Lukaji 5 - Mazu Otchena a Mulungu

Yesu ohaitana anamamuharaye

¹ Siku nimohi Yesu ohodowaga imela wandamela ntiya na Galileya. Agali wewule anamwindji kohozaga kafinyanaga vali liye vale ira kavwe mazu a Mulugu.

² Yesu agali evale ohoonaga mwadeya minli dagali mutcherelani ya mwiko. Mwadeya dile ahiyilevo ali aliba godomula, aliwa huwaga mataviwa.

³ Yesu ohogwela mwadeya mmohi ule, mwadeya agwenle liye ule aligi wa mulombwana Simawu. Agagwenle emule ohonvepaga Simawu ira: <<Kaditunyele mwiko vang'ono.>> Noira eno, Yesu ohogarati mmwadeyani mule, liye roma afundjiha anamwindji atene kaligi evale.

⁴ Yesu agamanle afundjiha atwale, ohowonga na Simawu ira: <<Katukula mwadeya ula udowena vodiha. Amala muvokele matavinyu mwiko ira mupe somba.>>

⁵ Evale Simawu ohowakulaga ira: <<Namafundjiha, hiyo niromile godomula ya mahiyu izima kanipileve yengo. Mbwenye voira unawonga gu nyo, miyo nnovokedamo matavihu akoka.>>

⁶ Aliwa kagavokenle mataviwale mwiko, kohokukusa somba didjindji, ante mataviwa roma kauwa na mwasa oindjiva wa somba dile.

⁷ Evale kohavepaga afwiwa kaligi mmwadeyani mmohiwa ira kaze kaakamihede. Afwiwale kagazile kaakamihedaga, mwadeya daminli dene dohozalaga somba, halaga vang'ono ira mwadeya dile diririyele.

⁸ Noira enne, mulombwana Simawu Peduru agaonne zela ejile jaireyile, ohozaga kokora valigi Yesu eraga: <<Nabwiya, susanivo vili miyo vano, mwasiwa miyo dili mutu otega!>>

⁹ Tchoira mulombwana Simawu na afwaye anno kaligi vamohi na liye kohotikiniheyaga na mwasa oindjiva wa somba dedile dakukusile atu dile.

¹⁰ Evale eto Simawu afwaye, kafwanyeya kagali Tiyagu na Juwawu ana Zebedewu, na aliwene kohokala otikiniheyene. Noira enne, Yesu ohomuwongana Simawu, liye ira: <<Kuove! Tchoira roma tchineneva eni dowaga sogolro weyo unakala maliba agodomula atu.>>

¹¹ Nomala eno, aliwa kohosusihedaga mwadeya diwa unde, aliwa hiya jatene janna atu, aliwa roma muhara Yesu.

Yesu ohonvulumutcha mutu mmohi anna urenda wa maranya

¹² Siku nimohi niwa Yesu ohofiyaga sidadi imohiwa. Wewule wohokalaga mutu anna maranya maningo matene. Maliba maranya ule agamuonne Yesu, ohomukokorelaga aworamaga, anvepaga ira: <<Nabwiya, mwafuna dera mudivulumutche.>>

¹³ Evale Yesu ohotapulaga ndanda naye amuhindaga murendole eraga: <<He, miyo dihifuna ira uvulumuwe. Eni weyo umala vulumuwa.>> Yesu agawongile eno, murendole maranya anna liye kohomalaga.

¹⁴ Evale Yesu ohomurumaga ira: <<Kumuwandele mutu mmohiwa. So mbwenye udowe wanvepe namakuta ira auing'ane. Wamala eno, udowe wavelele mukuto nnga Mozeji mwawongele liye para mutu wenno unavulumuwe urenda wa maranya. Udowe wairena eno ira atu kaona weyo wavelelaga mukuto, kakayena ibaribari ira weyo uhuvulumuwa.>>

¹⁵ Mbwenye muselu zela jengo jatene jaira Yesu ohosimbwagave vweya. Evale atu adjindji kohoza ira kavwe eto ira kavulumutchiwe maurenda kanna atu.

¹⁶ Atwale kaza enne, Yesu oahiyetcha evale, liye dowaga wahali atu ira alobele.

Yesu ohonvulumutcha mutu ohowenda

¹⁷ Siku nimohi Yesu afundjihaga, kohokalawo aFarizewu na anamafundjiha malamulo kagaratilege evale okumela vilambo datene da Galileya, Judeya na Jeruzalemu. Eto kopolo da Nabwiya doavulumutchana arenda dalive na liye.

¹⁸ Mwa enne kohokalawo alombwana kamuzilegena mulombwana mmohi ohowenda agali vamakani vaye ira kamuvolowena mmba mwaligi Yesu mule ira kamufiyena vamentoni va Yesu.

¹⁹ Mbwenye na mwasa oindjiva wa atu kaligi evale aliwa tchawandilege muvolowana maliba hawenda ule. Evale kohoumbuwelaga zelru doira: <<Ndoweni nigweleni vazulu va nyumba va.>> Kagagwenle kohoparapasula vazulu va nyumba vale, aliwa mutukula murendole na makayene, mutitiheda vamentoni va Yesu.

²⁰ Yesu agamuing'anne murendole na atu kamuzilena ale, ohoona ira aliwa kohokana nroromelo. Evale ohowongaga na maliba hawenda ule eraga: <<Moya eniva jotega jawo jihimala kurumuweliwa.>>

²¹ Yesu agawongile enne, andimuwa a anamafundjiha malamulo vamohi na aFarizewu kohoromaga umbuwela mmirimani mwiwa ira: <<Uluwola bani unamululuviha Mulugu eni? Tchoira kalivo unawanda kurumuwela jotega ahali Mulugu.>>

²² Evale Yesu ohovayelaga iziwa jatene jaumbuwela atu. Muwari mwa emule ohafukaga ira: <<Kodi mwasiwa gwa nni nyo wanganyedaga mmirimani mwenyu?

²³ Kodi yorutcha wonga tchivi? Inarutcha ku wonga na mutu ira: <Eni jotega jawo jihimala kurumuweliwa>, owu irutchile ku wonga na maliba hawenda ira: <Kavenya, uwende?>

²⁴ Mbwenye miyo nnafuna dinvulumutche murendola ira nyo muiziwe ira Mwana wa Mutu uhuvahiwa utongi mwilamboni ya vati ira akurumuwele jotega.>> Evale ohomuwongagana maliba hawenda ule eraga: <<Venya utukule makawo, udowege vande vawo!>>

²⁵ Yesu nowonga eno, mobaranya murendole ohovenyaga vamentoni va atu atene, tukula makaye, liye dowaga waniwa amutitimihaga Mulugu.

²⁶ Atu atene kaligi evale kohotikiniheyaga. Eto kohokagana ova ulukulu, kamutamalelaga Mulugu keraga: <<Peno nihiona jengo jotikiniha!>>

Yesu ohomuitana Levi

²⁷ Jagaireyile enne, Yesu okumaga mmba mwaligi liye. Adowaga ohonfwanyaga namasokiha misoko mmohi, nzina naye ali Levi, agaratilege vevo vakomihetcha liye misoko. Evale Yesu ohomuwongana eraga: <<Kadiharege.>>

²⁸ Noira enne, Levi ohovenyaga ahiyaga jatene jene, liye muharaga Yesu.

²⁹ Noira enne Levi ohomusakanyelaga Yesu pwando indimuwa. Vapwandoni vale vohokalaga anamasokiha misoko adjindjene na atu amohiwa ohiyana-hiyana. Atene anne kaligi vamohi na Yesu vameza.

³⁰ Mwa enne aFarizewu na anamafundjiha malamulo afwiwa kohasumululaga anamamuhara Yesu keraga: <<Nyo munawanda avi dja no ng'wa vamohi na anamasokiha misoko na atu amohiwa okana makalelo abure?>>

³¹ Evale Yesu ohawakulaga ira: <<Ngumi kanadowa wa mediku, mbwenye murenda gunadowa wa mediku.

³² Miyo dizaga mwilamboni ya vati kadizele aitana atu apama, mbwenye dizele aitana atu otega ira katwaruwe.>>

Zela muselu ojejuwari

³³ Atu amohiwa kafwanyeyaga evale kohowongaga na Yesu ira: <<Juwawu Mbatizi anamamuharaye anojejuwari fendo didjindji dene no lobela uwa wene. Eto atu anaahara aFarizewu anojejuwari, mbwenye anamauharaninyu kinajejuwari. Nnga mwasiwa gwa nni aliwa hajejuwarigi?>>

³⁴ Evale Yesu ohawakulaga eraga: <<Kodi aliba itaneliwa vapwandoni ya matelo anojejuwari kagali na namatela wenne vamohi? Kajinaireya.

³⁵ So mbwenye anoza kafiye malambo anafuna kumihiwavo namatela ule. Agakumihiwevo, aliba itaniwa ale anerege jejuwari!>>

³⁶ Yesu eto ohowongaga yofwalrafwaniha imohiwa eraga: <<Kalivo unatukula yowara ixa yapamene agwada ira atchapelrena nguwo yawale. Airana eno unongele wa sayi yowara ixa ile eto itchapa igwadile liye adowa atchapelrana nguwo yawale ile kinavahana. Unopuzeya wu na wu.>>

³⁷ Eto kalivo unatukula vinyu muxa ahela mutembeni mwawale. Tchoira mutu airana eno, tembe na wale nne nnotweya. Evale natweya, vinyule unotatiya. Era eno eto tembe nne nnonongeya.

³⁸ Mbwenye ifwanenle ira vinyu muxa aheliwe mutembeni muxa.

³⁹ Eto kalivo mutu unang'wa vinyu wawale, amala afunaga vinyu muxa, mwasiwa uni: <<Vinyu wawale guli wapama.>>