Lukaji 3 - Mazu Otchena a Mulungu

Juwawu Mbatizi ohotara ndila yafuna vira Yesu

¹ Vagamanle yaka kumi na tanu romela tempu Tiberiyo Sezare aromile liye kala mwene wa aRoma atene, Ponsiyu Pilatu agali governadore wa Judeya, Erodi agali mwene wa Galileya, mbalaye Filipi agali mwene wa ilambo ya Itureya na ilambo ya Tarakonite eto Lizaniya agali mwene wa ilambo ya Abileme,

² mulombwana Anasi na Kayafasi kagali andimuwa a anamakuta, pa evale Mazu a Mulugu vazile atu wa Juwawu mwana Zakariya muisalesaleni.

³ Liye ohoroma wendawenda wandamelana muhindje Jordawu aalaleyaga atu ira katwaruwe eto kabatiziwe ira kaleveleliwe jotega jiwa.

⁴ Ejo jakwakwaneliheda mazu kalrembiwe na namafiyiheda Izaiya wanle oira: <<Ukala nizu nnakuwa muisalesaleni niiraga: <Sakanyedani rampa wa Nabwiya. Ongolani ndila inafuna liye vira.

⁵ Mwemo munafwanyeya mapedi odiha munoza muvuheleliwe. Mwango na mikuma datene nnoza ditonde. Jogomba jatene jinoza jiwongoliwe. Ndila datene dotimbeya nnoza disakanyiwe pama.

⁶ Eto atu atene anoza kaone vulusa wa Mulugu.> >>

⁷ Evale Juwawu alaleyaga enne, kozaga atu wewule waligi liye ule ira kabatiziwe. Evale Juwawu agaaonne aliwa kazaga, ohoroma asumulula eraga: <<Nyo mulogo wa jivili nyo! Kodi uuwandenleni bani ira mutawe uwali wa Mulugu unafuna za utolotchani?

⁸ Akala muhutwaruwa, muvahege misapo dapama dotonyiheda twaruwa wenyu. Nyo mwagarati kamuroromelege ira: <Mulugu unonirumela mwasiwa hiyo nili ziza na Abarahamu.> Tchoira miyo nnouwandelani ira Mulugu afuna, unowanda tukula mabwe ali eva ala, liye sandutcha ira kakale ana Abarahamu.

⁹ Eto mbazo imala sayihiwa ira igwadege mitengo na mitchitchi diwa dene. Mutengo watene ahanavaha misapo dapama, unogwadiwa, avokediwe munloni.>>

¹⁰ Nomala enne, atu adjindji kaligi evale kagavwile jowonga ja Juwawu, kohonfuka, aliwa ira: <<Nnga hiyo niirege avi?>>

¹¹ Evale Juwawu ohawandela, liye ira: <<Miyo nnouwandelani ira ule unna kamiza mbinli, atukule imohi anvahe nfwaye ahanna. Ule unna jodja, inafwanela atukule anvahemo nfwaye ahanna jodja.>>

¹² Evale eto vohokalaga aliba sokiha misoko. Aliwa kohozaga wa Juwawu ira kabatiziwe. Evale kohonfukaga Juwawu keraga: <<Namafundjiha, nnga hiyo vano niirege avi?>>

¹³ Evale Juwawu ohawandela, liye ira: <<Nyo mwasokihaga misoko, kamuromolege konta yokwaranya yenno iwandeliwe nyo.>>

¹⁴ Evale eto vohokala anyakondo. Aliwa kohonfuka keraga: <<Nnga hiyo vano niire avi?>> Evale Juwawu ohawandelaga eraga: <<Nyo kamwaawakege atu kobiri diwa mowatutcha. Eto kamwaanukedege atu jengo jahairilena atu. So nyo mbwenye, muziveliwege yotambilra yenno munatambilra nyo bahi.>>

¹⁵ Muwari mwa enne atu dediheda wewa wohosimbwaga wendjededeya, aliwa umbuwelaga zela Juwawu ira: <<Kodi Namatikeliwa kaza akala wenna?>>

¹⁶ Juwawu mbwenye ohawandelaga atu kafwanyeyaga evale eraga: <<Miyo nnaubatizani na mahindje, mbwenye ukala unaza odikwaranya miyo, nne miyo eto kadili ofwanela tapula mingohi da sapato daye. Liye aza, unaubatizegeni na Munemba Otchena na munlo.

¹⁷ Liye ukana yovetana yaye mmandani mwaye ira avetena tirigu wenno uli nimburo nobubudavo jalo. Amala veta, unafuna atukule tirigu ahele musandjani mwaye, makata atatilele munloni ohotima.>>

¹⁸ Mulombwana Juwawu ohalaleya atu atene, aawandelaga, aakokomezaga Muselu Wapama na makalelo madjindjene.

¹⁹ Juwawu eto ohomusumulula mwene Erodi mwasiwa liye ohomutela Erodiya wenno amukumihile liye mmba. Tchoira muhiyanole ali mwadi mbalaye Filipi. Juwawu eto omusumulula zela jabure jatene jairetchana Erodi.

²⁰ Evale Erodi ohowendjeda jabure jatene jaira liye. Wendjeda uwa, amuhindile Juwawu, liye muheliha mukadeya.

Batiziwa wa Yesu

²¹ Juwawu ahanaheliwe mukadeya, oabatiza atu oindjivene. Yesu eto na liyene ohobatiziwa tempu imohive yabatiza Juwawu. Agabatiziwe, ohoromaga lobela. Mbwenye Yesu alobelaga, zulu wohuleya.

²² Evale Munemba Otchena ohotita na makalelo a kangayiwa, liye za vali Yesu vale eto zulu wohokumelaga mazu kawongaga ira: <<Weyo uli Mwanaga wenno nnamuziveliwa miyo eto unadihagalaliha.>>

Makolo a Yesu kuma mutu oroma Adawu fiyeda baliwa waye

²³ Yesu ohoroma laba mabasaye aganna yaka 30. Liye aoneya nnga mwana Joze, Joze mwana Eli,

²⁴ Eli mwana Matati, Matati mwana Levi, Levi mwana Meliki, Meliki mwana Janayi, Janayi mwana Joze,

²⁵ Joze mwana Matatiya, Matatiya mwana Amoji, Amoji mwana Nahumi, Nahumi mwana Esili, Esili mwana Nagayi,

²⁶ Nagayi mwana Maati, Maati mwana Matatiya, Matatiya mwana Semeyi, Semeyi mwana Jozeki, Jozeki mwana Joda,

²⁷ Joda mwana Jowanani, Jowanani mwana Reza, Reza mwana Zorobabeli, Zorobabeli mwana Selatiyeli, Selatiyeli mwana Neri,

²⁸ Neri mwana Meliki, Meliki mwana Adi, Adi mwana Koza, Koza mwana Elimada, Elimada mwana Eri,

²⁹ Eri mwana Jozuwe, Jozuwe mwana Eliyezeri, Eliyezeri mwana Jorimu, Jorimu mwana Matati, Matati mwana Levi,

³⁰ Levi mwana Simeyawu, Simeyawu mwana Juda, Juda mwana Joze, Joze mwana Jonani, Jonani mwana Eliyakimu,

³¹ Eliyakimu mwana Meleya, Meleya mwana Mena, Mena mwana Matata, Matata mwana Nata, Nata mwana Davi, Davi mwana Jese,

³² Jese mwana Obedi, Obedi mwana Bowazi, Bowazi mwana Sala, Sala mwana Nasoni,

³³ Nasoni mwana Aminadabe, Aminadabe mwana Adimi, Adimi mwana Arini, Arini mwana Ejiromi, Ejiromi mwana Pereji, Pereji mwana Juda,

³⁴ Juda mwana Jako, Jako mwana Izaki, Izaki mwana Abarahamu, Abarahamu mwana Tera, Tera mwana Nahori,

³⁵ Nahori mwana Serugi, Serugi mwana Rewu, Rewu mwana Pelegi, Pelegi mwana Eberi, Eberi mwana Sala,

³⁶ Sala mwana Kayinani, Kayinani mwana Aripaxadi, Aripaxadi mwana Semi, Semi mwana Nowe, Nowe mwana Lameki,

³⁷ Lameki mwana Metusela, Metusela mwana Inoki, Inoki mwana Jaredi, Jaredi mwana Mahalaleli, Mahalaleli mwana Kayinani,

³⁸ Kayinani mwana Enosi, Enosi mwana Seti, Seti mwana Adawu, Adawu mwana Mulugu.