Lukaji 7 - Mazu Otchena a Mulungu

Nroromelo na musogolrelri mmohi wa anyakondo

¹ Yesu agamanle awandela atu jatene eji, ohovenyaga adowaga sidadi ya Kafaranamu.

² Kafaranamu ule ohokalawo musogolrelri mmohi wa anyakondo 100. Musogolrelri ule ohokana namalabaye amuziveliwetcha liye. Namalabaye ule afwanyeya agali murenda, ahanle vang'ono ira akwe.

³ Evale musogolrelri wa anyakondo ule agavwile zela Yesu, oharuma andimuwa a aJudewu ira: <<Kadowani mwamuwandele Yesu ira aze anvulumutche namalabagola.>>

⁴ Andimuwale karumiwe ale kagafiyile wewule, kohonvepaga Yesu muwari momuguzela mendo, aliwa ira: <<Ii, Nabwiya mutuyo uhufwanela ira mmuirele yovepa yaye

⁵ tchoira liye unoniziveliwa hiyo aJudewu eto gwenno unimangenle nyumba yofundjamo Mazu.>>

⁶ Evale Yesu ohovenyaga vamohi na andimuwale aliwa dowaga wewule. Mbwenye kahanafiye, kagali vakwikwive na vande vale, mundimuwole oharuma afwaye eraga: <<Dowani mwamuwandele ira: <Mbwiyeni kamukukumuwe mwasiwa miyo kadili ofwanela ira mufiye vande vaga.

⁷ Eto miyo kadili ofwanela ira difiye vamentoni venyu ira diwonge na nyo. So mbwenye miyo nnafuna muwonge wewo bahi. Mwasiwa mwawonga wewo bahi, miyo dihiiziwa ira namalabaga unovulumuwa.

⁸ Mwasiwa na miyene dihikana andimuwa anaditonga. Eto miyo dihikana anyakondo nnaatonga miyo. Miyo damuwongana mmohi ira: <<Udowe wa Udje>>, liye unodowa. Eto damuwongana mmohiwa ira: <<Kaza uno>>, liye unoza. Eto damuwongana namalaba waga ira: <<Kadowa wahinde mabasa ala>>, liye unoirana. Na nyenne mwawonga bahi, liye unovulumuwa.> >>

⁹ Evale Yesu agavwile mazwale, ohotikiniheyaga valukulu zela ndimuwole, liye rungunuwa aing'ana anamwindji kamuharagale eraga: <<Na ibaribari miyo nnouwandelani ira mwa aIzarayeli atene, miyo kannanfwanye mutu okana nroromelo nnga nroromelo neno ninna liye.>>

¹⁰ Evale aliba rumiwa ale kagawelenle vande, kanfwannyege namalabole agavulumuwile.

Yesu ohomuvenyiha mwana mmohi mokwani

¹¹ Vagamanle tempu ya vang'onove Yesu ohomaruwaga adowaga sidadi ya Naimi. Adowaga wewule anamamuharaye vamohi na anamwindji ohokala a masika kohomuharaga.

¹² Yesu afiyaga va mulango ovolowela sidadile, kohokalagawo atu katukunlege mutembo wa mulombwana mmohi akwile. Mulombwanole muibalini mwaye abaliwemo mwanapongwe mmohive bahi eto mmaye ali makwele. Vevale vofwanyeyaga mwindji wa atu ohokala a masika a sidadile.

¹³ Evale Nabwiya agamuonne mmaye ule ohokagana tangaranga, nomala eno ohomuwongana eraga: <<Kunlege.>>

¹⁴ Yesu agafiyile vakwikwi vene na mutembole, ohosakwinyaga maka vamuhenle atu mutembole. Evale atu atene katukunlege mutembole kohoimelaga. Agairile enne Yesu ohowongaga na mwanokwa ule eraga: <<Muzombwe we, miyo nnouruma ira uvenye!>>

¹⁵ Yesu agawongile enne, mwanokwa ule ohovenya liye garati, roma wonga. Evale Yesu ohonvaheda mmaye.

¹⁶ Noira enne, atu kafwanyeyaga evale kohokagana ova eto komutitimihaga Mulugu keraga: <<Namafiyiheda mulukulu uhuoneya vari vehu. Mulugu uhapanda atwaye.>>

¹⁷ Mwa enne, jairilege Yesu siku nenne johoroma mwadeya ilambo yatene ya Judeya na tatamo dawandamenle ilambo yenne.

Juwawu Mbatizi oharuma anamamuharaye ambinli ira kadowe kanfuke Yesu

¹⁸ Evale anamamuhara a Juwawu Mbatizi kohodowaga kadeya muwandela Juwawu zela jatene jaireyile.

¹⁹ Evale Juwawu agavwile, oharuma anamamuharaye ambinli wa Nabwiya ira: <<Dowani mwanfuke muire: <Kodi nyo muli wenno afuna za, owu hehi nimuing'anelegeve mmohiwa?> >>

^20-21 Evale anamamuharaye ale kohodowaga aliwa fiya wali Yesu. Mwa tempu yenne kanfwannye Yesu aavulumutchaga atu adjindjene maurenda kanna atu, na jabure jimohi jiwa jaasimeliha, aakumihagamo minemba dabure eto aaonihaga aliba haona adjindjene. Evale aliwa kohonfukaga keraga: <<Juwawu Mbatizi unirumile ira nufukeni ira: <Kodi nyo muli wenno afuna za, owu hehi nimuing'anelegeve?> >>

²² Evale Yesu ohawakulaga eraga: <<Mudowe mwamuwandele Juwawu jatene jionne nyo na jatene jivwile nyo. Mwamuwandele ira: <Atu ohoona anoonihiwa, aliba rangala anowenda, aliba maranya anovulumutchiwa, atu ohovwa anovwa, aliba kwa anovenyihiwa mokwani eto aliba simela anolaleyiwa Muselu Wapama.

²³ Eto orelihiwa gu mutu wenne ahanadiwanganyeda!> >>

²⁴ Anamamuhara a Juwawu Mbatizi ale kagavenyilevo, Yesu ohoromaga awandela mwindji wa atu kafwanyeyaga evale zela mulombwana Juwawu eraga: <<Kodi nyo mudowaga muisalesaleni ira mwamuone Juwawu, mwadowela ona nni? Kodi mwadowela mwaone murere mmohi asakwinyeyaga na nipevo?

²⁵ Kodi na ibaribari mwadowela ona nni? Kodi mwadowele muona mutu owara jowara japama? Nari. Muing'ane, tchoira atu owara jowara jokwima na japama anafwanyeya mmavande mwa amwene!

²⁶ Kadiwandeleni, kodi nyo mwadowela ona nni? Kodi mwadowela muona namafiyiheda? He, na ibaribari eto miyo nnouwandelani ira liye uhumukwaranya namafiyiheda uli watene.

²⁷ Mwasiwa Juwawu gwenno awongiwa mMazuni ira: <Kaing'ana, miyo nnoza dimurume maliba milanyo vasogolro vawo ira asakanyede ndila inafuna we vira.> >>

²⁸ <<Miyo nnouwandelani ira muwari mwa atu atene obaliwa mwa ahiyana, kalivo mutu omukwaranya mulombwana Juwawu Mbatizi. Mbwenye wenne uli mung'ining'ini muUmweneni mwa Mulugu, guli mundimuwa omukwaranya Juwawu.>>

²⁹ Atu atene vamohi na anamasokiha misoko kagavwile jowonga ja Yesu, aliwa barumela ndila ya Mulugu nnga ndila yapama. Eto fwanyeya ira aliwa banne amohive kabatiziwe wanle na mulombwana Juwawu.

³⁰ Mbwenye aFarizewu na anamafundjiha malamulo aliwa tcharumelile jobalra ja Mulugu zela aliwa eto banno amohive kakondile batiziwa na mulombwana Juwawu.

³¹ Evale Yesu ohowongaga eraga: <<Kodi atu a tempu ili hiyo ila, nnafuna daafwalrafwanihe na yengo nni? Aliwa anafwalrafwana na yengo nni?

³² Nnafuna daafwalrafwanihe na makuru menli a ahima anagarati varampani kasakanyaga marandje ewa, kawongelagana keraga: <Hiyo nihiimba nyumbo da vamateloni eto nyo kamufunile ina. Nomala nihiimba nyumbo da vamakwelo eto kamufunile nla.> >>

³³ Yesu ohowongaga akoka eraga: <<Tchoira Juwawu Mbatizi vizile liye, kanadja pawu, nne kanang'wa vinyu. Mbwenye nyo mwamuona airaga eno, muni: <Liye uhukana munemba wabure.>

³⁴ Eto Mwana wa Mutu vizile liye unodja pawu, unong'wa. Mbwenye nyo mwamuona airaga eno, munawonga ira: <Kamuoneni, wenne gu mutu oziveliwa dja eto gu namalrezelra. Liye afwaye ba anamasokiha misoko na anamatega!>

³⁵ Mbwenye akala mutu unowenda na zelru, zelru daye nnaoneya muwari mwa joira jaye.>>

Muhiyana mmohi ohomuzoliha Yesu makura

³⁶ MuFarizewu mmohi eriwa Simawu ohomuitanaga Yesu ira adowe adje vande vaye. Yesu ohovenyaga, liye dowa vande va muFarizewu vale, liye dowa kala vameza.

³⁷ Musidadi mule mohokala muhiyana mmohi eni otega. Muhiyanole agavwile ira: <<Yesu uli mmba mwa muFarizewu mule unadja>>, ohozaga aganna garafwa nosakanyiwa na alabasturu mwagazanle perefume.

³⁸ Evale liye agafiyile mmba mule, ohodowa woramela vamanyaloni va Yesu, liye nlaga. Anlaga onyetihaga manyalo a Yesu na misodi daye, liye mpuputaga na nsisi naye, liye bejarigi manyalo a Yesu, liye mukutulelaga perefume ule.

³⁹ Mbwenye muFarizewu wenno amuitanele Yesu vande vaye ule, agamuonne muhiyanole eraga enne, ohoromaga umbuwela mmirimani mwaye eraga: <<Wenna ahakale namafiyiheda, ogomuiziwa muhiyana unamuhindahinda ula ira gu namatega.>>

⁴⁰ Evale Yesu ohowongaga na muFarizewu ule eraga: <<Simawu miyo dihikana inafuna miyo uwandela.>> Evale liye ohowakula ira: <<Kawongani namafundjiha.>>

⁴¹ Yesu ohoromaga muwandela eraga: <<Ohokalawo namafiyariha kobiri mmohi, aafiyarihile kobiri atu ambinli. Mmohi afiyarile kobiri 500 da parata. Nfwaye mmohiwa ule afiyarile kobiri 50 da parata.

⁴² Evale aliwa kagafiyarile tchawanda pagalri. Na mwasa oira aliwa tchawanda pagalri, mwinnya maliba kobiri ule ohalevelela ambinlene. Kodi mwa atu ambinli ale, ofuna ira amutamalele simbwa maliba fiyariha kobiri ule guvi?>>

⁴³ Evale Simawu ohowakula eraga: <<Onamo waga, ofuna mutamalela valukulu gu ule aleveleliwe kobiri didjindji.>> Evale Yesu ohomuwongagana eraga: <<Uhuwakula pama.>>

⁴⁴ Noira enne, Yesu ohorungunuwa liye muing'ana muhiyanole, liye wonga na Simawu ule ira: <<Unomuona muhiyanola? Miyo dagavolowile mmba muno, weyo kudivahile mahindje ira dihuwena manyalo aga. Mbwenye muhiyanola uhuwanda huwa manyalo agala na misodi daye eto uhuwanda puputa na nsisi naye.

⁴⁵ Weyo kudibejarile, mbwenye muhiyanola agavolowile emuno, liye kamiyanle bejari manyalo aga.

⁴⁶ Weyo kukutulenle makura vamuru vaga, mbwenye muhiyanola uhukutulela perefume manyalo aga.

⁴⁷ Nona nnouwandela ira zivela ulukulu unna liye unotonyiheda ira jotega jaye jidjindji jihileveleliwa. Mbwenye zela mutu wenno unakurumuweliwa jotega jaye ja vang'onove, unakana zivela wa vang'onove.>>

⁴⁸ Yesu agawongile enne, ohomuwongagana muhiyanole eraga: <<Jotega jawo jihimala kurumuweliwa.>>

⁴⁹ Evale Yesu agawongile enne, atu atene kafwanyeya vameza vale na liye kohoroma fukana oka oka keraga: <<Mulombwana wenna bani unafiyeda mwezo olevelela jotega?>>

⁵⁰ Evale Yesu ohomuwandelaga muhiyanole eraga: <<Nroromelo nawo nuhuvulusa. Venya udowege mwa murendele.>>