Markuji 11 - Mazu Otchena a Mulungu

Volowa wa Yesu sidadi ya Jeruzalemu

¹ Yesu na anamamuharaye kagakwivenle Jeruzalemu, kagali vakwikwi ira kafiye tatamo ya Betifaji na Betaniya, wewo uli Mwango wa Mitengo da Azeti, oharumaga anamamuharaye ambinli eraga:

² <<Dowani tatamo nnafwanyeya sogolro. Mwavolowaga wene, munofwanya mwana buru agamangeleliwe, wenno uli ahanarome gweliwa. Mwanfwanya mmutapule, mmuzena uno.

³ Eto akalavo mutu unafuna ufukani ira: <Mwasiwa gwa nni mutapulaga buruyo?>, muire: <Nabwiya gunafuna ira alabena. Amala unomuzana.> >>

⁴ Evale anamamuharaye kohodowaga, aliwa nfwanya mwana buru agamangeleliwe unde, mmambalo mwa ndila, va mulango eni. Evale kohomutapula.

⁵ Mbwenye atu kaligi vevale kohafuka keraga: <<Munamutapulela nni buruyo?>>

⁶ Aliwa kohowakula nnga Yesu mwawongele liye. Vevale kohorumeliha.

⁷ Anamamuharaye kagamutukunle buru ule, kagadowilena vali Yesu, kohela kapa diwa vazulu va buru ule, Yesu liye gwelavo.

Yesu ohowatcheliwa nnga mwene

⁸ Atu adjindji kotandelaga kapa diwa mundila eto amohiwa kohokana tambi dokana matakuru dakasile atu mmindani, aliwa mwadaga mundila ira Yesu avire mwemule.

⁹ Eto mwindji wa atu atene roma ale kaligi sogolro vamohi na ale kaligi mundulri, kokuwaga keraga: <<Hozana! Orelihiwa gu Mwene wenno unaza na nzina na Nabwiya!

¹⁰ Orelihiwa akale umwene wa babihu Davi unaza. Hozana Mulugu Okwaranya Jatene!>>

¹¹ Yesu ohovolowa muJeruzalemu, liye dowa Nyumba ya Yehova aing'anaga jatene jali mmambalo. Mbwenye voira nzuwa nohovira, ohodowa tatamo ya Betaniya na anamamuharaye kumi na ambinli.

Yesu ohotembelrelra mutengo mmohi wa mufigera

¹² Mmetcheloni muwa kawelagawo Betaniya, Yesu ohokana ndala.

¹³ Evale ohoonaga olapela wene mutengo mmohi wa mufigera aganna matakuru gubu gubu gubu, liye dowa wewule ira aone akala vohokala jovaha. Mbwenye agawandamenlevo, afwannye matakuruve bahi, mwasiwa mutengole tempwaye yovaha yali yahanafiye.

¹⁴ Evale Yesu ohomuwandela mutengole eraga: <<Kalivo mutu unafuna za welela dja jovaha jawo.>> Yesu awongaga enne anamamuharaye kohovwa ejile.

Yesu ohatamangiha aliba malronda Nyumba ya Yehova

¹⁵ Yesu na anamamuharaye kagafiyile Jeruzalemu, liye ohovolowaga vatando va Nyumba ya Yehova, liye roma atamangihamo anamagula na anamaguliha atene. Ohogwihaga meza da aliba tchindja kobiri na kadera da aliba guliha kangayiwa.

¹⁶ Eto kamuhiya mutu vira vatando va Nyumba ya Yehova vale aganna jengo jaye joguliha.

¹⁷ Eto oafundjiha atu eraga: <<Ihilrembiwa ira: <Nyumba yaga inaitaniwege: <<Nyumba yolobelamo para atu a malogo matene.>>> Mbwenye nyo muhuisandutcha kala nifukwe noakoyamo ambava!>>

¹⁸ Andimuwa a anamakuta na anamafundjiha malamulo kagavwile jairile Yesu, kohoroma saka zelru tivi ira kampena. Mbwenye komuova Yesu, tchoira atu adjindji kotikiniheya zela mafundjihelo aye.

¹⁹ Nzuwa nagavirile, Yesu na anamamuharaye kohovenyamo musidadi mule.

Umma wa mutengo wa mufigera

²⁰ Mmetcheloni muwa na mabebehene, Yesu na anamamuharaye kaviraga wandamelana vamutengoni va mufigera vale, kamuonnege mutengole uhumala umma na mitchitchi diwa dene.

²¹ Evale Peduru ohoumbuwela jawongile Yesu munziloni muwa, liye wonga na Yesu eraga: <<Kaing'anani Namafundjiha! Mutengo wa mufigera mwamutembelrelre nyo nzilo uhumala umma.>>

²² Yesu ohomuwakula eraga: <<Mmuroromele Mulugu.

²³ Mwasiwa mwamuroromela Mulugu, na ibaribari nnouwandelani ira wawonga na mwangola ira: <Katchikuwavo udowe wamorele bara>, wahanna yowanganyeda mmirimani mwawo, waroromela ira inoireya yenno iwongile we, na ibaribari inoireya.

²⁴ Na mwasa wenno nnouwandelani ira jatene jinavepe nyo molobela inafwanela muroromelege ira: <dihimala vahiwa.> Mwera eno, jinoireya.

²⁵ Eto mwalobelaga, mubabihege akurumuwela anno kauireleni yabure ira Babinyu uli zulu awande kurumuwela jotega jenyu.

²⁶ Tchoira nyo mwahaakurumuwele afwinyu, babinyu uli zulu na liyene kanakurumuwela jotega jenyu.>>

Andimuwa a aJudewu kohonfuka Yesu zela utongi anna liye

²⁷ Nomala enne, kohowelela Jeruzalemu akoka. Yesu awendaga vatando va Nyumba ya Yehova, andimuwa a anamakuta, anamafundjiha malamulo na andimuwa a aJudewu kohozaga valigi Yesu vale,

²⁸ kanfukaga keraga: <<Jatene jinaira we ji, unairana na utongi waani? Uurumile bani ira uiregena eji?>>

²⁹ Yesu ohawakulaga eraga: <<Na miyene eto nnafuna dufukeni yengo imohi. Mwadiwakula pama, na miyene nnouwandelani mutu wenno udivahile utongi ira diiregena jinera miyo.

³⁰ Kodi anvahile Juwawu utongi ira aabatizege atu, ali ani? Ali Mulugu uli zulu owu ali atu? Kadiwakuleni!>>

³¹ Evale aliwa kohoroma wonga oka oka keraga: <<Kodi mutula nimuwakule avi? Nera niwonge ira: <Anvahile utongi ali Mulugu uli zulu>, liye unofuka ira: <Nnga mwasiwa gwa nni nyo muza mwaharoromelaga jawonga Juwawu?>

³² Teto nawonga ira: <Anvahile Juwawu utongi ali atu>, nnaaova anamwindji anafwanyeya eva ala mwasiwa atene anna kohoiziwa ira na ibaribari Juwawu ali namafiyiheda wa Mulugu.>>

³³ Na mwasa wenne, kohomuwakulaga Yesu keraga: <<Kanimuiziwile amurumile Juwawu.>> Evale Yesu ohowonga eraga: <<Bahi eto, na miyene kannamuwonga mutu udivahile utongi zela jinairana miyo ji!>>