Lukaji 22 - Mazu Otchena a Mulungu

Judasi Iskariyoti ohomuguliha Yesu

¹ Ora yenno yahanle tempu ya vang'ono ira kadje Pwando ya Pawu Dohosakanyiwana Leverina, yenno yaitaniwa Pwando ya Mavirelo.

² Andimuwa a anamakuta na anamafundjiha malamulo kosakasaketcha makalelo oira kampe Yesu mozembiheya mwasiwa aliwa kaaovetcha anamwindji.

³ Evale Satana ohovolowa muwari mwa mulombwana Judasi wenno aitaniwa Iskariyoti, wenno ali muwari mwa anamamuhara kumi na ambinli a Yesu.

⁴ Evale Judasi ohodowa afwanya andimuwa a anamakuta na agwarda a Nyumba ya Yehova ira kapangane makalelo afuna liye avaheda Yesu mmandani mwiwa.

⁵ Aliwa kagavwile enne, kohagalalaga fiyeda muwandela ira: <<Wairana eno, hiyo nnouvaha kobiri.>>

⁶ Evale mulombwana Judasi ohorumela, nomala liye roma venda tempuwa yafuna liye nvelela Yesu mmandani mwiwa, anamwindji kahaonagawo.

Yesu na anamamuharaye kohodja Pwando ya Mavirelo

⁷ Nohofiya siku na Pwando ya Pawu Dohosakanyiwana Leverina, siku neno aJudewu kapa atu mabila ewa ira kadje Pwando ya Mavirelo.

⁸ Evale Yesu ohomuwandela Peduru na Juwawu, liye ira: <<Mudowe mwasakanyede jatene ira niwande dja Pwando ya Mavirelo.>>

⁹ Evale aliwa kohonfuka ira: <<Nyo munafuna nasakanyede uvi?>>

¹⁰ Evale Yesu ohawakula ira: <<Kavuruwanani. Mwavolowaga musidadi mo, munonfwanya mulombwana mmohi agatukunle muno wa mahindje. Mmuhare ante vande vanaya liye.

¹¹ Mwafiya muwonge na mwinnya wa vande vale, muire: <Namafundjiha gunirumile ira nufukeni ira: <<Sala ya alendo inafuna miyo na anamadiharaga nidje Pwando ya Mavirelo tchivi?>>>

¹² Mwawonga eno, liye unoutonyihedani sala ilukulu ya muzulu imanle sakanyediwa pama. Mwafiya nimburo neno, musakanye jodja jatene.>>

¹³ Evale anamamuharaye ambinli ale kohodowa musidadi mule. Kagadowile, kohofwanya jatene nnga mwemo mwawongele liye. Nomala eno, kohosakanyeda jatene ira kadje Pwando ya Mavirelo.

¹⁴ Oriwa yagafiyile, Yesu ohodowa vameza vamohi na anamarumiwaye.

¹⁵ Evale ohawandelaga, liye ira: <<Miyo diromile wanle kana yofuna ilukulu ira didje Pwando ya Mavirelo ila vamohi na nyo, tempu yaga ya goyi yahanafiye.

¹⁶ Tchoira miyo nnouwandelani ira kadiza didja pwando ila akoka fiyeda didje Pwando ya Mavirelo ya ibaribari muUmweneni mwa Mulugu.>>

¹⁷ Agairile enne ohotukulaga kopo ya vinyu, liye mutamalelana Mulugu, nomala, liye ira: <<Watchelani, mugane mwatene mukalele nyo.

¹⁸ Miyo nnouwandelani ira kadiza ding'wa akoka vinyu wa uva ula fiyeda Umwene wa Mulugu uze.>>

¹⁹ Noira eno, ohotukulaga pawu, liye mutamalelana Mulugu. Nomala ohomeya pawu ile, liye avaha anamamuharaye, liye awandela eraga: <<Ala ba maningwaga kavahiwe ira nyo mukale pama. Muiregena eni modiumbuwela miyo.>>

²⁰ Kagamanle dja, ohoirana yengo imohive, liye tukula kopo, avaha aawandelaga eraga: <<Kopo ila tchi kopo ya sangiri naga, neno nnatatiya para nyo muwari mokunga Yopangana Ixa.

²¹ Mbwenye ing'anani mutu wenno unafuna diguliha uli vameza veva vamohi na miyo!

²² Tchoira na ibaribari Mwana wa Mutu unafuna akwe na makalelo nnga mubalrele Mulugu. Mbwenye udilu wa mutu wenno unamuguliha.>>

²³ Evale Yesu anamamuharaye kohoromaga fukana mmohi na nfwaye keraga: <<Kodi unafuna muguliha bani?>>

Yesu ohowonga zela kala mundimuwa

²⁴ Anamamuhara Yesu kohokagana kangana ulukulu mwakalelege atu ira: <<Kodi muwari mwa hiyo, mundimuwa oakwaranya afwaye bani?>>

²⁵ Evale Yesu agavwile enne, ohawandelaga, liye ira: <<Amwene a atu a unde anaaruma atu ewa movitukulela. Eto anaitaniwa: <Atu oirana japama.>

²⁶ Mbwenye nyo kamukale eno. Zela nyo, wenno unafuna kala mundimuwa, akale nnga mung'onong'ono eto mutu wenno unatonga akalege nnga namalaba wa afwaye.

²⁷ Kodi mundimuwa gwenno uli vameza adjaga, owu gu mutu wenne unamulaba? Na ibaribari mundimuwa gwenno uli vameza. Mbwenye miyo vari va nyo dili nnga namalaba wenyu.

²⁸ <<Nyo mwali na miyo muwari mwa makatamiho matene daona miyo.

²⁹ Na mwasa wenno voira babaga udivaha umwene ira ditonge, na miyene nnouvahani umwene ira

³⁰ muwande dja no ng'wa vameza vaga muUmweneni mwaga eto mugarati mipando da umwene ira mutonge malogo kumi na menli a Izarayeli.>>

Yesu ohomuwandela Peduru ira: <>

³¹ Yesu ohowongagave eraga: <<Simawu, Simawu, kavuruwana! Satana uhuvepa ira auveteni nyo mwatene nnga tirigu.

³² Mbwenye miyo duhulobelela weyo Simawu ira nroromelo nawo nahautawe. Eto watwaruwa, waalimbihe abalawo.>>

³³ Peduru mbwenye ohowongaga na Yesu, liye ira: <<Nabwiya miyo dili okozeyene ira difungeliwe mukadeya na nyo eto ira dikwe vamohi na nyo!>>

³⁴ Evale Yesu ohomuwandelaga ira: <<Peduru miyo nnouwandela ira peno mutumbi oroma ahananle weyo unodiruna fendo taru.>>

³⁵ Nomala Yesu ohafuka anamamuharaye ira: <<Kodi vaurumileni miyo muulrendoni mwinyu diira: <Kamutukule sartera nne pasta nne sapato>, yohokalawo yengo yauhalenleni?>> Evale kohowakulaga, aliwa ira: <<Kilivo yanihalenle.>>

³⁶ Evale Yesu ohowonga, liye ira: <<Mbwenye peno va unna sartera na pasta ya muulrendoni atukule eto ule ahanna supada, agulihe kapaye, agulena supada.

³⁷ Miyo na ibaribari nnouwandelani ira inofuneya ira jikwakwanele jejo jilrembiwe zela miyo mMazuni ira: <Liye unoza aireliwe makalelo abure nnga mutu oirana ubure.> Na ibaribari jatene jilrembiwe zela miyo, jinokwakwanela.>>

³⁸ Evale anamamuharaye kohowonga, aliwa ira: <<Kaing'anani Nabwiya, masupada menli ala!>> Evale liye ohowakulaga, liye ira: <<Kohokwakwana anno.>>

Yesu oholobela Mwango wa Mitengo da Azeti

³⁹ Nnga molemelela, Yesu ohovenya, liye dowa Mwango wa Mitengo da Azeti eto anamamuharaye komuhara.

⁴⁰ Aliwa kagafiyile nimburo nenne, Yesu ohawandelaga eraga: <<Mulobele ira mwahaxixiwe.>>

⁴¹ Evale liye ohosusagavo, liye dowa vokala nnga ha vale nnga vinagomela nibwe mutu avoka. Evale ohokokoraga liye roma lobela

⁴² eraga: <<Babani, mwafuna, mudikumihelemo kopo da goyi dinna miyo! Mbwenye kiireye nnga inafuna miyo, iireye nnga munafunela nyo.>>

⁴³ Evale mungelro wa zulu ohotitaga liye mulimbihaga.

⁴⁴ Yesu mbwenye agalive mugoyini, oholobelaga na kopolo. Muwari molobela mule ohoromaga kuma kalruma. Kalruma nakumaga, nakalaga nnga matoto malukulu a sangiri kamorelaga vati.

⁴⁵ Evale liye agamanle lobela, awelelaga nimburo valigi anamamuharaye vale, aafwannyege atene kagonaga, mwasiwa kumbanya wewa wohotabwaga.

⁴⁶ Yesu ohawandelaga eraga: <<Kodi nyo munagonela nni? Kavenyani mulobele ira mwahaxixiwe.>>

Hindiwa wa Yesu

⁴⁷ Yesu awongagave enne tchi tempu yafiyaga atu oindjivene. Aasogolrelra anamwindjale ali mulombwana Judasi wenno ali muwari mwa anamamuharaye kumi na ambinli. Mwa enne kagafiyile, mulombwana Judasi ohomuwandamelaga Yesu ira ambejari.

⁴⁸ Yesu mbwenye ohowonga, liye ira: <<Judasi, kodi weyo unamuguliha Mwana wa Mutu muwari monvaha beju?>>

⁴⁹ Anamamuharaye anno kaligi vamohi na liye kagaonne jatene jafuna ireya jile, kohowonga, aliwa ira: <<Nabwiya, nyo munofuna ira naaporotche atwala na masupadihu ala?>>

⁵⁰ Kagairile enne namamuhara mmohi ohokumihaga supada naye, funaga ira ankakatena namalaba mmohi wa mundimuwa wa anamakuta. Mbwenye supada niwa nagwadilege nibaru na ikukuru ya muwononi odjana.

⁵¹ Yesu mbwenye ohahiyiha, liye ira: <<Kahiyani jejo jinera nyo jo!>> Evale ohindaga nibaru na namalabole, liye welihedawo.

⁵² Kagairile enne, Yesu ohowonga na andimuwa a anamakuta na agwarda a Nyumba ya Yehova na andimuwa a aJudewu kazilege evale ira kamuhinde, liye afuka eraga: <<Nyo mwazaga na masupada na golromondo dinyu ira mudihinde miyo, kodi nyo munadiona nnga dili mbava?

⁵³ Miyo dakaletcha na nyo malambo oindjiva Nyumba ya Yehova, mbwenye nyo kamwafunile dihinda na mandinyu. Mbwenye ora yenna tchenyu eto tchi ora ya kopolo da isi.>>

Peduru ohomukonda Yesu

⁵⁴ Evale aliwa kohomuhinda Yesu, aliwa mudowagana vande va mundimuwa wa anamakuta. Tempu yenne Peduru oaharaga olapela wene.

⁵⁵ Evale kohotumbanyaga munlo vatando va mundimuwa wa anamakuta vale, aliwa otaga. Na Peduru wenne ohodowaga garati na atu kafwanyeyaga vamunloni vale.

⁵⁶ Mwa enne ohokalawo namwali mmohi alaba evale amuonnege Peduru agagaratile wandamelana vamunloni vale. Liye roma muing'ana pama, nomala liye wonga ira: <<Mulombwanola na liyene ali vamohi na Yesu!>>

⁵⁷ Peduru mbwenye agavwile enne, ohorunaga, liye ira: <<We muhiyana we, miyo nne kadimuiziwile mulombwana wenno!>>

⁵⁸ Vagamanle tempu ya vang'ono, mulombwana mmohi afwanyeyaga evale ohomuonaga mulombwana Peduru, evale ohomuwongana, liye ira: <<Weyo uli mmohi wa nikuru na Yesu!>> Evale mulombwana Peduru ohomuwakulaga, liye ira: <<Nari moya, miyo kadili vamohi na liye!>>

⁵⁹ Peduru agawongile enne vagamanle ora imohi, mutu mmohiwa ohorumelaga awongaga eraga: <<Na ibaribari mutula ali vamohi na liye mwasiwa na liyene gu nkuda Galileya.>>

⁶⁰ Peduru mbwenye ohowakulaga eraga: <<We moya, jinawonga we jo, miyo kadiiziwile.>> Evale Peduru awongaga enne, tempu imohive mutumbi ohonlaga.

⁶¹ Evale Nabwiya ohorungunuwaga, liye muing'ana Peduru. Noira enne Peduru ohoumbuwelaga mazu amuwandenle Nabwiya oira: <<Peno mutumbi oroma ahananle, weyo unodiruna fendo taru.>>

⁶² Mwa enne Peduru ohokumaga evale anlaga no kumbanya ulukulu.

Yesu agali nimburo notonga na aJudewu

⁶³ Evale alombwana kamuing'anela Yesu kohoroma mukoma eto aliwa mpetaga.

⁶⁴ Aliwa eto kohonkunelaga wintoni, aliwa roma nkoma keraga: <<Kamurohe uvandile!>>

⁶⁵ Evale aliwa kohowongaga jengo jidjindji kamululuvihaga.

⁶⁶ Unde wagatchile, andimuwa a aJudewu, andimuwa a anamakuta na anamafundjiha malamulo kohogumanelaga vamohi. Noira eno, kohomuzagana Yesu vamentoni vewa ira kamutonge. Evale kohonfukaga, aliwa ira:

⁶⁷ <<Kaniwandele, kodi weyo uli Namatikeliwa?>> Evale liye ohowakula, liye ira: <<Miyo masiki duwandeleni, nyo kamunaroromela.

⁶⁸ Eto diira dufukeni yengo, kamunawakula.

⁶⁹ Mbwenye kuma tchineneva dowaga sogolro Mwana wa Mutu unogarati na utongi ikukuru ya muwononi odjana wa Mulugu wa Kopolo Datene.>>

⁷⁰ Agawongile enne atu atene kohonfuka, aliwa ira: <<Mwa eno, weyo uli Mwana Mulugu?>> Evale Yesu ohawakula, liye ira: <<Nyo gunawonga eni ira miyo dili Mwana Mulugu.>>

⁷¹ Evale aliwa kohoiraga: <<Nnga mwasiwa gwa nni nnafunege hiyo umboni umohiwa? Umboni umala oneya. Mwasiwa hiyo annya nihimala vwa jiwongile liye na wanoni waye.>>