Lukaji 9 - Mazu Otchena a Mulungu

Yesu oharuma anamarumiwa kumi na ambinli

¹ Noira enne, Yesu ohaitanaga anamamuharaye kumi na ambinli, liye avaha kopolo na utongi otamangiha minemba dabure datene no vulumutcha maurenda.

² Oharuma ira kadowe kalaleye zela Umwene wa Mulugu no avulumutcha arenda.

³ Yesu ohawandelaga eraga: <<Mwadowaga muulrendoni mwenyu, kamutukule ikumbuzo, nne pasta, nne yodja, nne kobiri, nne kamutukule kamiza mbinli.

⁴ Mwafiya musidadi mukale vande evo vanawatcheliwe nyo ante mufiyede venyamo musidadi mule.

⁵ Mbwenye mwafiya sidadi imohi, amala atu anafwanyeya mwemo kahautambilreni, muvenyemo musidadi mule. Eto mwavenyagamo, mutate tumbulru nnafwanyeya na manyalo enyu ira ikale ionihedo yoagwihana mulandu aliwa.>>

⁶ Noira eno, anamamuharaye ale kohovenya kadowaga mutatamoni mwatene, kalaleyaga Muselu Wapama eto kaavulumutchaga arenda pandi datene dene.

⁷ Mwene Erodi ohovwa jatene jaireya. Evale liye agavwile, ohomaliwa zelru, tchoira atu amohiwa kawongetcha ira: <<Wenno unerana ejo gu Juwawu Mbatizi, wire venya mokwani.>>

⁸ Amohiwa kawonga ira Eliya wire twanyuwa. Eto amohiwa kawonga ira gu namafiyiheda mmohiwene wa wanle uvenyile mokwani.

⁹ Erodi mbwenye agavwile, ohowongaga eraga: <<Juwawu unamuwonga atu uyo, gwenne damugwadihile miyo muru. Nnga mulombwana uyo guvi unairana jatene jinavwa miyo ji?>> Evale Erodi ohoroma funafuna nnga amuone.

Yesu ohadjihaga alombwana 5.000

¹⁰ Anamarumiwaye ale kagawenlewo wewule warumiwile atu, kohodowaga wa Yesu kamuwandelaga jatene jaireyile muulrendoni mwiwa. Noira eno, Yesu ohatukulaga anamamuharaye ale kadowaga ilambo ya Betisayida.

¹¹ Evale atu kagavwile ira: <<Yesu uhudowa ilambo ya Betisayida na anamamuharaye>>, kohovenyaga, aliwa aharaga wewule. Evale aliwa kagafiyile wewule, Yesu ohawatchela mwapama, liye roma alaleyela atwale zela Umwene wa Mulugu eto oavulumutcha anno kafwanyeyana maurenda ofuna vulumutchiwa.

¹² Evale nzuwa nohoromaga tita. Noira enne, anamamuharaye kumi na ambinli ale kagaonne nzuwa nititaga, kohodowaga nfwanya Yesu kamuwandelaga ira: <<Kaagunyeni atwala ira aliwa kadowe tatamo na kokola dowandamela na uno ira kavende jodja kadje eto kasake nimburo nnafuna atu gona, mwasiwa nimburo nili hiyo ni ti nimburo nohokala atu.>>

¹³ Yesu mbwenye ohawakulaga eraga: <<Inafwanela nyenne mwaavahe yodja!>> Evale Yesu agawongile enne, anamamuharaye ale kohomuwakulaga, aliwa ira: <<Hiyo so ninna pawu tanu na somba mbinli. Kaya nidowe nagule jodja ira atwala kadje kakwakwane?>>

¹⁴ Fwanyeya ira alombwana ve kaligi evale kohokwakwana nnga 5.000, hiya ahiyana na ahima. Yesu ohowongaga na anamamuharaye ale eraga: <<Kaawongenani atwala kagarati makuru makuru. Kada nikuru nikayegena atu 50.>>

¹⁵ Evale anamamuharaye ale kohoirana, aliwa agaratiha atwale.

¹⁶ Nomala eno, Yesu ohotukulaga pawu tanu na somba mbinli dile, liye ing'ana zulu, liye reliha jodja jile. Nomala eno, liye meya, tukula avaheda anamamuharaye ale ira kaagawelege atwale.

¹⁷ Atene kagamanle gaweliwa pawu dile, kohodjaga aliwa rumbala ante jodja jile fiyeda hala. Jodja jahanle jile kagagudenle, johozalaga migogoda kumi na minli.

Peduru ohorumela ira Yesu gu Namatikeliwa

¹⁸ Siku nimohi Yesu ohoromaga lobela agali na anamamuharaye bahi. Evale liye ohafukaga anamamuharaye ale, liye ira: <<Kodi atu kadiona, anadira dili ani?>>

¹⁹ Yesu agafukile enne anamamuharaye ale kohowakulaga keraga: <<Atu amohiwa anauirani Juwawu Mbatizi, atu amohiwa anauirani Eliya, atu amohiwa anaira muli namafiyiheda mmohi ukwile wanle amala avenya mokwani.>>

²⁰ Evale Yesu ohawelihedaga aliwa, aafukaga eraga: <<Nnga nyo? Kodi mwadiona, munadiira ani?>> Evale Peduru ohomuwakulaga, liye ira: <<Nyo muli Namatikeliwa wenno urumiwe na Mulugu.>>

²¹ Noira enne, Yesu ohawandelaga anamamuharaye ale na mazu okokomeza aarumaga eraga: <<Mazu anno kamumwandele mutu mmohiwa.

²² Ili yofwanela Mwana wa Mutu aonihiwe goyi ilukulu, alramwisiwe na andimuwa a aJudewu na andimuwa a anamakuta vamohi na anamafundjiha malamulo, amala apiwe eto siku naneraru avenye mokwani.>>

Inafwanela kada mutu atukule muradi waye

²³ Yesu ohawandelaga atene eraga: <<Akala uhukalawo unafuna dihara miyo, inafwanela alramwise ingumi yaye, malambo matene atukule muradi waye arome dihara miyo!

²⁴ Tchoira mutu wenno unavende jovulumutcha ingumi yaye, liye unagomela iyelela ingumi ya ibaribari. Mbwenye mutu wenno unayelele ingumi yaye ya ilambo ya vati na mwasa wa miyo unovulumutcha ingumi ya ibaribari.

²⁵ Mutu adjavo jatene jili mwilamboni ya vati, amala apuzeya ingumi ya ibaribari, jaye jipile liye jinamupindulra nni?

²⁶ Tchoira mutu wenno unadinyaswele miyo eto mutu wenno unanyaswele zela mazu aga, Mwana wa Mutu aza azaga na undimuwa waye eto na undimuwa wa Babaye na undimuwa wa angelro otchena, na liyene unoza amunyaswele mutu wenno.

²⁷ Mbwenye na ibaribari nnouwandelani ira veva vali hiyo va, kohokalavo atu anaone Umwene wa Mulugu aliwa kahanakwe.>>

Yesu ohotchindjeya

²⁸ Yesu agamanle wonga enne, vagamanle malambo matanu na mararu, ohomutukulaga Peduru, Juwawu na Tiyagu aliwa gwela mwangoni ira alobele.

²⁹ Evale Yesu alobelaga, makalelo a kove yaye kohotchindjeyaga, jowara jaye jatene kala jotchena jijerimelaga.

³⁰ Evale mobaranya kohooneya alombwana ambinli anno kafwanyeya kagali Mozeji na Eliya, aliwa za wongaga na Yesu.

³¹ Alombwanale katwanyuwilege na makalelo ojerimela. Aliwa kawongaga zela ukwa wa Yesu wewo wafuna liye kwakwaneliheda sidadi ya Jeruzalemu.

³² Jaireya atu enne, Peduru na afwaye ale kohozaleliwaga kove. Evale kagavenyile, kohoonaga undimuwa wa Yesu na alombwana anne annaga liye evale ale.

³³ Atu ambinli ale kafunaga venyavo vevale valigi Yesu vale, Peduru ohowongaga ira: <<Namafundjiha, yali yapama nikalegeni wewuno. Nimange misasa miraru. Musasa mmohi wenyu, mmohiwa wa Mozeji, mmohiwa wa Eliya.>> Mbwenye Peduru awongaga eno, kaiziwile yawonga liye.

³⁴ Peduru awongagave enne, murambo ohozaga akunela. Murambole agaakunenle, anamamuharaye ale kohoromaga ova.

³⁵ Noira eno, mmiramboni mule mohokumelaga nizu nawongaga niiraga: <<Wenno gu Mwanaga umusakunlre miyo. Munvwelelege liyene!>>

³⁶ Nizu nne nagamiyanle, anamamuharaye kamuonnevo Yesu ekave bahi. Evale aliwa kagaonile enne, muwari mwa malambo anne kohomiyalaga, nne tchamuwandenle mutu mmohiwa zela jejo jaonile atu.

Vulumutchiwa wa muzombwe mmohi okana munemba wabure

³⁷ Mmetcheloni muwa, aliwa katitaga mwangoni ule, atu adjindji ohokala a masika kohozaga gumana na Yesu.

³⁸ Muwari mwa anamwindji ale, ohokalamo mulombwana mmohi akuwilege molimbiha eraga: <<Namafundjiha, nnouvepani ira mudionele mwanagola, tchoira dinna mmohive wenna.

³⁹ Vamohi viwa munemba otakala unomuhinda mwanola mobaranya. Amuhinda, mobaranya mwanola unoroma kuwaga, amala liye pingiriyaga eto liye kumaga nipweru wanoni. Amuhinda eno kanamuhiya tchinene fiyeda mporotcha.

⁴⁰ Miyo dagafiyile eva dahavepa anamauharaninyu ira kawande tamangiha munemba wabure unna mwanagola, mbwenye aliwa kiwandile.>>

⁴¹ Mulombwanole agawongile enne, Yesu ohowongaga eraga: <<Nyo atu ohokana nroromelo eto oviringana! Kodi miyo nnaza dikale na nyo fiyeda alini? Miyo nnafuna divilele na joira jenyu fiyeda alini?>> Evale ohomuwongana mulombwanole, liye kwi: <<Kamuzena uno mwanawoyo.>>

⁴² Kamudowagana vali Yesu vale, munemba wabure ule ohomuhinda mwanole, nvokela vati, mwanole liye pingiriyaga. Mbwenye Yesu ohomusumulula munemba otakala ule, nomala liye nvulumutcha mwanole, liye nvaheda babaye.

⁴³ Atu atene kafwanyeyaga evale kohoromaga tikina kopolo da Mulugu. Eto aliwa kohotikinaga zela jejile jairile Yesu jile. Evale atu katikinagave enne, Yesu ohowongaga na anamamuharaye ale eraga:

⁴⁴ <<Muvuruwanetchetche pama yenno inafuna miyo uwandelani veva. Inafuna miyo uwandelani tchi ila: Mwana wa Mutu unovahediwa mmandani mwa atu.>>

⁴⁵ Mbwenye mazu awongilege Yesu ale anamamuharaye ale tchaonenlremo zela yatapulela atu. Tchoira mazwale kali mazu okoyeya, tawiha ira aliwa anaze kaonelremo. Teto ira kafuke kera ova.

Kodi mundimuwa oakwaranya afwaye bani?

⁴⁶ Siku nimohi anamamuhara Yesu kohoroma runihana zela muselu oira: <<Kodi bani unafuna kala mundimuwa muwari mwa hiyo?>>

⁴⁷ Yesu mbwenye ohoiziwa zela jejo jaumbuwela atu mmirimani mwewa. Evale ohomutukulaga mwana mmohi, liye dowa muimetcha valigi liye vale,

⁴⁸ liye awandela ira: <<Mutu wenno unamuwatchela mwana nnga wenna na nzina naga, liye uhudiwatchela miyo. Eto ule udiwatchenle miyo, kadiwatchenle miyo ve bahi, mbwenye uhumuwatchela mutu wenno udirumile. Tchoira mutu wenno unaviyeviha kwaranya nyo mwatene, gunafuna kala mundimuwa.>>

⁴⁹ Noira eno, Juwawu ohomuwakulaga Yesu, liye ira: <<Namafundjiha, hiyo nihimuona mulombwana mmohi unatamangiha minemba dabure na nzina nenyu. Mbwenye naganfwannye, nihimuhiyiha mwasiwa liye kanauharani vamohi na hiyo.>>

⁵⁰ Mbwenye Yesu ohawandelaga, liye ira: <<Kammuhiyihe. Mwasiwa wenno ahananiharahara uli na hiyo!>>

Atu a tatamo imohi ya Samariya kohokonda muwatchela Yesu

⁵¹ Yesu agaonne ira tempu yoira liye adowe zulu yohowandamela, ohokunga ulrendo odowa Jeruzalemu.

⁵² Evale Yesu ahanadowe, oharuma atu vasogolro vaye. Aliba rumiwale kagamaruwile, kohodowaga tatamo ya aSamariya ira kawande sakanyeda nimburo neno nafuna atu fiyeda.

⁵³ Mbwenye aSamariya ale kagavwile ira: <<Yesu unadowa Jeruzalemu>>, tchafunne muwatchela.

⁵⁴ Evale anamamuharaye ambinli Tiyagu na Juwawu kagaonne ejile, kohomuwongana Yesu keraga: <<Nabwiya kodi nyo munofuna ira hiyo nirumihe munlo zulu ira aze aatolotche atwala?>>

⁵⁵ Aliwa kagawongile enne, Yesu ohorungunuwa aing'ana, liye asumulula zela zelru dedile.

⁵⁶ Evale kohovenyihana, aliwa dowaga tatamo imohiwa.

Aliba rutchiwa muhara Yesu

⁵⁷ Yesu na anamamuharaye ale kagali mundila kadowagave, mutu mmohi ohowongaga na Yesu eraga: <<Miyo nnerege uharani watene unayege nyo!>>

⁵⁸ Evale Yesu ohomuwakulaga, liye ira: <<Anambwa a mukokolani kohokana miliha nnakala atu eto mbalrame dovava zulu dihikana jitundji jiwa. Mbwenye Mwana wa Mutu kanna vosameliha murwaye.>>

⁵⁹ Evale Yesu ohomuwongana mutu mmohiwa, liye ira: <<Kadiharege.>> Mbwenye liye ohowongaga eraga: <<Nabwiya, miyo nnavepa mudirumelihe dibabihe dowa damukoye babaga, amala duharegeni!>>

⁶⁰ Evale Yesu ohomuwakulaga eraga: <<Waahiye aliba kwa kakoyanege aliba kwave! We mbwenye udowe walaleye zela Umwene wa Mulugu.>>

⁶¹ Noira eno, mutu mmohiwa aligi evale ohowongaga eraga: <<Nabwiya nnafuna duhareni. Mbwenye mubabihe didediha vang'onove ira didowe daalanye atu a vande vaga.>>

⁶² Yesu mbwenye ohomuwakulaga eraga: <<Mutu wenno unatukula himba alimaga eto era eno, aing'anaga mundulri, kahi mutu ofwanelela kala muUmweneni mwa Mulugu.>>