Malakiya 2 - Mazu Otchena a Mulungu

Mazu oamanga mulandu anamakuta

¹ Yehova wa Makuru Matene unawonga ira: <<Peno nnawonga na nyo anamakuta. Nlamulo nnakumiha miyo para nyo ti ni.

² Mwahadivwelele eto mmirimani mwenyu mwahafune riheda nzina naga, miyo Yehova wa Makuru Matene nnoutembelrelrani. Joreliha jinawatchela nyo miyo nnotembelrelra. Eto dihimala tembelrelra joreliha jenyu mwasiwa kamunadivwelela na mmirimani mwenyu mwatene.

³ Kavuruwanani. Nnoza daonihe goyi ahiminyu a musogolro eto nnoza dupamedeni mambi wintoni wenyu, mambi a jifuwo jinavelela nyo muwari mwa pwando dinyu. Amala eno nnoutatilani vamohi na mambi anno.

⁴ Jaireya eno, nyo munoiziwa ira para miyo uvahani nlamulo nodivwelela, ili ira yopangana ipanganne miyo na aLevi idowegeve sogolro. Unawonga gu miyo Yehova wa Makuru Matene.

⁵ <<Yopangana yaga na aLevi yali yovaha ingumi eto yovaha murendele. Eto yali yopangana ira kadiovege. Evale kodiova eto kowopihiwa na mwasa wa nzina naga.

⁶ Jofundjiha ja ibaribari jali wanoni wewa. Johokala pama kajafwanyeya vamilomoni vewa. Kawenda na miyo mwa murendele eto mowongowa. Kohawelihawo adjindji ubureni wafwanyeya atu ira kahiye joira jiwa jabure.

⁷ Mwasiwa mmilomoni mwa anamakuta inafwanela mukumege zelru eto inafwanela atu kadowege wa aliwa ira kafundjihiwe na aliwa. Tchoira anamakuta ba aliba milanyo aga miyo Yehova wa Makuru Matene.

⁸ Mbwenye nyo anamakuta muhumala hiya ndila daga. Muhumala agwagwadutcha atu adjindji na jofundjiha jenyu. Muhumala takaliha yopangana yaga na aLevi. Unawonga gu Yehova wa Makuru Matene.

⁹ Nona miyo dihisakanya ira mukale atu opetiwa, atu ohokana mabasa vamentoni va atu atene mwasiwa nyo kamuharile ndila daga eto munatonga milandu muwari mwa nsakulro hiya muwari mwa malamulo.>>

Malakiya ohowonga mazu oamanga mulandu akuda Juda zela jotela jiwa

¹⁰ Kodi hiyo atene kaninna babihu mmohive? Kodi unipandutchile kahi Mulugu mmohive? Akala ti eno, nnga mwasiwa gwa nni hiyo kalaga atu ohororomeleya mmohi na nfwaye, hiyo viringanihaga yopangana Mulugu asakannye liye na ababihu?

¹¹ Akuda Juda ba atu ohororomeleya. Muwari mwa ilambo ya Izarayeli na ilambo ya Jeruzalemu munoireya jengo jotakaletchetcha. Tchoira akuda Juda kohotakaliha Nyumba ya Yehova yenno inazivela liye. Aliwa kohodowa atela ahiyana olobela amilugu a unde.

¹² Yehova unomukumihamo mutu uli watene unairana jatene ejo ira ahakale muzizani mwa Jako, mutule vamohi na ahimaye. Masiki mutu wenno azegenave jovelela wa Yehova wa Makuru Matene, unokumihiwamo.

¹³ Eto jengo jimohi jiwa munaira nyo ti ji. Vaibuwani va Yehova muhumala zalihavo misodi, nyo nlaga no dumbela na mwasa oira Yehova kanabalra yovelela yenyu eto kanawatchela inazana nyo mmandani mwenyu.

¹⁴ Mbwenye nyo munafuka ira: <<Nnga mwasiwa gwa nni habalraga jovelela jehu?>> Yehova kanabalra mwasiwa liye gu mboni wa yopangana yenno yapanganne we siku namutenle we muhiyanawo oroma. Wagamanle pangana kala ororomeleya na muhiyanawo, weyo kuharihile masiki liye agalive nfwawo eto agalive muhiyanawo upangannena we telana.

¹⁵ Mulugu asakanyile ira atu ambinli kakale mmohive mwa maningo eto kakale mmohive mwa munemba. Mulugu para irana eno, afunavo nni? Liye afuna ira aliwa kaabalege ahima omuhara liye. Na mwasa wenno inafwanela kada mutu aviing'ane pama eto akale ororomeleya na muhiyanaye oroma.

¹⁶ Tchoira Yehova Mulugu wa Izarayeli unawonga ira: <<Miyo nnoida mwalana. Eto nnomwida mutu unakana uwali na muhiyanaye.>> Na mwasa wenno polre polre tawiha ira munaze mukale atu ohororomeleya na ahiyaninyu. Unawonga gu Yehova wa Makuru Matene.

¹⁷ Muhumala muwaheyiha Yehova na jowonga jenyu. Mbwenye nyo munofuka iraga: <<Nimuwaheyihile avi?>> Mmuwaheyihile muwari mowonga ira: <<Mutu uli watene unairana jabure gwapama vamentoni va Yehova eto Yehova unomuziveliwa.>> Eto mmuwaheyihile muwari mofuka ira: <<Uli waani Mulugu otonga mwa ibaribari?>>