Lukaji 21 - Mazu Otchena a Mulungu

Yovelela ya makwele mmohi wa muhiyana

¹ Yesu ohaonaga atu orayela kahelaga jovaha jiwa mukaxani mwa jovelela.

² Ohomuonaga eto makwele mmohi wa muhiyana osimela avelelaga kobiri mbinli da momba, da valori ing'ining'inive.

³ Evale liye ohowonga, liye ira: <<Na ibaribari nnouwandelani ira muhiyanola, wenna uli makwele osimela, uhuvelela kobiri ilukulu akwaranya atenene kavelenle.

⁴ Mwasiwa atu amohiwa kavelenle muwari mokana jimohi jiwa vande viwa. Mbwenye muhiyanola muwari mosimela mwaye uvelenle kobiri yatene yanna liye, yenno yafuna mukalihawo ingumi yaye.>>

Yesu ohowonga zela jionihedo ja malambo ogomiheda

⁵ Atu amohiwa kohoromaga wonga keraga: <<Nyumba ya Yehova ila ihiriya pama na mwasa wa mabwe oriya na jovelela joriya karihedilena atu!>> Evale Yesu ohowongaga, liye ira:

⁶ <<Anoza kafiye malambo ira jatene jinaona nyo ji jibwanyuliwevo. Kavali nibwe nnafuna za kala vazulu va nibwe nfwaye.>>

⁷ Evale aliwa kohofukaga, aliwa ira: <<Namafundjiha, kaniwandeleni siku nnafuna za ireya jatene ejo. Kodi ionihedo tchivi inafuna za jejo jafunaga ireya?>>

⁸ Yesu ohawandelaga eraga: <<Polre polre tawiha ira munaze munyengiwe. Mwasiwa atu adjindji anerege za kavikalihege nnga miyo, kawongege kerege: <Miyo dili Kiristu>, nari kawongege ira: <Tempuwa ihiwandamela.> Mbwenye nyo mwaaona atu anno, kamwahare.

⁹ Nyo kamuove mwavwa atu kawongaga zela ja kondo nari jowanawana jimohi jiwa. Tchoira inafwanela ira jengo jejo jiireye miyo dahanaze. Mbwenye jaireyaga ejo kahi ira magomelo kohowandamela, nari.>>

¹⁰ Yesu ohowongagave eraga: <<Nlogo nimohi nnoza nivenye ira niwanege na nlogo nimohi niwa. Eto umwene umohi unoza uvenye uwanege na umwene umohiwa.

¹¹ Mamburo madjindji munoza mukale vindarandara johokala ja masika, na ndala, na marenda owopiha. Jinoza jiireyege jengo jokatamiha eto zulu unoza ukumelege jionihedo jidjindji.

¹² Mbwenye jatene eji jahanaireye, na mwasa wa nzina naga nyo munoza muhindiwe, muireliwe makalelo abure, muveleliwe ira mwatongiwe munyumbani dofundjamo mazu. Eto munoza mutatileliwe mukadeya eto munoza mutukuliwe mudowiwena mmandani mwa amwene na mmandani mwa agovernadore ira mwatongiwe.

¹³ Jatene eji jinafuna uireyelani jinalaba ira muwande dihidedela umboni.

¹⁴ Kauhindagani mulimbe murima ira mwahakukumuwe zela yenno inafuna nyo wakula mwatongiwaga.

¹⁵ Mwasiwa miyo nnoza duvaheni mazu no onelramo wewo amwidaninyu kahanawande atu runiha nne konda.

¹⁶ <<Ababinyu, adibilinyu, na abali amohiwa anna nyo na afwinyu, anoza kauveleleni ira muhindiwe. Eto muwari mwa nyo, amohiwa anofiyeda piwa.

¹⁷ Atu atene anerege uidani nyo na mwasa wa nzina naga.

¹⁸ Mbwenye mwa jatene jinafuna nyo ona, nne nsisi ninyu nimohi kaniza nidimela.

¹⁹ Eto nyo mwakalave ovilela muwari mwa eji, munoza mukayena ingumi.

²⁰ <<Nyo mwaza muona sidadi ya Jeruzalemu yagarindjiwe na makuru a anyakondo, muiziwe ira ora inafuna sidadiyo ibwanyuliwe ihifiya.

²¹ Mbwenye sidadiyo yagarindjiwe, atu anne anakale Judeya, inafwanela katawelege mmwangoni. Mutu wenno unafwanyeye musidadi, atawe mobaranya. Eto mutu wenno unafwanyeye unde wa sidadi, kawelele musidadi mwakoka mwene.

²² Mwasiwa malambo anno anaza kakale malambo oweliha kunyakunya ira jikwakwanele jatene jilrembiwe mMazuni.

²³ Udilu zela ahiyana okana vambani na ahiyana okana ahima ang'onong'ono owamwa matempu anno! Mwasiwa unoza ukale goyi ilukulu mwilamboni ya vati na uwali wa Mulugu zela nlogo neni.

²⁴ Atu adjindji anoza kapiwege na masupada eto amohiwa anoza kahindiwe, katukuleliwege vilambo datene dene. Eto atu a unde anoza kamunyingalelege Jeruzalemu fiyeda tempu yewa imale.

²⁵ <<Unoza ukale jionihedo nzuwani, mwedini na nyenyedini. Eto mwilamboni ya vati munoza mukale goyi, na makatamiho zela atu a malogo matene, anerege kala okukumuwene na mwasa okukuma wa mahindje a bara na mahindje omanganyeya.

²⁶ Atu oindjiva anoza kahileyege na mwasa oova kaumbuwelaga zela jejo jinafuna ireya mwilamboni ya vati. Tchoira kopolo datene da zulu nnoza ditikinyeyege.

²⁷ Mwa enne anoza kamuone Mwana wa Mutu azelaga mmiramboni na kopolo na undimuwa wohokala wa masika.

²⁸ Jengo jeji jaza jiroma ireya, nyo mukale olimba mirima eto muvenyihe kove dinyu mwasiwa vulusiwa wenyu uhuwandamela.>>

²⁹ Nowonga enne Yesu ohawandelaga yofwalrafwaniha imohi, liye ira: <<Kaing'anani mutengo wa mufigera owu nari mutengo uli watene.

³⁰ Nyo mwaona matakuruwale karoma puwa, munovayela iziwa ira tempu ya muzongwe ihiwandamela.

³¹ Sawasawa mwaona jeji jiireyaga inafwanela muiziwe ira Umwene wa Mulugu uhuwandamela.

³² Na ibaribari nnouwandelani ira jatene eji jinokwakwanela atu okalawo malambo anne kahanamale kwa.

³³ Zulu na ilambo ya vati jinoza jivire, mbwenye mazwaga kiza kamala.

³⁴ <<Inafwanela muving'anege pama nyokave zela jinaira nyo. Tawiha ira mmirimani mwinyu munazale jofuna ira mudjege bure, nari jong'wa, nari makatamiho a ingumi ninna hiyo. Tawiha ira siku neno nnaze nuzeleni morurumutcha nnga mutu amangaga ratuwero.

³⁵ Tchoira siku niwa nazaga nnaazela atu atene anafwanyeya mwilamboni ya vati.

³⁶ Mwa eno, inafwanela muing'anelege tempu datene, mulobelegeve ira mukayena kopolo dotawa jatene jinafuna ireya eto muwande imela vamentoni va Mwana wa Mutu aza azaga.>>

³⁷ Mwa malambo anne Yesu ofundjiha vatando va Nyumba ya Yehova na ntana. Mbwenye nzuwa naviraga, odowetcha mwango unaitaniwa Mitengo da Azeti.

³⁸ Eto na mabebehene, mwindji wa atu kodowetcha Nyumba ya Yehova ira kavuruwane jofundjiha jaye.