Lukaji 2 - Mazu Otchena a Mulungu

Baliwa wa Yesu

¹ Tempu yali Sezare Agustu mwene wa aRoma atene, liye ohokumiha nlamulo ira atu a mwilamboni mwaye mwatene kalrembelriwe ira aiziwe indjiva wa atu atene.

² Lrembelra wewo wali woroma kuma mulombwana Kwiriniyo varomile liye kala governadore wa ilambo ya Siriya.

³ Evale kada mutu odowa tatamo ya waniwa ira alrembelriwe wewo.

⁴ Voira kada mutu alrembelriwa wewo wafwanyeya nlogo naye, mulombwana Joze ohovenyaga Nazareti, porovinsiya ya Galileya, adowaga sidadi ya Davi yaitaniwa Beleme, yafwanyeya muwari mwa porovinsiya ya Judeya. Joze adowile lrembelriwa wewule mwasiwa liye abaliwe muwari mwa nlogo na mwene Davi.

⁵ Joze adowaga wewule ira alrembelriwe, ohomutukula mwendaye Mariya wenno ambanyenlre liye. Eto fwanyeya ira Mariya tempu yenno afwanyeya aganna vambani.

^6-7 Aliwa kagafiyile Beleme ule, yohokwakwana tempu yoira Mariya ambale mwana. Evale kohovenda nyumba yofiyedamo eto tchafwannye. Mwa enne kohovolowa munikolrani mwakala anavinyama a vande. Noira eno, Mariya ohombala mwanaye oroma wa mwanapongwe. Aliwa mbulruwalri mwanole na nguwo, dowa mugonantiha muningulani mwemo mwadjela anavinyama.

Anamakumbuza kohowandeliwa zela baliwa wa Yesu

⁸ Fwanyeya ira mutatamoni mmohive emule, mahiyu anne kohokalawo anamakumbuza kafwanyeya mukokolani kaing'anelaga mabila emule.

⁹ Morurumutcha mungelro mmohi wa Nabwiya ohatwanyuwela eto moneya ulukulu wa Nabwiya woharungunuwaga anamakumbuza atene anne. Evale aliwa kohokana ova wohokala wa masika.

¹⁰ Mbwenye mungelro wa Nabwiya ohawandela eraga: <<Nyo kamuove! Kaing'anani, tchoira miyo dazela uwandelani Muselu Wapama unafuna zana hagalala ulukulu. Muselu dizilena miyo uwandelani uli para atu atene a ilambo ya vati.

¹¹ Museluwa gu ula: Peno eva eni musidadi ya Davi muhubaliwa Nvulusi, liye gu Namatikeliwa, gu Nabwiya.

¹² Ionihedo inafuna miyo uvahani tchi ila: Mwadowa mwanfwanya mwana agamanle bulruwalriwa na nguwo eto agagonantihiwe muningulani mwemo munadjela anavinyama, mwaniwa gwenno.>>

¹³ Evale mungelrole agawongile enne, kohozaga angelro amohiwa oindjiva, aliwa za gumanela na mungelro nfwiwole, kamutamalelaga Mulugu keraga:

¹⁴ <<Mulugu Okwaranya Jatene atitimihiwe eto murendele akale vati vano muwari mwa atu anno anaaziveliwa liye.>>

¹⁵ Mwa enne angelro ale kagadowile, anamakumbuzale vahanle atu kohowongaga, aliwa ira: <<Ndoweni sidadi ya Beleme ira naone jejo Nabwiya aniiziwihile liye hiyo muwari mwa angelro ale.>>

¹⁶ Evale aliwa kohovenyihanaga mobaranya kadowaga sidadi ya Beleme. Kagafiyile wewule, kohonfwanya Mariya na Joze wewule wali nyumba ya anavinyama. Eto kohomuona mwanole agagonantihiwe muningulani mwemo mwadjela anavinyama.

¹⁷ Nomala eno, kohoromaga awandelamo atu kali evale zela jatene jawongile angelro ale zela mwanole.

¹⁸ Atu atene kavwile jawongile anamakumbuza ale kohotikiniheyaga.

¹⁹ Mariya mbwenye agahanle, kawandile diwala jengo jatene jaireyile. Vagarati liye oumbuweletcha mmirimani mwaye.

²⁰ Noira enne, anamakumbuzale kohowelelaga kokolani wakoka wene, kamutamalelaga Mulugu na mwasa wa jengo javwile atu na jaonne atu. Tchoira kohofwanya jatene nnga mwemo mwawongele mungelrole.

Ineliwa wa Yesu

²¹ Kagakwakwanne malambo matanu na mararu oira mwanole aineliwe, kohomuinelaga, aliwa nvaha nzina na Yesu. Nzina na Yesu ali neno naromonle mungelro, Mariya ahanakayena ingulu ya mwanole.

²² Eto kagakwakwanne malambo ovisasanyeda nnga mwemo malamulo a Mozeji munawongela atu, aliwa kohomutukulaga mwanole kamudowagana Jeruzalemu ira kanvelele vamentoni va Nabwiya.

²³ Aliwa kairana mokwakwanela na jejo jilrembiwe mmalamuloni mwa Nabwiya ira: <<Mwana uli watene wenno uli murandji baliwa, akala mwanapongwe, inafwanela avahediwe wa Nabwiya.>>

²⁴ Eto kadowa velela mukuto mokwakwaneliheda nlamulo na Nabwiya ira: Kaveleliwe maziya menli owu hehi ana kangayiwa ambinli.

²⁵ MuJeruzalemu mule mohokala mulombwana mmohi aitaniwa Simeyawu. Liye ali mutu wapama, omuriheda Mulugu eto odediheda ona womboliwa wa aIzarayeli. Eto liye ali mutu owenda na Munemba Otchena.

²⁶ Muwari mwa Munemba Otchena emule ohowandeliwa ira: <<Weyo kunafiyeda kwa wahanamuone Namatikeliwa wa Nabwiya.>>

^27-28 Mulombwana Simeyawu agawandeliwe enne muwari mosogolrelriwa na Munemba Otchena, ohovolowaga Nyumba ya Yehova. Tempu yavolowaga Mariya na Joze kamuzagana mwanole ira kakwakwanelihede nnga mwemo mwawongela malamulo, fwanyeya eto mulombwana Simeyawu ohodowaga liye mutukula mwanole Yesu mmandani mwaye, liye roma mutamalela Mulugu eraga:

²⁹ <<Nabwiya peno mbwenye muhukwakwaneliheda yenno yawongile nyo malambo a mundulrimu. Va mbwenye miyo podi kwa mwa murendele.

³⁰ Mwasiwa miyo peno dihimala ona na meswaga vulusa wenyu,

³¹ wewo musakanyile nyo para atu atene

³² ira akale wareya wa atu atene ohokala aJudewu ira kaiziwe ndila yenyu eto ira atwinyu aIzarayeli kateteliwe.>>

³³ Joze na Mariya kagavwile jengo jawongilege mulombwana Simeyawu zela mwanole, kohokalaga otikiniheyene.

³⁴ Nomala enne, Simeyawu oharelihaga, amuwandelaga Mariya mmaye Yesu eraga: <<Kaing'ana, mwanola gusakulriwe na Mulugu ira akale mutu oagudjula atu adjindji a aIzarayeli no avenyiha atu adjindji a aIzarayeli. Liye gunafuna kala ionihedo ya Mulugu. Atu adjindji anerege wonga jabure zela liye.

³⁵ Eto jengo jatene jinaumbuwelege aIzarayeli mokoyeya jinoza jiiziweye. Mbwenye zela weyo Mariya, mwa mwanola ikala yengo inafuna za ireya, yukumbanyihe nnga supada noxongowa nnaulata mmirimani mwawo.>>

³⁶ Wewule eto wohokala namafiyiheda mmohi wa muhiyana aitaniwa Ana, liye ali makwele. Ana babaye ali Fanuweli wa ziza na Azeri. Liye eto ohomala ulula. Muhiyanole agateliwile, agaromile muiziwa mulombwana, vamanle yaka tanu na mbinli, noira eno mamunaye ohokwa.

³⁷ Tempu yakwile mamunaye liye okalave makwele fiyeda siku nenne. Ana tempu yenne afwanyeya aganna yaka 84. Liye akaletchave vatando va Nyumba ya Yehova ntana na mahiyu amutamalelaga Mulugu, ajejuwarigi, alobelaga.

³⁸ Evale tempu mulombwana Simeyawu yamutamalela liye Mulugu zela mwanole, na Ana wenne ohozaga amutamalelaga Mulugu, awongaga jengo jidjindji zela mwanole. Ana eto oawandeletcha zela mwanole atu oindjiva kadedihetcha womboliwa wa Jeruzalemu.

Ulukula wa Yesu

³⁹ Joze na Mariya kagamanle kwakwaneliheda nnga mwawongela malamulo a Nabwiya, kohowelelaga waniwa wakoka wene, ilambo ya Galileya sidadi ya Nazareti.

⁴⁰ Yesu oulukula, agali olimbene maningo, zelru daye dodowagave sogolro. Eto Mulugu omusogolrelra na sayi daye.

Yesu agali Nyumba ya Yehova

⁴¹ Va kada yaka, Yesu ababaye kodowetcha Jeruzalemu ira kadje Pwando ya Mavirelo.

⁴² Yesu aganna yaka kumi na mbinli, aliwa kohodowa Jeruzalemu pwandoni nnga veretcha atu molemelela.

⁴³ Kagafiyile wewule, pwando yagamanle djiwa, kagabalaleyile, ababaye kohovenyihana, aliwa welagawo. Mbwenye Yesu kawenlewo, ohalaga Jeruzalemu wewule, ababaye kahaiziwaga.

⁴⁴ Aliwa kesaga: <<Nili vamohi, liye uli na afwaye a muulrendoni.>> Kagawendile siku nimohi, kohoroma musaka mwaniwa muwari mwa abali ewa na muwari mwa afwiwa.

⁴⁵ Mbwenye kalivo amuonne. Vevale aliwa kohowelaga, aliwa dowa wakoka wene wali atu Jeruzalemu, roma nvenda.

⁴⁶ Kagamanle malambo mararu, kohonfwanyaga mwanole agali Nyumba ya Yehova agagaratile vari va anamafundjiha malamulo aavuruwanaga eto aafukaga.

⁴⁷ Atene anne kanvuruwanaga kotikiniheya vadjindji mwasiwa Yesu awakulaga na makalelo apama no onelramo wapama.

⁴⁸ Ababaye ale kaganfwannye mwanole, na aliwene kokalaga otikiniheyene. Mmaye ule kwi: <<Mwanaga, wirele nni jeji? Kaing'ana, miyo vano na babawo nohosimela nusakaga.>>

⁴⁹ Evale liye ohawakula eraga: <<Nyo mwadivendela nni? Nyo kamuiziwile ira ili pama dikalege nyumba ya babaga?>>

⁵⁰ Ababaye ale kagavwile mazu anne, tchawandile onelramo.

⁵¹ Vevale Yesu ohomaruwaga vamohi na ababaye kawelelaga Nazareti. Eto liye oavwelela ababaye. Mbwenye mmaye ohokoya jatene ejile mmirimani mwaye.

⁵² Yesu ohoulukula. Zelru daye doulukulave. Liye oziveliwiwa na Mulugu eto oziveliwiwa na atu.