Lukaji 18 - Mazu Otchena a Mulungu

Yofwalrafwaniha ya makwele mmohi wa muhiyana okana ntindi

¹ Yesu ohowongaga yofwalrafwaniha imohi aaonelrihagamo anamamuharaye ira aliwa kakale atu ohogomana lobela eto ira aliwa kahakukumuwege.

² Liye ohowongaga eraga: <<Muwari mwa sidadi imohi ohokalamo namatonga mmohi. Namatongole kamuova Mulugu nne liye kambalra mutu uli watene.

³ Eto musidadi mule mohokala muhiyana mmohi ali makwele. Muhiyanole odowetcha wa namatonga ule ira atongiwe, eraga: <Muditongele mwa ibaribari mulandu dinna miyo na mwidanaga.>

⁴ Mwa enne vohomala tempu ilukulu namatonga ule ahafunaga tonga milandu da muhiyanole. Mbwenye liye oumbuwela ira: <Na ibaribari miyo kannamuova Mulugu nne kannambalra mutu.

⁵ Mbwenye voira muhiyanola unodisimeliha, nnomutongela mwa ibaribari ira ahadisimelihe akoka.> >>

⁶ Nabwiya ohowongagave eraga: <<Muvuruwane pama yawongile namatonga wabure ule.

⁷ Akala namatonga wabure ule ohowanda mutongela mwa ibaribari muhiyanole milandu daye, kodi Mulugu kanaatongela milandu atwaye osakulriwa anno anamuitana ntana na mahiyu? Unoakamiheda mohodibeliwa.

⁸ Miyo nnouwandelani ira Mulugu unoza aatongele mulandu wewa mwa ibaribari mobaranya. Mwa eno, kodi Mwana wa Mutu aza azaga, unoza afwanye nroromelo mwilamboni?>>

Yofwalrafwaniha ya muFarizewu na namasokiha misoko

⁹ Kohokalawo atu kavinyindela, kaumbuwelaga ira: <<Hiyo nili apamene.>> Aliwa eto koalramwisa afwiwa. Evale Yesu ohawandela atu anne yofwalrafwaniha ila, liye ira:

¹⁰ <<Wohokalaga alombwana ambinli kavenyilege, aliwa dowa Nyumba ya Yehova ira kalobele. Mutu mmohi ali muFarizewu. Mmohiwa ali namasokiha misoko.

¹¹ Aliwa kagadowile lobela, muFarizewu ule ohoimelaga vaye vene, alobelaga eraga: <Mulugu miyo nnoutamalelani mwasiwa miyo kadili nnga atu amohiwa. Miyo kadili nnga anno anaadjelra afwiwa na anno anaairela afwiwa ubure na aliba raruwa, nne miyo kadili nnga namasokiha misoko uli vale.

¹² Miyo nnojejuwari va sumana fendo mbinli eto nnovelela yanekumi ya jatene jinakana miyo.>

¹³ Mbwenye namasokiha misoko ule ohoimelaga olapela wene, nne meswaye kaing'anihile zulu. Liye ohogugudaga vamirimani vaye alobelaga eraga: <Mulugu, mudiwendele tangaranga miyo vano mutu otega.> >>

¹⁴ Yesu ohomarihaga eraga: <<Miyo na ibaribari nnouwandelani ira mwa alombwana ambinli ale kadowaga vande, adowile agali wapamene vamentoni va Mulugu ali namasokiha misoko, hiya nfwayele. Mwasiwa ule unavitukulela, unoyevihiwa. Eto ule unaviyeviha, unotukuleliwa.>>

Yesu na ahima

¹⁵ Wohokalaga atu kaatukunle ahima a mmandani, aliwa adowagana valigi Yesu ira aahelege ndanda, aarelihe. Anamamuharaye kagaonne makalelo anne, kohoroma asumululaga aliba azana ahimale.

¹⁶ Mbwenye Yesu ohaitanelaga ahima vali liye vale eraga: <<Kamwakondihe ahima za vali miyo. Ahiyeni ahima kaze mwasiwa Umwene wa Mulugu, annya ba atu okala nnga ha ahima anna.

¹⁷ Na ibaribari nnouwandelani ira mutu wenno ahanawatchele Umwene wa Mulugu mokala nnga mwana, liye kaza avolowa muUmweneni.>>

Istoriya ya mutu mmohi orayela

¹⁸ Evale mundimuwa mmohi ohofukaga, liye ira: <<Namafundjiha wapama, ira miyo dikayena ingumi yohomala, dire avi?>>

¹⁹ Yesu mbwenye ohowakula, liye ira: <<Kodi unadiirela nni wapama? Kalivo uli wapama ahali Mulugu bahi.>>

²⁰ Evale Yesu ohomuwandelaga ira: <<We umala iziwa jinawonga malamulo ira kuraruwe, kumpe mutu, kube, kumunukede mutu, umurihedege babawo na mmawo.>>

²¹ Mundimuwole ohorumelaga, liye ira: <<Miyo jatene ejo nnoirana romela uzombweni waga.>>

²² Yesu agavwile enne, ohoira: <<Ihala yengo imohi ira uirena. Udowe wagulihe jatene jinna we, utukule kobiriwa waagawele aliba simela. Waira eno, unokana rayela wawo ilambo ya zulu. Wamala irana jatene jejo, uze udihare.>>

²³ Mundimuwole agavwile enne, ohokumbanyaga valukulu, tchoira liye ali mutu orayela bure.

²⁴ Yesu agaonne kumbanya wa mutule, ohowongaga eraga: <<Ili yorutcha ira mutu orayela avolowe muUmweneni mwa Mulugu.

²⁵ Ira kamelo axolre mopovowa mwa singano no ira mutu orayela avolowe muUmweneni mwa Mulugu, inarutcha tchoira mutu orayela avolowe muUmweneni mwa Mulugu.>>

²⁶ Atu atene kavwilege mazwale kohofukaga keraga: <<Nnga era eno, unafuna vulusiwa bani?>>

²⁷ Yesu ohowakula, liye ira: <<Jengo jejo jahanawandeya na atu, na Mulugu jinowandeya.>>

²⁸ Evale Peduru ohowongaga, liye ira: <<Kaing'anani! Hiyo nihiya jatene, hiyo uharagani nyo.>>

²⁹ Yesu ohowakula eraga: <<Nnafuna duwandeleni ibaribari ira mutu wenno unahiya nyumbaye, muhiyanaye, abalaye, arongoliye, ababaye nari anaye na mwasa wa Umwene wa Mulugu,

³⁰ liye unotambilra jengo jidjindji mwilamboni emuno kwaranya janna liye. Eto vasogolro unotambilra ingumi yohomala.>>

Yesu ohowonga akoka zela kwa no venyihiwa waye

³¹ Yesu ohaitanelaga anamamuharaye kumi na ambinli vokala nnga ha vale, liye awandelaga eraga: <<Kavuruwanani pama! Ulrendola eni hiyo nnadowa Jeruzalemu, wewo unafuna ireya jatene jalrembile anamafiyiheda zela Mwana wa Mutu.

³² Tchoira Mwana wa Mutu unovahediwa mmandani mwa atu ohokala aJudewu, aliwa anomululuviha, anomuruwana, anomutapela mare,

³³ anomuwaxula, amala kampe. Mbwenye aliwa kagamanle mpa, siku naneraru, unovenya mokwani.>>

³⁴ Anamamuharaye mbwenye tchaonenlremo jawongile Yesu. Yotapulela ya mazwale yaligi yengo yokoyeya. Aliwa tchawanda onelramo jawongaga liye jile.

Vulumutchiwa wa mulombwana mmohi ohoona

³⁵ Yesu awandamelaga sidadi ya Jeriko, ohokalawo mulombwana mmohi ohoona agaratilege mmambalo mwa ndila, avepaga kobiri.

³⁶ Liye agavwile anamwindji kaviraga, ohofukedaga zela jaireya.

³⁷ Evale kohomuwandelaga keraga: <<Yesu wa Nazareti unavira.>>

³⁸ Liye agavwile enne, ohoromaga muitana eraga: <<Yesu mwana Davi, mudiwendele tangaranga!>>

³⁹ Atu kaligi sogolro wa Yesu, komusumululaga ira amiyale. Liye mbwenye kawandaga miyaliheya. Okuwagave eraga: <<Mwana Davi, kadiwendeleni tangaranga miyo vano!>>

⁴⁰ Yesu agavwile enne ohoimelaga, liye ira: <<Kamuzenani uno mutu unadiitana uyo.>> Evale liye agafiyile valigi Yesu vale, Yesu ohonfuka, liye ira:

⁴¹ <<Kodi weyo unafuna ira miyo duirele nni?>> Liye ohorumelaga, liye ira: <<Nabwiya, miyo nnafuna dionege!>>

⁴² Evale Yesu ohomuwandela eraga: <<Kaonaga! Weyo eni uhuvulumuwa na mwasa wa nroromelo nawo.>>

⁴³ Yesu agawongile enne, tempu imohive yenne mutule ohoromaga ona eto ohoromaga mutitimiha Mulugu, liye muharaga Yesu. Atu atene kaonile jatene ejile kohoromaga mutamalela Mulugu.