Lukaji 17 - Mazu Otchena a Mulungu

Jofundjiha jimohi jiwa ja Yesu

¹ Yesu ohawandelaga anamamuharaye eraga: <<Jengo jofuna ira jaategihege atu jineregeve za. Mbwenye udilu wa mutu wenno unafuna ziha jengo jejo jinafuna mutegiha nfwaye.

² Yali yapama amangeleliwe nibwe nlukulu munikohini mwaye, adowe atatileliwe mbara, akwele emo, hiyaniha no kana mulandu omutegiha mwana mmohi mwa ahima ala.

³ <<Muviing'ane pama jinera nyo! Mbalawo autegela, umusumulule. Eto liye atwaruwa, umukurumuwele.

⁴ Liye autegela weyo siku nimohi fendo tanu na mbinli eto va kada tega azaga wa weyo awonga ira: <Dihitwaruwa. Mudikurumuwele.> ante fendo tanu na mbinli, inafwanela umukurumuwele.>>

⁵ Evale anamarumiwaye kohowongaga na Nabwiya keraga: <<Muniwendjede nroromelo nihu.>>

⁶ Evale Nabwiya ohawakulaga, liye ira: <<Ahakanlege nnga nroromelo ninyu nifiya nnga ulukula wa mbewu imohi ya mostarda, nyo mwerege wonga na mutengo wa amore ula ira: <Kaduleya na mitchitchi dene udowe wazaleye mwiko!> Eto nyo mwawonga eno, mutengole erege uvwelelani.>>

⁷ <<Kodi bani muwari mwa nyo unakana namalaba waye alabaga munda, nari akumbuzaga mabila, aweruwaga amuwandela ira: <Kabaranya uze ugarati udje.>?

⁸ Kalivo mutu unaira eno. Mbwenye mofutukula, namalabole aweruwaga, munamuwongana ira: <Kapiya jantari, uware jengo japama, uze udigawele jodja ira miyo didje, ding'we. Miyo dagamanle, weyo mbwenye podi roma dja no ng'wa.>

⁹ Eto namalabole agamanle irana jatene jejile, patarawu waye ule kanamutamalela moira uhuvwelela jamurumile liye, nari.

¹⁰ Mwa eno, na nyenne mwamala irana jatene jejo jiwandeliwe nyo, muwongege ira: <Hiyo nili anamalaba ohokana mabasa. So nnakwakwaneliheda jejo jinawandeliwa hiyo ira niirena.> >>

Vulumutchiwa wa aliba maranya kumi

¹¹ Yesu adowagave muulrendoni mwaye oya Jeruzalemu, ohoviraga madilre a Samariya na Galileya.

¹² Evale afiyaga tatamo imohi eni, atu kumi okana maranya kohozaga ira kagumane na liye. Evale aliwa kohoimelaga olapela wene,

¹³ aliwa roma kuwa keraga: <<Yesu, Namafundjiha, kaniwendeleni tangaranga hiyo vano.>>

¹⁴ Evale Yesu agaaonne aliwa, ohowongaga eraga: <<Dowani wa anamakuta ira aliwa kauoneni.>> Yesu agawongile enne, aliwa kadowaga mundila, kohovulumuwaga.

^15-16 Muwari mwa aliba vulumuwa ale, ohokalavo mmohi ali muSamariya. Liye mbwenye agaonne ira: <<Dihivulumuwa>>, ohowelaga amutitimihaga Mulugu mokuwa, liye dowa kokora vamanyaloni va Yesu afiyihaga kove yaye vati, amutamalelaga zela yenno yamuirele liye.

¹⁷ Evale Yesu ohonfukaga muSamariya ule, liye ira: <<Nyo aliba vulumuwa mwali kumi. Nnga amohiwa atanu na annayi kali waani?

¹⁸ Nnga mwasiwa gwa nni mutu oza okumela Samariya ula liye wela mutitimihaga Mulugu ekave?>>

¹⁹ Evale Yesu ohomuwandelaga mulombwanole, liye ira: <<Venya udowege. Weyo uhuvulumuwa na mwasa wa nroromelo nawo.>>

Mazelo a Umwene wa Mulugu

²⁰ Kohokalawo aFarizewu kanfukile Yesu ira: <<Kodi Umwene wa Mulugu unaza alini?>> Evale Yesu ohawakula eraga: <<Umwene wa Mulugu kunaza muwari mooneya na meso.

²¹ Kalivo mutu unafuna wonga ira: <Kaing'anani, Umwene wa Mulugu ula>, nari: <Kaing'anani, Umwene wa Mulugu ule.> Mwasiwa Umwene wa Mulugu unafwanyeya muwari mwa nyo.>>

²² Evale ohawandelaga anamamuharaye eraga: <<Anoza kafiye malambo munafunege nyo nnga muone siku na Mwana wa Mutu nagafiyile. Mbwenye malambo anne kiza iireya.

²³ Tchoira atu amohiwa anerege za kauwandelegeni keraga: <Kaing'anani Mwana wa Mutu ula!>, nari: <Kaing'anani, Mwana wa Mutu ule!> Mbwenye nyo mwavwa mazu anno, kamwaahare ira mudowe mwanvende vili liye.

²⁴ Tchoira siku nnafuna za Mwana wa Mutu, jinaza jiireye nnga jerima wa muzongwe wakumelaga ilambo ya zulu umoneyaga ilambo ya vati.

²⁵ Mbwenye jatene ejo jahanaireye, inafwanela Mwana wa Mutu ababihe lramwisiwa na atu a tempu ili hiyo ila eto aonihiwe goyi.

²⁶ <<Jinafuna ireya Mwana wa Mutu ahanaze jinakala nnga jaireyile tempu ya Nowe.

²⁷ Tempu ya Nowe, atene kodja no ng'wa, alombwana na ahiyana kotelana fiyeda siku Nowe avolowile liye mmwadeyani. Nowe agavolowile, wohoza mahindje madjindji, mala apa atu atene.

²⁸ <<Eto kalaga nnga jaireyile tempu ya Lroti. Atu atene kodja, kong'wa, kogula, koguliha, kozaletcha, komangetcha nyumba diwa.

²⁹ Mbwenye siku nakumilemo mulombwana Lroti muSodoma mule, zulu wohorumbwaga munlo na mabwe ohinda, mala apa atu atene.

³⁰ Siku nnafuna za oneyihiwa Mwana wa Mutu jinaza jiireye eno.

³¹ Siku neno nafiya, mutu wenno unakale vazulu va nyumba vaye eto aganna jaye mmba mwaye, atite mobaranya atawe eto kadowe mmba ira adowe atukule jaye. Eto mutu wenno unakale minda kawelele vande.

³² <<Muumbuwele zela mwadi Lroti.

³³ Mutu wenno ahanarumele zuzumiha ingumi yaye, unoyelela ingumi ya ibaribari, mbwenye wenno unarumele zuzumiha ingumi yaye, unokana ingumi ya ibaribari.

³⁴ Miyo nnouwandelani ira mahiyu anne, atu ambinli anoza kagonanti vakamani vamohive, mutu mmohi atukuliwevo, mmohiwa ahiyiwe vevo.

³⁵ Ahiyana ambinli anoza katchilege vatchiloni vamohi, mbwenye mmohi unoza atukuliwevo, mmohiwa unoza ahiyiwe.

³⁶ Siku neno alombwana ambinli anoza kalabege mmindani vamohi, mmohi atukuliwe, mmohiwa ahiyiwe.>>

³⁷ Evale anamamuharaye kohonfukaga keraga: <<Nabwiya jejo jinaza jiireye uvi?>> Evale liye ohawakula, liye ira: <<Wewo unakale mutembo wa mutu okwa, ku wewo unafuna za gumana makuvi.>>