Lukaji 23 - Mazu Otchena a Mulungu

Yesu ohosumeliwa vamentoni va Pilatu

¹ Noira enne, atu atene kafwanyeyaga evale kohovenyaga, aliwa mulanda Yesu mudowana wa Pilatu.

² Kagafiyile wewule, kohoromaga musumela keraga: <<Mutula nimuhindile aaholotchaga atu a nlogo nehu, aawandelaga ira kahapagalrigi misoko wa mundimuwa Sezare eto awongaga ira liye gu Namatikeliwa eto gu Mwene.>>

³ Evale Pilatu ohonfukaga Yesu eraga: <<Kodi weyo uli Mwene wa aJudewu?>> Yesu ohowakula, liye ira: <<Nyo gunawonga eni.>>

⁴ Evale Pilatu ohowonga na andimuwa a anamakuta na anamwindji kafwanyeyaga evale, liye ira: <<Miyo kadifwanyile mwasa wabure ofuna mutongela mulombwanola.>>

⁵ Mbwenye aliwa kohokanyihedagave keraga: <<Liye mafundjihelo unafundjiha liye, uroma tatamula madugudugu mwa atu atene a Judeya. Liye uromile ilambo ya Galileya fiyeda uno.>>

⁶ Pilatu agavwile enne, ohofukaga, liye ira: <<Kodi mulombwanola gwa ilambo ya Galileya?>>

⁷ Evale Pilatu agaiziwile ira Yesu ali wa ilambo yatonga mwene Erodi, ohomuruma ira adowe wa Erodi, atonge liyene. Tchoira ora yenno Erodi afwanyeya muJeruzalemu emule.

⁸ Evale Erodi agamuonne Yesu, ohagalalaga valukulu mwasiwa liye ofunetcha muona roma wanle na mwasa wa jengo javwetcha liye zela Yesu. Eto ofunetcha ira amuone Yesu aumbuwelaga ira: <<Miyo nnafuna dimuone Yesu ira airena ionihedo.>>

⁹ Evale Erodi ohoromaga nfuka Yesu jengo jidjindji, mbwenye Yesu kawakunleve yengo.

¹⁰ Andimuwa a anamakuta na anamafundjiha malamulo kali evale kohoroma munukeda Yesu jengo jidjindji johokala ja masika.

¹¹ Eto Erodi na anyakondwaye kohoromaga muyeviha muwari mompeta. Kohomuwarihaga kapa yoriyetchetcha, aliwa muweliheda wa Pilatu wakoka wene.

¹² Pilatu na Erodi agali wanle kohoidana, wandana wewa wohoroma siku nenne.

¹³ Evale Pilatu ohaitaniha andimuwa a anamakuta, andimuwa a aJudewu na anamwindji,

¹⁴ liye ira: <<Nyo muhudizelana mutula muiraga: <Mutula unaholotcha nlogo nihu.> Kaing'anani, miyo dihinfuka jengo jidjindji vamentoni venyu mbwenye jatene jinamunukeda nyo kadinfwannyena.

¹⁵ Nne masiki Erodi, na liyene kanfwannyena mulandu, nona amuwelihedaga uno. Kaing'anani, mulombwanola kairilena yengo yabure yofwanela ira apiwe.

¹⁶ Miyo nnotonga ira liye awaxuliwe, amala dimutapule, adowege.>>

AJudewu kohomukonda Yesu

¹⁷ Nnga molemelela, yafiyaga tempu ya Pwando ya Mavirelo, Pilatu omukutchetcha munyakadeya mmohi wenno asakulriwa na anamwindji.

¹⁸ Evale anamwindji kavwaga Pilatu awongaga jomutapula Yesu, kohoromaga kuwa keraga: <<Mumpe mulombwanoyo. Mmukutche Baraba.>>

¹⁹ Fwanyeya ira mulombwana Baraba kamuwongana atu ira akutchiwe ule, afungeliwe na mwasa owanawana na aRoma muwari mwa sidadi eto na mwasa ompa mutu.

²⁰ Evale Pilatu ohowonga akoka na anamwindjale mofuna ira amukutche Yesu.

²¹ Mbwenye aliwa kohokuwagave keraga: <<Kamukomeleni! Kamukomeleni vamuradini!>>

²² Evale Pilatu ohowonga fendo yaneraru, liye ira: <<Mulombwanola kodi unafwanyeyana mulandu nni? Miyo kannamuonana yabure yofwanela piwela. Nnoruma ira awaxuliwe, amala dimukutche.>>

²³ Aliwa mbwenye kohokalela ntindi kakuwagave molimbiha, kanvepaga Pilatu ira Yesu adowe akomeliwe. Evale kuwa wewa wohogondjiha yofuna ya Pilatu yaye.

²⁴ Mwa enne Pilatu ohorumelaga yovepa yewa.

²⁵ Liye mukutcha mulombwana wenne afungeliwe na mwasa owanawana na aRoma eto na mwasa ompa mutu. Evale Pilatu oharuma anyakondwaye ira kamuirena Yesu nnga mwafunele anamwindji.

Yesu ohokomeliwa vamuradini

²⁶ Evale anyakondo kamudowagana Yesu mundila, kohonfwanyaga mulombwana mmohi wa sidadi ya Sirene aitaniwa Simawu. Siku nenne liye akumaga olapela wene na sidadi. Evale anyakondo ale kohomuhindaga, aliwa mutukuliha muradi ira amuharegena Yesu.

²⁷ Evale kohokalawo atu oindjiva kamuhara. Muwari mwa atwale, mohokalaga ahiyana amohiwa katomonlege kuto kamunlelaga.

²⁸ Evale Yesu ohorungunuwaga aing'ana ahiyanale, liye awandela eraga: <<Ahiyana a Jeruzalemu kamudinlele miyo, mbwenye muvinlelege nyoka na ahiminyu!

²⁹ Tchoira anoza kafiye malambo oira atu kaze kawongege ira: <Orelihiwa ba ahiyana ohobala, nari ahiyana anne kali kahanabale, nari ahiyana anne kali kahanarome wamwiha!>

³⁰ Inoza ifiye tempu atu kawongege na mwango dilukulu kerege: <Mwango kanifinye!> Eto anoza kawongege na mwango ding'onong'ono keraga: <Mwango kanikunele!>

³¹ Kodi akala jatene ejo jinaireya na mutengo mutiti, nnga mutengo aumma jinaza jikale avi?>>

³² Eto anyakondwale kohatukulaga alombwana amohiwa ambinli abure ira kadowe kapiwe vamohi na Yesu.

³³ Kagafiyile nimburo neriwa Nigaragazu, kohomukomela Yesu vamohi na atu abure ale, mmohi ikukuru ya muwononi odjana, mmohiwa ikukuru ya muwononi oromana, Yesu afwanyeya vari.

³⁴ Evale Yesu ohowonga ira: <<Babani akurumuweleni atwala! Tchoira aliwa kiziwile inaira atu.>> Noira enne, kohoganaga jowara jaye muwari mosakanya jogu ya ngari.

³⁵ Anamwindji kafwanyeyaga evale kagali omiyalene kaing'anaga jatene. Mbwenye andimuwa a aJudewu kompetaga Yesu keraga: <<Uluwole gwenno aavulumutchetcha atu oindjiva. Akala gu Namatikeliwa wenno usakulriwe na Mulugu, avivulumutche mwinnya!>>

³⁶ Na anyakondo anne kompetaga Yesu, aliwa dowaga valigi liye kanvahaga vinyu ohokala pama nnga vinagere,

³⁷ keraga: <<Akala uli Mwene wa aJudewu, kavivune eto!>>

³⁸ Vazulu va muradi wa Yesu vale, kohokomelavo isi tabwa neno valrembile atu na iGerego, iRoma na iEberewu, ira: <<ULA GU MWENE WA AJUDEWU.>>

³⁹ Mutu wabure mmohi akomeliwege vamohi na Yesu ohoromaga muruwana Yesu eraga: <<Weyo kuli Namatikeliwa? Kavivune weyo na hiyo vamohi!>>

⁴⁰ Mbwenye nfwayele ohomuhiyihaga eraga: <<Kodi weyo kunamuova Mulugu, voira na hiyene nihitongiwa ira nikwe nnga liye?

⁴¹ Hiyo nihifwanela kwa na mwasa wa ubure wirilena hiyo. Mbwenye liye kairilena yengo yabure.>>

⁴² Evale liye ohowonga, liye ira: <<Yesu, mwadowa muUmweneni mwinyu mudiumbuwele miyo vano!>>

⁴³ Yesu ohomurumela, liye ira: <<Nnafuna duwandele ibaribari ira peno eva eni weyo unodowa wakale na miyo ilambo ya ibaribari zulu!>>

Kwa wa Yesu

^44-45 Iwandamelaga pandi ya 12 ora, nzuwa nohotimaga. Yohozavo isi ilukulu ilambo yatene fiyeda pandi ya 15 ora. Evale kurtina ilukulu yafwanyeya mmba mwa Nyumba ya Yehova yohokauwaga vari na vari.

⁴⁶ Yesu ohokuwaga molimbiha eraga: <<Babani nnovelela muzimu waga mmandani mwinyu!>> Awongaga eno ali vuma waye wogomiheda, noira enne ku mariheya wene.

⁴⁷ Noira enne, mundimuwa wenno aasogolrelra anyakondo afwaye, agaonne jaireyilege jile, ohomutamalelaga Mulugu eraga: <<Na ibaribari mulombwanola kaanna yotega.>>

⁴⁸ Atu atene kazenlege onela kafwanyeyaga evale, kagaonne jatene jaireyilege, kohowelagawo kagugudaga vamirimani viwa.

⁴⁹ Yesu afwaye atene na ahiyana kamuharile kuma ilambo ya Galileya, kohokalaga olapela wene kaing'anaga jatene jejile.

Koyiwa wa Yesu

^50-51 Ohokalawo mulombwana mmohi aitaniwa Joze. Liye ali wa sidadi ya Arimateya mwilamboni mwa Judeya eto ali mutu wapama owongowa. Liye aing'aneletcha za wa Umwene wa Mulugu eto ali namatonga mmohi afwanyeya muwari mwa anamatonga a aJudewu. Mbwenye muwari mokala vamohi na anamatonga a aJudewu ale, kaziveliwa jotonga na joira jaira andimuwa afwaye ale zela Yesu.

⁵² Evale liye ohodowa nvepa Pilatu maningo a Yesu.

⁵³ Pilatu agamurumelihile, ohodowa kumihavo maningo a Yesu vamuradini vale, liye bulruwalri na nguwo yosakanyiwa na usalru wapama, nomala liye dowa muhela masiye a nifukweni notimbiwa nibweni, wewo wali wahanarome koyiwa mutu.

⁵⁴ Jejo jaireyaga siku nosakanyeda jatene ja sabado, vagahanle vang'ono ira sabado arome.

⁵⁵ Ahiyana kamuharilege Yesu kuma Galileya, kohodowa vamohi na Joze eto kohoona masiye na nimburo neno vamuhenle atu Yesu.

⁵⁶ Nomala eno, kohowelagawo, aliwa sakanya maperefume na jonukela ira kadowe kahele maningo a Yesu. Nagafiyile siku na sabado, kohovuma nnga mwemo munawongela malamulo.