Lukaji 16 - Mazu Otchena a Mulungu

Jowelruza johiyana hiyana ja Yesu

¹ Yesu ohowonga na anamamuharaye eraga: <<Ohokalawo mulombwana mmohi orayela anna musogolrelri waye asogolrelra jorayela jaye. Kohokalawo atu amohiwa kavenyile kadowa wa patarawu ule, aliwa muwandelaga ira: <Namasogolrelrawo ule unanonga jorayela jawo.>

² Patarawule agavwile enne, ohomuitana namasogolrelra ule, liye nfuka kwi: <Katchiye, miyo nnovwa atu kawongaga jengo jidjindji zela nkani wawo. Miyo nnafuna udiwelihede jatene jene duhiyedile miyo, eni weyo kuma peno dowa sogolro kunawelela wendiha akoka jaga, mwasiwa kuli namasogolrelra ofwanela.>

³ Evale namasogolrelra ule agavwile mazu anne, ahanawongemo na patarawu zela jatene jahiyediwe liye, ohoumbuwelaga mmirimani mwaye eraga: <Eva eni patarawu unadilanya. Unafuna aditamangihe. Nnga miyo nnafuna dire avi? Miyo kadinna kopolo dolima mmindani eto ira divepe kobiri, nnonyaswa.

⁴ Aa! Dihiiziwa inafuna miyo iravo, ira datamangihiwa vamabasani vaga nnalaba miyo, vasogolro atu kadiwatchele ira dikale mmavande mwiwa.>

⁵ Evale liye ohaitanihaga atu atene kanfiyarile patarawaye ule. Agaaitanihile, ohoromaga nfuka mutu mmohi mmohi eraga: <Katchiye, weyo unfiyarile avi patarawu?>

⁶ Evale mutu oroma ohorumelaga eraga: <Miyo difiyarile mino 100 da azeti.> Namasogolrelra ule ohowongaga eraga: <Ugarati veva, ulrembe vakadernoni va mino 50. Miyo nnoasinari.>

⁷ Noira enne, ohonfukaga wanembinli, liye ira: <Katchiye, weyo ufiyarile avi?> Liye ohowakula ira: <Miyo difiyarile masakwi 100 a tirigu.> Evale namasogolrelra ule ohomuwandela ira: <Ulrembe vakadernoni va masakwi 80. Miyo nnoasinari.>

⁸ Noira enne, patarawu agavwile jaira namasogolrelra onamole, ohomutamalela namasogolrelra ule na mwasa oxanga waye.>> Evale Yesu ohowongagave eraga: <<Ahima a mwilamboni kohosimbwa xanga mmalrondani mwewa na afwiwa hiyaniha na ahima a muwareyani.

⁹ Miyo nnouwandelani ira inafwanela mulabena rayela wenyu wa mwilamboni ya vati ira muwande akana afwinyu ira ora inafuna kobirinyu utawani, aliwa kaze kauwatcheleni ilambo ya mukalakala.>>

¹⁰ <<Mutu wenne uli ororomeleya mwa jengo jing'ining'ini, gwenno unafwanyeya agali ororomeleya na jengo jilukulu. Eto mutu wenne ahali ororomeleya mwa jengo jing'ining'ini, liye kahi mutu ororomeleya na jengo jilukulu.

¹¹ Muwari mwa eno nyo mwahakale atu ororomeleya zela rayela wa vang'ono wa mwilamboni motakala muno, unafuna uvahani mabasa oing'anela jorayela ja ibaribari bani?

¹² Eto nyo akala kamuli ororomeleya zela jengo ja afwinyu, unafuna za uvahani jenyu bani?

¹³ <<Kalivo muzari unawanda alaba ambwiye ambinli. Mmohi unerege muvwelela, muziveliwaga. Eto mmohiwole unerege muida, mpetaga. Kavali jowandeya eto ira mutu awande muhara Mulugu na ja kobiri tempu imohive.>>

¹⁴ Yesu agamanle wonga enne, aFarizewu kafwanyeyaga evale, voira aliwa vakala atu koziveliwa kobiri bure, kohoroma mpeta Yesu.

¹⁵ Evale Yesu ohowongaga kwi: <<Nyo muli atu ovikaliha pama vamentoni va atu. Mbwenye Mulugu umala iziwa jili mmirimani mwinyu. Tchoira yengo yenno inateteliwa na atu mwilamboni, vamentoni va Mulugu tchi yengo yotakaletchetcha.

¹⁶ <<Malamulo a Mozeji na jofundjiha ja anamafiyiheda jilabile fiyeda ante tempu ya Juwawu Mbatizi. Mbwenye roma tempu ya Juwawu ante peno, Muselu Wapama zela Umwene wa Mulugu unnana laleyiwa. Kada mutu unavilimbiheda ira awande volowa.

¹⁷ <<Ili yengo yohorutcha ira ilambo ya zulu na ya vati jimale hiyaniha no kumavo yolremba ing'onong'onove inafwanyeya mmalamuloni.

¹⁸ <<Mulombwana amwalana na muhiyanaye adowa amutela muhiyana mmohiwa, unararuwa. Eto mutu wenno unamutele muhiyana umwalanile na mamunaye, unararuwa.>>

Maliba rayela mmohi na mulombwana Lazaro

¹⁹ Yesu ohowongagave eraga: <<Ohokalawo mulombwana mmohi orayela, awaretcha jowara jokwima, ja usalru wapama wa kore ya musuzu wa bwanda eto malambo matene osakanyetcha pwando dilukulu vande vaye.

²⁰ Ohokalawo eto mulombwana mmohiwa osimela aitaniwa Lazaro, anna jilonda maningo aye matene. Mwa enne atu kohomuhiya va mulango, vande va mutu orayela vale.

²¹ Lazaro ofunafuna nnga adje jinyenyeri jamorela mutchindo mwa meza vande va mulombwana orayela evale. Mwa enne anambwa koza, aliwa munyangulraga jilonda janna liye jile.

²² <<Noira enne, maliba simela Lazaro ule ohokwa. Agakwile, angelro kohomutukula, aliwa mudowana wewo wafwanyeya Abarahamu. Eto vagamanle malambo a vang'ono, mulombwana orayela ule na liyene ohokwa, liye koyiwa.

²³ Liye mbwenye agakwile, ohoroma ona goyi dilukulu, mwasiwa liye adowiwena Nimburo na Anokwa eto nimburo niwa nagali na goyi. Evale mulombwana orayela ule, againg'anne kombela ya ule olapela wene, ohomuonaga Abarahamu agali vamohi na Lazaro.

²⁴ Evale liye ohokuwaga eraga: <Babani Abarahamu, kadiwendeleni tangaranga miyo vano! Mmurume Lazaro anyetihe magomo wa ibuno yaye na mahindje, aze adondihede vanlumini vaga ira dione inonono vang'ono, mwasiwa dihikana goyi munloni uli miyo uno.>

²⁵ Mbwenye Abarahamu ohomuwakulaga eraga: <Mwanaga, uumbuwele ira wagali mungumi wohotambilra jengo japama. Eto mulombwana Lazaro awatchenle simela. Mbwenye peno va liye unnana hagalala uno, weyo unna goyi.

²⁶ Eto hiya jatene ejo, vari va weyo na hiyo viheliwa vodiha valukulu ira ule unafuna kuma uno dowa wewo ahawande eto ule unafuna kuma wewo za uli hiyo uno ahawande.>

²⁷ <<Noira eno, maliba rayela ule ohokalelagave ntindi awongaga eraga: <Babani Abarahamu, miyo nnouvepani ira mmurume mulombwana Lazaro adowe vande va ababaga,

²⁸ mwasiwa miyo dahakana adibilaga atanu. Mmurume adowe aawandele ira aliwa kakwa, kahaze nimburo nnafwanyeya miyo dizuzumaga ni.>

²⁹ Abarahamu mbwenye ohomuwakulaga eraga: <Adibilawo kohokana jolremba ja Mozeji na ja anamafiyiheda ira kawandeliwe. So inafwanela aliwa kavuruwanege jejo.>

³⁰ Evale mulombwanole ohokalelagave ntindi eraga: <Nari, babani Abarahamu! Akalavo mutu mmohi uvenyile mokwani adowa awonga na aliwa, anotwaruwa.>

³¹ Abarahamu mbwenye ohomuwakulaga eraga: <Aliwa kahafune vwa jolremba ja Mozeji nne ja anamafiyiheda, masiki mutu okwa avenye adowe awonge na aliwa, kinawandeya.> >>