwasa ofuna mugwihana mulandu.

¹⁴ Aliwa kohofiya kawongaga ira: <<Namafundjiha, hiyo nihiiziwa ira nyo muli mutu owonga ibaribari eto kamunabalra utongi wa atu amohiwa. Eto nyo kamunatonga muwari moing'ana kove, mbwenye munafundjiha ndila ya Mulugu mwa ibaribari. Nera muniwandele. Kodi mwa malamulo ehu inorumelihiwa nimpagalrigi misoko Sezare, owu hehi?>>

¹⁵ Evale Yesu ohoonelramo zela ja ungongomwa jawonga atu. Mwa enne ohawongagana eraga: <<Kodi nyo munafunela nni jodixixa miyo? Kazanani uno kobiri imohi ya parata ira miyo dione.>>

¹⁶ Kaganvahile, liye ohafuka eraga: <<Kodi nzina vamohi na kove jili vakobirini va jaani?>> Aliwa kohorumela keraga: <<Ja Sezare.>>

¹⁷ Noira eno, Yesu ohawandelaga eraga: <<Ja Sezare, munvahege Sezare. Ja Mulugu, munvahege Mulugu.>> Evale aliwa kohotikiniheya na mwasa wa mazu Yesu awongile liye.

ASadusewu kohonfuka Yesu zela nkani ovenya mokwani

¹⁸ ASadusewu anno ani mutu akwa, kanavenya mokwani, kohodowaga wali Yesu, aliwa nfuka keraga:

¹⁹ <<Namafundjiha, Mozeji ohonilrembela nlamulo noira: <Mulombwana mmohi akwa, amuhiya muhiyana ahanambalena ahima, mbalaye adowe amutele muhiyanole, ambalena mwana ira akale mwana wa mbalaye ukwile ule.>

²⁰ So mbwenye iireyile tchoira kohokala alombwana atanu na ambinli kabaliwe ingulu imohive. Mulukuluwa mutela muhiyana eto liye kwa ahambanlena mwana.

²¹ Owelela liye mutela muhiyanole eto liye kwa ahambanlena mwana eto waneraru na liyene yohomuireyela yengo imohive.

²² Mwa enne yoireyave eno fiyeda ira alombwana atene anne kohomutela muhiyanole eto kohokwa kahambanlena ahima. Atene anne kagamanle, muhiyanole eto na liyene liye kwa.

²³ Nnga jiireyile atu eno, siku novenya, atu atenene okwa kakalagawo, va alombwana atene anne, unafuna kala muhiyanole mamunaye bani? Tchoira atenene kohomutela!>>

²⁴ Yesu ohowakula ira: <<Nyo muhumala nyengiwa, mwasiwa nne kamuiziwile jejo jilrembiwe mMazuni, nne kopolo da Mulugu nyo kamuiziwile.

²⁵ Tchoira atu atenene okwa kavenya, kunakala telana. Mbwenye atu atene anaza kakale nnga angelro a zulu.

²⁶ <<Zela venya mokwani, kodi nyo kamuilerile mazu kalrembiwe mulivuru na Mozeji, anawonga zela mulombwana Mozeji aonaga nikupu nihindaga munlo? [Abarahamu, Izaki na Jako kagakwile wanle,] Mulugu ohowonga na Mozeji ira: <Miyo dili Mulugu wa Abarahamu, Mulugu wa Izaki na Mulugu wa Jako!>

²⁷ Ku wonga Mulugu kahi Mulugu wa aliba kwa, mbwenye gu Mulugu wa aliba kalawo. Nyo eno muhumala holowa.>>

Yesu ohowonga nlamulo nlukulu nokwaranya malamulo matene

²⁸ Ohokala eto namafundjiha malamulo azile evale, liye roma vuruwana jowonga jile. Liye mbwenye agaonne ira Yesu ohowakula pama, ohonfuka Yesu eraga: <<Kodi nlamulo nlukulu kwaranya malamulo matene tivi?>>

²⁹ Yesu ohowakula eraga: <<Nlamulo nlukulu kwaranya malamulo matene ti ni: <Kavuruwanani aIzarayeli! Nabwiya Mulugu wehu gu mmohi bahi.

³⁰ Umuziveliwege Nabwiya Mulugu wawo na mmirimani mwawo mwatene, no kalawo wawo watene, no onelramo wawo watene, vamohi na kopolo dawo datene.>

³¹ Nanembinli nlukulu ti ni: <Umuziveliwege mutu uli watene nnga munaviziveliwela we wa mwinnya.> Kanilivo nlamulo nimohi niwa nlukulu hiya menli ala.>>

³² Evale namafundjiha malamulo ule ohomuwongana Yesu eraga: <<Namafundjiha, muhuwonga pama! Muhuwonga ibaribari mwasiwa Mulugu gu mmohive eto kaliwo Mulugu mmohiwa ahali liye.

³³ Nimuziveliwegeni Mulugu na murimihu watene, no onelramo wihu watene, na kopolo dihu datene eto naazivelegeni afwihu amohiwa nnga munavizivela hiyo oka. Tchoira tchapama vwelelaga malamulo menli anna, hiyaniha no zana wa Mulugu jovelela jotumeya jatene na mikuto datene.>>

³⁴ Evale Yesu agaonne ira namafundjiha malamulo ule ohorumela moonelramo, ohomuwandela eraga: <<Weyo kuli olapela na muUmweneni mwa Mulugu.>> Mwa enne kalivo awandile nfuka Yesu yengo imohiwa.

Yesu ohowonga zela Namatikeliwa

³⁵ Yesu afundjihaga Nyumba ya Yehova, ohofuka eraga: <<Kodi mwasiwa gwa nni anamafundjiha malamulo fundjihaga ira: <Namatikeliwa unafuna akale mwana Davi.>?

³⁶ Tchoira Davi muwari mozaleliwa Munemba Otchena oholremba ira: <Nabwiya uwonga na Nabwiya waga eraga: <<Ugarati muwononi waga odjana ante difiyede agondjiha amwidanawo ira kakale nnga yengo yonyingalihavo manyalo awo.>>>

³⁷ Akala Davi amuira Namatikeliwa: <Nabwiya waga>, nnga unawande avi tempu imohive kala mwana Davi?>> Yesu awongaga enne, anamwindji kaligi evale koziveliwa kavuruwanaga jejo jafundjihaga liye.

Yesu ohawandela atu zela ubure wa anamafundjiha malamulo

³⁸ Yesu afundjihagave, ohawandela atu eraga: <<Polre polre na anamafundjiha malamulo! Tchoira aliwa anoziveliwetcha wara bata dolapa. Eto anoziveliwetcha londjeliwa kawendaga murampani.

³⁹ Kafiya nyumba dofundjamo Mazu, anaziveliwetcha garati mipando da sogolro. Eto kadowa vapwandoni anagaratetcha mipando dorihediwa.

⁴⁰ Aliwa anaawaka amakwele a ahiyana nyumba diwa eto anolapiha malobelo ewa ira kaoniwege na atu. Na mwasa wa ejo anoza katongiwe na makalelo abure ohokala a masika.>>

Yesu ohomutetela makwele mmohi avelenle kobiri ya vang'ono yanna liye

⁴¹ Yesu ohogaratigi Nyumba ya Yehova aing'anaga makalelo kavelela atu kobiri mukaxani mwa jovelela. Mwa enne kohokalawo atu adjindji orayela kavelela kobiri ilukulu ya mbwabwada.

⁴² Mbwenye ohozaga makwele mmohi wa muhiyana eto agali mutu osimela. Liye ohovelelaga mukaxani kobiri mbinli da gwindji gwindji, da valori ing'ining'inive.

⁴³ Yesu agamuonne muhiyanole, ohaitanaga anamamuharaye eraga: <<Na ibaribari nnouwandelani ira muhiyanola, wenna unafwanyeya agali makwele osimela, uhuvelela kwaranya atenene kavelenle kobiri dilukulu emu.

⁴⁴ Mwasiwa atu amohiwa kavelenle muwari mokana jimohi jiwa vande viwa. Mbwenye muhiyanola muwari mosimela mwaye uvelenle kobiri yatene yanna liye, yenno yafuna mulaba zela kalawo waye.>>