Lukaji 4 - Mazu Otchena a Mulungu

Yesu ohoxixiwa na Satana

¹ Yesu ohokumaga muhindje Jordawu agazaleliwe Munemba Otchena. Evale ohosogolrelriwa na Munemba mmohive wenne ira adowege muisalesaleni.

² Agadowile muisalesaleni mule, ohomala malambo 40 ntana na mahiyu ahadjile yengo, eraga xixiwa na Diyabo. Magomelo uwa ohokana ndala.

³ Evale Diyabo ohomuwongana eraga: <<Weyo akala uli Mwana Mulugu, uwonge na nibwe ni ira nisanduwe nikale pawu.>>

⁴ Evale Yesu ohomuwakula, liye ira: <<MMazuni muhulrembiwa ira: <Kahi pawu ve bahi inamukalihawo mutu.> >>

⁵ Diyabo eto ohomutukula Yesu, mudowana nimburo notama bure, liye muoniha maumwene matene a ilambo ya vati ora imohive.

⁶ Evale ohomuwandelaga eraga: <<Miyo nnafuna duvahe maumwene matene no rayela unafwanyeyana maumwene ala, mwasiwa miyo dihivahiwa jatene jeji ira jikale jaga eto dihikana utongi owanda nvaha mutu unanfunana miyo.

⁷ Malringana wadikokorela uditamalela, jatene jeji jinokala jawo.>>

⁸ Evale Yesu omuwakulaga ira: <<MMazuni eto muhulrembiwa ira: <Umutamalelege Nabwiya Mulugu wawo eto umulabege liyene bahi.> >>

⁹ Diyabo eto ohomutukula Yesu amudowagana Jeruzalemu, liye muhela vazulu va Nyumba ya Yehova, nimburo notama bure. Evale ohomuwandelaga eraga: <<Akala weyo uli Mwana Mulugu, uvivoke vazulu va nyumba vali we vo, umorele vati.

¹⁰ Mwasiwa ihilrembiwa mMazuni ira: <Mulugu unoaruma angelro aye ira kauing'anele.

¹¹ Aliwa anouhidedela na mandiwa ira manyalo awo kahaporeye na mabwe.> >>

¹² Evale Yesu ohomuwakulaga ira: <<MMazuni eto muhulrembiwa ira: <Kumuxixe Nabwiya Mulugu wawo.> >>

¹³ Evale Diyabo agamuxixile Yesu na makalelo matene ohiyana-hiyana, ohomuhiya para tempu imohiwa.

Yesu oholramwisiwa sidadi ya Nazareti

¹⁴ Yesu ohowelela porovinsiya ya Galileya muwari mwa kopolo da Munemba Otchena. Makalelo anna liye kohovweya mwilamboni yatene ya wewule.

¹⁵ Eto liye ohoroma fundjiha munyumbani mwiwa mwemo mwafundja atu mazu. Mwa enne ohoroma tamaleliwa mwa atu atene na mwasa wa jofundjiha jaye.

¹⁶ Noira eno, Yesu ohovenya, liye dowa Nazareti wewo waulukulenle liye. Nnga molemelela, nagafiyile siku na sabado, ohovolowaga muwari mwa nyumba yofundjamo Mazu. Agavolowile, ohoimelaga ira aileri mazu.

¹⁷ Evale kohonvahaga livuru na namafiyiheda Izaiya. Liye agatukunle, ohogudubulra, liye fwanya vevo valrembiwe mazu oira:

¹⁸ <<Munemba wa Nabwiya uli na miyo. Mwasiwa Nabwiya udihambihile ira daalaleye Muselu Wapama aliba simela eto udirumile ira daalaleye mazu aliba kadeya ira kawomboliwe, aliba haona kaonege, ale anazuzumihiwa kakutchiwe muwari mo zuzuma wewa.

¹⁹ Eto udirumile ira dilaleye ira: <Yaka ya sayi da Nabwiya tchenna.> >>

²⁰ Yesu agailerile eno, ohofungaga livuru nne, liye nvaha musogolrelri, liye dowa garati. Vevale agagaratile, atu atene kaligi mwemule kohokalelaga muing'ana do do do.

²¹ Vevale Yesu ohoromaga wonga, liye ira: <<Mazu muvwile nyo ala, kohomala kwakwanela peno eni.>>

²² Kagavwile mazu matene awonga Yesu, atene kohowonga japama zela wa Yesu. Kohotikina zela mazu a sayi dawonga liye. Vevale eto kohoroma fukanaga, keraga: <<Wenna kahi mwana Joze?>>

²³ Evale Yesu ohowonga na atwale eraga: <<Miyo dihiiziwa ira nyo munafuna nnga mudiwongelaga miyo imariya yenno inawongiwetcha ira: <Akala uli mediku, wabulelaga uvivulumutche wa mwinnya!> Tapulela ira nyo munafuna mwagadirumile ira: <Matikiniho waira we ilambo ya Kafaranamu, kairana uno ilambo ya waninyu ila.> >>

²⁴ Yesu ohowongagave, eraga: <<Na ibaribari nnouwandelani ira kalivo namafiyiheda unarihediwa ilambo ya waniwa.

²⁵ Na ibaribari nnouwandelani ira muselu wenna unakala nnga jaireyile wanle. Mwilamboni muno tempu yalimo namafiyiheda Eliya vohomala yaka taru na medi mitanu na mmohi muzongwe zulu aharumbwaga. Ilambo yatene ya Izarayeli mohokala ndala. Amakwele a ahiyana kali muIzarayeli muno tempu ya namafiyiheda Eliya tchali a masika.

²⁶ Mulugu mbwenye kamurumile Eliya ira adowe wa amakwele a ahiyana a Izarayeli kafwanyeya muno, nari. So mbwenye amurumile Eliya ira adowe wa makwele wa muhiyana mmohi akala sidadi ya Sarepita, ilambo ya Sidoni.

²⁷ Sawasawa nnga jaireyile mwilamboni muno tempu yalimo namafiyiheda Elizewu. Tempu yaliwo liye kohokalawo aIzarayeli okana maranya. Mbwenye mulombwana Elizewu kanvulumutchile nne mutu mmohi muwari mwa aliwa. So mbwenye mutu anvulumutchile liye ali wa ilambo ya Siriya bahi aitaniwa Namani.>>

²⁸ Yesu agamanle wonga mazu anne, atu atene kafwanyeyaga mmba mule kohotakaleliwaga valukulu.

²⁹ Mwa enne kohovenya, aliwa muhinda Yesu, mudowana unde wa sidadi. Eto fwanyeya ira sidadiwa kamangile vamwangoni. Atu kamuhindile Yesu ale kamudowagana kohokana yofuna ira: <<Nafiya wewule, namundunyele vodiha valukulu vale.>>

³⁰ Mbwenye kaganfiyilena vazulu vale, Yesu kawandeyile. Ohoviraga vari vewa, liye dowaga jaye.

Yesu ohotamangiha munemba wabure

³¹ Yesu agakumile evale, ohodowaga Kafaranamu, sidadi imohi inafwanyeya muwari mwa ilambo ya Galileya. Agafiyile wewule ohoromaga afundjiha atu siku na sabado.

³² Evale atu aafundjihaga liye ale kotikiniheya na makalelo afundjiha liye mwasiwa liye afundjiha na utongi.

³³ Munyumbani mwafundjihaga liye mazu mule mohokalaga mulombwana mmohi anna munemba wabure, otakala. Mulombwanole ohokuwaga eraga:

³⁴ <<Yesu wa Nazareti, nnga munafuna muniirele nni hiyo? Kodi mwazela ira munitolotche? Miyo duhuiziwani pama. Nyo muli Mutu Otchena wa Mulugu.>>

³⁵ Evale Yesu ohomusumulula munemba otakala ule eraga: <<Kamiyala, ukumemo mwa mutuyo!>> Munemba wabure ule ohonvokelaga vati mutule, liye kumamo. Mutule ohogwela vati, mbwenye kaporeyile.

³⁶ Evale atu atene kaligi mmba mule kohotikiniheyaga karomaga wonga kada mutu na nfwaye keraga: <<Mazu anna anatapulela nni? Wenna ukana utongi na kopolo dowanda wonga na minemba dotakala. Eto awonga na minemba dile, nnonvwelela.>>

³⁷ Evale joira jaye johoroma vweya tatamo datene dawandamenle wewule.

Yesu ohavulumutcha atu adjindji

³⁸ Yesu ohovenyagamo muwari mwa nyumba yofundjamo Mazu mule, liye dowa vande va mulombwana Simawu. Eto fwanyeya ira mulombwana Simawu okana mbogohaye afwanyeya agali murenda aganna febiri. Yesu agafiyile vande vale, aliwa kohonvepa ira anvulumutche.

³⁹ Evale Yesu ohodowaga vevale vagonatilege murendole, liye wonga mosumulula ira: <<Febiri kakumamo mwa mutula.>> Noira eno, urendole wohomala, muhiyanole liye kala pama, liye venya roma asakanyela jodja.

⁴⁰ Evale nzuwa niviraga, atene kanna afwiwa okana maurenda ohiyana-hiyana koazana arendale, aliwa nvepaga Yesu ira aavulumutche. Nonvepa, Yesu oahela manda atwale, atene aliwa vulumuwaga.

⁴¹ Minemba didjindji dabure dakumaga mwa atwale dokuwa diiraga: <<Nyo muli Mwana Mulugu.>> Evale Yesu osumulula minemba dabure dile ira dahamuromolege, mwasiwa dohomuiziwa Yesu ira gu Namatikeliwa.

⁴² Unde wagatchile Yesu okumaga mwali atu mule, adowaga nimburo eni wahali atu. Agadowile wewule, atu atene kaligi evale kohoromaga musakasaka. Kaganfwannye kohonvepaga ira: <<Nyo kamudowe, hiyo nnafuna ira mukaleve wewuno.>>

⁴³ Evale Yesu ohawakulaga ira: <<Miyo nnafuna daalaleye atu a sidadi dimohi diwa ira na aliwene kaiziwe Muselu Wapama wa Umwene wa Mulugu. Tchoira Mulugu adirumile ira dilabe mabasa olaleya anno.>>

⁴⁴ Nomala enne, ohodowaga alaleyaga muwari mwa nyumba dofundjamo mazu dafwanyeya ilambo yatene ya Judeya.