Lukaji 8 - Mazu Otchena a Mulungu

Ahiyana kamukamiheda Yesu

¹ Vagamanle tempu ya vang'onove, Yesu ohovenyaga awendawendaga sidadi diwa na tatamo diwa, alaleyaga Muselu Wapama wa Umwene wa Mulugu. Anamamuharaye kumi na ambinli kafwanyeya vamohi na liye

² vamohi na ahiyana amohiwa anne aakumihilemo liye minemba dabure na ale aavulumutchile liye maurenda. Ahiyaniwa ba ala: Mariya wenno aitaniwa nkuda Madala, wenno Yesu ankumihilemo liye minemba mitanu na minli dabure

³ na Jowana mwadi Kuza, Kuza wenno ali musogolrelri wa vande va mundimuwa Erodi. Mmohiwa ali Suzana vamohi na ahiyana amohiwa adjindjene. Ahiyana anna banno kamukamihedetcha Yesu muwari mwa jokana jiwa.

Yofwalrafwaniha ya maliba woka mbewu

⁴ Evale kohogumaneyaga wa Yesu mwindji ohokala wa masika wa atu, kakumenlege sidadi dohiyana-hiyana. Mwa enne Yesu ohoromaga awandela muwari mwa yofwalrafwaniha eraga:

⁵ <<Ohokalawo namazala mmohi avennye ira awoke mbewu daye. Awokaga mbewu dile, dimohi damorenle mmambalo mwa ndila, evale atu kohoza nyingalelaga eto mbalrame dovava zulu dohoza, aliwa dodamo, aliwa dja.

⁶ Eto mbewu dimohi damorenlege vanibweni. Evale dagamenle, mohodibeliwa dohonyala mwasiwa vati vale kavali munyeto.

⁷ Mbewu dimohi diwa dohomorela vamenle minga. Evale minga dile dohoulukula vamohi, mbewu dile mala pitikelrelreya na minga dile. Na mwasa wenne, mbewu dile dohofiyeda nyala.

⁸ Eto mbewu dimohi diwa damorenle vateyani vapama. Mbewu dedile dohowanda mela mwapama, aliwa ulukula mwapama, fiyeda baliha fendo 100 kwaranya jejile jazanle mwinnyole.>> Yesu agawongile enne, ohowelelaga wonga mokuwa eraga: <<Ule unna mabaru ovwana, avwe.>>

Yotapulela zela yofwalrafwaniha ya namawoka mbewu

⁹ Evale anamamuharaye ale kohonfukaga ira: <<Kodi yofwalrafwaniha muwongile nyo ile, inatapulela avi?>>

¹⁰ Evale Yesu ohawakulaga eraga: <<Nyo muhuvahiwa ira muonelremo jokoyeya ja Umwene wa Mulugu. Mbwenye zela atu amohiwa kahavahiwile onelramo jokoyeya ja Umwene wa Mulugu, miyo nnaawongana mwa jofwalrafwaniha ira aliwa kaing'anaga, kahaonegeve yengo eto kavwaga kahaonelregemove yengo.

¹¹ Yofwalrafwaniha yawonga miyo, yotapulela iwa tchi ila. Mbewu nnazaliwa ba mazu a Mulugu.

¹² Mbewu damorenle mmambalo mwa ndila ba atu anne anavwa mazu a Mulugu, mohodibeliwa Diyabo unoza akumihamo mazwale mmirimani mwewa ira aliwa kaharoromele ira kahawande vulusiwa.

¹³ Mbewu dedile damorenle vamabweni tapulela atu anne anavwa mazu a Mulugu, kawatchelaga mazwale mohagalala eto anarumela mwa tempu ya vang'onove bahi. Mbwenye voira kinna mitchitchi, aliwa kaxixiwa muwari mwa makatamiho, anagomela hiya ndila yazana atu.

¹⁴ Eto mbewu dedo damorenle vamingani ba atu anne anavuruwana mazu a Mulugu eto vinadowege atu sogolro anomala pitikelrelriwa na mabasa, na jorayela, na joziva jinafwanyeya mwilamboni ya vati. Mwa eno, anagomela umma jovaha jiwa jahanaire yengo.

¹⁵ Mbwenye mbewu dedo damorenle vateyani vapama, ba atu anne anavwa mazu a Mulugu, kakoyaga kaganna murima wapama na makalelo apama eto kavahaga jovaha japama muwari movilela.>>

Zela wareya wa panti

¹⁶ Yesu ohowongagave eraga: <<Kalivo mutu unahindiha panti atukula adowa agudumeya na muno owu nari adowa ahela nkukusuni mwa kama. Mbwenye unahela nimburo nooneya ira mutu uli watene unavolowa awandege ona wareya.

¹⁷ Tchoira yengo ili yatene yokoyeya inooneya eto yengo ili yatene yokuweya inovweya ize ikale wareyani.

¹⁸ Polre polre zela makalelo anavwa nyo. Tchoira mutu wenne unna, gunafuna vahiwave. Mbwenye mutu wenne ahanna, mwa yengo yenno inaumbuwela liye ira: <Dihikana.> unoza awakiwe.>>

Za wa Yesu mmaye na Yesu abalaye

¹⁹ Evale Yesu mmaye na Yesu abalaye kohovenyaga kadowaga wewule waligi Yesu ira kadowe kagumane na liye. Mbwenye tchawandile volowa mwasiwa atu kafwanyeyaga mmba mule kohosimbwaga indjiva.

²⁰ Evale Yesu ohowandeliwa ira: <<Mminyu na abalinyu kali unde wu, anafuna kauoneni.>>

²¹ Evale Yesu ohawakula atwale eraga: <<Mmaga na abalaga ba atu anne anavwa mazu a Mulugu, kamala kairagana.>>

Yesu ohomiyalihaga nipevo nlukulu

²² Siku nimohi Yesu na anamamuharaye kohogwelaga mwadeya. Evale Yesu ohowongaga na anamamuharaye ale, liye kwi: <<Ndoweni kombela imohiwa ya ule.>> Evale kohovenyihanaga, aliwa dowaga.

²³ Mbwenye aliwa kadowaga, Yesu ohoromaga gona. Evale Yesu agonaga, nohooneyaga nipevo nohokala na masika. Nipevo nne nohoromaga tukula mahindje dowagana mmwadeyani mwali atu mule, aliwa halaga vang'ono ira kabwine.

²⁴ Noira enne, kohoromaga nvenyiha Yesu kamuitanaga keraga: <<Namafundjiha! Namafundjiha! Hiyo nnokwa.>> Evale Yesu ohovenyaga. Agavenyile, ohoroma sumulula nipevo na mahindje omanganyeya ale, aliwa miyala, jatene kala pama.

²⁵ Evale Yesu ohafukaga anamamuharaye ale eraga: <<Nroromelo nenyu nili uvi?>> Yesu agawongile enne, anamamuharaye ale kohoovaga eto kohotikiniheyaga keraga: <<Kodi mutu wenna bani unawanda wonga na nipevo eto na mahindje omanganyeya ira jimiyale, amala jengo jiwa jinvwelelaga?>>

Yesu ohogumana na mulombwana mmohi okana minemba dabure

²⁶ Yesu na anamamuharaye kohowendagave mwiko ante aliwa fiya ilambo ya Jeraza, kombela imohiwa ya ntiya na Galileya.

²⁷ Agatitile mmwadeyani mule, ohozaga mulombwana mmohi wa sidadi yenne. Mulombwanole ali mutu okana minemba dabure. Aromile wanle wenda eno mandave, nne kakaletcha vande, so liye akaletcha mmasiyeve.

²⁸ Evale mulombwanole agamuonile Yesu, ohokuwaga, liye dowa gwela vamanyaloni va Yesu. Nomala eno, ohokuwaga molimbiha eraga: <<Kodi mwazela mudikayena ani, nyo Yesu Mwana wa Mulugu Okwaranya Jatene? Nnouvepani ira mwahadionihe goyi.>>

²⁹ Mutule awongele enne mwasiwa Yesu ere muruma munemba wabure ule ira akumemo mwa mutule. (Eto fwanyeya ira munemba otakala ule omugwihetcha. Evale atu kommangetcha na makurenti a momba mendo na manda, mbwenye kammanga enne, opaza jatene jene, munemba otakala anna liye ule omutukula mudowagana muisalesaleni.)

³⁰ Evale Yesu ohonfukaga, liye ira: <<Weyo nzina nawo uli ani?>> Mutule ohomurumelaga, liye ira: <<Miyo nzina naga nnaitaniwa Anamwindji!>> Liye awongele enne mwasiwa minemba didjindji dali muwari mwa liye.

³¹ Evale minemba dabure dile dohonvepaga Yesu mwa ntindi ira: <<Nnouvepani ira mwahanirume muliha odiha ohokana magomelo.>>

³² Wandamelana valigi atu vale vohokalaga nguluwe didjindji deraga dja vankumani. Minemba dabure dile dohonvepaga Yesu ira divolowe munguluweni mule. Evale Yesu ohorumeliha yovepa yewa.

³³ Noira enne, minemba dile dohokumaga mmaningoni mwa mutu mule, aliwa dowa volowa munguluweni mule. Evale nguluwe datene edile dohotamangaga dititelaga vodiha, aliwa dowa morela vantiyani, kwela evale.

³⁴ Mbwenye atu kakumbuzaga nguluwe dile kagaonne ejile jaireyaga na nguluwe dile, kohotawaga, aliwa dowa laleyaga muwari mwa sidadile na mutatamoni.

³⁵ Aliba wandeliwa ale kagavwile, kohovenyaga, aliwa dowaga wewule ira kaone jatene jaireyile. Mbwenye aliwa kagafiyile wewule, kagaonile jatene ejile kohoovaga mwasiwa aliwa kanfwanyile mulombwana akumihiwemo minemba dabure ule uhugarati vamanyaloni va Yesu, uhuwara jowara jaye eto aganna zelru daye.

³⁶ Ale kaonile jatene ejile kohodowa awandelamo afwiwa makalelo Yesu anvulumutchile liye mutu wa minemba dabure ule.

³⁷ Noira eno, atu atene kakala ilambo ya Jeraza kohonvepaga Yesu ira avenyemo mwilamboni mwiwa mule mwasiwa aliwa kohokagana ova ulukulu. Evale Yesu ohogwelaga mmwadeyani akoka ira awelele wakumile liye.

³⁸ Mulombwana akumihiwemo minemba dabure ule, agamuonne Yesu adowaga, ohonvepa na ntindi eraga: <<Miyo nnafuna duharegeni.>> Yesu mbwenye ohomurumaga eraga:

³⁹ <<Wela udowege vande ira wawonge upama Mulugu uuirele liye.>> Evale mulombwanole ohowelela vande. Agadowile, ohoroma laleya sidadi yatene yenne zela jengo japama jamuirele Yesu.

Yesu ohonvenyiha mokwani namwali mmohi

⁴⁰ Yesu awelagawo, atu atenene kali wewule kohomuwatchela mwa murendele mwasiwa atu komuing'aneletcha.

^41-42 Mwa enne liye agali wewule, ohozaga mulombwana mmohi wenno ali mundimuwa wa nyumba yofundjamo Mazu eriwa Jairo. Liye ohomukana mwanaye wa muhiyana anna yaka kumi na mbinli. Mwanaye ule ali murenda ahanle vang'ono ira akwe. Fwanyeya ira mwana wa muhiyana mmohive anna liye ali wenne. Liye ohozaga kokora vamanyaloni va Yesu amuguzelaga mendo ira Yesu adowe vande vaye ira mwanaye ule awande vulumuwa. Evale Yesu adowaga wewule, atu adjindji kohomuharaga fiyeda mwezo ofinyanaga pandi datene.

⁴³ Mwa enne ohozaga muhiyana mmohi amanle yaka kumi na mbinli aganna urenda ohamba, kumaga sangiri malambo matene. Liye ohomala nonga jatene janna liye vande vaye na amediku adjindjene asakaga mirombwe ira avulumuwe, mbwenye kalivo mediku awandile nvulumutcha.

⁴⁴ Liye agafiyile evale, ohodowaga unduli wa Yesu ule, liye hinda magomo wa kapa ya Yesu. Nohinda kapele, sangiri nanna liye nne nohomiyalaga, liye vayela vulumuwa evale.

⁴⁵ Evale Yesu ohofukaga eraga: <<Bani udisakwinyile?>> Fwanyeya ira atu atene kali evale kohorunaga. Evale Peduru ohomuwakulaga eraga: <<Namafundjiha, kaing'anani atu kohoindjiva bure eto anosimbwa ufinyani bure ikukuru ili yatene. Kodi nyo munowanda fuka iraga: <Kodi bani udisakwinyile?> >>

⁴⁶ Evale Yesu ohowongaga eraga: <<Ukala udisakwinyile, tchoira dihiona ira mwa miyo dihikumamo kopolo.>>

⁴⁷ Evale muhiyanole agaonile ira kavali jowandeya ira avikoye, ohodowaga wa Yesu angurumelaga akokoraga vamentoni vaye. Ohoromaga wonga vamentoni va atu atene makalelo anna liye para liye fiyeda muhinda Yesu eto makalelo avulumuwile liye mobaranya.

⁴⁸ Evale liye agamanle wongamo, Yesu ohomuwandelaga eraga: <<Mwanaga nroromelo nawo nuhuvulumutcha. Venya udowege mwa murendele.>>

⁴⁹ Yesu awongagave enne, ohozaga mutu mmohi wa vande va Jairo. Agazile ohowongaga na Jairo eraga: <<Mbwiyeni, kammusimelihe Namafundjiha, tchoira mwaninyu uhukwa.>>

⁵⁰ Yesu mbwenye agavwile enne, ohomulimbihaga Jairo, amuwandelaga eraga: <<Jairo kuove. So uroromele bahi. Mwasiwa mwanawo unokala pama.>>

⁵¹ Evale Yesu agafiyile vande va Jairo vale, avolowilege mmba mule vamohi na Peduru, Juwawu na Tiyagu na mwanole ababaye bahi. Liye karumelihile ira mutu mmohiwa avolowe mmba mule.

⁵² Atu atenene kafwanyeyaga evale kokuwaga kamunlelaga mwanole. Mbwenye Yesu ohowongaga na aliwa eraga: <<Kamunlege! Mwasiwa mwanola kakwile, so unagona.>>

⁵³ Yesu agawongile enne, atwale kagavwile, kohoromaga muteya mwasiwa aliwa kohoiziwa ira mwanole ohokwa.

⁵⁴ Noira enne, Yesu ohodowaga evale, liye muhideda mwanokwa ule na ndanda naye, liye wonga eraga: <<Namwali we, kavenya!>>

⁵⁵ Yesu agawongile enne, namwali ule munemba waye ohomuwelela akoka, liye venya mobaranya. Noira enne, Yesu oharumaga atwale ira kanvahe yodja.

⁵⁶ Jagaireyile enne mwanole ababaye kohokalaga otikiniheyene. Evale Yesu ohawandelaga ira: <<Kamumwandele mutu zela eji jiireyile veva.>>