Markuji 10 - Mazu Otchena a Mulungu

Yesu ohowonga zela muselu omwalana

¹ Yesu ohokumaga nimburo nenne, liye dowa ilambo ya Judeya ante kombela ya muhindje Jordawu. Atu oindjiva kohogumanaga akoka, valigi liye vale, liye oroma afundjihaga, nnga molemelela.

² AFarizewu kaligi evale, kofunafunaga muxixa Yesu, aliwa nfuka keraga: <<Kodi muwari mwa malamulo inowandeya mutu mulanya muhiyanaye?>>

³ Liye ohawakula muwari mofuka eraga: <<Nnga nyo Mozeji auwandenleni avi?>>

⁴ Evale aliwa kohowakulaga ira: <<Hiyo nlamulo na Mozeji nnaniwandela ira mutu afunaga mulanya muhiyanaye, unalremba dugumento anvahe muhiyanole, amala amurume adowege.>>

⁵ Evale Yesu ohowonga eraga: <<Akala nyo mohonvwa Mozeji awongaga mazu anna, liye alrembele para nyo mwasiwa mohokana mirima dovanda.

⁶ Mbwenye voroma vene, Mulugu apandutchaga wene jatene jene, amusakanyile mulombwana mmohi na muhiyana mmohi.

⁷ Nona mulombwana unerege muhiya babaye na mmaye ira adowe ambande muhiyanaye,

⁸ era eno, ambinlene anokala maningo mamohive bahi. Mwa eno, aliwa kinakala maningo menli, mbwenye maningo mamohive bahi.

⁹ Nona kakalevo unafuna mwalaniha yenno Mulugu igumanihile liye.>>

¹⁰ Kagawelenle vande, anamamuharaye kohonfuka zela muselu mmohive wenne.

¹¹ Evale Yesu ohowakula eraga: <<Mulombwana wenno unamwalana na muhiyanaye, amala adowa amutela muhiyana mmohiwa, unararuwa eto unamutegela ampudjaga muhiyanaye oromole.

¹² Eto muhiyana amwalana na mamunaye, adowa ateliwa na mulombwana mmohiwa, na liyene unararuwa.>>

Yesu ohareliha ahima

¹³ Kohokalaga atu kaatukunle ahima, kaadowana valigi Yesu ira Yesu aahelege manda, aarelihe. Anamamuharaye eto kohoroma asumululaga aliba azana ahimale ira kahaafiyena evale.

¹⁴ Mbwenye Yesu ohotakaleliwa, eraga: <<Mwahiye ahima kaze vali miyo, kamwakondihe. Mwasiwa Umwene wa Mulugu, annya ba atu okala nnga ha ahima anna.

¹⁵ Miyo na ibaribari nnouwandelani ira mutu wenno ahanawatchele Umwene wa Mulugu mokala nnga mwana, liye kaza avolowa muUmweneni.>>

¹⁶ Yesu agamanle wonga eno, ohatukulaga ahimale, aakumbarelaga, aahelaga manda, aarelihaga.

Muselu wa mulombwana mmohi orayela

¹⁷ Yesu avenyihanaga ira adowege muulrendoni mwaye, ohokala mulombwana mmohi orayela atamangile za wa Yesu, liye mukokorela. Agamukokorenle, ohonfuka ira: <<Namafundjiha wapama, miyo ira dikayena ingumi yohomala, dire avi?>>

¹⁸ Yesu mbwenye ohowakula ira: <<Kodi unadiirela nni wapama? Kalivo uli wapama ahali Mulugu bahi.>>

¹⁹ Evale Yesu ohomuwandelaga ira: <<We umala iziwa malamulo anowonga ira: <Kumpe mutu, kuraruwe, kube, kumunukede mutu, kumudjelre mutu, umurihedege babawo na mmawo.> >>

²⁰ Evale mulombwanole ohowonga ira: <<Namafundjiha, jatene ejo miyo nnoirana romela uzombweni waga.>>

²¹ Yesu ohomuing'ana momuzivela, liye muwandela ira: <<Ihala yengo imohi ira wirena. Udowe wagulihe jatene jinna we, utukule kobiriwa waagawele aliba simela. Wairana eno, unokana rayela ilambo ya zulu. Wamala, uze udihare.>>

²² Mbwenye liye agavwile mazwale, ohokalaga lohulo. Mwa enne ohokumagavo okumbanyene mwasiwa liye ali mutu orayela.

²³ Evale Yesu ohaing'ana anamamuharaye, liye kwi: <<Nnafuna duwandeleni, ili yorutcha ira mutu orayela avolowe muUmweneni mwa Mulugu!>>

²⁴ Evale anamamuharaye kagavwile mazu anne kohotikinaga. Mbwenye Yesu ohowonga akoka eraga: <<Anaga, ili yorutcha ira aliba nyindela jorayela kavolowe muUmweneni mwa Mulugu.

²⁵ Tchoira ira kamelo axolre mopovowa mwa singano no ira mutu orayela avolowe muUmweneni mwa Mulugu, inarutcha tchoira mutu orayela avolowe muUmweneni mwa Mulugu.>>

²⁶ Vevale anamamuharaye kohotikiniheya valukulu, aliwa roma fukana oka oka keraga: <<Nnga era eno, unafuna vulusiwa bani?>>

²⁷ Evale Yesu ohaing'anaga aliwa, liye kwi: <<Mwa mutu ekave kinawandeya. Mbwenye na Mulugu kajirutchile. Tchoira na Mulugu jatene jinowandeya.>>

²⁸ Evale Peduru ohoroma wonga na Yesu ira: <<Kaing'anani! Hiyo nihiya jatene uharagani nyo.>>

²⁹ Yesu ohowakula eraga: <<Na ibaribari nnouwandelani ira mutu wenno unahiye nyumbaye, abalaye, arongoliye, mmaye, babaye, ahimaye, nari tereno yaye na mwasa wa miyo eto na mwasa olaleya Muselu Wapama,

³⁰ agalive mwilamboni muno unotambilra fendo 100 da nyumba, arongoliye, abalaye, mmaye, babaye, ahima, nari tereno, vamohi no harahariwa. Eto tempu inaza sogolro, unotambilra ingumi yohomala.

³¹ Mwa eno, adjindji kali arandji peno va, anoza kakale ogomiheda eto adjindji kali ogomiheda peno va, anoza kakale arandji.>>

Yesu ohowelela wonga akoka zela kwa waye no venya waye mokwani

³² Yesu vamohi na anamamuharaye kohogundeyaga muulrendoni mwewa kadowaga Jeruzalemu. Liye ali sogolro, anamamuharaye aliwa muharaga mundulri katikinaga. Kohokalawo eto atu amohiwa kaahara kaganna ova. Evale Yesu ohaitanela anamamuharaye kumi na ambinli ale ikukuru imohi, liye roma wonga zela jejo jafuna muireyela eraga:

³³ <<Kavuruwanani pama! Hiyo eni ulrendola nnadowa Jeruzalemu. Nadowa wewule Mwana wa Mutu unoveleliwa mmandani mwa andimuwa a anamakuta, na anamafundjiha malamulo. Aliwa anomutonga ira apiwe eto anonvaheda mmandani mwa atu ohokala aJudewu.

³⁴ Atu ohokala aJudewu ale anompeta, kamutapele mare, kamuwaxule eto kamala, kampe. Eto akwa, siku naneraru unovenya mokwani.>>

Yovepa ya mulombwana Tiyagu na mbalaye Juwawu

³⁵ Jagaireyile enne, ana Zebedewu anno kafwanyeya kagali Tiyagu na Juwawu, kohofiya valigi Yesu, aliwa ira: <<Namafundjiha, nnafuna nuvepeni ira murumele niirela inafuna hiyo vepa.>>

³⁶ Yesu ohafuka eraga: <<Nyo munafuna miyo duireleni nni?>>

³⁷ Aliwa kohorumela keraga: <<Nera nuvepeni ira mwagarati mpando wenyu wa undimuwa unafuna nyo kana, munihiye ira mwa hiyo atu ambinli, mmohi agarati muwononi wenyu odjana, mmohiwa agarati muwononi wenyu oromana.>>

³⁸ Yesu mbwenye ohawakula eraga: <<Nyo inavepa nyo kamuiziwile. Kodi nyo munowanda ng'wa kopo ya goyi inafuna miyo ng'wa? Owu hehi kodi munowanda batiziwa mugoyini mwemo munafunela miyo batiziwa?>>

³⁹ Aliwa kohowonga atu kwi: <<He, nnowanda.>> Evale Yesu ohawandela eraga: <<Ng'wave, munong'wa kopo ya goyi inafuna miyo ng'wa. Eto batiziwave, munobatiziwa mugoyini nnga mwemo munafunela miyo batiziwa.

⁴⁰ Mbwenye ira dugaratiheni nfwaye muwononi waga odjana, nfwaye muwononi waga oromana, jejo mbwenye kahi miyo unafuna uvahani. So mipando dedo disakanyiwe ira kavahiwe ale kasakulriwe ira kagarativo.>>

⁴¹ Evale anamamuhara afwiwa kumi ale kagavwile yovepa yenne, kohotakaleliwa zela Tiyagu na Juwawu.

⁴² Vevale Yesu ohagumaniha anamamuharaye atene vamohi, liye ira: <<Nyo muhumala iziwa makalelo vinera andimuwa a atu a unde. Aliwa anovikaliha annya a atu anaatonga atu eto anoasogolrelra muwari mwa utongi.

⁴³ Mbwenye zela mwa nyo kamukale eno. Mofutukula, ule unafuna ira akale mundimuwa, akalege namalaba wa afwaye.

⁴⁴ Ule unafuna kala murandji, akalege muzari wa atu atene.

⁴⁵ Kalaga nnga Mwana wa Mutu. Mwana wa Mutu kazele ira atu kamulabege. Mbwenye uzele ira avahe ingumi yaye ira aawombole atu oindjiva.>>

Yesu ohonvulumutcha mutu ohoona eriwa Bartimewu

⁴⁶ Yesu na anamamuharaye kohofiya sidadi ya Jeriko. Kakumaga sidadile, kadowaga, ohokala mwindji wa atu oindjiva kamuhara. Evale ohokalaga mulombwana mmohi ohoona eriwa Bartimewu mwana Timewu, agaratilege mmambalo mwa ndila, avepaga kobiri.

⁴⁷ Liye agavwile ira Yesu wa Nazareti unavira, ohoromaga kuwa eraga: <<Yesu Mwana Davi, mudiwendele tangaranga.>>

⁴⁸ Evale Bartimewu akuwagave, kohokalavo atu adjindji karomile musumulula ira amiyale. Liye mbwenye kawanda miyaliheya. Okuwagave eraga: <<Mwana Davi, kadiwendeleni tangaranga miyo vano!>>

⁴⁹ Evale Yesu ohoimelaga, liye wonga ira: <<Kamuwandeleni wenno unadiitana uyo afiye uno.>> Atwale kohomuwandelaga keraga: <<Kavwa, kalimba kopolo, Yesu unauitana.>>

⁵⁰ Bartimewu agavwile enne, ohotatila kapa yaye, avenyaga mobaranya, adowaga waligi Yesu ule.

⁵¹ Evale Yesu ohonfukaga ira: <<Unafuna ira miyo duirele nni?>> Evale maliba haona ule ohomuwakulaga Yesu eraga: <<Namafundjiha, miyo nnafuna nnga dagaonne.>>

⁵² Yesu ohomuwandelaga ira: <<Tchiyege. Tchoira nroromelo nawo nuhuvulumutcha.>> Bartimewu ora imohive yenne ohoromaga ona, liye roma muharaga Yesu wayaga liye.