Markuji 1 - Mazu Otchena a Mulungu

Laleya wa mulombwana Juwawu

¹ Roma wa Muselu Wapama wa Yesu Kiristu, Mwana Mulugu,

² molingana na mwemo mulrembiwele atu livuru na namafiyiheda Izaiya ira: <<Kaing'ana, miyo nnoza dimurume maliba milanyo vasogolro vawo ira asakanyede ndila inafuna we vira.>>

³ Muhulrembiwa eto mazu oira: <<Ukala nizu nnakuwa muisalesaleni niiraga: <Sakanyedani rampa wa Nabwiya. Ongolani ndila inafuna liye vira.> >>

⁴ Mwa enne Juwawu ohoza, liye dowa muisalesaleni, roma alaleyaga atu ira katwaruwe eto kabatiziwe ira kaleveleliwe jotega jiwa.

⁵ Atu adjindji kakala ilambo ya Judeya na sidadi ya Jeruzalemu kodowa wa liye muhindje Jordawu. Aliwa korumelela jotega jiwa, aliwa batiziwaga na Juwawu.

⁶ Juwawu awara jowara josakanyiwa na mawoya a akamelo. Sintu naye nali na tembe eto adjetcha miserebo na nuwi da mukokolani.

⁷ Liye eto olaleyetcha eraga: <<Mundulri mwaga ukala unafuna zamo odikwaranya miyo eto na miyene kadili ofwanela worama ira ditapule mingohi da sapato daye.

⁸ Miyo nnaubatizani na mahindje, mbwenye liye aza, unaubatizegeni na Munemba Otchena.>>

Batiziwa wa Yesu

⁹ Mwa tempu yenne yalaba Juwawu mabasaye, Yesu ohovenya kuma sidadi ya Nazareti, muwari mwa porovinsiya ya Galileya, liye dowa batiziwa na Juwawu Mbatizi muhindje Jordawu.

¹⁰ Tempu yenne Yesu agamanle batiziwa, akumaga mwiko mule, ora imohive yenne ohoonaga zulu uhuleyaga. Evale Munemba ohommorelaga na makalelo nnga kangayiwa.

¹¹ Evale zulu wohokumelaga nizu niwongaga ira: <<Weyo uli Mwanaga unamuziveliwa miyo eto unadihagalaliha.>>

Xixiwa wa Yesu

¹² Nomala enne, mobaranya Munemba Otchena ohomutukulela Yesu muisalesaleni.

¹³ Evale Yesu ohomala malambo 40 muisalesaleni axixiwaga na Satana. Liye afwanyeya emule vamohi na anavinyama a mukokolani. Mbwenye kohokalawo eto angelro kamukamiheda.

Yesu ohaitana anamamuharaye oroma

¹⁴ Evale Juwawu ohindiwa, volotchihiwa kadeya. Agahindiwe, Yesu ovenya, dowa porovinsiya ya Galileya, liye roma alaleya atu Muselu Wapama wa Mulugu,

¹⁵ eraga: <<Tempu ihikwakwana, Umwene wa Mulugu uhuwandamela. Twaruwani, murumele Muselu Wapama.>>

¹⁶ Siku nimohi Yesu awendaga mmambalo mwa ntiya na Galileya, ohonfwanyaga Simawu na mbalaye Andire kavokelaga mataviwa mwiko mwasiwa aliwa kali anamagodomula.

¹⁷ Evale Yesu ohowongaga eraga: <<Kadiharegeni. Mwadihara, miyo nnousakanyani ira nyo mukale aliba agodomula atu.>>

¹⁸ Noira eno, mobaranya ambinlene kohiyaga mataviwale, aliwa roma muharaga Yesu.

¹⁹ Aliwa kadowagave sogolro, kagasusile vang'ono, Yesu ohafwanya anamagodomula amohiwa ambinli kagali na babiwa Zebedewu. Mmohi eriwa Tiyagu, mmohiwa ali mbalaye Juwawu. Aliwa kafwanyeya mmwadeyani mwiwa, katchapelraga mataviwa.

²⁰ Yesu ohovayela aitana ira kamuhare. Mobaranya aliwa komuhiya babiwa Zebedewu na anamalabiwa amohiwa mmwadeyani mwiwa. Aliwa roma muhara Yesu.

Yesu gu mwinnya ofundjiha eto gu mwinnya otamangiha minemba dabure

²¹ Evale Yesu na anamamuharaye kagadowile sogolro, kohovolowaga sidadi ya Kafaranamu. Nagafiyile siku na sabado, Yesu ohovolowaga nyumba yofundjamo Mazu, liye roma afundjiha atu kafwanyeya emule.

²² Yesu agaromile fundjiha, atwale kohoroma tikiniheya, tchoira liye aafundjiha nnga mwinnya, hiya nnga jaira anamafundjiha malamulo.

²³ Munyumbani mwiwa mwemo mwafundjiha Yesu Mazu mule, mohokalaga mutu mmohi agwa munemba otakala. Munemba anna mutule ohoroma wonga na Yesu mokuwa eraga:

²⁴ <<Yesu wa Nazareti, kodi munafuna muniirele nni hiyo? Kodi mwazela ira munitolotche? Miyo duhuiziwani pama. Nyo muli Mutu Otchena wa Mulugu.>>

²⁵ Evale Yesu ohomusumulula munemba otakala ule eraga: <<Kamiyala, ukumemo mwa mutuyo.>>

²⁶ Mwa enne munemba otakala ule ohoroma mukwatimiha mutule. Evale munembole ohokuwaga na kopolo. Agakuwile enne, ohokumagamo mwa mutule.

²⁷ Evale atu atene kaligi emule kagaonne enne, kotikiniheya kafukanaga oka oka keraga: <<Kodi jinereya ji nni? Mutula ukana mafundjihelo maxa a kopolo. Eto aruma minemba dotakala, minemba dile nnonvwelela.>>

²⁸ Mwa enne joira jaye johoroma vweya mobaranya mwilamboni mwatene mwa Galileya.

Yesu ohonvulumutcha mbogohi wa Peduru

²⁹ Jagaireyile enne, mohodibeliwa Yesu ohovenyaga agali na Simawu, Andire, Tiyagu na Juwawu, aliwa kuma muwari mwa nyumba yofundjamo Mazu mule, aliwa dowa vande va Simawu na mbalaye Andire.

³⁰ Evale Simawu mbogohaye afwanyeya ogonantene agali murenda, aganna febiri. Yesu agafiyile, aliwa kohovayela muwandela ira Simawu mbogohaye murenda.

³¹ Evale Yesu ohofiya vakwikwive na muhiyanole, liye muhinda ndanda naye, nvenyiha. Evale febiri yanna liye yohomala, liye roma apiyela jodja.

Yesu ohavulumutcha arenda adjindji

^32-33 Siku nimohive nenne ora ya tchiguwo nzuwa nagavirile, vande valigi Yesu vale vozaga atu atene a sidadile. Aliwa kohomuzelagana arenda atene a wewule vamohi na ale kazuzumihiwa na minemba dabure, aliwa gumana va mulango vali liye vale.

³⁴ Evale Yesu ohoroma avulumutcha arenda ohiyana-hiyana. Nari anno kazuzumihiwa na minemba dabure, oavulumutcha, akumihagamo minemba dile. Yesu mbwenye kahiyile minemba dabure dile ira diwongege zela liye mwasiwa dohomuiziwa.

Yesu ohalaleya ale kali kahanavwe ibaribari

³⁵ Yesu ohovenyaga na mabebehene unde wahanatche pama, liye dowaga nimburo wahali atu ira adowe alobele wewo.

³⁶ Simawu na afwaye tempu yavennyege atu, kanfwannye Yesu kalivo. Aliwa kohoromaga nvenda.

³⁷ Evale kohonfwanya, aliwa wonga ira: <<Atu anausakani mundulri mu kahi a masika.>>

³⁸ Yesu ohawandelaga ira: <<Miyo mabasaga kahi welela mundulri. Mbwenye miyo dizaga, dazele ira daalaleyege atu anno anafwanyeya sogolro. Ndoweni sogolro tatamo dimohi ira daalaleyege atu anafwanyeya wewo.>>

³⁹ Evale kohodowaga sogolro, kawendawendaga porovinsiya ya Galileya yatenene, liye alaleyaga atu munyumbani mwiwa mwemo mwafundja atu Mazu eto liye avulumutchaga arenda ogwa minemba dabure.

Yesu ohonvulumutcha maliba maranya

⁴⁰ Evale ohokala mutu mmohi anna maranya. Liye ohozaga valigi Yesu, liye mukokorela, muguzelaga Yesu mendo eraga: <<Mwafuna, dera mudivulumutche.>>

⁴¹ Yesu agaonne makalelo anna mutule, ohomukumbanya valukulu. Evale liye ohotapulaga ndanda naye, amusakwinyaga maliba maranya ule, liye ira: <<Miyo dihifuna ira uvulumuwe.>>

⁴² Mwa tempu imohive yenne, maranya anna liye kohomala. Liye vulumuwa.

⁴³ Evale Yesu ohomugunya muwari momukokomeza pama,

⁴⁴ liye ira: <<Wadowaga kuwongege na atu amohiwa zela yenno iireyile eva. So mbwenye udowe wanvepe namakuta ira auing'ane. Wamala eno, udowe wavelele mukuto wenno Mozeji awongile liye ira ikale umboni vamentoni va atu ira weyo uhuvulumuwa.>>

⁴⁵ Mbwenye mulombwanole ohovenyihanaga, liye roma wonga bure. Mwa enne jairile Yesu jile johoroma vweya. Na mwasa wenne, Yesu kavolowa burebure sidadi dedile, awendawenda mmafora mwahali atu. Mbwenye masiki eno, kohokalawo atu adjindji kakumela mwatene mwene kadowaga wa liye.