Malakiya 3 - Mazu Otchena a Mulungu

Zela za wa Yehova

¹ Yehova wa Makuru Matene unawonga ira: <<Kaing'anani, miyo nnoza dimurume maliba milanyo waga vasogolro vaga ira asakanyede ndila inafuna miyo vira. Liye agazile, morurumutcha Nabwiya unoza aze muwari mwa Nyumba yaye. Liye gu Nabwiya wenno unafuna zana yopangana eto wenno munamuing'anela nyo eto munanfuna nyo.

² Nnga naza nifiya siku na Yehova, kodi bani unawanda vilela? Bani unafuna kala oimelene liye afiyaga? Mwasiwa liye azaga, unaza nnga munlo ohinda wa maliba nyungulrutcha oru. Eto unaza nnga sabawu ya maliba fulra nguwo.

³ Unoza agarati aatchenihe eto aasakanyede aLevi nnga maliba nyungulrutcha unatcheniha liye eto unasakanyeda liye oru na parata. Evale aliwa anoza kavelele wa Yehova mikuto na makalelo apama.

⁴ Evale mikuto da aJuda na mikuto da akuda Jeruzalemu nnoza dikale domuziveliwiha Yehova nnga mwakalele atu yaka da mundulri.>>

⁵ Yehova wa Makuru Matene unawonga ira: <<Nnoza difiye vakwikwi vene wa nyo ira ditonge. Mobaranya nnozana umboni oagwihana mulandu aliba lowa, aliba raruwa, aliba hidedela umboni onama, aliba adjelra anamalaba ewa, ale anaaoniha goyi amakwele a ahiyana na anapawi, nari wenno ahanamuirela upama mutu oza nari atene kahanadiova miyo.

⁶ Jatene ejo nnoirana, tchoira miyo dili Yehova ohotchindjeya. Nona nyo ana Jako mwahatolowa.

Mangiwa mulandu zela yanekumi

⁷ <<Nyo roma malambo a makolo enyu mwazave muviringanihaga malamulo aga, kamwaharile. Kawelani, muze wa miyo. Mwaira eno, na miyene nnowela, dikale na nyo. Unawonga gu Yehova wa Makuru Matene. Amala nyo munofuka iraga: <Hiyo nnawele moira avi?>

⁸ Miyo eto nnoufukani ira: <Kodi inofwanela mutu mbela Mulugu? Nyo mbwenye munodibela.> Amala nyo munodifuka iraga: <Hiyo nnaubelani avi?> Miyo nnouwakulani ira: <Munadibela muwari mwa janekumi na jovelela jimohi jiwa.>

⁹ Muli otembelrelreya nlogo natene nene na mwasa odibela.

¹⁰ Muzena kada mutu yanekumi yatenene nyumba yaga yokoyamo jengo ira munyumbani mwaga mukale jodja. Unawonga gu Yehova wa Makuru Matene. Mudixixe, mudione akala miyo kannahula majanela a zulu ira dumorihedeni mareliho madjindji fiyeda nyo mwahakayena vohela.

¹¹ Miyo nnoza dibarele ira anantumbwa kahadje mbewu denyu. Uva wenyu kaza ahiya vaha. Unawonga gu Yehova wa Makuru Matene.

¹² Ilambo yenyu inafuna ikale ilambo yohagalaliha. Nona atu a unde anerege wonga ira muli atu orelihiwa. Unawonga gu miyo Yehova wa Makuru Matene.>>

¹³ Yehova unawonga ira: <<Muhuwonga mazu odipudja.>> Amala nyo munofuka iraga: <<Mpudja uwa niirile avi?>>

¹⁴ <<Dipudja uwa, munadipudja muwari mowonga ira: <Mulaba Mulugu kunna mabasa. Kuli mpindu hara makalelo anafuna Mulugu. Kuli mpindu wenda mokumbanya vamentoni va Yehova wa Makuru Matene.

¹⁵ Hiyo nnaona ira atu ovitukulela banakana upama. Atu oirana jotakala banakala orelihiwa. Masiki kamuxixe Mulugu, kinaireliwa yabure.> >>

¹⁶ Evale ale kamuova Yehova kohoroma tapanya mmohi na nfwaye. Yehova ohoroma vuruwana pama jowonga jewa. Mwa eno, vamentoni vaye vohokala livuru nalrembiwe nowumbutcheda zela ale anamuova Yehova no riheda nzina naye.

¹⁷ Yehova wa Makuru Matene unawonga ira: <<Atu anno anadiova miyo anoza kakale aga. Siku neno nafiya, nnoza daasakanye ira kakale atu aga a ibaribari anaaziveliwa miyo. Nnoza daawendele tangaranga nnga mutu amuwendelaga tangaranga mwanaye wenno unamulabetcha.

¹⁸ Evale munoza muone hiyana wa atu apama na atu abure. Eto munoza muone hiyana wa atu omulaba Mulugu na atu ohomulaba Mulugu.>>