Malakiya 4 - Mazu Otchena a Mulungu

Siku nowopiha na Yehova

¹ <<Kaing'anani, tchoira ukala siku nnafuna za, nokaha nnga hofu. Atu atene ovitukulela na atu atene oirana jotakala anoza kaje nnga makata. Siku neno nnaza no nnomala atumeya, kaviza vihala nne mutchitchi nne tambi. Unawonga gu Yehova wa Makuru Matene.

² Mbwenye nyo munaova nzina naga, nzuwa na upama nnoza nukumeleni eto nnouvulumutchani muwari mwa mifware daye. Munoza mulupalupege mohagalala nnga vini ana ng'ombe kakumaga nkolrani mwiwa.

³ Eto munoza mwaanyingalelege atu otakala mwasiwa aliwa anoza kakale nnga ndora mmanyaloni mwenyu. Ejo jinaireyege siku nimanle miyo balra. Unawonga gu Yehova wa Makuru Matene.

⁴ <<Muumbuwele malamulo damuwandenle miyo namalaba waga Mozeji agali mwango Orebi ira aIzarayeli atenene kaharege. Malamulo anno ba mangano na jotonga ira nyo muumbuwelege.

⁵ <<Kaing'anani nnomuruma namafiyiheda Eliya ira aze wa nyo nahanafiye siku nindimuwa nowopiha na Yehova.

⁶ Liye aza, unorungunutcha mmirimani mwa ababi ira kawendege pama na ahimiwa eto unorungunutcha mmirimani mwa ahima ira kawendege pama na ababi, tawiha ira nnaze dinonge ilambo, ditolotche na makalelo ohokala a masika.>> Kukala mazu a livuru na Malakiya.