Malakiya 1 - Mazu Otchena a Mulungu

¹ Ula gu muselu wa mazu a Yehova awongile liye na aIzarayeli muwari mwa Malakiya.

² Yehova gunawonga ira: <<Miyo nnazave duzivelagani nyo aIzarayeli.>> Mbwenye nyo munorungunuwa nyo fukaga ira: <<Yehova unizivenle moira avi?>> Yehova unawakula ira: <<Kodi Ezawu kahi Jako mbalaye wa mulukulu? Mbwenye masiki Ezawu agalive mulukuluwa, miyo dimuziveliwe Jako

³ eto Ezawu dihimwida. Ilambo yakala liye ya mwangoni dihisandutcha kala muisalesaleni. Ilambo yanvahile miyo, dahiyedile anambwa a mukokolani.

⁴ Eto akuda Edomu anno anafwanyeya kagali ana Ezawu kaza kawonga ira: <Nihimala bwanyuliwa, nnafuna nimange akoka madebe ehu>, miyo dagali Yehova wa Makuru Matene nnoza daawakule ira: <Kaahiyeni kamange akoka. Miyo mbwenye nnogwiha. Nnosakanya ira aliwa kaitaniwege: <<Ilambo ya ubure ya atu anno Yehova aatakaleliwe liye kala no kala.>> >

⁵ Nyo aIzarayeli munoza muone eji na meso enyu eto munoza muwonge ira: <Yehova gu mulukulu ilambo yatene na unde wene wa Izarayeli.> >>

Takaleliwa wa Mulugu zela jovelela ja akuda Juda

⁶ Yehova wa Makuru Matene unawonga ira: <<Mwana unomuriheda babaye eto namalaba unomuriheda patarawu waye. Akala na miyene dili babi, nnga rihediwa waga uli uvi? Akala na miyene dili patarawu, oviwa waga uli uvi? Nyo anamakuta munapeta nzina naga eto munawonga ira: <Nzina nenyu nipetile moira avi?>

⁷ Nyo munapeta nzina naga muwari movelela jodja jotakala vazulu va ibuwa yaga ya mikuto. Eto munawonga ira: <Hiyo nutakalihileni moira avi?> Nyo muditakalihile muwari mowonga ira: <Meza ya Yehova kahi yengo.>

⁸ Kodi mwavelela mwanainyama ohoona ira akale mukuto, yenno kahi yabure? Eto mwavelela mwanainyama otchikama owu obulela, yenno kahi yabure? Mwanvaha yenno governadore, kodi liye unowatchela mohagalala, owu hehi, kodi liye unouziveliwanani? Jatene ejo unawonga gu Yehova wa Makuru Matene.>>

⁹ Yehova wa Makuru Matene unawonga ira: <<Masiki mudivepe dagali Mulugu na upama unna miyo ira dikayena sayi na nyo, kodi na jovelela jotakala jejo jili mmandani mwenyu, miyo nnowanda rumela? Miyo kannamuirela upama nne mutu mmohi mwa nyo.

¹⁰ Yali yapama mutu mmohi adowe afunge mulango ira mwahawandege tumbanya munlo vasayi vaibuwani vaga va mikuto.>> Yehova wa Makuru Matene unawonga ira: <<Kadinna ziveliwa zela nyo. Eto nne kannawatchela jovelela jili mmandani mwenyu.

¹¹ Tchoira roma makumelo wa nzuwa fiyeda mavirelo wa nzuwa atu a unde anerege iziwa ira nzina naga ti nlukulu. Eto mamburo matene atu anerege tumeya jonukela na nzina naga eto anerege velela jovelela ja ibaribari. Mwasiwa atu a unde anerege iziwa ira nzina naga ti nlukulu. Unawonga gu Yehova wa Makuru Matene.

¹² Mbwenye nyo munapeta nzina naga iraga: <Meza ya Yehova imala takalihiwa. Eto jodja jili vevo kajinna mabasa.> >>

¹³ Yehova wa Makuru Matene unawonga eto ira: <<Nyo munawonga ira: <Aa, jeji jihimala niwaheyiha!> Eto munaombela musinyu jovelela. Eto munovelela joba, jotopinya, jobulela, nyo zagana vaibuwani va mukuto. Kodi miyo nnowatchela jejo jokumela mmandani mwenyu? Unawonga gu Yehova wa Makuru Matene.

¹⁴ Otembelrelreya akale ngongomwa wenno unna nibila na mulombwana napama muwari mwa jifuwo jaye eto agalumbenle ira avelele, mofutukula avelela wa Yehova mwanainyama mmohiwa orangala. Tchoira miyo dili Mwene Mundimuwa eto nzina naga nnerege oviwa muwari mwa malogo matene. Unawonga gu miyo Yehova wa Makuru Matene.>>