Lukaji 24 - Mazu Otchena a Mulungu

Venya wa Yesu mokwani

¹ Siku noroma na sumana na mabebehene, ahiyanale kohotukulaga maperefume kasakanyilege atu, aliwa venya, dowa masiye wakoyiwe Yesu.

² Mbwenye kagafiyile wewule, kafwanyilege nibwe nafungilena atu nifukweni ule nagakumihiwewo.

³ Evale aliwa kagavolowile, maningo a Nabwiya Yesu tchafwanyilemo.

⁴ Mwa enne kohomaliwaga zelru. Mobaranya, kohokalawo alombwana ambinli kawarilege jowara jojerimela kaakumelenle.

⁵ Evale aliwa kohokagana ova ulukulu, aliwa oramiheda kove diwa vati. Alombwanale kohowongaga na aliwa keraga: <<Kodi mwasiwa gwa nni nyo musakaga mutu okalawo wewo unafwanyeya atu kakwile?

⁶ Liye kanafwanyeya uno, mbwenye uhuvenyihiwa mokwani. Muumbuwele yenno yauwandenleni liye agali ilambo ya Galileya

⁷ ira: <Inofuneya ira Mwana wa Mutu aveleliwe mmandani mwa anamatega, akomeliwe vamuradini eto aze avenye mokwani siku naneraru.> >>

⁸ Evale ahiyanale kohoumbuwelaga yenno yaawandenlege Yesu.

⁹ Aliwa kagawenlewo masiye ule, kohawandela anamamuharaye kumi na mmohi na atu amohiwa zela jatene jaireyile.

¹⁰ Ahiyana kaawandenle anamarumiwa, maziniwa ali Mariya nkuda Madala, Jowana na Mariya mmaye Tiyagu vamohi na ahiyana amohiwa kafwanyeya vamohi na aliwa.

¹¹ Evale anamarumiwa ale kagawandeliwe, kaona nnga ahiyanale kawonga jengo johokana mabasa ja mmuruni mwiwa. Na mwasa wenne, tcharoromenlege.

¹² Mbwenye Peduru ohotamangaga, liye dowa nifukweni ule. Agafiyile wewule, agapatamenlemo, aonilege lensori ve bahi. Evale ohowelelaga vande, atikinaga jejile jaireyile.

Yesu ohakumelela alombwana ambinli ndila ya Emawu

¹³ Siku nimohive nenne, kohokalawo alombwana ambinli kamaruwile, aliwa dowaga tatamo imohi yaitaniwa Emawu. Lapela uwa na Jeruzalemu ali nnga kilometuru kumi na imohi.

¹⁴ Aliwa kadowaga mundila kotapanyedaga zela jejile jaireyile.

¹⁵ Aliwa katapanyedagave ejile, kafukanaga, mwinnyiwene Yesu ohawandamelaga, liye roma wenda vamohi na aliwa.

¹⁶ Mbwenye aliwa meso ewa kohokuneliwa ira kahawande muiziwa.

¹⁷ Mwa enne Yesu ohafuka, liye ira: <<Kodi nyo munatapanyeda nni nyoka nyoka muwendaga?>> Evale Yesu agaafukile enne, aliwa kohoimelaga mokumbanya.

¹⁸ Mutu mmohi eriwa Keleyopa ohowonga, liye ira: <<Kodi weyo gusimbwetchetche kala mulendo muJeruzalemu muno, para weyo haiziwa jiireyile malambo anna kavirile ala?>>

¹⁹ Evale Yesu ohafuka, liye ira: <<Kodi jiireyile nni?>> Aliwa kohomuwakula, aliwa ira: <<Jejo jimuireyele Yesu wa Nazareti. Liye ali namafiyiheda wa kopolo mozela joira jaye na jowonga jaye vamentoni va Mulugu na vamentoni va atu atene.

²⁰ Evale andimuwa a anamakuta na andimuwihu kohonvelela ira akwe, aliwa mukomela vamuradini.

²¹ Mbwenye hiyo yodediheda yehu ali ira liye awande awombola aIzarayeli. Eto mwa jatene vihimala malambo mararu jengo ji jiireyile atu.

²² Ahiyana amohiwa kali vamohi na hiyo kohonikatamiha mwasiwa kamaruwile unde wahanatche pama, aliwa dowa masiye.

²³ Eto maningo a Yesu kifwanyilewo. Aliwa kowelawo kawongaga ira: <Hiyo nahaona angelro, aliwa niwandela ira liye uhuvenya mokwani.>

²⁴ Na ibaribari alombwana amohiwa mwa hiyo kohodowa masiye ule, aliwa ona ibaribari yawongile ahiyanale mbwenye na aliwene Yesu kimuonile.>>

²⁵ Yesu ohawandela, liye ira: <<Nyo muli orutcha onelramo eto muli atu odibeliwa roromela jatene jiwongile anamafiyiheda!

²⁶ Kodi nyo kamunonile ira yali yofuneya ira Namatikeliwa aonihiwe goyi dedo, amala avolowe muwari mwa undimuwa waye?>>

²⁷ Evale ohoroma aonelrihedamo jatene jalrembiwe mMazuni zela liye, aromagana malivuru a Mozeji na jolremba jatene ja anamafiyiheda.

²⁸ Kawandamelaga tatamo yadowa atu, Yesu ohokalaga nnga unafuna aakwaranye.

²⁹ Evale aliwa kohonvepa na ntindi keraga: <<Kalani na hiyo mwasiwa unde uhudiba, nzuwa nihivira.>> Evale Yesu ohovolowaga, liye kala na aliwa vamohi.

³⁰ Ohogaratigi vameza vamohi na aliwa, liye tukula pawu, reliha, liye meya, agawela.

³¹ Evale meswiwa kohuleyaga, aliwa fiyeda muona ira gu Yesu. Mbwenye liye ohadimelagavo.

³² Evale aliwa kohoromaga wonga mmohi na nfwaye keraga: <<Xii, mmirimani mwihu kanere ziveliwa wene tempu yaniwandela liye mundila mule, anitapulelagamo Mazu!>>

³³ Evale aliwa kohovenyaga ora imohive yenne aliwa welela Jeruzalemu. Kagadowile, kohafwanyaga anamarumiwa kumi na mmohi kagagumanenle vamohive eto kagali vamohi na atu amohiwa,

³⁴ kawongaga jimohive ejile keraga: <<Na ibaribari Nabwiya uhuvenyihiwa mokwani. Liye uhunkumelela mulombwana Simawu.>>

³⁵ Evale alombwana ambinli ale kohorumelela mazwale, kawongaga zela jejo jaaireyele mundila, ante ora yaagawela liye pawu, kafiyedaga muiziwa.

Yesu ohakumelela anamamuharaye

³⁶ Evale aliwa kaawandelagave afwiwale ejile, mobaranya Yesu ohakumelela vari vewa, liye ira: <<Murendele akale na nyo!>>

³⁷ Aliwa evale kohorendjeyaga valukulu, kaumbuwelaga ira: <<Ii, wenna muzimu!>>

³⁸ Liye mbwenye ohowongaga ira: <<Kodi nyo mukalele nni okukumuwene muwanganyedaga mmirimani mwinyu?

³⁹ Kaing'anani mandaga ala na manyalo aga ala, muiziwe ira gu miyene. Mudihinde. Mwadihinda, munodiroromela. Tchoira muzimu kanakana maningo nne makuva nnga mwemo munadionela nyo.>>

⁴⁰ Awongagave enne, ohaonihaga mandaye na manyalo aye.

⁴¹ Aliwa kagaonne, tchawandile roromela tchoira aliwa kohagalalaga eto kohotikiniheyaga tempu imohive. Evale Yesu ohafuka, liye ira: <<Kodi veva muhukanavo yodja?>>

⁴² Evale aliwa kohonvahaga ikukuru imohi ya somba yowotcha na nikanda na nuwi,

⁴³ liye watchela, liye dja vamentoni vewa.

⁴⁴ Nomala enne, Yesu ohowonga, liye ira: <<Tempu dali miyo na nyo malambo a mundulrimu, dohouwandelani ira jatene jilrembiwe zela miyo mmalamuloni a Mozeji, malivuru a anamafiyiheda na Salmu jinokwakwanela.>>

⁴⁵ Evale Yesu ohahulaga maumbuwelelo ewa ira kawande onelramo jilrembiwe mMazuni.

⁴⁶ Ohawandelaga, liye ira: <<MMazuni muhulrembiwa ira Namatikeliwa unoonihiwa goyi eto siku naneraru unovenyihiwa mokwani.

⁴⁷ Eto mwa nzina naye, muselu zela twaruwa no leveleliwa jotega unolaleyiwa mwa malogo matene roma ilambo ya Jeruzalemu.

⁴⁸ Nyo muli amboni zela jengo jeji.

⁴⁹ Muing'ane, miyo nnourumihedani nipangano na Babaga. Mbwenye mudedihege muJeruzalemu emuno fiyeda kopolo da zulu duzeleni.>>

Madowelo a Yesu ilambo ya zulu

⁵⁰ Evale Yesu ohadowagana anamamuharaye unde wa sidadi, tatamo ya Betaniya. Kagafiyile wewule, ohatapulelaga mandaye, liye areliha.

⁵¹ Aarelihagave, Yesu ohoromaga ahiyaga, liye tukuleliwa ilambo ya zulu.

⁵² Evale aliwa kohomutamalelaga, nomala aliwa welelaga Jeruzalemu wakoka wene no hagalala ulukulu.

⁵³ Evale aliwa kokalave Nyumba ya Yehova kamutamalelaga Mulugu. Kukala mazu Lukaji alrembile liye muwari mwa Munemba Otchena zela jaira Yesu agali mwilamboni ya vati.